སྐྱིད་ཉལ་བྱས་ནས་ནང་དུ་བསྡད་པའི་ཉིན་མོ།

འཕྲེད་འཕྱངས་དྲྭ་ཐག་ཐོག་ཏུ་ཉི་འདེ་བྱེད་བཞིན་པ།

ཞོགས་འདོན་རྣམས་ཚར་བར་བྱས་ཤིང་དེ་རིང་གི་གནམ་གཤིས་དེ་ཧ་ཅང་བཟང་བས་ཞོགས་ཟས་ཚར་རྗེས་ཆུ་དྲོད་འཇམ་གྱི་འགྱིག་གཞོང་ནང་དུ་ཉལ་བས་ཧ་ཅང་སྐྱིད་པོ་བྱུང་། མི་ཚེ་འདི་གཅིག་པུར་བསམ་བློ་གཏང་མཁན་ཞིག་ཡིན་ན་དབང་པོའི་སྒོ་ལྔའི་འདོད་ཡོན་ལ་ཚོད་འཛིན་གྱི་སྒོ་ནས་ལོངས་སྤྱད་ནས་རང་གི་ཆེད་དུ་སྡིག་ལས་སུ་མ་འདྲེས་པར་མི་ཚེ་འདིར་བག་ཕེབས་པོའི་སྒོ་ནས་བསྐྱལ་ཐུབ་ནའང་དེ་བས་འཚེངས་བསམ་ནས་ཆུ་དྲོད་མཇམ་ནང་དུ་སྐྱིད་ཉལ་སྐར་མ་སུམ་བཅུ་ཙམ་བྱས། འགྱིག་གཞོང་གི་ཟུར་དུ་གློག་གི་མཐེབ་གནོན་མནན་ན་ནང་ནས་ཆུ་རྣམས་རང་ཤུགས་ཀྱིས་འཕགས་ནས་རྒྱབ་དང་སྒལ་པ་སོགས་ལ་མཉེ་འཕུར་བྱེད་པ་འདི་ཡི་ཚོར་བ་བདེ་བ་ནི་ཧ་ཅང་སྐྱིད་པ་ལ་བཤད་མ་ཤེས་པ་ཞིག་རེད།  དེ་ནས་ཡར་ལངས་ནས་གཟུགས་པོར་ཆུ་གཤལ་ཐེངས་གཅིག་བྱས་ནས་ཉི་རའི་བར་གསེང་ནང་དུ་འཕྲེད་འཕྱངས་ཐག་སྡང་གི་ཐོག་ཏུ་བར་སྣང་དུ་ཉི་འོད་ཞབས་སུ་སྐྱིད་ཉལ་ཆུ་ཚོད་གཅིག་ཙམ་རིང་བྱས་པས་དེ་རིང་ནི་བན་རྒན་ལུང་པ་འདིར་སླེབས་ནས་སྐྱིད་པའི་ཚད་ལ་འགྲན་ཟླ་མེད་པ་ཞིག་བྱུང་། ཉིན་གུང་ཟ་མ་རུ་བྱ་ཤའི་ཐུག་པ་ཞིག་འཐུང་ནས་འཛམ་གླིང་གི་སྒེའུ་ཁུང་ནང་རྒྱངས་ལྟ་ཞིག་བྱས་པས་༧གོང་ས་སྐྱབས་མགོན་ཆེན་པོ་མཆོག་ནས་ལ་དྭགས་སུ་བོད་པ་རྣམས་བཀའ་སློབ་ཞིག་གི་སྐབས་སུ་འདི་ལྟར་གསུངས་འདུག 
ང་ཚོའི་བོད་རིགས་ནང་ནས་ཞེན་ཁོག་དང་ཤ་ཚ་ཡིན་ཀྱང་ཁ་ཤས་ཤིག་གིས་ད་བོད་གཞུང་བསྡུ་གསོག་བརྒྱབ་སོང། འགྲིག་གི་མི་འདུག་ཅེས་སྐད་རྒྱག་མཁན་བྱུང་བ་དེ་ལ་ང་རང་ཏོག་ཙམ་བློ་ཕམ་བྱུང།  ངས་ལོ་བཅུ་དྲུག་ནས་བོད་གཞུང་གི་འགན་འཁྱེར་བ་ཡིན། ལོ་བཅུ་དྲུག་ནས་ད་ཆ་ལོ་བདུན་ཅུ་དོན་དྲུག་ལ་སླེབས་པའི་བར་ངས་འགན་འཁྱེར་བ་ཡིན། མི་ལྟ་བུར་མཚོན་ན་ཕྲུ་གུ་ཆུང་ཆུང་གཡས་སྐྱོར་གཡོན་སྐྱོར་བྱེད་མཁན་ཞིག་མགོ་འདོན་འཚོ་སྐྱོང་བྱས་པ་ཡིན། དེ་འདྲ་བྱེད་མཁན་གྱི་མི་གཅིག་ལ་ད་ཆ་བོད་གཞུང་བསྡུ་གསོག་བརྒྱབ་སོང་བརྗོད་ན་ལ་དག་གི་རེད་དམ། ལོ་དྲུག་ཅུའི་རིང་ངས་ཕར་གཡས་སྐྱོར་གཡོན་སྐྱོར་གྱི་ལྟ་རྟོག་བྱས་པ་དེ་ཇི་ལྟར་བྱས་ཏེ་བསྡུ་གསོག་རྒྱག་གི་རེད་དམ། དེ་ཙམ་ཡང་བསམ་བློ་མ་འཁོར་བར་བོད་གཞུང་བསྡུ་གསོག་བརྒྱབ་སོང་ཞེས་སྐད་ཅོར་རྒྱག་དུས་དེ་ནི་ང་ལ་ཡིད་ཆེས་མེད་པའི་རྟགས་རེད་བསམ་པ་དྲན་བྱུང། ཚུར་ཡིད་ཆེས་མེད་ན་དེ་ལ་བྱེད་རྒྱུ་གང་ཡང་མི་འདུག ཡིད་ཆེས་ཡོད་ན་ལོ་བཅུ་དྲུག་ནས་འགན་འཁྱེར་མཁན་གྱི་༸རྒྱལ་བ་རིན་པོ་ཆེས་བོད་གཞུང་བསྡུ་གསོག་རྒྱག་གི་མ་རེད། དེ་ལ་དགོས་པ་རྒྱུ་མཚན་ཞིག་ཡོད་ཀྱི་རེད་བསམ་དྲན་དགོས་པ་ཡིན། ཤེས་སོང་ངམ། 

གསུང་འདི་མཐོང་བ་དང་མཉམ་དུ་སེམས་ལ་སྐྱོ་གདུང་འདྲེས་མས་མིག་ཆུ་རྡོག་མ་ཁ་ཤས་རང་དབང་མེད་པར་ཤོར་སོང་། ད་ཡིན་ན་དེང་སང་བོད་པ་རེ་ཟུང་གི་ཁོག་ཏུ་བསམ་བཞིན་དུ་གཟུགས་ཅན་གནོད་བྱེད་སྡང་བའི་དགྲ་བོ་རྒྱ་དམར་དང་། གཟུགས་མེད་དམ་སྲིའི་དོལ་ཚོགས་ཁོག་ཏུ་ཞུགས་པར་བསམ་ནས་གཞིས་ལུས་བོད་རིགས་སྤུན་ཟླ་རྣམས་ཀྱི་སེམས་ཤུགས་དང་ལྷག་བསམ་སོགས་དྲན་ནས་སེམས་ཁུང་ནས་གཅོས་མིན་གྱི་སྙིང་རྗེ་འདྲ་ཞིག་སྐྱེས་བྱུང་།

དེ་ནས་ཉིན་གུང་རྒྱབ་ཏུ་འཕྲོད་བསྟེན་གྱི་ཆེད་དུ་རྐང་འགྲོས་ཀྱིས་རྒྱ་མཚོའི་འགྲམ་དུ་ཆུ་ཚོད་གཅིག་ལྷག་སོང་ནས་ནང་དུ་འབྱོར་ཞིང་དགོང་ཟས་སུ་ཁ་སང་གི་མོག་མོག་ལྷག་འཕྲོ་དེ་ཟོས་ནས་ཉལ་སར་སོང་ནས་གཉིད་དུ་ཡུར།