གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ།

ངོས་ཀྱི་གྲོགས་པོ་ལུས་རྩལ་དགེ་རྒན་དང་མཉམ་དུ། 

ཞོགས་པ་ཆུ་ཚོད་བདུན་པའི་སྐབས་སུ་ནས་ལངས་ཏེ་ངོས་ཀྱི་ཁ་འདོན་རྣམས་ཚར་བར་བྱས་ཤིང་ཐབ་ཚང་ནང་དུ་སོང་ནས་ཞོགས་ཟས་ལ་རོལ། སྔར་ཉིན་ནས་དུས་ཆད་བྱས་པ་ནང་བཞིན་ངོས་ཀྱི་དགེ་ཕྲུག་ཀེའི་ཐེའི་ཡི་ཕ་རྒན་ནད་བབས་ལྗི་བས་ངོས་ཐུག་འཕྲད་ལ་འགྲོ་རྒྱུ་བྱས་པ་དེ་ཡིན། ཆུ་ཚོད་དགུ་པའི་སྐབས་སུ་ཀེའི་ཐེའི་སླེབས་བྱུང་བས་ངོས་གཉིས་ཤར་རྒྱག་ཁོ་རང་གི་ཕ་རྒན་ནང་དུ་སོང་། ཁར་མེལ་ཝ་ལེའི་ཞེས་མི་ཚང་འབྱོར་ལྡན་བསྡད་སའི་ས་གནས་སུ་ཁང་པ་ཧ་ཅང་རྒྱ་ཆེན་པོ་ཞིག་གི་ནང་དུ་ཕ་རྒན་ལོ་གྲངས་བརྒྱད་བཅུ་གྱ་གཉིས་ཅན་རྒན་པོ་བྲོད་གོག་དང་གཟུགས་སྟོབས་སོགས་ཧ་ཅང་ཆེན་པོ་ཅན་ཞིག་ནས་རྐང་འཁོར་རྐུབས་སྟེགས་ཀྱི་ཐོག་ཏུ་བསྡད་ནས་གསར་ཤོག་ཀློག་བཞིན་འདུག་པ་དེ་ནི་ཁེའི་ཐེའི་ཕ་རྒན་རེད་འདུག ངོས་ནས་ལུང་པ་འདི་ཡི་འགྲོ་སྟངས་ལྟར་དུ་ལག་འཇུའི་ཞོར་དུ་ཁམས་འདྲི་དང་མིང་སོགས་ངོ་སྤྲོད་བྱས་ནས་ལྷོད་ལྷོད་ཀྱིས་ངོས་ཀྱི་དབྱིན་ཇི་ཆག་རོ་དེ་རྒྱབ་ནས་ཁ་བརྡ་བྱས་པས་མི་རྒན་ལོ་གྲངས་ཆེ་བ་དང་ནད་ཡུན་རིང་ཚོད་རིག་པ་ཧ་ཅང་གསལ་པོ་ཡོད་པ་མ་ཟད་སེམས་པ་སྐྱིད་མདོག་ཁ་བོ་མཚར་གཏམ་ལ་ཧ་ཅང་དགའ་བོ་ཅན་ཞིག་འདུག ཟུར་དུ་མ་རྒན་མགོ་དཀར་པོ་ཅན་ལྟས་ཚོད་ཁོ་རང་ལས་ཅུང་ཆུང་བ་ཡོད་པ་དེ་ནི་ཁོ་རང་གི་གཟའ་ཟླ་རེད་འདུག ཆུ་ཚོད་གཅིག་ཙམ་རིང་མི་རྒན་དང་མཉམ་དུ་བསྡད་ནས་ཁ་བརྡ་འདྲ་མིན་བྱས་ནས་དེ་ནས་ཁོ་རང་གི་འདོད་པ་ལྟར་དུ་ཐེའུ་ལན་ཟ་ཁང་ཞིག་ནང་དུ་ཉིན་གུང་ཟ་མ་བཟའ་རུ་སོང་ནས་ཟ་མ་འགྲངས་ཚད་ཟོས་ནས་ཉིན་རྒྱབ་ཆུ་ཚོད་གསུམ་པའི་སྐབས་སུ་ཆོས་ཚོགས་ཀྱི་ཚོགས་གཙོ་ཧར་ཌེའི་ནང་དུ་སོང་། འདི་ལོའི་ངོས་ཀྱི་མཛད་མཆར་ཁག་དང་། ཟླ་བ་རྗེས་མའི་སྤྱི་ཚེས་གསུམ་ཉིན་ས་གནས་གཞན་དག་ཞིག་ཏུ་ཆོས་བཤད་ལ་འགྲོ་དགོས་པས་དེའི་སྐོར་སྐད་ཆ་མདོར་བསྡུས་ཞིག་བྱས་ནས་ཆུ་ཚོད་དྲུག་པའི་སྔོན་ནས་མལ་གསོ་ཅུང་ཙམ་བྱས། དེ་ནས་ཆུ་ཚོད་ལྔ་དང་ཕྱེད་ཀའི་སྐབས་སུ་བདེ་ཆེན་ཞིང་སྒྲུབས་འཚོགས་ལ་སོང་བས་མི་གྲངས་ཉི་ཤུ་ཙམ་འདུག་པས་ཆོ་ག་མ་བཏོན་པའི་སྔོན་ནས་དེ་རིང་ཡང་སྐྱར་ངོས་ཀྱི་དབྱིན་ཇི་གོབ་ཏོ་རྒྱབ་ནས་ཀུན་སློང་བཅོས་སྟངས་སྐོར་མདོར་བསྡུས་ཞིག་བཤད། དེ་རིང་གི་ཆོ་ག་ཉིད་བོད་ཀྱི་སྒྲ་གདངས་ཐོག་འདུར་དབྱངས་ཀྱི་བཏོན་ཅིང་སྐབས་སྐབས་སུ་མེའི་གོའུ་ནས་མཛུབ་གནོན་སྒྲ་གདངས་སམ་ piano ཐོག་ནས་ཨ་མི་དྷེ་ཝའི་བསྙེན་དབྱངས་མི་མང་གི་སྐད་གདངས་དང་མཉམ་དུ་གཏང་བྱུང་བས་མི་མང་པོ་ཞིག་ནས་དགའ་ཉམས་ཀྱིས་ཁ་ནམ་མཁའ་རུ་གདངས་ནས་འདོན་པ་འདོན་བཞིན་མགོ་བོ་ལིང་ལིང་བྱེད་ཀྱི་འདུག དེ་ནས་ཆུ་ཚོད་དགུ་པའི་སྐབས་སུ་ཆོ་ག་རྣམས་ཚར་བར་བྱས་ཤིང་ཞོར་དུ་ཟུར་གཅར་དང་དམིགས་བསལ་དགོས་རིགས་རྣམས་ཀྱི་སོ་སོའི་འདོད་པ་ཇི་བཞིན་བསྐངས་ནས་ཕན་ཚུན་གྱེས་བྲལ་གྱི་ཕྱག་རྒྱ་དང་། ལག་གཡུགས་སོགས་བྱས་ནས་ཤར་རྒྱག་ནང་དུ་སོང་ཞིང་དེ་རིང་གི་ཉིན་ཐོ་མདོར་བསྡུས་ཞིག་གཏང་ནས་ནས་ཉལ་སར་སོང་ནས་གཉིད་དུ་ཡུར།   

བདེན་པ་བཞི་ཡི་ཆོས་བཤད་བྱས་པའི་ཉིན་མོ།

མཉམ་མེད་ཤཀྱའི་རྒྱལ་པོ་ཟས་གཙང་སྲས།

ད་ནུབ་གཉིད་གཏན་ནས་ཁུག་མ་སོང་གང་ཡིན་ཞེ་ན། ཉིན་གཉིས་སྔོན་ལོ་གསར་སྐབས་སུ་མི་མང་ནས་ཟས་རིགས་མི་འདྲ་བ་མང་པོ་ཞིག་ཁུར་འདུག་སྟབས་ངོས་ནས་ཕྲན་ཙམ་ཟོས་པས་ཟས་དུག་གྱུར་ནས་ཁ་སང་བྲོད་ཁོག་བདེ་བོ་གཏན་ནས་མི་འདུག་འོན་ཀྱང་སྣང་ཆུང་བྱས་ནས་ཆུ་ཚ་བོ་འདྲ་འཐུང་བ་ལས་དམིགས་བསལ་སྨན་སོགས་གང་ཡང་ཐབས་ཤེས་མ་བྱས་སྟབས་ད་ནུབ་ཆུ་ཚོད་དང་པོའི་སྐབས་སུ་ནས་ངོས་ཀྱི་བྲོད་གོག་ནང་ནས་འཛམ་གླིང་དམག་ཆེན་གཉིས་པའི་འཐབ་འཁྲུག་འདྲ་བྱས་ནས་གོག་གོག་དང་རྡིང་རྡིང་གི་སྒྲ་རྒྱུན་མི་ཆད་པ་ཞིག་གིས་རྐྱེན་གྱིས་མཐར་ཆབ་ཁང་ནང་དུ་ཐེངས་མ་ལྔ་ཙམ་འགྲོ་དགོས་བྱུང་སོང་། ཆབ་ཁང་ནང་ལ་སོང་ཚར་བའི་སྐབས་སུ་བྲོད་གོག་ནང་ནས་ན་ཟུག་ཧ་ཅང་ཆེན་པོ་གཏོང་གི་འདུག ད་ནང་ཞོགས་པ་ཆུ་ཚོད་བཞི་པའི་སྐབས་སུ་ལངས་ནས་ཆུ་ཚ་བོ་ཞིག་བཀོལ་ནས་འཐུང་ཞིང་ན་སྲན་འདྲ་བྱས་ནས་ནམ་མ་ལངས་བར་སྒུག་བསྡད་པ་ཡིན། ནམ་ལངས་པ་དང་མཉམ་དུ་ངོས་ཀྱི་དགེ་ཕྲུག་ཆོས་མིང་དུ་རིན་ཆེན་ཆོས་སྒྲོན་ནམ། ཡུལ་མིང་དུ་ཀིམ་ལ་སྨན་སློང་བས་སྨན་ནག་པོ་ཆག་པ་ཞིག་སྤྲད་བྱུང་ཞིང་ཆུ་ཚ་བོའི་ལྷན་དུ་ཟོས་པས་ཅུང་ཕན་པོ་བྱུང་། དེ་རིང་ངོས་ལ་སེམས་ཁྲལ་ཞིག་ཡོད་པ་དེ་ནི་ཟླ་གཅིག་སྔོན་ནས་གསར་ཤོག་སོགས་མང་པོའི་བརྒྱུད་ནས་ཁྱབ་བསྒྲགས་ཤུགས་ཆེར་བྱས་པའི་བདེན་པ་བཞི་ཡི་ཆོས་བཤད་རྒྱུ་ཞིག་ཡོད་པ་དེ་ཡིན། ད་ནུབ་བྲོད་གོག་གཤལ་ཐེངས་མང་དྲག་ནས་ཟས་རོ་དང་མ་ཟད་མཐར་ཁྲག་དང་བཅས་པ་གཤལ་ནས་ངོས་ཀྱི་བྲོད་གོག་ནང་དུ་ཟས་ཀྱི་དྲི་ཙམ་ཡང་མེད་པར་གྱུར་ནས་བྲོད་གོག་སྟོང་ལྷབ་བེ་འདྲ་ཞིག་རེད་འདུག དེ་ནས་ཨ་མ་ཀུན་བཟང་དབང་མོའམ་སུ་སིན་ལ་ཁ་པར་ཞིག་གཏང་ནས་འབྲས་ཐུག་བཀོལ་རོགས་ཟེར་བས་སུ་སིན་ནས་འབྲས་ཐུག་ཞིམ་པོ་བཀོལ་བྱུང་བས་དེ་འཐུང་ནས་ཀིམ་ནས་སྤྲད་པའི་སྨན་དེ་གང་མང་ཞིག་ཟོས་ནས་གཉིད་དུ་ཡུར་བས་ཅུང་ཕན་པོ་འདྲ་ཞིག་རེད་འདུག དེ་ནས་ཉིན་རྒྱབ་ཆུ་ཚོད་བཞི་པའི་སྐབས་སུ་ངོས་ཀྱི་སློབ་མ་ཆོས་མིང་དུ་ཀརྨ་བློ་བཟང་ངམ། ཡུལ་མིང་དུ་ཌོག་གེ་སླེབས་ནས་ཁོ་རང་ནས་ཀྱང་སྨན་དམིགས་བསལ་ཞིག་སྤྲད་བྱུང་བས་སྨན་ཟོས་ནས་ཆོས་བཤད་ས་རུ་སོང་བས་དེ་རིང་ནི་མི་མང་གིས་ཚོགས་ཁང་ཡོངས་སུ་ཁེངས་ནས་རྗེས་ནས་སླེབས་མཁན་རྣམས་ལ་རྐུབ་སྟེགས་མ་ཐོབ་པའི་དཀའ་ངལ་འདུག མི་གྲངས་དྲུག་བཅུ་ཙམ་གྱིས་ཚོགས་ཁང་ཡོངས་སུ་ཁེངས་སོང་། མི་མང་ཤོས་ནི་གསར་པ་ཤ་སྟག་རེད་འདུག དེ་རིང་ཆོས་ཐུན་བརྗོད་བྱ་བདེན་པ་བཞིའི་སྐོར་ཡིན་པས་སྔོན་འགྲོ་ཀུན་སློང་བཅོས་སྟངས་ནས་དངོས་བཞི་བདེན་པ་བཞི་བཅས་སྐད་བསྒྱུར་བརྒྱུད་ནས་འགྲེལ་བཤད་བྱས་པས་མི་མང་ནས་དགའ་བོ་བྱས་སོང་། དེ་ནས་དྲི་བ་དྲི་ལན་སོགས་སྐར་མ་ཁ་ཤས་བྱས་ནས་བསྔོ་བ་སྨོན་ལམ་སོགས་ཀྱིས་མཐའ་རྒྱན་ནས་དེ་རིང་གི་ཆོས་ཐུན་དེ་གནས་སྐབས་བཀྲ་ཤིས་བདེ་ལེགས་ཀྱིས་མཐའ་གྲུབ་སོང་། དགེ་སློབ་ཡོངས་དང་ལྷན་འདྲ་པར་སོགས་མཉམ་དུ་སྐྱོན་ནས་ཟུར་གཅར་སོགས་ལ་སྐད་ཆ་དང་ངོ་སྤྲོད་སོགས་བྱས་ནས་མཐར་ཕན་ཚུན་གྱེས་བྲལ་གྱིས་ཕྱག་རྒྱ་དང་། ལག་གཡུག་སོགས་ཅི་རིགས་བྱས་ཤིང་ངོས་ཀྱང་ནང་དུ་འབྱོར་ནས་དེ་རིང་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།

བོད་ཆུ་འབྲུག་ལོའི་གནམ་ལོ་གསར་བཞད་ཉིན་མོ།

མྱ་ངན་གྱི་ལོ་གསར་ཉིན་མོ་ངོས་ཀྱི་དགེ་ཕྲུག་རྣམས་དང་ལྷན།

ཞོགས་པ་སྔ་བོར་ལངས་ནས་སོ་གདོང་སོགས་བཀྲུ་གཤལ་གཙང་མ་བྱས་ནས་ཞོགས་འདོན་རྣམས་ཚར་བར་བྱས་ཤིང་འོག་ཤོད་ཐབ་ཚང་ནང་དུ་སོང་ནས་ཞོགས་ཟས་ལ་རོལ་བཞིན་པའི་སྐབས་སུ་སྔ་ན་མེད་པའི་དེ་རིང་ཁ་པར་གྱི་ཏིར་སྒྲ་རྒྱུན་ཆད་མེད་པ་ཞིག་ཡོད་པ་དེ་ནི་རྒྱ་གར་དང་། བལ་ཡུལ། བོད། དབྱིན་ལན་སོགས་འཛམ་གླིང་གང་སར་ངོས་ཀྱི་སྤུན་མཆེད་རྣམས་བྲམ་ཟེས་ཤ་ཁྲག་སྟོར་བ་ནང་བཞིན་གང་སར་ཁྱབ་ནས་ཡོད་པས་ཁོང་ཚོ་རེད་འདུག ཉིན་མོ་འདི་ནི་བོད་ཆུ་འབྲུག་ལོའི་གནམ་ལོ་གསར་བཞད་ཀྱི་ཉིན་མོ་ཞིག་ཡིན་སྟབས་ཁོང་ཚོའི་ང་ལ་ཁམས་འདྲི་དང་ལོ་གསར་བཀྲ་ཤིས་བདེ་ལེགས་ཀྱི་ཁ་གཡང་སྨོན་ཚིག་དེ་རེད།  
ལར་ནི་སྐལ་པ་ཡ་ཐོག་གོང་མར་༡༩༥༩ ལོའི་ཡར་སྔོན་བོད་རིགས་རྣམས་ལ་ཕྱི་དངོས་པོའི་དཔལ་འབྱོར་དང་། ཚན་དཔལ་རིགས་གསུམ་གྱིས་ཧ་ཅང་ཕྱུགས་པོ་ཞིག་མ་ཡིན་ཀྱང་ཟླུམ་གཟུགས་གོ་ལའི་སྒང་ནས་སེམས་ཀྱི་ཞི་བདེའི་རྒྱ་མཚོ་འཁྱིལ་སའི་རྒྱལ་ཁབ་གཅིག་ཞེས་འབོད་ཆོག་པར་སྣང་། སྐབས་དེ་དུས་བོད་རིགས་རྣམས་ཀྱིས་ལོ་གསར་གྱི་དུས་ཆེན་འདི་ལ་གལ་ཆེན་ཞིག་ཏུ་ངོས་འཛིན་བྱེད་ནས་སྲོལ་རྒྱུན་གྱི་ལུགས་སྲོལ་དང་མཐུན་པར་ཉིན་དང་པོར་སྔ་ནས་ལངས་ཞིང་ཕོ་མོའི་ཆས་གོས་དང་རྒྱན་ཆས་སོགས་འདོགས་ནས་ནང་མི་དང་ལྷན་དུ་དང་པོ་ཕྱེ་མར་དང་བཀྲ་ཤིས་པའི་འབྲས་སིལ་མར་ཁུའམ་གྲོ་མ་མར་ཁུ་སོགས་བཟའ་སྲོལ་ཡོད། དེ་ནས་རིམ་བཞིན་ནང་མི་རྣམས་ཀྱིས་རྒན་བཀུར་གཞོན་སྐྱོང་ངང་ནས་འཆམ་མཐུན་གྱིས་ནང་དུ་ཕན་ཚུན་གཏམ་གླེང་དང་ཤོ་རྒྱན་སོགས་བྱེད་ནས་ནང་དུ་འདུག་སྲོལ་ཡོད། ཉིན་གཉིས་པ་དང་གསུམ་པའི་སྐབས་སུ་རིམ་བཞིན་སོ་སོའི་ཉེ་འབྲེལ་དགའ་རོགས་སོགས་ལ་ལག་པ་སྟོང་པ་མ་ཡིན་པར་སོ་སོའི་འོས་ཚོད་དང་མཐུན་པར་མཚམས་གཏགས་སམ་རྔན་པ་ཁྱེར་ནས་ཕན་ཚུན་འགྲུལ་བཞུད་བྱེད་ཅིང་དགོན་པ་སོགས་ཀྱི་ནང་དུ་འགྲོ་ནས་ལྷ་གསང་གཏོང་བ་དང་རྟེན་ལ་མཆོད་པ་འབུལ་ཞིང་སོ་སོའི་རིགས་བདག་བླ་སྤྲུལ་རྣམས་ལ་ཁ་གཏགས་དང་འོས་བབས་དང་མཐུན་པའི་འབུལ་བ་བྱེད་ཅིང་། ལོ་གསར་གྱི་དུས་ཡུན་ཀྱང་ཡུལ་ལུང་སོ་སོའི་འགྲོས་དང་ཁོམ་ལོངས་དང་བསྟུན་ནས་མང་ན་ཉིན་ཞག་ཉི་ཤུ་ཙམ་དང་ཐ་ན་ཡང་ཉིན་གྲངས་གསུམ་ཙམ་རིང་ཡུལ་མི་གྲོང་ཁྱིམ་རྫོང་སྡེ་སོགས་ནས། རྟ་རྒྱུགས། བྲོ་རྡུང་། གླུ་ལེན། གར་འཁྲབ། མེ་འཕེན། ཤུགས་ངོམས། རྒྱུགས་ཤར། ཐག་འཐེན་སོགས་རྩེད་རིགས་མི་གཅིག་པ་སྣ་ཚོགས་ཀྱིས་གང་ལྟར་རྒན་པོ་ལོ་བརྒྱ་བཅུ་མན་ཆོད་དང་བྱིས་པ་ལོ་གསུམ་ཡན་ཆོད་ལ་ལོ་གསར་ཞེས་པའི་དུས་ཆེན་འདི་ཡི་སྐབས་སུ་ལྷ་ཡི་ཞིང་ཁམས་མི་ཡུལ་དུ་འཕོས་པ་ལྟ་བུའི་ཆེས་དགའ་སྐྱིད་ལྡན་པའི་ནམ་ཡང་བརྗེད་མེད་སྐྱིད་པའི་དུས་ཆེན་ཞིག་དང་མ་ཟད་བོད་ཀྱི་རིག་གཞུང་གི་ངོ་བོ་སྲུང་རྩི་བྱེད་པའི་དུས་སྟོན་ཀྱང་རྩ་ཆེ་ཤོས་ཞིག་ཀྱང་ཡིན། 
ཡིན་ནའང་བོད་མི་སྤྱི་མཐུན་གྱི་ལས་དང་བསོད་ནམས་སོགས་མར་ངོའི་ཟླ་བ་བཞིན་དུ་ཟད་པ་དང་། མ་ཟད་འབྱོར་བའི་ཐ་མ་རྒུད་ཞེས་པ་ལྟར་༡༩༥༩་ལོ་ནག་པོ་དེ་ནས་བཟུང་སྟེ་བོད་ས་ཡོངས་སུ་རྫོགས་པར་བསད་རྡུང་མནར་གཅོད་སོགས་དམྱལ་བ་མི་ཡུལ་དུ་འཕོས་པ་ལྟ་བུའི་མར་རིམ་བཞིན་ལོ་རེ་བཞིན་དུ་ད་བར་དུ་ཆེས་མྱ་ངན་དང་མུན་ནག་གི་ལོ་ཞིག་ཏུ་སྲུང་རྩི་བྱེད་དགོས་པ་བྱུང་ཡོད་པ་ནི་འདས་ཟིན་པའི་མི་ལོ་དྲུག་བཅུ་ལ་ཕྱི་མིག་ཞིག་བལྟས་ན་ད་གཟོད་གཞི་ནས་གསལ། ལྷག་པར་དུ་ཉིས་སྟོང་བརྒྱད་ལོའི་ས་བྱིའི་ཞི་རྒོལ་ཆེན་མོ་བྱུང་བ་ནས་བཟུང་སྟེ་ད་བར་འདས་པའི་མི་ལོ་བཞི་ལ་ལོ་གསར་ཞེས་སྐྱིད་པའི་དགའ་སྟོན་དེ་ཉིད་ཀྱང་སྡུག་བསྔལ་གྱི་ཉིན་མོ་དམིགས་བསལ་བ་ཞིག་ཏུ་འགྱུར་ནས་བོད་གཞི་བྱེས་གཉིས་ཀྱིས་ཆོས་ཕྱོགས་ཀྱི་སྲོལ་རྒྱུན་གྱི་མཆོད་གསོལ་སྨོན་ལམ་ཙམ་ལས་གཞས་སྣ་འཁྲབ་སྟོན་ཕར་ཞོག ལྷག་པར་འདི་ལོར་ཁ་སང་བཞུགས་སྒར་རྡ་རམ་ས་ནས་༧ གོང་ས་སྐྱབས་མགོན་ཆེན་པོ་མཆོག་དབུར་བཞུགས་ཐོག་བོད་གཞུང་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་བོད་གཞུང་དམངས་གཉིས་ནས་ཉིན་གཅིག་རིང་ཟས་བཅད་ངོ་རྒོལ་གནང་བ་མ་ཟད་འཛམ་གླིང་གང་སར་བོད་རིགས་ཡུར་གྱར་བ་རྣམས་ནས་༼མུན་ནག་གི་ལོ༽ཞེས་པ་དང་། ༼སྤུན་ཟླ་མེར་བསྲེགས་ཀྱི་ལོ་༽ ཞེས་པ་སོགས་སྒྱུ་རྩལ་རྣམ་པ་མི་འདྲ་བ་མང་པོའི་སྒོ་ནས་མྱ་ངན་གྱི་ལོ་གསར་ལ་སྲུང་རྩི་བྱས་ཡོད། 
ངོས་ནས་ཀྱང་གཟུགས་པོའི་ཚོད་དཀྱིལ་དཀྲུང་གི་དཔེ་ལྟར་སྔ་ནས་གྲ་བསྒྲིགས་བྱས་ཟིན་པ་ལྟར་ས་གནས་འདིར་བོད་རིགས་གསུམ་གཅིག་པུ་མ་གཏོགས་མེད་ཀྱང་ཉིན་རྒྱབ་ཆུ་ཚོད་གཉིས་པའི་ཐོག་ངོས་ཀྱི་དགེ་ཕྲུག་རྣམས་དང་ལྷན་དུ་འཛོམས་ནས་མི་གྲངས་ཉིན་ཤུ་རྩ་གྲངས་ཞིག་འདུག་པས་དང་པོ་གོང་ས་མཆོག་སྐུ་པར་རིན་པོ་ཆེར་མཇལ་དར་ཕུལ། དེ་ནས་ཉེ་ཆར་བོད་ནས་མེ་བསྲེགས་གཏང་བའི་གཞིས་ལུས་བོད་རིགས་སྤུན་ཟླ་རྣམས་ཀྱི་དཀའ་སྡུག་གི་ཆེད་དུ་ངག་བཅད་སྐར་མ་གཅིག་བྱས་ནས་མྱ་ངན་ཞུས་མཐར། ༼བདེན་ཚིག་སྨོན་ལམ་༽ཉིད་རྟ་དབྱངས་ཀྱིས་སྐྱོར། ངོས་ཀྱི་སྐད་བསྒྱུར་ནས་བདེན་ཚིག་སྨོན་ལམ་གྱི་ནང་དོན་འགྲེལ་བཤད་གནང་སོང་བས་མི་མང་པོ་ཞིག་ནས་མིག་ཆུ་གཏོང་བཞིན་འདུག དེ་ནས་ངོས་ཀྱི་དབྱིན་ཇི་གོབ་ཏོ་དེ་སྐྱོན་ནས་ངོ་ཚ་མེད་པར་ད་ལྟའི་བོད་ཀྱི་གནས་སྟངས་སྐོར་འགྲེལ་བཤད་ཐུང་ཙམ་བྱས་ནས་ཉེ་ཆར་བོད་རིགས་ཉི་ཤུ་རྩ་ལྔས་སྐུ་ལུས་མེར་བསྲེགས་གཏང་བའི་ཕྱེད་པར་དང་། ལོ་གྲངས་མིང་དང་བཅས་པ་ཚང་མ་མཉམ་དུ་ཡོད་པའི་card འམ་བྱང་བུ་ཞིག་བཟོས་ཡོད་པས་ཚང་མར་འགྲེམས་སྤེལ་བྱས། དེ་ནས་མེར་བསྲེགས་ཀྱི་འོག་ཏུ་རྒྱལ་གཅེས་འདས་པོ་འདས་མོ་དེ་རྣམས་ཀྱི་ཆེད་དུ། བདེ་ཆེན་ཞིང་སྒྲུབ་བསྡུས་པ་ཞིག་བཏོན་ནས་བསྔོ་སྨོན་སོགས་ཀྱི་མཐའ་རྒྱན་ནས་ཟུར་དུ་སོ་སོའི་ནང་ནས་ཁུར་ཡོང་བའི་ཟས་རིགས་སོགས་ལ་མཉམ་རོལ་བྱས་ནས་ཆུ་ཚོད་བཞི་པའི་སྐབས་སུ་འདི་ལོའི་མྱ་ངན་གྱི་ལོ་གསར་དེ་གནས་སྐབས་མཇུག་བསྒྲིལ། 
ངོས་ཀྱི་སློབ་མ་རྗེ་ཧྥུའི་ངོ་ཆེན་ལྟར་དུ་དེ་རིང་ཆུ་ཚོད་བདུན་པའི་སྐབས་སུ་ངོ་ཤེས་རྙིང་པ་ལུས་སྦྱོང་ངམ་ཡོ་གའི་དགེ་རྒན་ལྟས་ཚོད་ལ་རྒྱ་གར་འདྲ་བོ་ཨ་རི་བ་མི་རྒན་ཁ་སྤུ་ཅན་ཞིག་ཡོད་པ་དེ་ཡི་ཡོ་གའི་ལུས་རྩལ་ཁང་ལ་འགྲོ་རྒྱུ་ཁས་ལེན་བྱས་ནས་དེར་སོང། ཁོ་རང་ཚོའི་འདོད་པ་ལ་དེ་རིང་ཡོ་གའི་ལུས་རྩལ་ཁང་ནང་དུ་ངོས་ལ་ཨ་མི་དྷེ་ཝའི་བསྙེན་དབྱངས་དགོས་པ་དེ་རེད་འདུག ངོས་ནས་ཀྱང་དབྱིན་ཇི་ཆག་རོ་དེ་སྐྱོན་ནས་ཚང་མར་ཁམས་འདྲི་དང་སྦྲགས་ནས་དེ་རིང་བོད་ཀྱི་ལོ་གསར་གྱི་འགྲེལ་བཤད་ཐུང་ཙམ་ཞོར་དུ་ད་ལྟའི་བོད་ཀྱི་གནས་སྟངས་སྐོར་དང་ཆབས་གཅིག་ཏུ་འོད་དཔག་མེད་ཀྱི་ལོ་རྒྱུས་མདོར་བསྡུས་དང་ཕན་ཡོན་བཅས་མཐར་ཨ་མི་དྷེ་ཝའི་བསྙེན་དབྱངས་མེ་གོའི་མཛུབ་གནོན་སྒྲ་སྙན་ནམ་ piano གདངས་ཀྱི་རྟ་ལ་སྐྱོན་ནས་མཉམ་དུ་གཏང་བས་མི་མང་ཧ་ཅང་དགའ་བོ་བྱས་སོང་། དེ་ནས་ཕན་ཚུན་གྱེས་བྲལ་གྱི་འཐམ་འཁྱུད་དང་། ལག་འཆང་། ཕྱག་རྒྱ་སོགས་ཅི་རིགས་བྱས་ནས་སུ་སིན་ངེད་གཉིས་རླངས་འཁོར་གྱི་ཁ་མ་རི་ཎའི་ཕྱོགས་སུ་བསྒྱུར་ནས་རྩལ་ཆེན་གྱི་མདའ་འཕངས་པ་བཞིན་དུ་ནང་དུ་འབྱོར་བས་དེ་རིང་ལས་ཀ་མང་བའི་རྐྱེན་གྱིས་དཀའ་ལས་ཁ་ནས་ཤི་གྲབ་འདྲ་བྱེད་ཀྱི་འདུག་ཀྱང་ཨུ་ཚུགས་ཀྱིས་དེ་རིང་གི་ཉིན་ཐོ་དེ་མ་ཆད་ཙམ་ཞིག་གཏང་ནས་ཉལ་སར་སོང་ནས་གཉིད་དུ་ཡུར།  

གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ།

ཆུ་འགྲམ་ཞིག་ཏུ་ལྷོད་དལ་བྱས་ནས་བསྡད་བཞིན་པའི་སྐབས་སུ།

ཞོགས་པ་ལངས་ནས་འཆར་ཅན་གྱི་ཁ་འདོན་རྣམས་ཚར་བར་བྱས་ཤིང་ཐབ་ཚང་ནང་དུ་སོང་ནས་ཞོགས་ཟས་མདོར་བསྡུས་ཞིག་ལ་རོལ། དེ་རིང་གི་ཉིན་མོ་འདི་ནི་ཨ་རིའི་སྲིད་འཛིན་དུས་ཆེན་ཞིག་ཡིན། ཨ་རིའི་མི་རྣམས་ནི་ཉིན་ལྟར་ལས་ཀར་འགྲོ་ནས་ཕན་ཚུན་ལྷོད་ལྷོད་དུ་བསྡད་རྒྱུའི་གོ་སྐབས་ལྟ་ཅི་དབུགས་གཏང་ལེན་བྱེད་པ་ལའང་དུས་ཚོད་ལྷོད་ལྷོད་ཅིག་མི་རག་ཅིང་ཟ་མ་བཟའ་བའི་སྐབས་སུ་རླངས་འཁོར་ནང་ནས་བཟའ་བ་དང་འགྲོ་བཞིན་དུ་བཟའ་བ་སོགས་ཧ་ཅང་བྲེལ་ཟིང་ཆེ་བའི་ལུང་པ་འདིར་ཉིན་གཅིག་ལ་ལྷོད་དལ་དུ་བསྡད་རྒྱུ་ཡོད་པ་དེ་ནི་སྟེས་དབང་གིས་ཐོབ་པའི་གསེར་སྲང་སྟོང་གིས་མི་ཐོབ་པའི་གོ་སྐབས་བཟང་པོ་ཞིག་ཀྱང་རེད། ངོས་ལ་ལྟོས་ན་དེ་རིང་གི་ཉིན་མོ་འདི་ནི་ཡང་ཧ་ཅང་གལ་ཆེན་པོ་ཞིག་ཡིན། རྒྱུ་མཚན་གང་ཡིན་ཞེ་ན། ས་གནས་འདིར་ངོས་རང་འབྱོར་ནས་ཕལ་ཆེར་ལོ་གསུམ་ཙམ་ཕྱིན་ཀྱང་སླེབས་ནས་བཟུང་སྟེ་བདུན་ཕྲག་རེར་གནམ་ཆོས་འོད་དཔག་གི་ཆོ་ག་དེ་མི་མང་ན་བདུན་བཅུ་དང་བརྒྱད་བཅུ་ཉུང་ན་བཅུ་ལས་མེད་ཀྱང་ཆད་མེད་དུ་བྱས་པ་ཡིན་དེ་རིང་གི་ཉིན་མོ་འདི་ནི་གཟའ་ཟླ་བའི་འཆར་ཅན་གྱི་བདེ་ཆེན་ཞིང་སྒྲུབས་འཚོགས་པའི་བསྐལ་བཟང་གི་ཉིན་མོ་དེ་ཉིད་ཡིན། ཉིན་གུང་ཟ་མ་རུ་འབྲས་དང་རྡ་ལི་ཚོད་མ་བཅས་ཡོད་པའི་རྒྱ་གར་ཟ་མ་འདྲ་བོ་ཞིག་ཟོས་ནས་ཆུ་ཚོད་གཅིག་ཙམ་རིང་འཕྲོད་བསྟེན་ཆེད་དུ་རྐང་འགྲོས་བྱས་ནས་ནང་དུ་འབྱོར་ཞིང་ངལ་གསོ་ཕྲན་ཙམ་བྱས་ནས་ཉིན་རྒྱབ་ཆུ་ཚོད་ལྔ་པའི་སྐབས་སུ་བདེ་ཆེན་ཞིང་སྒྲུབས་འཚོགས་ལ་སོང་བས་མི་རྣམས་རིམ་བཞིན་འབྱོར་བྱུང་དེ་རིང་ཕལ་ཆེར་མི་གྲངས་ཉི་ཤུ་ཙམ་ཞིག་འདུག་པ་མ་ཟད་ཀོ་རི་ཡ་ངོས་ཀྱི་གྲོགས་པོ་གྲྭ་པ་ཞིག་ཡོད་པ་དེ་ཡང་ཕེབས་འདུག མེ་གོའི་ནས་མཛུབ་གནོན་སྒྲ་སྙན་ནམ་ piano བདེ་ཆེན་ཞིང་སྒྲུབས་འདོན་པའི་སྒྲ་གདངས་དང་མཉམ་དུ་གཏང་བྱུང་བས་མི་མང་རྣམས་ཀྱང་དགའ་བོ་བྱེད་ཀྱི་འདུག དེ་རིང་གི་འདོན་པ་བོད་ཀྱི་སྒྲ་གདངས་ཐོག་ནས་གཏོན་ཅིང་བར་མཚམས་སྐབས་སུ་དབྱིན་ཇིའི་ཐོག་ཏུ་ཕབས་པའི་རྒྱུ་མཚན་དེ་ཉིད་འདོན་བཅུགས། སྒོམ་གྱི་སྐབས་སུ་ངོས་ཀྱི་དབྱིན་ཇི་ཆག་རོ་དེ་ངོ་ཚ་མེད་པར་སྐྱོན་ནས་ཆོས་བཤད་ཁུལ་བྱས་ཀྱང་མང་པོ་ཞིག་ནས་ཧ་གོ་བའི་བརྡ་ཡིས་མགོ་བོ་ལིང་ལིང་བྱེད་ཀྱི་འདུག ལར་ནི་ལུང་པ་འདི་ཡི་མི་རྣམས་ལ་སྐད་བསྒྱུར་ཡག་པོ་ཞིག་བརྒྱུད་ནས་ཆོས་བཤད་པ་ལས་སོ་སོའི་ནམ་རྒྱུན་དགེ་རྒན་ང་འདྲ་བ་དབྱིན་ཇ་ཐེབ་ཆག་ལས་མི་ཤེས་པ་དེ་བསྐྱོན་ནས་ཆོས་བཤད་པ་ལ་དགའ་སྣང་ཆེ་བ་བྱེད་ཀྱི་འདུག དེ་ནས་ངོས་ལ་ཟུར་གཅར་དང་ཁ་བརྡ་བྱེད་མཁན་རྣམས་ཀྱི་ཐུགས་འདོད་ལྟར་སོ་སོའི་རེ་བ་ཇི་བཞིན་བསྐང་ནས་ཕན་ཚུན་གྱེས་བྲལ་གྱི་ཕྱག་རྒྱ་དང་། ལག་འཆང་། སོགས་བྱས་ནས་སུ་སིན་ངེད་གཉིས་ཀྱང་དེ་རིང་གི་ཆོས་ཐུན་དེ་ཡག་རབ་དང་བཟང་རབ་སོགས་རང་བསྟོད་ཀྱི་ཤུད་ཤོབ་ལུང་པ་གང་ཙམ་བསྒྲོགས་བཞིན་ནང་དུ་འབྱོར་ནས་དེ་རིང་གི་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།  

རྗེའུ་ཧྥུ་དང་མཉམ་དུ་དགོང་ཟས་ཟོས་པའི་ཉིན་མོ།

ཨ་རིའི་ཤ་མེད་ཟ་ཁང་ཞིག་ནང་དུ་དགོང་ཟས་སྐབས་སུ།

ཞོགས་པ་ཆུ་ཚོད་བདུན་པའི་སྐབས་སུ་ལངས་ནས་ངོས་ཀྱི་ཁ་འདོན་རྣམས་ཚར་བར་བྱས་ཤིང་ཚེ་ལས་འདས་མ་ཨ་ཕྱི་རྒན་མོ་དེ་ཉིད་ཀྱི་ཆེད་དུ་འོད་དཔག་མེད་ཀྱི་ཆོ་ག་ཚར་གསུམ་བཏོན་ནས་བསྔོ་སྨོན་སོགས་གང་དྲག་བྱས་ཤིང་འོག་ཤོད་ཐབ་ཚང་ནང་དུ་སོང་ནས་ཞོགས་ཟས་མདོར་བསྡུས་ལ་རོལ། དེ་ནས་གློ་ཁུག་ནང་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ངོས་ཀྱི་སྙིང་ནས་གཅེས་པའི་ཉི་ཧོང་ཨ་མ་རྒན་མོ་སུ་སིན་ནམ་ཆོས་མིང་དུ་ཀུན་བཟང་དབང་མོ་རེད་འདུག་མོ་རང་གི་བུ་ཁྱིམ་དུ་གཞིས་སྐོར་དུ་སླེབས་ནས་དེ་རིང་ཉིན་ཐ་མ་ཡིན་སྟབས་སུ་སིན་ནས་བུ་ད་ལྟ་ནང་ལ་འགྲོ་ཆེས་བྱེད་ཀྱི་འདུག་ཟེར་བ་དང་མཉམ་དུ་བུ་ནས་ཁ་པར་བླངས་ཤིང་ཁོང་ནས་གསུངས་ན་དེ་རིང་ཁོ་རང་ནང་དུ་ལོགས་དགོས་ཡོད་ལས་ཀའི་གུང་སང་ཉིན་གཉིས་ལས་མ་གཏོགས་མེད་ཁྱོད་རང་ཡག་པོ་བཞུགས་ཟེར་བས་ངོས་ཀྱི་བསྡད་སར་སུ་སིན་གི་ནང་ལ་སྐར་མ་གསུམ་ལས་མི་དགོས་སྟབས་ང་ད་ལྟ་ཁྱེད་རང་ལ་ཐུག་འཕྲད་ལ་ཡོང་གི་ཡིན་ཟེར་ནས་དེ་མ་ཐག་ཏུ་ཁྱིམ་མཚེས་སུ་སིན་གི་ནང་དུ་སོང་ནས་བོད་ཀྱི་ལུགས་སྲོལ་ལྟར་དུ་སྐེ་ལ་ཁ་གཏགས་ཞིག་བཀོན་ལག་ཏུ་ཁོ་རང་ནས་དད་མོས་བྱེད་ས་༧ གོང་ས་མཆོག་གི་སྐུ་པར་ཞིག་དང་ཉེ་ཆར་འབྲུག་ནས་གཏང་བའི་སྤོས་ཆག་ཞིག་བཅས་སྤྲད་པས་ཁོ་རང་ཧ་ཅང་དགའ་བོ་བྱུང་སོང་། དེ་ནས་ཁོང་མ་བུ་གསུམ་དང་སྐད་ཆ་རྒྱུན་རིང་བྱས་ནས་མཐར་ཁོ་རང་ཕེབས་སྐྱེལ་དུ་ཡུལ་ལུང་འདི་ཡི་ལུགས་སྲོལ་ལྟར་དུ་འཐམ་འཁྱུད་དང་ལག་གཡུགས་སོགས་ཅི་རིགས་བསྐྱེལ་བྱས་ཁོ་རང་ཡང་ལོ་གཅིག་ནང་ནས་མ་དང་སྤུན་མཆེད་ལ་འཕྲད་པ་ཐེངས་གཅིག་ཙམ་ཡིན་སྟབས་མ་ལ་བརྩེ་བའི་རྣམ་འགྱུར་གྱིས་འབྲལ་མི་ཕོད་པ་ལྟ་བུར་བྱེད་ཀྱི་འདུག སུ་སིན་ནི་ཕ་ཡུལ་ཉི་ཧོང་ནས་ཡིན་པའི་བུད་མེད་ཧ་ཅང་བསམ་བཟང་དང་མ་ཟད་ཆོས་ལ་དད་འདུན་ཆེན་པོ་ཡོད་མཁན་ཞིག་དང་ཁྱད་པར་དུ་ངོས་ལ་ར་གན་གསེར་རློམ་གྱི་འདུ་ཤེས་ཀྱིས་དད་ལྡན་ཆོས་མ་རྣམ་དག་ཞིག་ཡིན། མོ་རང་ཨ་རིར་སླེབས་ནས་ཕལ་ཆེར་མི་ལོ་ཧྲིལ་པོ་ལྔ་བཅུ་ཙམ་འགྲོ་སྐད་འདུག མོ་རང་ཆོ་ག་དེ་ཕ་ཡུལ་ཇོར་མན་ནས་ཡིན་པ་རེད་འདུག ཆོ་ག་གྲོང་ནས་ལོ་གྲངས་བཅུ་གསུམ་ཙམ་ཡིན་སྐད་འདུག མོ་རང་ལ་བུ་གཉིས་ཡོད་པ་བུ་ཆེ་བ་མོ་རང་མཉམ་དུ་བསྡད་ཡོད་པ་དང་ བུ་ཆུང་བ་ས་གནས་འདིར་རླངས་འཁོར་ཆུ་ཚོད་གསུམ་ཙམ་གྱི་སར་ཡོད་པ་རེད། སུ་སིན་མོ་རང་ད་ལོར་ལོ་གྲངས་བརྒྱད་བཅུ་གྱ་གཉིས་ཡིན་ཀྱང་ཕར་ལྟས་ཚོད་ལ་གོས་རྣམས་ཉིན་ལྟར་དུ་གཙང་མ་གྱོན་ཅིང་གཟུགས་པོའི་གཟོ་ལྟ་ལེགས་ཤིང་མོ་ལོ་དྲུག་བཅུ་ཙམ་གྱི་ལས་ཕྱིན་མེད་པ་འདྲ་བོ་ཞིག་ཡོད་པ་མ་ཟད་མོ་རང་རྒན་ཡོལ་ཞུས་ནས་ལོ་གྲངས་ཁ་ཤས་སུ་སོང་བས་ངོས་ས་གནས་གང་དུ་འགྲོ་དགོས་ཀྱང་རླངས་འཁོར་ཁ་ལོ་བ་ཡིན་པ་མ་ཟད་ང་ཚོའི་ཆོས་ཚོགས་ཀྱི་གཟའ་ཟླ་བའི་འཆར་ཅན་བདེ་ཆེན་ཞིང་སྒྲུབས་ཀྱི་མཆོད་དཔོན་ཀྱང་ཡིན། དེ་ནས་ཉིན་རྒྱབ་ཆུ་ཚོད་ལྔ་པའི་སྐབས་སུ་ངོས་ཀྱི་དགེ་ཕྲུག་རྗེ་ཧྥུ་ནས་སྔར་ཉིན་ནས་དགོང་ཟས་སུ་ཤ་མེད་ཨ་རིའི་ཟ་ཁང་ཞིག་ནང་འགྲོ་རྒྱུ་བྱས་ཡོད་སྟབས་སུ་སིན་ངེད་གཉིས་དེར་སོང་བས་ཟ་ཁང་ནང་ནས་གང་འདོད་ཟ་ཆོག་པའི་ཟས་རིགས་མང་པོའི་ནང་ནས་སོ་སོར་གང་དགའ་བདམས་ནས་དགོང་ཟས་འགྲང་ཚད་ཅིག་ཟོས་ནས་ནང་དུ་འབྱོར་ཞིང་འཛམ་གླིང་གི་སྒེའུ་ཁུངས་ནང་ནས་རྒྱངས་ལྟ་ཞིག་བྱས་པས་དེ་ནི་དེང་སང་བོད་འགུ་ལོག་གཙོར་བྱས་པའི་ས་གནས་མང་པོ་ཞིག་ནས་གྲྭ་བཙུན་མང་པོ་ཞིག་ནས་བོད་བསྟན་སྲིད་ཀྱི་ཆེད་དུ་གཟུགས་པོ་མེ་མཆོད་དུ་ཕུལ་བ་དེ་ལ་རྒྱ་གར་བོད་ཀྱི་གཞོན་ནུ་ཚོགས་པ་ནས་ལོ་སར་དུས་ཆེན་སྐབས་ནས་བཟུང་སྟེ་བོད་རང་བཙན་མ་ཐོབ་ཀྱི་བར་དུ་རྒྱ་ནག་དམར་པོའི་སྐར་ལྔའི་དར་ཆ་ཉིད་མེ་ལ་བསྲེགས་རྒྱུའི་ལས་འགུལ་སྤེལ་རྒྱུའི་གསར་བསྒྲགས་དེ་མཐོང་བ་དང་མཉམ་དུ་ངོས་ཀྱི་སེམས་ལ་མ་བདེ་བ་ཞིག་བྱུང་། གང་ཡིན་ཟེར་ན་གཅིག་ནི་ང་ཚོའི་དབུ་ཁྲིད་གོང་ས་མཆོག་གཙོར་བྱས་པའི་བོད་རིགས་ཡོངས་ནས་འཚེ་མེད་ཞི་བའི་ལས་འགུལ་ལ་འགྲོ་བཞིན་པ་རེད་ཐབས་ལམ་དེ་ཉིད་ཀྱིས་རྒྱུད་ནས་རྒྱལ་ཕྱི་ནང་མང་པོ་ཞིག་ནས་རྒྱབ་སྐྱོར་ཚད་ཇེ་མཐོར་འགྲོ་ཞིང་། མ་ཟད་རྒྱ་ནག་ནང་ཁུལ་རྒྱ་རིགས་ཤེས་ཡོན་ཅན་དང་རྒྱུ་རྩལ་བ་སོགས་མང་པོ་ཞིག་ཀྱང་ཉིན་རེ་བཞིན་དུ་བློ་སེམས་འགྱུར་བ་འགྲོ་ནས་བོད་ལ་རྒྱབ་སྐྱོར་བྱེད་བཞིན་པ་འདིའང་དེ་ཡི་བཀའ་དྲིན་ཉག་གཅིག་ཡིན་པ་རེད། གཉིས་སུ་རྒྱ་ནག་གི་རྒྱལ་དར་མེར་བསྲེགས་གཏང་བའི་ལས་འགུལ་སྤེལ་ན་ད་ལྟ་ང་ཚོ་ལ་རྒྱབ་སྐྱོར་ཡོད་བཞིན་པ་དང་ཉིན་རེ་ནས་ཇེ་མང་དུ་འགྲོ་བཞིན་པའི་རྒྱ་རིགས་སྤུན་ཟླ་རྣམ་པའི་སེམས་ཁུངས་སུ་ཆུ་གྲངས་བླུགས་པ་ལྟ་བུའི་ན་ཟུག་འཕར་མ་ཞིག་སྤྲད་པ་རེད། རྒྱལ་དར་ནི་རྒྱལ་ཁབ་དང་མི་མང་མཚོན་བྱེད་ལས་རྒྱལ་ཁབ་ཀྱི་སྲིད་གཞུང་གཅིག་པུའི་མཚོན་དོན་ཞིག་གཏན་ནས་མིན། ང་ཚོའི་དགྲ་ཁ་གཏད་དེ་ད་ལྟའི་གུང་ཕྲན་སྲིད་གཞུང་དམར་ཤོག་ཚོགས་པའི་རྒྱ་རྒན་ཁ་ཤས་ལས་རྒྱ་ནག་མི་མང་གཏན་ནས་མིན་པ་ནི་ལོང་བས་ལྟས་ཀྱང་རྒྱལ་ཁམས་ཡུལ་གསལ་ཞེས་པ་ལྟར་དུ་རེད། ང་ཚོའི་འཐབ་རྩོད་འདི་ལ་རྒྱབ་གཉེར་མེད་དུ་མི་རུང་བ་དེ་རྒྱ་ནག་མི་མང་རེད། དེ་ལ་དགོངས་ནས་གོང་ས་སྐྱབས་མགོན་ཆེན་པོ་མཆོག་ནས་ཀྱང་འཛམ་གླིང་གང་སར་༼བོད་རྒྱ་མཛའ་འབྲེལ་ཚོགས་པ༽ཞེས་པ་མང་པོ་ཞིག་གསར་འཛུག་གནང་ཞིང་དེའི་བརྒྱུད་ནས་བོད་དོན་ལ་དོ་སྣང་བྱེད་མཁན་ཉིན་རེ་བཞིན་དུ་ཇེ་མང་ལ་འགྲོ་བཞིན་ཡོད། ངོས་དབང་མེད་དེ་ཁ་མང་། གཡོག་ངན་དེ་ལྟོ་ཆེ་ཞེས་པའི་གཏམ་དཔེ་ལས་མ་འདས་ཀྱང་གཞོན་ནུ་ཚོགས་པས་བོད་བསྟན་སྲིད་ཀྱི་དོན་དུ་ལས་འགུལ་སྤེལ་བར་ཧ་ཅང་དགེ་མཚན་ཆེ་ཡང་ལས་འགུལ་སྤེལ་སྟངས་མ་ཤེས་ན་ཕན་ལས་གནོད་ཆེ་བས་ད་རེས་ཧ་ཅང་ཐུགས་བསམ་ནན་པོ་གཏོང་དགོས་འདུག་སྙམ། དེ་ནས་དེ་རིང་གི་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར། 

ཨ་རིའི་མཛའ་གྲོགས་ཀྱི་དུས་ཆེན་ཉིན་མོ།

པར་པ་ཨོ་ཤང་ནས་བླངས་པའི་མེ་ཏོག

ཞོགས་པ་ལངས་ནས་ངོས་ཀྱི་ཁ་འདོན་རྣམས་ཚར་བར་བྱས་ཤིང་ཐབ་ཚང་ནང་དུ་སོང་ནས་ཞོགས་ཟས་ལ་རོལ། དེ་རིང་གི་ཉིན་མོ་འདི་ནི་ཨ་རིའི་མཛའ་གྲོགས་ཀྱི་དུས་ཆེན་ཡིན་སྟབས་ངོས་ཀྱི་དགེ་ཕྲུག་རྣམས་ནས་ཀྱང་ཁ་པར་ཆད་མེད་དུ་འབྱོར་གྱི་འདུག སྔར་ཉིན་གཟའ་ཟླ་བའི་བདེ་ཆེན་ཞིང་སྒྲུབས་སྐབས་སུ་ངོས་ལ་མི་མང་ནས་མེ་ཏོག་མང་པོ་ཞིག་སྤྲད་བྱུང་བ་དེ་ཉིད་ཀྱང་དུས་ཆེན་འདི་ཡི་ཆེད་དུ་ཡིན་པ་གཞི་ནས་ཧ་གོ་སོང་། ཉིན་མོ་འདིར་ངོས་ཀྱི་དགེ་ཕྲུག་གཤའ་རེན་ནམ་ཆོས་མིང་དུ་ཀརྨ་ཆོས་སྒྲོན་གྱིས་མགྲོན་འབོད་ལྟར་དུ་སྟབས་བདེའི་ཟ་ཁང་ནང་དུ་ཚིག་ཇ་མཉམ་དུ་འཐུང་ལ་འགྲོ་དགོས་པ་དེ་རེད། དེ་ནས་ཉིན་གུང་ཆུ་ཚོད་དང་པོའི་སྐབས་སུ་ངེད་གཉིས་ངོས་ཀྱི་ཟུར་ལ་ཡོད་པའི་སྟབས་བདེའི་ཟ་ཁང་ཞིག་ནང་དུ་སོང་ནས་སོ་སོའི་འདོད་པ་བཞིན་འཐུང་ཆུ་མངར་མོ་དང་ཚིག་ཇ་སོགས་མཉམ་འཐུང་བྱས་ནས་ཆུ་ཚོད་གཅིག་ཙམ་ཁ་བརྡ་འདྲ་མིན་བྱས་ནས་བསྡད་པ་ཡིན། དེ་ནས་དགོང་ཟས་སུ་བུ་མོ་ལིའི་རྫའི་ནང་མི་རྣམས་ཀྱི་འདོད་པ་ལྟར་དུ་རྒྱ་ནག་ཟ་ཁང་ཞིག་ནང་དུ་སོང་ནས་དགོང་ཟས་སུ་མཉམ་དུ་རོལ་ནས་ནང་དུ་འབྱོར་ཞིང་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་པས་མ་འོངས་པའི་རྒྱ་ནག་གི་སྲིད་འཛིན་ཡིན་པའི་རྒྱ་ནག་དམར་ཤོག་མཐོ་རིམ་མི་སྣ་ཞིག་ཨ་རིར་ལྟ་སྐོར་འབྱོར་ནས་ཉི་ཡོག་གཙོར་བྱས་པའི་བོད་རིགས་བརྒྱ་ཕྲག་མང་པོས་ངོ་རྒོལ་དང་སྐད་འབོད་བྱེད་ཀྱི་ཡོད་པ་དེ་རེད། དེ་ནས་ཚེ་ལས་འདས་ནས་བདུན་གསུམ་ཙམ་ལས་མ་ཕྱིན་པའི་ངོས་ཀྱི་ཨ་ཕྱི་རྒན་མོ་དེ་ཉིད་ཀྱི་བུ་མོ་ངོས་ཀྱི་སྲིང་མོ་མཚོ་སྐྱིད་ལ་ཁ་པར་ཞིག་གཏང་བས་མོ་རང་ནས་ཟེར་ན་དེང་སང་དགོན་ཞབས་དགོན་པའི་བླ་གྲྭ་རྣམས་ཀྱིས་མི་འཁྲུགས་པའི་སྒོ་ནས་ཞེ་དགུ་འདོན་བཞིན་ཡོད་ཟེར། ངེད་མིང་སྲིང་གཉིས་སྐར་མ་ཁ་ཤས་སྐད་ཆ་བྱས་ནས་ཉལ་སར་སོང་ནས་གཉིད་དུ་ཡུར།

ཨེ་ཤ་ཡའི་རླུང་འཕྲིན་ཁང་དུ་སྐད་ཆ་བཤད་པའི་ཉིན་མོ།

མཛེས་སྡུག་ལྡན་པའི་ས་ཆ་ཨེས་ལེན་ཌའི། 

ཁ་སང་གི་ཉིན་མོ་འདིར་ངོས་ལ་ས་གནས་འདིར་སྤྱི་ལེ་བརྒྱ་ཙམ་གྱི་སར་ཡོད་པའི་སྐད་གྲགས་ཅན་གྱི་ས་ཆ་༼ཨེརསི་ལན་དེའི་༽ཞེས་པ་དེར་ངོས་ཀྱི་གྲོགས་པོ་སྦྲེན་ཊེ་དང་ལྷན་དུ་སོང་། ས་ཆ་དེ་ནི་ཀི་ལི་ཧྥོ་ཉའི་ས་གནས་ཡག་ཤོས་ཞིག་ལ་ངོས་འཛིན་བྱེད་ནས་མི་མང་པོ་ཞིག་དེར་ཡོང་ནས་ཞགས་བསྡོད་བྱེད་པ་དང་ལྟ་སྐོར་ལ་འགྲོ་བ་སོགས་རྒྱུན་མི་ཆད་པ་ཞིག་ཡོད་པ་རེད། ས་གནས་དེར་རང་བྱུང་གི་ཆུ་ཚན་གྱི་རྫིང་བུ་སྐྱིལ་ནས་ཡོད་པས་མགོ་སེར་དང་མགོ་ནག་སོགས་མི་རིགས་རྣམས་ངོ་ཚའི་སྒྲིབ་གཡོགས་གང་ཡང་མེད་པར་དམར་ཧྲང་དུ་ཆུ་ནང་དུ་ཧྲེང་ཉལ་བྱེད་པ་དང་། ཁ་ཤས་ཀྱིས་ཆུ་ནང་ནས་ཀྱང་དེབ་བཀླགས་པ་སོགས་བྱེད་ཀྱི་འདུག་ངོས་ནི་དང་པོ་ས་གནས་འདིར་སླེབས་པ་དང་མཉམ་དུ་ཉམ་ང་བག་ཚ་གང་ཡང་མེད་པར་དམར་ཧྲང་དུ་གྱུར་པའི་མི་རྣམས་མཐོང་བ་དང་མཉམ་དུ་ངོ་ཚ་ཞིང་མིག་གིས་ལྟ་མ་ཕོད་པ་འདྲ་ཞིག་འདུག དེ་ནས་ཉིན་གུང་ཟ་མ་རུ་ངོས་ཀྱི་སློབ་མ་ཀེལ་ལེའི་སྔ་ནས་མངགས་པའི་ཟ་མ་ག་ཚད་ཟོས་ཀྱང་ཆོག་པའི་ཟས་རིགས་འདྲ་མིན་ལ་རོལ་ནས་ངོས་ས་ཆ་དེའི་གཡོན་ཕྱོགས་སུ་ཡོད་པའི་མེ་ཏོག་ལྡུམ་ར་ཞིག་ཡོད་པ་དེའི་ནང་བསྡད་ནས་ཁ་འདོན་རྣམས་ཚར་བར་བྱས་པས་ངོས་ཀྱི་གྲོགས་པོ་སྦྲེན་ཊེ་ནི་དམར་ཧྲང་དུ་ཆུ་ཚ་བོའི་ནང་དུ་མཛུལ་སོང་། དེ་ནས་ཉིན་གུང་རྒྱབ་ལོགས་ཆུ་ཚོད་ལྔ་པའི་སྐབས་སུ་རླངས་འཁོར་ཁ་མོ་རི་ནའི་ཕྱོགས་སུ་བསྒྱུར་ནས་ཡོང་བས་ནང་དུ་དགོངས་མོ་ཆུ་ཚོད་བཅུ་པའི་སྐབས་སུ་གཞི་ནས་ནང་དུ་འབྱོར་སོང་། ཁ་པར་ནང་དུ་ལན་ཞིག་ཡོད་པ་དེ་ནི་ཨ་རིའི་རྒྱལ་ས་ཝ་ཤིང་ཀྲོན་ལ་ཡོད་པའི་བོད་ཀྱི་རླུང་འཕྲིན་ཁང་ལས་ཁུངས་ནང་ནས་ཨ་ཅ་རིག་ལྡན་སྒྲོལ་མ་ལགས་རེད་འདུག མོ་རང་གིས་ལན་ཞིག་ཡོད་པ་དེ་ནི་ཉེ་ཆར་ནང་ཆེན་ས་གནས་སུ་ལྷག་དཀར་སྲུང་བརྩི་བྱས་པའི་སྐབས་སུ་མི་མང་གྱེན་ལངས་བྱས་པ་དེའི་སྐོར་ཤེས་འདོད་ཡོད་པ་རེད་འདུག ངོས་ནས་མོ་རང་ལ་ཕར་ཁ་པར་གཏང་བས་མོ་རང་ནས་གསུངས་ན་སང་ཉིན་ཞོག་པ་ཀི་ལི་ཧྥོ་ཉའི་ཆུ་ཚོད་ལྔ་པའི་སྐབས་སུ་ངོས་དང་ཉི་ཡོག་བོད་ཀྱི་དོན་གཅོད་ནས་ཟུང་དྲུང་ཀུན་དགའ་བཀྲ་ཤིས་གཉིས་ལ་དྲི་བ་དྲིས་ལན་ཡོད་ཅེས་པའི་རེ་འདུན་བཏོན་སོང་བས་ངོས་ཀྱང་ཞོག་པ་སྔ་བོ་ཡིན་པར་མ་མཛེམས་ནས་ཁས་ལེན་བྱས་པ་ཡིན། དེ་ནས་སང་ཉིན་སྐད་ཆ་བཤད་རྒྱུ་མདོར་བསྡུས་ཞིག་ཡིག་ཐོག་ཏུ་ཕབས་ནས་གྲ་བསྒྲིགས་འདྲ་ཞིག་བྱས་ནས་ཉལ་སར་སོང་ནས་གཉིད་དུ་ཡུར།


ད་ནང་ཞོགས་པ་ཆུ་ཚོད་ལྔ་པའི་སྐབས་སུ་མགོ་སྔས་ཟུར་དུ་ལག་འཛིན་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ད་ནུབ་སྐད་བརྡ་བྱས་པའི་ཨེ་ཤ་ཡའི་རང་དབང་རླུང་འཕྲིན་ཁང་ནས་ཨ་ཅ་རིག་ལྡན་སྒྲོལ་མ་ལགས་རེད་འདུག ངོས་ནི་གཉིད་ཚ་དཀྲོགས་བྱས་པའི་རྐྱེན་གྱིས་མིག་ཅག་དང་སོ་བྲེགས་སོགས་ཕྱི་ལོང་དང་བཀྲུ་ལོང་སོགས་མ་བྱུང་བར་གློ་བུར་དུ་རླུང་འཕྲིན་ཁང་ནང་དུ་སྐད་ཆ་བཤད་རྒྱུའི་མགོ་འཛུགས་བྱས་པ་ཡིན། མོ་རང་ནས་གསུངས་ན་ཀུན་དགའ་ལགས་དང་ངོས་གཉིས་ལ་སྡོམ་པས་སྐར་མ་བཞི་བཅུའི་དུས་ཚོད་ཡོད་གསུངས་བྱུང་། ངས་བཤད་རྒྱུ་དེ་ནི་ནང་ཆེན་ཕྱོགས་ལ་ཁ་སང་ལྷག་དཀར་གྱི་དུས་ཆེན་ནས་བཟུང་ད་ལྟའི་བར་གནས་སྟངས་གང་འདྲ་ཡོད་མེད་སྐོར་རེད་འདུག་པས་ཚང་མ་ཆད་ལུས་མེད་པར་བཤད་པ་ཡིན། ཀུན་དགའ་ལགས་ལ་དེང་སང་རྒྱ་ནག་གི་དཔོན་རིགས་རྣམས་དང་སྔོན་མའི་དཔོན་རིགས་རྣམས་ཀྱི་ཁྱད་པར་དང་། རྒྱ་ནག་གིས་བོད་ལ་ལྟ་ཕྱོགས་འཛིན་པའི་སྲིད་ཇུས་ལ་འགྱུར་བ་ཡོད་མེད་སོགས་རེད་འདུག དེ་ནས་རླུང་འཕྲིན་ནང་དུ་སྐད་ཆ་ཚར་བ་དང་མཉམ་དུ་ཉལ་སར་སོང་ནས་གཉིད་དུ་ཡུར་བས་ཞོགས་པ་ཆུ་ཚོད་དགུ་པའི་བར་གཉིད་ཐུན་གཅིག་རེད་འདུག ཡར་ལངས་ནས་ཁ་འདོན་མདོར་བསྡུས་ཞིག་བྱས་ནས་ཞོག་ཟས་ལ་རོལ་བཞིན་པའི་སྐབས་སུ་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཉི་ཡོག་ལ་ཡོད་པའི་ལུང་པ་ཀོ་ལམ་བྷེའི་ནས་ཡིན་པའི་ངོས་དགེ་ཕྲུག་༼ཨསེ་མེ་རའི་ཌ་༽རེད་འདུག་མོ་རང་གི་དྲི་བ་ནི་ངོས་ཉི་ཡོག་ནམ་ཡོང་མིན་སྐོར་རེད་འདུག ཐོག་ཁར་སོང་ནས་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་པས་ཡང་སྐྱར་འཁྲི་འདུ་ལབ་དགོན་པ་ནས་ཡིན་པའི་གྲྭ་པ་ཞིག་ནས་སྐུ་ལུས་མེ་ལ་ཕུལ་བའི་གནས་ཚུལ་ཡི་མུག་པ་ཞིག་འདུག་དེ་ནི་ངོས་ལ་མཚོན་ན་ཆེས་མི་མཛེས་པའི་བྱ་ལས་ཞིག་ཀྱང་ཡིན། ཉིན་གུང་ཟ་མ་རུ་ཁ་སང་བཀོལ་བའི་ཟྭ་ཐུག་ལྷག་མོ་དེ་གྲངས་གློག་ནང་ནས་བཏོན་ཅིང་ཚ་བོ་བྱས་ཞིང་རྩམ་པ་ཞིག་རྫིས་ནས་མཉམ་དུ་ཟོས་པས་དཔེ་མེད་ཞིམ་པོ་འདྲ་ཞིག་བྱུང་། དེ་ནས་སུ་སིན་དང་མཉམ་དུ་འཕྲོད་བསྟེན་གྱི་ཆེད་རྐང་འགྲོས་ཀྱིས་ཆུ་ཚོད་གཅིག་ལྷག་སོང་ནས་ནང་དུ་འབྱོར་ཞིང་ཁ་སང་དེ་རིང་གཉིས་ཀྱི་ཉིན་ཐོ་མདོར་བསྡུས་ཞིག་གཏང་ནས་ཉལ་སར་སོང་ནས་འཛམ་གླིང་གི་སྒེའུ་ཁུངས་ནང་ནས་ལྟ་ཙམ་བྱས་པས་ཁ་བརྡའི་དྲ་ཚིགས་ནང་དུ་ཨ་མདོ་རྔ་བ་ནས་ཡིན་པའི་བཙུན་མ་བསྟན་འཛིན་དབང་མོ་ཟེར་བ་ལོ་བཅོ་བརྒྱད་ཅན་གྱི་རྒྱལ་གཅེས་ཀྱི་དཔའ་མོ་ཞིག་ནས་ལུང་ཁུག་ཞིག་ནང་དཔངས་རྟགས་སོགས་གང་ཡང་མེད་པར་རྙེད་པར་དཀའ་བའི་མི་ལུས་རིན་པོ་ཆེ་དེ་ཐལ་བ་སྦར་མོ་གང་ལ་རྗེས་འདུག་པའི་གནས་ཚུལ་ཡ་ང་ཞིག་མི་འདོད་བཞིན་དུ་རོ་མིག་དེས་མཐོང་སོང་བས་ཞེ་འགྱོད་དང་སྐྱོ་སྣང་གིས་ཁེངས་བཞིན་གཉིད་དུ་ཡུར་བའི་ཐབས་ཤེས་བྱས། 

འཛམ་གླིང་གང་སར་བོད་རིགས་རྣམས་ཀྱིས་ལྷག་དཀར་སྲུང་རྩི་བྱས་པའི་ཉིན་མོ།

ནང་ཆེན་ནས་མི་དམངས་གྱེན་ལངས་བྱེད་བཞིན་པ།

ཞོགས་པ་ལངས་ནས་ཁ་འདོན་རྣམས་ཚར་བར་བྱས་ཤིང་ཞོར་དུ་ངོས་ཀྱི་ཨ་ཕྱི་རྒན་མོ་ཚེ་ལས་འདས་མ་དེའི་ཆེད་དུ་འོད་དཔག་མེད་ཀྱི་ཆོ་ག་ཚར་གསུམ་དང་བསྔོ་སྨོན་སོགས་གང་ལེགས་བྱས་ནས་ཐབ་ཚང་ནང་དུ་སོང་ནས་ཞོགས་ཟས་ལ་རོལ། དེ་ནས་ཐོག་ཁར་ཡོང་ནས་ངོས་ཀྱི་རིག་མཛོད་གོབ་ཏོ་དེ་ཁ་ཕྱེས་ནས་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་པས་ཨ་མདོ་རྔ་བའི་དཔའ་རྒོད་ཁ་ཤས་ཀྱི་སྔ་ལོར་བོད་བསྟན་སྲིད་ཀྱི་ཆེད་དུ་གཟུགས་པོ་མེ་ལ་ཕུལ་བའི་མེ་སྟག་ཆུང་ཆུང་དེ་ཉིད་རིམ་བཞིན་ཁམས་བྲག་མགོ་དང་གསེར་རྟ་སོགས་སུ་མཆེད་ནས་དེ་རིང་སླར་ཡང་སྒ་སྐྱེ་དགུ་འཁྲི་འདུ་རྫོང་ཟིར་དཀར་དགོན་པའི་དགེ་འདུན་པ་རྣམས་ཀྱིས་སྣེ་ཁྲིད་ནས་མང་ཚོགས་སྟོང་ཕྲག་ལྔ་ཙམ་ནས་རྒྱངས་ཐག་ཆུ་ཚོད་གསུམ་ཙམ་རིང་ལུས་ལ་བོད་ཆས་གྱོན་ནས་ཁ་ནས་རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ང་ཚོ་ལ་མི་རིགས་ཀྱི་ཐོབ་ཐང་དགོས་ཞེས་པ་སོགས་ཀྱི་འབོད་སྒྲ་སྒྲོགས་པ་དང་མ་ཟད། ངོས་ཀྱི་སྐྱེ་ཡུལ་ཁམས་ནང་ཆེན་ནས་ཀྱང་ལྷག་དཀར་ཉིན་མོ་འདི་ལ་བསྟུན་ནས་བོད་རིགས་ལྔ་བརྒྱ་ཙམ་གྱིས་ལུས་ལ་བོད་ཆས་གྱོན་ནས་ཁ་རུ་རྩམ་པ་འགམ་ཞིང་དུས་ཆེན་ལྷག་དཀར་སྲུང་བརྩི་རྒྱ་ཆེན་བྱས་པ་མ་ཟད་བོད་རིགས་མང་པོ་ཤིག་ནས་ཉེན་གཏོགས་པའི་ཕྱོགས་ལ་ཁ་གཏད་ནས་བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་པའི་འབོད་སྒྲ་རྒྱ་ཆེར་སྒྲོགས་འདུག དེ་དང་ཆབས་ཅིག་ཏུ་བཞུགས་སྒར་ཁུལ་སོགས་གཙོར་བྱས་པའི་ཕྱི་སྡོད་ཀྱི་བོད་རིགས་རྣམས་ནས་ཀྱང་དེ་རིང་གི་ལྷག་དཀར་གྱི་ཉིན་མོ་འདིར་འཛམ་གླིང་གང་སར་རྒྱ་ནག་གཞུང་ཚབ་ཁང་གི་འདུན་དུ་སྐད་འབོད་དང་ལས་འགུལ་འདྲ་མིན་སྤེལ་གྱི་འདུག ངོས་རང་བསྡད་སའི་ས་གནས་འདིར་བོད་རིགས་གསུམ་གཅིག་པུ་ལས་མེད་ཀྱང་ནམ་རྒྱུན་དུས་ཆེན་ཆུང་ཁག་རིགས་ལ་ངོས་ཀྱི་སློབ་མ་མགོ་སེར་རྣམས་ཁྲིད་ནས་སྐད་འབོད་སོགས་ངེད་མི་གསུམ་ནས་ཀྱང་གང་ཐུབ་ནུས་པས་ལྕོག་ཚོད་བྱེད་ཀྱི་ཡོད་ཀྱང་། སྟབས་མ་ལེགས་པ་ཞིག་ལ་རྒྱུགས་རན་དུས་ཤ་ཁྱི་དེ་རྐང་པ་ཆག་ཞེས་པའི་དཔེ་ལྟར་དེ་རིང་ནི་དགོས་པའི་དུས་སུ་བལ་ཡུལ་ནས་ཡིན་པའི་ཨ་ཅ་ཆོས་འཛིན་ལགས་རྒྱ་གར་ལ་དུས་འཁོར་དབང་ཆེན་ལ་སོང་ནས་ཚུར་མ་འབྱོར་བ་དང་། རྡོ་རྗེ་གླིང་ནས་ཡིན་པའི་བུ་མོ་ཀུན་བཟང་ལགས་ལས་ཀ་ནས་དགོངས་པ་མ་རག་པ་སོགས་ཀྱིས་རྐྱེན་ནས་ངོས་གསུམ་ནས་མཉམ་འཛོམ་གྱིས་ལས་ཀ་གང་ཡང་བྱེད་མ་ཐུབ་ཀྱང་། ངོས་ནས་དེ་རིང་དམིགས་བསལ་གྱི་ལྷག་དཀར་ཉིན་མོར་སོང་རྩང་བོད་པ་ཡིན་པའི་དྲན་རྟེན་གྱི་ཆེད་ཉིན་གུང་རྩམ་པ་ཞིག་ཟོས་ནས་ཟླ་བ་གསུམ་གོང་ནས་ངོས་ཀྱི་ཆོས་ཚོགས་ཀྱི་ཚོགས་གཙོ་བལ་ཡུལ་ལ་སོང་བའི་ངོས་ལ་ལག་བརྟགས་སུ་གནང་བའི་དངུལ་ལེན་སྟོད་ཐུང་ཞིག་གི་ཕྱི་ངོས་སུ་བོད་ཀྱི་རྒྱ་དར་དང་བོད་རང་བཙན་ཡིན་ཞེས་པའི་ཡི་གེ་ཡོད་པ་ཅན་དེ་གྱོན་ནས་སྐུ་ལུས་མེར་བསྲེགས་གཏང་བའི་རྒྱལ་གཅེས་དཔའ་བོ་དང་དཔའ་མོ་དེ་རྣམས་ཀྱི་ཆེད་དུ་བདེ་ཆེན་ཞིང་གི་ཆོ་ག་ཚར་གསུམ་དང་། བདེ་ཆེན་སྨོན་ལམ་ཚར་གཅིག་བཅས་སྟོན་ནས་དགེ་སྔོ་སོགས་གང་ལེགས་བྱས། ཆུ་ཚོད་གསུམ་པའི་སྐབས་སུ་སྔ་ནས་དུས་བཀག་བྱས་པ་ནང་བཞིན་ལས་ཀ་ཞིག་གི་ཆེད་ཨ་རིའི་ལས་ཁུངས་ནང་དུ་སུ་སིན་དང་མཉམ་དུ་སོང་བས་ལས་ཀ་ཚང་མ་གེགས་མེད་མཐར་ཕྱིན་གྱིས་འགྲུབ་སོང་། དེ་ནས་སུ་སིན་ངེད་གཉིས་འཕྲོད་བསྟེན་གྱི་ཆེད་དུ་རྐང་འགྲོས་ཀྱིས་ཆུ་ཚོད་གཉིས་ཙམ་སོང་ནས་ནང་དུ་འབྱོར་ཞིང་དགོང་ཟས་སུ་ཤ་ཁུ་ཞིག་བཀོལ་ཞིང་རྩམ་པ་ཞིག་རྫིས་ནས་མཉམ་དུ་ཟོས་པས་ཞིམ་པོ་དཔེ་མེད་ཅིག་བྱུང་། དེ་ནས་ཉལ་སར་སོང་ནས་ནང་ཆེན་ནང་དུ་ཡོད་པའི་ངོས་ཀྱི་སྲིང་མོ་ལ་ཁ་པར་ཞིག་གཏང་བས་མོ་རང་ནས་དེ་རིང་ང་ཚོའི་བསང་གསོལ་གཏང་བ་ཡིན་ཡག་པོ་བྱུང་སོང་ཟེར་བ་ལས་གཞན་སྐད་ཆ་རྣམས་ཁ་ཐུག་བཤད་ཕོད་ཀྱི་མི་འདུག ངས་ཀྱང་མ་ལ་བུ་མོ་སྐྱེས་པ་གོ་དེ་རིང་ཆོད་པ་རེད་ད་དུང་གསང་གསོལ་གཏང་བྱུང་ན་ནང་དུ་ཡིབ་མ་བསྡད་ནས་འགྲོ་དགོས་པའི་བསྐུལ་འདེད་བྱས་པ་ཡིན། མོ་རང་ནི་ཆུང་ཆུང་སྐབས་སུ་རྒྱ་གཞུང་གི་སློབ་གྲར་སོང་ནས་ཡིག་རྒྱུག་འཕྲོད་ཅིང་རྒྱ་ནག་གཞུང་གི་ལས་བྱེད་རྙིང་པའི་གྲས་ཤིག་ཡིན་ཀྱང་བོད་ཀྱི་ལ་རྒྱ་ཡོད་མཁན་ཞིག་རེད། ད་ལྟ་ཤོར་མདའ་རྫོང་གི་སྨན་ཁང་ནང་དུ་ལས་ཀ་ཡོད་སྐད་འདུག ད་དུང་ངོས་ཀྱི་ཁ་པར་གྱི་བྱང་བུའི་ནང་དུ་ཨ་སྒོར་གསུམ་ཙམ་ཡོད་པས་རྫ་སྟོད་རྫོང་ལ་ཡོད་པའི་ངོས་ཀྱི་སྤུན་མཆེད་ལ་ཁ་པར་ཞིག་གཏང་བས་ཁོ་རང་ནས་ཟེར་ན་ད་ལྟ་རྫ་སྟོད་རྫོང་གི་ནང་ནས་གཞོན་སྐྱེས་གཙོར་བྱས་པའི་མི་གྲངས་ལྔ་བརྒྱ་ཙམ་གྱིས་ཁ་ནས་རྒྱལ་བའི་ཞབས་བརྟན་བགྲངས་ནས་གྲོང་དཀྱིལ་ནས་ཡར་འགྲོ་མར་འགྲོ་ཆུ་ཚོད་གཅིག་ཙམ་བྱས་ཤིང་ཁ་ཤས་ཀྱིས་བོད་མིའི་སྤྱི་བདེ་དམག་མི་ལ་གདོང་གཏུགས་ནས། ཁྱེད་རང་ཡང་བོད་པ་རེད་ང་ཡང་བོད་པ་རེད་ང་དང་ཁྱོད་གཉིས་གཅིག་པ་རེད། ཁྱོད་རང་བུ་དཔའ་བོ་ཡིན་ན་ཁྱོད་རང་ལག་ཏུ་ཡོད་པའི་གུན་ཕྲན་ཏང་གི་མེ་མདའ་དེ་ད་ལྟ་ངོས་ཀྱི་བྲང་དུ་རྒྱོབ་དང་སོགས་ཟེར་ནས་ཧ་ཅང་ཟིང་ཆ་ཆེན་པོ་བྱས་སོང་ཟེར། དེ་ནས་ཉེན་གཏོགས་པ་མང་པོ་འབྱོར་བྱུང་བས་བོད་པ་རྣམས་ཀྱིས་གནས་སྐབས་མཚམས་འཇོག་བྱས་སོང་ཟེར་བས་ངས་ཀྱང་གནས་ཚུལ་གང་ཡོད་པ་དེ་རབ་ཏུ་བྱུང་ན་གློག་བརྙན་ལེན་པ་དང་མ་བྱུང་ནའང་པར་རྒྱག་ཐུབ་པར་གྱིས་ནས་ངོས་ལ་གཏང་ཤོག་ཞེས་བསྐུལ་མ་འདྲ་བྱས་པ་ཡིན། དེ་རིང་གི་ཉིན་ཐོ་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།

གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ།

སྨན་འདམ་ལས་གྲུབ་པའི་སངས་རྒྱས་ཀྱི་སྐུ།

ཞོགས་པ་འཆར་ཅན་ལྟར་དུ་ངོས་ཀྱི་ཁ་འདོན་རྣམས་ཚར་བར་བྱས་ཤིང་ཞོར་དུ་ཨ་ཕྱི་རྒན་མོའི་ཆེད་དུ་འོད་དཔག་ཆོ་ག་དང་སྤྱན་རས་གཟིགས་འཁོར་བ་དོངས་སྤྲུགས་སོགས་ངན་སོང་སྦྱོང་བརྒྱུད་ཀྱི་ལྷ་རྣམས་ཀྱི་སྨོན་ལམ་སོགས་གང་དྲག་བྱས་ནས་འོག་ཤོད་ཐབ་ཚང་ནང་དུ་སོང་ནས་ཞོགས་ཟས་ལ་རོལ། གློ་ཁུག་ནང་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ངོས་ཀྱི་དགེ་ཕྲུག་གསར་པ་ཆོས་མིང་དུ་ཀརྨ་ཆོས་སྒྲོན། ཡུལ་མིང་དུ་རྗེ་ནེའི་རེད་འདུག། དེ་ནི་དེ་རིང་མོ་རང་གི་ནང་དུ་ཉིན་གུང་ཟ་མ་བཟའ་རྒྱུ་བྱས་པ་དེ་རེད། མོ་རང་ནས་གསུངས་ན་ཉིན་གུང་ཆུ་ཚོད་བཅུ་གཉིས་སྐབས་སུ་མོ་རང་གི་གྲོགས་པོ་ཁེལ་ལེའི་ཡོང་གི་ཡོད་པས་ང་ལ་འགྲོ་ཆེས་གྲ་སྒྲིག་གྱིས་ཞེས་པའི་རྟིང་བསྐུལ་དེ་རེད། ངོས་ཀྱང་རྒྱབ་ཁུག་དང་། ལག་འཛིན་ཁ་པར་སོགས་ཁུར་ནས་འགྲོ་ཆེས་བྱས་ནས་བསྡད་པས་མི་རིགས་ནག་པོའི་རྒད་པོ་ཨ་ར་ཅན་འཇིགས་སུ་རུང་བ་ཞིག་སླེབས་སོང་བས་ངེད་གཉིས་སྐད་ཆ་བྱེད་བཞིན་རྗེ་ནེའི་ནང་དུ་ཤར་རྒྱག་སོང་བས་རྗེའི་ནེའི་ནི་དེང་དུས་ཨ་རིའི་མི་ཚང་གི་ཁང་པའི་ཕྱི་དབྱིབས་སུ་དགྲ་སྟྭ་གྱེན་ལ་སླངས་འདྲ་ཁང་པ་མཛེས་ཤིང་ཡིད་དུ་འོང་བ་ཞིག་གི་ནང་དུ་གཙང་སེང་ངེ་བག་དྲོ་མདོག་ཁ་བོ་བྱས་ནས་བསྡད་འདུག ང་ནང་དུ་སླེབས་པ་དང་མཉམ་དུ་བོད་པའི་ལུགས་སྲོལ་བྱེད་ནས་སྒོ་ནང་ནས་ཁ་གཏགས་ཁུར་ནས་བསུ་མ་བྱེད་ཀྱི་འདུག དེ་རིང་གི་ཟ་མ་རུ་ངོས་ཀྱི་ཟ་མ་དགའ་ཤོས་འབྲས་དང་རྡ་ལི་ཡིན་པར་ཤེས་ནས་མོ་རང་ནས་ཆེད་དུ་བཟོས་པ་ཡིན་ཟེར་མོ་རང་གི་གྲོགས་མོ་ངོས་ཀྱི་སློབ་མ་ཁ་ཤས་སྡོམ་པས་མི་གྲངས་བརྒྱད་ཙམ་འདུག་པས་ང་ཚོ་མཉམ་དུ་ཉིན་གུང་ཟ་མ་ལ་རོལ། དེ་ནས་ཨ་ཧྥི་རི་ཀ་ནས་ཡིན་པའི་མི་རྒན་ནག་པོ་དེས་ངོས་ནང་དུ་བསྐྱལ་བྱུང་བས་བདུན་ཕྲག་གཅིག་རིང་ལ་འཁྲུ་རྒྱུ་མ་བྱུང་བའི་བེམ་གོག་དེ་ཉིད་བཀྲུས་ནས་སྐར་མ་སུམ་ཅུ་ཙམ་ཉལ་སར་ངལ་གསོ་བྱས། དེ་ནས་ཆུ་ཚོད་ལྔ་དང་ཕྱེད་སྐབས་སུ་ཀུན་བཟང་དབང་མོའམ་སུ་སིན་སླེབས་བྱུང་བས་ངེད་གཉིས་ཤར་རྒྱག་ཆོས་ཚོགས་ཕྱོགས་སུ་བདེ་ཆེན་ཞིང་སྒྲུབས་འཚོགས་ལ་སོང་བས་མི་རྣམས་རིམ་བཞིན་འབྱོར་སོང་སྡོམ་པས་དེ་རིང་གི་ཞིང་སྒྲུབས་སྐབས་སུ་མི་གྲངས་ཉེར་ལྔ་ཙམ་ཞིག་འདུག དེ་རིང་གི་སྔོན་འགྲོའི་ཆོས་བཤད་ལ་ཀུན་སློང་བཅོས་སྟངས་སྐོར་དང་། དངོས་གཞིའི་ཆོས་ཁྲིད་ལ་སྐྱབས་འགྲོའི་ཕན་ཡོན་དང་བསླབ་བྱ་སོགས་སྐད་བསྒྱུར་བརྒྱུད་ནས་བཤད་པས་མི་རྣམས་ཧ་ཅང་དགའ་བོ་བྱས་སོང་། དེ་ནས་དེ་རིང་གི་བདེ་ཆེན་ཞིང་སྒྲུབ་ཉིད་བོད་པའི་སྒྲ་གདངས་ཐོག་ནས་འདུར་དབྱངས་ཀྱིས་བཏོན་པས་ཨ་མི་དྷེ་ཝའི་བསྙེན་པའི་སྐབས་སུ་མེ་གོའི་ནས་མཛུབ་གནོན་སྒྲ་སྙན་ནམ་ piano ཐོག་ནས་མི་མང་གི་བསྙེན་དབྱངས་དང་མཉམ་དུ་གདངས་གཏང་བྱུང་བས་མི་མང་ནས་དགའ་བོ་བྱས་པ་མ་ཟད་ཁ་ཤས་མིག་ནས་མཆི་མ་གཏོང་བཞིན་འདུག འདོན་པ་ཚར་བ་མཉམ་དུ་དེ་རིང་ཆོས་ཚོགས་ཀྱི་འཚོགས་མི་རྣམས་ནས་ཟླ་རེར་ཨ་སྒོར་ཉི་ཤུ་ཆོས་ཚོགས་ཀྱི་ཆེད་བསྡུ་དགོས་པའི་དུས་ཚོད་ཡིན་སྟབས་ཆོས་ཚོགས་ཀྱི་དངུལ་གཉེར་སི་ཊེའི་ཧྥུ་ནེའམ་ཆོས་མིང་དུ་པདྨ་སྒྲོལ་མ་ནས་མི་མང་སར་དངུལ་བསྡུ་ནས་ཟིང་ཟིང་ལོང་ལོང་འདྲ་བྱེད་ཀྱི་འདུག ངོས་ནས་ཟུར་བཅར་མཁན་རྣམས་ལ་རིམ་བཞིན་ཐུག་འཕྲད་དང་། གྱེས་བྲལ་གྱི་ཕྱག་རྒྱ་དང་། ལག་འཇུ་སོགས་བྱས་ནས་སུ་སིན་དང་ལྷན་དུ་རླངས་འཁོར་ཁ་མོ་རིའི་ན་སོགས་སུ་བསྒྱུར་ནས་ནང་དུ་འབྱོར་བ་དང་ལྷན་དེ་རིང་ངོས་ཀྱི་ལས་ཀའི་བྲེལ་ཟིང་དང་ཞིང་སྒྲུབས་སོགས་མཉམ་ཁེལ་གྱིས་ཧ་ཅང་ཐང་ཆད་སོང་བས་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།

ཁྲིམས་རྩོད་པ་ལ་ཐུག་འཕྲད་ལ་སོང་བའི་ཉིན་མོ།

ཨ་རིའི་སྐད་གྲགས་ཅན་གྱི་ཨེ་ཤ་ཡའི་འགྲེམ་སྟོན་ཁང་།

ཞོགས་པ་སྔ་མོར་ལངས་ནས་ཁ་འདོན་རྣམས་ཚར་བར་བྱས་ཤིང་ཐབ་ཚང་ནང་དུ་སོང་ནས་ཞོགས་ཟས་ཉུང་ཙམ་ཟོས་ནས་ངོས་ཀྱི་རྒྱབ་ཁུག་དང་ཉེར་སྤྱད་རྣམས་ཁུར་ཆོག་ཆོག་གྲ་བསྒྲིགས་བྱས་ནས་བསྡད། ཅུང་ཙམ་རྗེས་ནས་ཆོས་ཚོགས་ཀྱི་ཚོགས་གཙོ་ཧར་ཌེའི་དང་སུ་སིན་གཉིས་ཆུ་ཚོད་དགུ་པའི་སྐབས་སུ་སླེབས་བྱུང་བས་ང་ཚོ་གསུམ་རླངས་འཁོར་གཅིག་ནང་དུ་ཞུགས་ནས་ངོས་ཀྱི་ཁྲིམས་རྩོད་པ་རྗེ་ཧྥུ་སར་སོང་། རྗེ་ཧྥུ་ནི་འདི་ནས་ཆུ་ཚོད་གསུམ་ཙམ་གྱི་སར་ཆོད་པའི་ཀི་ལི་ཧྥོ་ཉའི་རྒྱལ་ས་San Francisco ལ་ཡོད། དེ་རིང་ནི་ངོས་ཀྱི་ཨ་རིའི་ཡིག་ཆ་རྣམས་འགྲུབ་ནས་བདུན་ཕྲག་གཉིས་ཙམ་ཡིན་དེ་རིང་ས་གནས་འདིར་ཡོང་དོན་གཙོ་བོ་ནི། གཏམ་དཔེར། མདའ་གཅིག་གིས་ཤྭ་བ་གཉིས་བསད་ཅེས་པ་ལྟར་ངོས་ཀྱི་ཁྲིམས་རྩོད་པ་རྗེ་ཧྥུ་ལ་ཨ་རིའི་སྐྱབས་བཅོལ་ཡིག་ཆའི་སྐོར་ལེགས་གྲུབ་བྱུང་བ་ལ་ཐུགས་རྗེའི་ལེགས་འབུལ་ལག་བཏགས་ཤིག་སྤྲད་རྒྱུ་ཡོད་པ་དེ་དང་། ཞོར་དུ་བོད་པའི་ཟ་ཁང་ནང་ནས་རྩམ་པ་ཉོ་རྒྱུ་དེ་གཉིས་ཁོ་ན་ཡིན། ཆུ་ཚོད་དང་པོའི་སྐབས་སུ་བོད་པའི་ཟ་ཁང་ཞིག་ནང་རྗེ་ཧྥུ་དང་དུས་ཆད་བྱས་པ་ནང་བཞིན་དེར་འཛོམས་བྱུང་བས་ང་ཚོ་ཚང་མས་ཉིན་གུང་ཟ་མ་བོད་ཟས་འདྲ་མིན་མངག་ནས་ཕན་ཚུན་ཁ་བརྡ་སོགས་བྱས་མཐར་རྗེ་ཧྥུ་ལ་ལག་བཏགས་ཀྱི་ཆེད་དུ་གོང་ས་མཆོག་དང་ངོས་ཀྱི་པར་དང་རྗེ་ཧྥུ་ངེད་གཉིས་མཉམ་དུ་ཡོད་པའི་མཛེས་ཆོས་ཀྱིས་སྤྲད་པའི་པར་སྒྲོམ་སྤུས་ལེགས་ཤིག་དང་། དངུལ་ལས་བཟོས་པའི་སངས་རྒྱས་བཅོམ་ལྡན་འདས་ཀྱི་སྐུ་སྐེ་ལ་འདོག་རྒྱུ་ཞིག་དང་། རྡོ་རྗེ་དྲིལ་བུ་ཆུང་ཆུང་སྤུས་ལེགས་ཤིག་དང་གཞན་ཁ་གཏགས་བཅས་སྤྲད་པས་ཁོ་རང་ནས་ཧ་ཅང་དགའ་བོ་བྱས་སོང་། ཁོ་རང་ནས་གསུངས་ན་དེ་སྔ་ཕན་ཆོད་ངས་ཁྲིམས་རྩོད་པའི་ལས་ཀ་བྱས་ནས་བཟུང་སྟེ་མི་མང་པོ་ཞིག་ལ་ཨ་རིར་སྐྱབས་བཅོལ་གྱི་ཡིག་ཆ་ཐོབ་ཀྱང་ཁྱེད་རང་ཚོའི་ངོས་ལ་བྱས་པ་ནང་བཞིན་བྱེད་མཁན་གཅིག་ཀྱང་མི་འདུག ལར་ནི་བོད་མི་དང་མ་ཟད་དགེ་འདུན་པ་ཡིན་དུས་འདྲ་རྒྱུ་མི་འདུག་སོགས་ཟེར་ནས་ངོས་ལ་བསྟོད་ར་མང་པོ་བྱས་སོང་། དེ་ནས་གཅིག་གིས་གཅིག་ལ་ཡག་རབས་དང་བཟང་རབས་སོགས་ལུང་པ་གང་ཙམ་བཤད་རེས་བྱས་ནས་མཐར་ཕན་ཚུན་གྱེས་བྲལ་གྱི་འཐམ་འཁྱུད་དང་། ལག་འཇུ་སོགས་ཅི་རིགས་བྱས་ནས་རྗེ་ཧྥུ་ལ་ཕེབས་བསྐྱེལ་ཐུང་ཙམ་བྱས། སྤྱིར་བཏང་ལུང་པ་འདིར་སྒོར་མོ་མི་དགོས་པའི་རིན་མེད་ཀྱི་ལས་ཀ་གཅིག་ཀྱང་མེད། ལྷག་པར་སྤྱི་ཚོགས་ལས་རིགས་ཀྱི་ཁྲོད་ནས་ཁྲིམས་རྩོད་པ་དང་། སྨན་པ་གཉིས་ལས་ཀའི་གོང་ཚད་མཐོ་ཤོས་དེ་ཡིན། ངས་ཁོང་ལ་གླ་ཆ་ཨ་སྒོར་བཞི་སྟོང་སྤྲད་ཚར་ཡང་ད་དུང་ཡ་རབས་བཟང་སྤྱོད་དང་ལྡན་པའི་ཐོག་ནས་རྔན་པ་རྣམས་སྤྲད་པ་ཡིན། དེ་ནས་ཟ་ཁང་ནང་ནས་ཨ་སྒོར་བརྒྱ་ཡིས་རྩམ་པ་མང་པོ་ཞིག་ཉོས་ནས་ཆུ་ཚོད་ཕྱེད་ཀ་ཙམ་གྱི་ས་རུ་ཡོད་པའི་Asian Art Museum ཞེས་ཨེ་ཤའི་ཡའི་བཟོ་སྐྲུན་གྱི་འགྲེམས་སྟོན་ཁང་ཞིག་ཡོད་པ་དེའི་ནང་དུ་སོང་། འགྲེམ་སྟོན་ཁང་འདི་ནི་འཛམ་གླིང་ནང་དུ་སྐད་གྲགས་ཡོད་པའི་འགྲེམ་སྟོན་ཁང་རེད་ཟེར། ཁང་པའི་བཟོ་རྩལ་གྱི་རི་མོ་དང་དབྱིབས་སོགས་ལ་ཧ་ལས་པ་ཞིག་འདུག་ནང་དུ་ནང་པའི་ཆོས་ལུགས་ཀྱི་སྐུ་དང་ཐང་ག་རྙིང་པ་ཧ་ཅང་མང་པོ་འདུག ངོས་ནི་འགྲེམས་སྟོན་ཁང་འདི་སྔ་ནས་གོ་མྱོང་ཡོད་ཀྱང་འདིར་དངོས་སུ་སླེབས་པ་ཐེངས་དང་པོ་ཡིན། འགྲེམ་སྟོན་ཁང་ནང་ལོགས་ཀྱི་ཁང་པ་རྣམས་སྡེ་ཚན་དུ་ཕྱེས་ནས་རྒྱལ་ཁབ་འདྲ་མིན་དཔེར་ན་རྒྱ་ནག་དང། བོད། རྒྱ་གར། ཀོ་རི་ཡ། ཉི་ཧོང་། ཐེ་ལན་ཌི། ཀམ་བྷོ་ཌའི། སོགས་ཀྱི་ནང་པའི་ཆོས་ཀྱི་མཆོད་ཆས་དང་། སྐུ། ཐང་ག སོགས་ལོ་གཅིག་སྟོང་ལྔ་བརྒྱ་སོགས་ཀྱི་ཅ་དངོས་རིན་ཐང་དང་བྲལ་བ་མང་པོ་འདུག འགྲེམ་སྟོན་ཉིད་ཞིབ་མཇལ་བྱས་ཤིང་དེ་ནས་ཟུར་དུ་ཡོད་པའི་ཨ་རིའི་སྐད་གྲགས་ཅན་གྱི་ཁང་པ་ཞིག་ཡོད་པ་དེར་ལྟད་མོ་ལྟ་རུ་སོང་། དེ་ནས་རླངས་འཁོར་ཁ་མོན་ཊེ་རེའི་སོགས་ལ་བསྒྱུར་ནས་ཡོང་བས་དགོང་མོ་ཆུ་ཚོད་བཅུ་པའི་སྐབས་སུ་ནང་ལ་སླེབས་སོང་བས་དེ་རིང་གི་ཉིན་ཐོ་མ་ཆད་ཙམ་ཞིག་གཏང་ནས་སེ་ཁེབ་བམ་གནམ་སྐར་སྒེའུ་ཁུང་ནང་ནས་ལྟ་ཙམ་བྱས་པས་རྡ་སར་བཞུགས་པའི་བཀའ་བརྒྱུད་སྤྱི་འཐུས་སྐུ་ཞབས་བསྟན་པ་ཡར་འཕེལ་ལགས་དང་ལྷན་དུ་སྐད་ཆ་མང་པོ་ཞིག་བྱས་ནས་ཉལ་སར་སོང་ནས་གཉིད་དུ་ཡུར། 

ཨ་རིའི་ལས་ཁུངས་ནང་དུ་སོང་བའི་ཉིན་མོ།

མཛེས་པའི་ཀི་ལི་ཧྥོ་ཉའི་མེ་ཏོག

ཞོགས་པ་ལངས་ནས་འཆར་ཅན་གྱི་ཁ་འདོན་རྣམས་ཚར་བར་བྱས་པ་མ་ཟད་ཨ་ཕྱི་རྒན་མོའི་དེ་ཉིད་ཚེ་ལས་འདས་ནས་བདུན་གཉིས་པར་ཁེལ་བས་སྦྱོར་དངོས་རྗེས་གསུམ་ཚང་བའི་འོད་དཔག་མེད་ཀྱི་ཆོ་ག་ཚར་གསུམ་དང་། སྤྱན་རས་གཟིགས་འཁོར་བ་དོངས་སྤྲུགས་ཀྱི་ཆོ་ག་ཚར་གཅིག་བཅས་དང་བསྔོ་སྨོན་སོགས་གང་དྲག་བྱས་ནས་འོག་ཤོད་ཐབ་ཚང་ནང་དུ་སོང་ནས་ཞོགས་ཟས་མདོར་བསྡུས་ཤིག་ལ་རོལ། དེ་ནས་ཟུར་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ངོས་ཀྱི་ཆོས་ཚོགས་ཀྱི་ཚོགས་གཙོ་ཧེར་ཌའི་རེད་འདུག་མོ་རང་ནས་གསུང་ན་སྐར་མ་སུམ་ཅུར་དེར་འབྱོར་གྱི་ཡོད་པས་ལས་ཁུངས་སུ་འགྲོ་ཆེས་གྲ་བསྒྲིགས་གྱིས་ཞེས་པའི་སྔོན་བརྡ་དེ་རེད། ངོས་ཀྱང་རྒྱབ་ཁུག་དང་ཡིག་ཆ་ཚང་མ་ཁུར་ནས་འགྲོ་ཆེས་གྲ་བསྒྲིགས་བྱས་པས་ཧེར་ཌའི་སླེབས་སོང་བས་ངོས་གཉིས་ས་གནས་འདིར་ཡོད་པའི་ཨ་རིའི་གཞུང་གི་social Security card འམ་བོད་སྐད་དུ༼སྤྱི་ཚོགས་སྲུང་སྐྱོབ་ཨང་གྲངས༽ཞེས་པའི་ལས་ཁུངས་སུ་སོང་བས་མི་རྣམས་བང་བསྒྲིགས་ནས་འཚང་ཁ་ཤིག་ཤིག་བྱེད་ཀྱི་འདུག ངེད་གཉིས་ཀྱང་བང་བསྒྲིགས་ཤིང་ཨང་གྲངས་བླངས་ནས་བསྒུགས་བསྡད་པས་ངོས་ཀྱི་མིང་བོས་བྱུང་བས་སྒེའུ་ཁུང་ཨང་གྲངས་བརྒྱད་པའི་ནང་ནས་ཨ་རི་མི་དཀྱུས་མ་ལོ་ལོན་ཞིག་འདུག་པས་བསམ་ཡུལ་ལས་འདས་པ་ཞིག་ལ་ང་མཐོང་བ་དང་མཉམ་དུ་ཕྱག་རྒྱས་གུས་འདུད་བྱེད་ཀྱི་འདུག ངོས་ཀྱི་དབྱིན་ཇི་གོབ་ཏོ་དེ་སྐྱོན་ནས་ངེད་གཉིས་ཁ་བརྡ་བྱས་དུས་ཁོང་རང་ཐེག་དམན་གྱི་ནང་པ་ཞིག་རེད་འདུག ཁོང་གི་དགེ་རྒན་དེ་འབར་མའི་དགེ་སློང་ཞིག་ཡིན་ཟེར། ཁོང་ནས་ངོས་ཀྱི་གདོང་པར་བལྟ་བཞིན་དུ་ཁྱོད་རང་ལོ་སྔོན་མར་ངས་གསར་ཤོག་ནང་ནས་འཐོང་མྱོང་འདུག་ཟེར་བས་ངས་ཀྱང་ཏག་ཏག་རེད་བསམ་བྱུང་གང་ཡིན་ཞེ་ན་ལོ་སྔོན་མར་ངོས་ཀྱི་མཛད་རིམ་ཕལ་ཆེར་འདིར་ཕྱོགས་གསར་ཤོག་མང་པོ་ཞིག་ནང་དུ་བཀོད་འདུག ཁོང་ནས་ངོས་ལ་དམིགས་བསལ་གྱིས་རོགས་པ་བྱས་ནས་སང་ཉིན་ནས་ཁྱོད་རང་གི་༼སྤྱི་ཚོགས་སྲུང་སྐྱོབ་ཨང་གྲངས། ༽ སླེབས་ཀྱི་རེད་ཟེར་བས་ངོས་ཀྱང་ཧ་ལས་སོང་། དེ་ནས་ཕན་ཚུན་སྐད་བརྡ་ཐུང་ཙམ་བྱས་ནས་ངོས་ཀྱི་ཆོས་ཚོགས་ཀྱི་ཁ་བྱང་དང་ཁ་པར་ཨང་གྲངས་སོགས་ཚང་མ་སྤྲད་པས་ཁོ་རང་ངོས་ཀྱི་ཆོས་བཤད་སར་ཡོང་གི་ཡིན་ཟེར། དེ་ནས་ཧར་ཌེའི་ངེད་གཉིས་དེ་རིང་གི་གནས་ཚུལ་ལམ་འགྲོ་བྱུང་ཚུལ་དང་ཡག་རབས་བཅོ་བརྒྱད་བགྲངས་བཞིན་ནང་དུ་ལོགས། ངོས་ཀྱི་རླངས་འཁོར་ཁ་ལོ་བ་སུ་སིན་སླེབས་སོང་བས་ངེད་གཉིས་ནམ་རྒྱུན་ལྟར་འཕྲོད་བསྟེན་གྱི་ཆེད་དུ་རྐང་འགྲོས་ཀྱིས་ཆུ་ཚོད་གཅིག་ཙམ་སོང་ནས་ནང་དུ་འབྱོར་ཞིང་ཟྭ་ཚོད་ཀྱི་ཐུག་པ་ཞིག་བཀོལ་ནས་འཐུང་བས་དཔེ་མེད་ཞིམ་པོ་བྱུང་། དེ་ནས་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་པས་འདི་ལོའི་དུས་འཁོར་དབང་ཆེན་ལ་བོད་ནས་ཕེབས་པའི་ཆོས་ཞུ་བ་རྣམས་བོད་ལ་མར་ལོགས་པའི་སྐབས་མེ་འཁོར་འབབས་ཚུགས་ནས་རྒྱ་མིའི་བོད་མི་ཆོས་ཞུ་བ་མི་བརྒྱ་སྐོར་ཞིག་འཇུ་བཟུང་བྱས་ནས་དཀའ་ངལ་ཧ་ཅང་ཆེན་པོ་འཕྲད་ཡོད་པའི་གནས་ཚུལ་དེ་དང་ཨ་རིའི་འཛམ་གླིང་གི་བརྙན་འཕྲིན་གསར་འགྱུར་སྐད་གྲགས་ཅན་CNN ཞེས་པ་དེའི་གསར་འགོད་པ་བསམ་བཞིན་དུ་བོད་བྲག་མགོ་ལ་སོང་བའི་སྐབས་སུ་རྒྱ་ནག་གཞུང་ནས་ས་གནས་སུ་མ་གཏང་ནས་ཡར་སློག་ཡོད་པའི་སྐོར་རེད་འདུག དེ་ནས་དེ་རིང་གི་ཉིན་ཐོ་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།