སྤྱི་ལོ་༢༠༡༤་ལོའི་དངོས་གྲུབ་རྡོ་རྗེ་དང་གཟའ་ཟླ་བཀྲ་ཤིས་སྒྲོལ་མ་བཅས་ཀྱི་ནང་མི་འདི་ང་འདུག་སའི་ས་གནས་monterey bay ནས་ངོ་ཤེས་སུ་གྱུར། ༢༠༡༠ལོར་ང་ས་གནས་འདིར་བསྡད་པའི་རིང་ལ་སྐབས་དེ་དུས་བལ་ཡུལ་ནས་ཡིན་པའི་བོད་པའི་བུ་མོ་ཆོས་འཛིན་དང་། རྒྱ་གར་རྡོ་རྗེ་གླིང་ནས་ཡིན་པའི་བོད་པའི་བུ་མོ་ཀུན་བཟང་། གཞན་བོད་ཀྱི་བུ་མོ་རྡོ་རྗེ་སྒྲོལ་མ་བཅས་བོད་པ་གསུམ་གཅིག་པུ་ལས་མི་འདུག སྐབས་དེ་དུས་ང་ཚོའི་བོད་ཀྱི་ལོ་སར་དང་། སུམ་བཅུའི་དུས་དྲན། སྐྱབས་མགོན་རིན་པོ་ཆེའི་འཁྲུངས་སྐར་སོགས་ལ་མཉམ་རུབ་ཀྱིས་ཆོས་དང་འཇིག་རྟེན་གྱི་ལས་ཀ་མང་པོ་བྱེད་ཀྱི་ཡོད། དབྱིན་ཇི་རྣམས་ཀྱིས་ཁྱེད་རང་བོད་པ་བཞི་ལས་མ་གཏོགས་མེད་ཀྱང་ལས་ཀ་ཧ་ཅང་ཡག་པོ་བྱེད་ཀྱི་འདུག་ཟེར་ནས་བསྔགས་བརྗོད་བྱེད་མཁན་ཡང་མང་པོ་བྱུང་། སྟབས་མ་ལེགས་པ་ཞིག་ལ་ཀུན་བཟང་དང་ཆོས་འཛིན་གཉིས་ཀྱི་ལས་ཀ་ནི་གཞན་དབང་སྟབས་བསྟུན་ཁོ་ན་ཡིན་སྟབས་ལས་ཀ་མ་རག་པའི་དབང་གིས་གནས་སྐབས་ལས་ཀའི་ཆེད་དུ་ས་གནས་གཞན་ལ་མི་འདོད་བཞིན་དུ་སྤོ་དགོས་བྱུང་། དེ་ནས་བཟུང་སྟེ་གཟའ་ཟླ་དབྱིན་ཇི་ཡིན་པའི་བུ་མོ་རྡོ་རྗེ་སྒྲོལ་མ་ངེད་གཉིས་གཅིག་པུར་གྱུར་ངེད་གཉིས་ཀྱང་སོ་སོའི་ལས་ཀའི་དབང་གིས་ཐུག་གྲངས་ཇེ་ཉུང་ལ་གྱུར། ཡང་སྟབས་མ་ལེགས་པ་ཞིག་ལ་ཨ་ཅ་རྡོ་རྗེ་སྒྲོལ་མ་ནི་བློ་བུར་དུ་ཅི་ཡིན་འདི་ཡིན་མེད་པར་འདས་གྲོངས་སུ་གྱུར། དུས་དེ་ནས་བཟུང་སྟེ་ས་གནས་འདིར་བོད་རིགས་ང་ལས་མ་གཏོགས་གཅིག་ཀྱང་མེད། ཉིན་གཅིག་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་བོད་རིགས་ཤིག་རེད་འདུག ངེད་གཉིས་སྐད་ཆ་བྱས་དུས་ཁོང་ནས་འདི་ལྟར་ཟེར།
“ཁྱེད་མཁན་པོ་ཀར་བསྟན་ལགས་ཡིན་ནམ། ང་ཡི་མིང་ལ་བསྟན་འཛིན་ནམ་མཁའ་ཡིན། ང་ས་གནས་འདིར་སྤོས་ནས་ཟླ་ཤས་ལས་འགོར་མེད། འཇམ་དབྱངས་ཆོས་འཁོར་གླིང་དང་ཁྱེད་ཀྱི་ཁ་པར་ཨང་གྲངས་ངས་ངས་དྲ྄་རྒྱའི་རྒྱུད་ནས་རྙེད་སོང་། ང་སང་ཉིན་ཁྱེད་ཀྱི་ཆོས་ཚོགས་ལ་ཡོང་ན་འགྲིག་གི་རེད་དམ།”
ཞེས་ཟེར། གསལ་ལ་དག་ཅིང་གཙང་བའི་བོད་སྐད་གཙང་མ་སྐྱོན་མཁན་ཞིག་ནས་དེ་ལྟར་ཟེར་དུས་ངས་ཀྱང་རྨ་བྱས་འབྲུག་སྐད་ཐོས་པ་ལྟར་དགའ་བོའི་ངང་ནས་ཡིན་ད་ཡིན་སང་ཉིན་ཕེབས་རོགས་ཞུས།
ཕྱི་ཉིན་དུས་ཆད་བྱས་པ་ལྟར་གདོང་ནར་མོའི་དབྱིབས་སུ་ཡོད་པའི་ཕོ་གསར་ལྟད་གཟོ་མདོག་ཅན་ཞིག་ནས་མེ་ཏོག་ཆུན་པོ་དར་གྱིས་རྒྱན་པ་ཞིག་ལག་ཏུ་བཟུང་ནས་ཆོས་ཚོགས་སུ་ཕེབས་སོང་། ངེད་གཉིས་ཕན་ཚུན་སྐད་ཆ་བྱས་དུས་འདི་ནས་སྐར་མ་བཅུ་ཙམ་གྱི་སར་ཁོང་གི་གཅེན་མོ་བཀྲ་ཤིས་སྒྲོལ་མ་དང་། ཁྱོ་ག་དངོས་གྲུབ་རྡོ་རྗེ་གཉིས་ནང་དུ་ཁོང་བསྡད་ཡོད་ཚུལ་སྐད་ཆ་ཞིབ་ཕྲ་གསུངས་སོང་། ཕལ་ཆེར་༢༠༡༥ སྤྱི་ཟླ་༡ ཚེས་པ་༢༤ ཉིན་ཐེངས་མ་དང་པོ་ཁོང་ཚོའི་ནང་དུ་དགོང་ཟས་ལ་མགྲོན་འབོད་བྱས་པ་ལྟར་ང་ཡི་རླངས་འཁོར་ཁ་ལོ་བ་ཉི་ཧོང་ཨ་མ་སུས་སིན་ངེད་གཉིས་མཉམ་དུ་སོང་། སྐབས་དེ་དུས་ཐེངས་དང་པོ་ངོ་ཤེས་པའི་གྲོགས་པོ་དངོས་གྲུབ་རྡོ་རྗེ་ལགས་ནི། སྐུ་གཟུགས་འབྲིང་པོ་ཙམ་ཞལ་རས་སྨུག་མདངས་གོར་དབྱིབས་ཅན་ཚེམས་སོ་རྣམས་དཀར་ལ་འཚེར་བའི་རང་བཞིན་ནམ་རྒྱུན་ཞལ་རས་སུ་མ་བཅོས་པའི་ལྷན་སྐྱེས་ཀྱི་འཛུམས་མདངས་ཡོད་པ་མི་ཡ་རབས་གཉོམ་ཆུང་ཞིག་ཏུ་མཐོང་། ཁོང་གི་བཟའ་ཟླ་བཀྲ་ཤིས་སྒྲོལ་མ་ནི་བོད་རིགས་དཀྱུས་མའི་བུ་མོ་ཡ་རབ་ཡིད་དུ་འོང་བ་ནམ་རྒྱུན་ཞལ་གསང་ཞིང་ཕན་སེམས་ཅན་ཞིག་དང་། དངོས་གྲུབ་ཀྱི་གཅུང་མོ་ཀུན་བཟང་ནི་ལས་ཀར་ཧུར་བརྩོན་ཆེ་ཞིང་གཉོམ་ཆུང་ལ་སེམས་བཟང་ཡ་རབས་ཅན་ཞིག་འདུག། དེ་ནས་བཟུང་སྟེ་ང་ཚོ་ཚང་མ་ཕན་ཚུན་མ་བགྲོས་བསམ་པ་གཅིག་མཐུན་གྱི་གྲོགས་པོར་གྱུར་ནས་བོད་ཀྱི་གཏམ་དཔེར། ཁྱིམ་མཚེས་བར་ཐག་ཉེ་ན། ཙི་ཙི་ཕར་རྒྱུག་ཚུར་རྒྱུག་གི་དཔེ་ལྟར་ང་ཚོ་ཐུག་རྒྱུ་ཇེ་མང་ལ་སོང་།
དུས་དེ་ནས་བཟུང་སྟེ་ང་ལ་ཁྱིམ་མཚེས་བོད་པ་ཡ་རབ་ཀྱི་མི་ཚང་ཞིག་ཡོད་པ་དེ་ནི་ང་ཡི་ངོས་ནས་བསམ་ན་ཧ་ཅང་བསོད་ནམས་ཆེན་པོ་ཞིག་ཏུ་ངོས་འཛིན་བྱེད་ཀྱི་ཡོད། དུས་དེ་ནས་བཟུང་སྟེ་མི་ཚང་འདི་ནི་ང་ཡི་མི་ཚང་ནང་བཞིན་ཕན་ཚུན་སྐྱིད་སྡུག་ལང་ཕྱོགས་སོགས་གཅིག་ཏུ་གྱུར། སུམ་བཅུའི་དུས་དྲན་དང་། སྐྱབས་མགོན་རིན་པོ་ཆེའི་འཁྲུངས་སྐར། བོད་ཀྱི་ལོ་གསར་སོགས་ལ་ང་ཚོ་མཉམ་འཛོམས་བྱེད་ཅི་ཐུབ་བྱེད་ཀྱི་ཡོད།
དེ་ནས་ལོ་འགའ་ཡི་རྗེས་སུ་ཕ་ཡུལ་ཨ་མདོ་ནས་ཡིན་པའི་བོད་པའི་མི་ཚང་ཞིག་ཀྱང་ངོས་ཀྱི་ཉེ་འགྲམ་ས་གནས་འདིར་གནས་སྤོས་གནང་བས་མི་ཚང་དེ་ཉིད་ཀྱང་རང་བཞིན་གྱིས་ཁྱིམ་མཚེས་ཀྱི་གྲོགས་པོ་བཟང་པོ་གྱུར། སྐབས་རེ་ང་ཚོ་མཉམ་འཛོམས་བྱེད་སྐབས་ངས་མཚར་གཏམ་དང་བཅས་འདི་ལྟར་ཟེར་གྱི་ཡོད།
“ས་གནས་Monterey བོད་རིགས་སྤྱི་མཐུན་ཚོགས་པའི་རྒྱུན་ལས་མི་གསུམ་ལ་ཚོགས་མི་ཡོད་མ་རེད། ཡིན་ནའང་ང་ཚོ་གསུམ་རྒྱུན་ལས་དང་ཚོགས་མི་གཅིག་ཅོག་རེད།”
ཅེས་ཟེར་གྱི་ཡོད། གང་ལྟར་ཀྱང་ང་ལ་ལྟོས་ན་ལས་དབང་གིས་ས་མཐར་གྱར་བའི་བོད་པ་གང་ཞིག་ཡིན་ཀྱང་དམིགས་ཡུལ་གཅིག་པ། ལང་ཕྱོགས་གཅིག་པ། སྐྱིད་སྡུག་གཅིག་པ་བཅས་མདོར་ན་གཅིག་པ་གསུམ་གྱིས་མཉམ་གནས་བྱེད་དགོས་རྒྱུ་ནི་ཧ་ཅང་གལ་ཆེན་པོ་ཞིག་མཐོང་གི་ཡོད།
ལྷག་པར་དུ་དངོས་གྲུབ་རྡོ་རྗེ་ངེད་གཉིས་ནི་སྒེར་མཐུན་གྱི་གྲོགས་པོར་གྱུར་ནས་ས་གནས་གང་སར་སྤྲོ་སེང་ལ་འཁྱམས་ཉུལ་བྱས་པ་ཐེངས་མ་མང་པོ་ཡིན། མ་ཟད་དངོས་གྲུབ་རྡོ་རྗེ་ནི་ནང་ཆོས་ལའང་དོ་སྣང་ཆེ་ཙམ་ཡོད་སྟབས་ཁོང་དང་ག་དུས་འཕྲད་ཀྱང་ནང་ཆོས་ཀྱི་ཐོག་ནས་དྲི་བ་ཧ་ཅང་མང་པོ་ཡོད། དེ་ནས་༢༠༡༩ ནས་བཟུང་སྟེ་འཛམ་གླིང་སྤྱི་ལ་ནད་ཡམས་ཀྱི་དཀའ་ངལ་ཆེན་པོ་ཞིག་འཕྲད་པའི་རྐྱེན་གྱིས་མི་རྣམས་ཟུར་བཀག་དུ་གནས་དགོས་སྟབས་དངོས་གྲུབ་རྡོ་རྗེའི་ཐུགས་འདོད་ལྟར་བཀའ་བརྒྱུད་པའི་ལུགས་སྲོལ་ལྟར་སྔོན་འགྲོ་འབུམ་བཞིའི་ལུང་ཁྲིད་བཤད་པས་ཁོང་ནི་བརྩོན་འགྲུས་དང་སེམས་ཤུགས་ཅན་ཞིག་ཡིན་སྟབས་ཆོས་ཕྱིར་ལ་དཀའ་སྤྱད་ཀྱི་བཟོད་པའི་གོ་ཁྲབ་གྱོན་ནས་ཕྱག་འབུམ་དང་། མནྜལ་འབུམ། ཡིག་བརྒྱ་འབུམ། བླ་མའི་རྣལ་འབྱོར་འབུམ་བཅས་སྔོན་འགྲོ་འབུམ་བཞི་ཆ་ཚང་རིང་པོར་མ་ཐོགས་པར་གེགས་མེད་ལེགས་གྲུབ་བྱུང་བས་ང་ནི་ཁོང་གི་བརྩོན་འགྲུས་དང་། སེམས་ཤུགས་ལ་ཧ་ལས་སོང་། དེ་ནས་བཟུང་སྟེ་ངེད་གཉིས་སྒེར་མཐུན་གྱི་གྲོགས་པོའི་འབྲེལ་བ་ཙམ་མ་ཡིན་པར་ཆོས་ཕྱོགས་ནས་དགེ་སློབ་ཀྱི་འབྲེལ་བ་དམ་ཟབ་བྱུང་། ༢༠༢༤ ལོར་ཁ་ལི་ཧྥོ་ཉའི་berkeley ཁོང་ནས་སྦྱིན་བདག་དང་གོ་སྒྲིག་གནང་ནས་བོད་རིགས་རྣམས་ལ་བདེ་ཆེན་ཞིང་སྒྲུབ་ཆེན་མོ་ཐེངས་མ་དང་པོ་འཚོགས།
དངོས་གྲུབ་རྡོ་རྗེ་དང་བཟའ་ཟླ་བཀྲ་ཤིས་སྒྲོལ་མ་གཉིས་ནི་ཡ་རབ་བཟང་སྤྱོད་དང་ལྡན་པའི་བོད་པའི་མི་ཚང་ཞིག་ཡིན། ནམ་རྒྱུན་ཁོང་གཉིས་ནང་དུ་མོག་མོག་དང་བོད་ཟས་རྣམས་ཟོས་པའི་གྲངས་ཀ་ནི་བགྲང་གིས་མི་ལང་བ་ཞིག་ཡིན། སྟབས་མ་ལེགས་པ་ཞིག་ལ་དངོས་གྲུབ་རྡོ་རྗེའི་ཕ་མ་གཉིས་ཀ་ཉིའུ་ཡོག་ལ་དངོས་གྲུབ་ཀྱི་གཅེན་མོའི་ནང་དུ་ཡོད་ཀྱང་ཕ་རྒན་ཡུན་རིང་ནད་ཀྱིས་གདུང་བའི་རྐྱེན་གྱིས་༢༠༢༦ སྤྱི་ཟླ་༩་པའི་ཚེས་པ་༡༣་ལ་ཉིའུ་ཡོག་སྨན་ཁང་ནང་དུ་འདས་གྲོངས་སུ་གྱུར་འདུག དེ་མ་ཐག་ཏུ་སྨན་ཁང་ནང་ནས་གྲོགས་པོ་དངོས་གྲུབ་ཀྱིས་ཁ་པར་འབྱོར་བས་ཁོང་གི་རེ་བ་ལྟར་ང་ལ་ཕ་རྒན་གྱི་རྣམ་ཤེས་དག་པའི་ཞིང་ལ་རྡོ་འཕེན་འཕེན་བྱེད་ཐུབ་པའི་ཐུགས་རྗེ་དང་བྱིན་རླབས། ཚེ་འདས་སྐད་ཅིག་ཉིད་ལ་བར་དོའི་སྡུག་བསྔལ་ལས་སྐྱོབས་ཐུབ་པའི་ནུས་པ་སོགས་ཆེར་མེད་ཀྱང་གྲོགས་པོའི་རེ་བ་ལྟར་ཕ་རྒན་འདས་པོར་རྒྱང་འཕོ་དང་། བསྔོ་སྨོན་སོགས་རང་འཁོས་གང་ཤེས་བྱས་པ་ཡིན། དེ་བས་གལ་ཆེ་བ་ཞིག་ནི་བོད་ནང་དུ་དགོན་པ་མང་པོར་བསྔོ་ཞུས་ཀྱི་འབྲེལ་འཇོག་སོགས་ཀྱང་བྱས། རང་ངོས་ནས་ཀྱང་ཞེ་དགུ་མ་ཡོལ་བར་དུ་ཉིན་རེའི་ཞལ་འདོན་འཕར་མ་སྤྱན་རས་གཟིགས་འཁོར་བ་དོང་སྤྲུག་དང་། འོད་དཔག་མེད་ཀྱི་ཆོ་ག་སོགས་མ་ཆད་པར་བྱེད་བཞིན་པ་ཡིན།
ང་ནི་ནམ་རྒྱུན་ལས་དབང་གིས་ཁྱིམ་ཚང་གཅིག་པའི་ནང་མི་རྣམས་དང་། ཆོས་ཕྱོགས་ནས་སློབ་མ་འཇིག་རྟེན་པའི་ཕྱོགས་ནས་གྲོགས་པོ་སོགས་མདོར་ན་ངལ་་རེ་ལྟོས་དང་བློ་འགེལ་བྱེད་མཁན་རྣམས་ལ་སྤུན་མཆེད་ཀྱི་བརྩེ་གདུང་། ཆོས་ཀྱི་དམ་ཚིག། གྲོགས་ཀྱི་ཕྱི་མཐའ་སོགས་ལ་ཧ་ཅང་གཙིགས་ཆེན་དུ་འཛིན་མཁན་ཞིག་ཡིན་སྟབས་ད་རེས་གྲོགས་པོ་དངོས་གྲུབ་ལགས་ཀྱི་ཕ་འདས་གྲོངས་སུ་གྱུར་པ་ལ་ངས་ཁ་ཙམ་དང་ཚིག་ཙམ་མ་ཡིན་པར་རང་ཉིད་ཕ་མ་གཉིས་པོས་སྔ་ནས་བསྐྱུར་བའི་དྭ྄་ཕྲུག་ངོ་མ་ཞིག་ཡིན་པའི་སྟབས་ཀྱིས་ཁྱེད་ལ་སེམས་གཏིང་ནས་གདུང་སེམས་མཉམ་བསྐྱེད་ཞུ།།
ལར་ནས་སྤྱོད་འཇུག་ལས། སྐྱེ་ནའང་གཅིག་པུ་སྐྱེ་འགྱུར་ཞིང་།། འཆི་ནའང་དེ་ཉིད་གཅིག་འཆི་སྟེ།།
སྡུག་བསྔལ་བསྐལ་གཞན་མི་ལེན་ན།། གེགས་བྱེད་མཛའ་བས་ཅི་ཞིག་བྱ།།
ཞེས་གསུངས་པ་དང་ལྷག་པར་དུ་སྐྱེས་པའི་ཐ་མ་འཆི་བ་དང་། འདུས་པའི་ཐ་མ་འབྲལ་བ་སོགས་འཁོར་བ་སྡུག་བསྔལ་གྱི་རང་འཚང་འདི་རྣམས་སེམས་ལ་ངེས་པའི་ཐོག་ནས་ནམ་ཞིག་རང་ཉིད་ཀྱང་ལམ་འདིའི་ནང་དུ་མི་འདོད་བཞིན་དུ་འགྲོ་དགོས་ངེས་པས་དེ་བས་ད་ལྟ་ནས་གྲོགས་པོ་དངོས་གྲུབ་རྡོ་རྗེ་ཁྱེད་ནས་ཀྱང་དེ་བཞིན་དུ་འཆི་བའི་སྐབས་སུ་ནི་དམ་པའི་ཆོས་ཁོ་ན་ལས་གཞན་སྐྱབས་གནས་སུ་གང་ཡང་མེད་སྟབས་ད་ལྟ་ནས་རང་དྲིན་རང་ལ་ཆེ་བ་ནི་དམ་པའི་ཆོས་ཁོ་ན་ལ་བརྩོན་པ་མ་བརྗེད་པར་གནང་རོགས་ཞེས་འབོད་སྐུལ་ཙམ་ཡིན་ནོ།།