ཡེ་ཤུའུ་ལྷ་ཁང་ཞིག་ནང་དུ་ཆོས་བཤད་པའི་ཉིན་མོ།

ཡེ་ཤུའི་ལྷ་ཁང་ནང་དུ་ཆོས་བཤད་བྱེད་བཞིན་པ།

ཞོགས་པ་ལངས་ནས་འཆར་ཅན་ལྟར་དུ་ཁ་འདོན་རྣམས་ཚར་བར་བྱས་ཤིང་། འོག་ཤོད་ཐབ་ཚང་ནང་དུ་སོང་ནས་ཞོགས་ཟས་མདོར་བསྡུས་ཞིག་ལ་རོལ་ནས་དེ་རིང་གི་ཉིན་མོའི་གནམ་གཤིས་ཧ་ཅང་བཟང་བས་གཟུགས་པོའི་འཕྲོད་བསྟེན་གྱི་ཆེད་དུ་ཕྱི་རོལ་དུ་རྐང་འགྲོས་ཀྱིས་ཆུ་ཚོད་གཅིག་ལྷག་སོང་ནས་ནང་དུ་འབྱོར། གློ་ཁུག་ནང་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་བྷོ་སི་ཏྲོན་ལ་ཡོད་པའི་ཡེ་ཤེས་དང་དཀོན་མཆོག་བཟའ་མི་གཉིས་རེད་འདུག ཁོ་རང་གཉིས་རྒྱ་གར་ལ་གནས་སྐོར་ལ་སོང་ནས་ཟླ་བ་མང་པོ་ཕྱིན་ཅིང་ཚུར་འབྱོར་ནས་ངོས་ལ་ཁམས་འདྲིའི་ཁ་པར་རེད་འདུག དེ་ནས་དྲ་ངོས་སུ་ཉུལ་བས་ཡང་སྐྱར་སེམས་སྐྱོ་དགོས་པ་ཞིག་ལ་ཨ་མདོ་ཀིརྟི་དགོན་པའི་ཟུར་ནས་གྲྭ་ཆུང་གཉིས་ནས་དུས་གཅིག་ཏུ་གཟུགས་པོ་མེ་ལ་ཕུལ་བའི་ཆེས་ཡ་ང་བའི་གནས་ཚུལ་ཞིག་དང་མ་ཟད་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ཀྱི་སྐུ་ཕུང་རྡ་རམ་ས་ལ་གདན་འདྲེན་ཞུ་སྐབས་བོད་རིགས་སྐྱ་སེར་སྟོང་ཕྲག་མང་པོའི་ལག་ཏུ་ཁ་བཏག་བཟུང་ནས་ངུ་གདངས་ཀྱིས་བང་བསྒྲིགས་ནས་ཕེབས་བསུ་བྱེད་པ་ཆེས་ཡ་ང་བའི་གནས་ཚུལ་མི་འདོད་བཞིན་དུ་མཐོང་རྒྱུ་འདུག ད་ཡིན་ན་དུས་རབས་འདི་ཡི་གཞིས་བྱེས་གཉིས་ཀྱི་བོད་རིགས་རྣམས་ཀྱིས་སྐྱིད་མིན་སྡུག་གི་ཁུར་པོ་དེ་འདས་པའི་མི་ལོ་ལྔ་བཅུའི་རིང་ཁུར་ཀྱང་འཇིག་རྟེན་ཁ་དཔེར། སྡུག་ཁུར་པོ་གཉིས་དེ་ཇེ་ལྕི། ཞེས་པའི་དཔེ་ལྟར་དུ་ལུང་པ་མེད་པའི་མི་ཞིག་ཡིན་ན་ཉིན་རེ་བཞིན་དུ་མི་འདོད་ཀྱང་སེམས་ཁྲལ་དང་སྡུག་བསྔལ་ནི་ཇེ་ཆེ་རེད་འདུག། 

ངོས་ལ་ལྟོས་ན་དེ་རིང་གི་ཉིན་མོ་འདི་ཟླ་བ་ཁ་ཤས་སྔོན་ནས་གྲ་སྒྲིག་བྱས་པའི་ཡེ་ཤུའི་ལྷ་ཁང་ཞིག་གི་ནང་དུ་ཆོས་བཤད་རྒྱུ་དེ་ཡིན་སྟབས་ཉིན་གུང་ཟ་མ་ཞིག་ཟོས་ནས་གཟུགས་པོ་བཀྲུས་ཤིང་ཆོས་བཤད་ལ་འགྲོ་བའི་གྲ་སྒྲིག་བྱས་ནས་བསྡད། ཆུ་ཚོད་ལྔ་པའི་སྐབས་སུ་ངོས་ཀྱི་རླངས་འཁོར་ཁ་ལོ་བ་ཨ་མ་སུས་སིན་སླེབས་བྱུང་བས་ངེད་གཉིས་ཤར་རྒྱག་ཆོས་བཤད་ས་རུ་སོང་བས་ངོས་ཀྱི་ཆོས་ཚོགས་ཀྱི་ཚོགས་གཙོ་ཧར་ཌིའི་དང་སེའི་ཊེའི་ཧྥེའུ་ནེ་གཉིས་ནས་མཆོད་གཤམས་དང་གྲ་སྒྲིག་བྱེད་བཞིན་འདུག ཆུ་ཚོད་བདུན་པའི་སྐབས་སུ་ཆོས་བཤད་མགོ་འཛུགས་བྱས་པས་ཁང་པ་དེའི་ནང་གི་རྐུབ་སྟེགས་ཕལ་ཆེར་ཁེངས་འདུག དེ་རིང་གི་ཆོས་བཤད་ཀྱི་བརྗོད་བྱའི་གཙོ་བོ་ནི་ happiness in a troubled world,བོད་ཡིག་ནང་དུ་༼འཛམ་བུའི་གླིང་རྙོག་དྲའི་སྐབས་སུ་བདེ་སྐྱིད་འཚོལ་བ་༽ ཞེས་པ་ཞིག་ལ་ཤུགས་བསྟན་དུ་གོ་ཨི་དགོས་ན་སྙམ། བརྗོད་བྱ་དེ་ཉིད་གཞི་རྩར་བྱས་ནས་ངོས་ཀྱི་སྐད་བསྒྱུར་བྱམས་པ་མཐར་ཕྱིན་བརྒྱུད་ནས་ཆོས་བཤད་བྱས་པས་མི་མང་པོ་ཞིག་ནས་ཧ་ཅང་དགའ་བོ་བྱས་སོང་། དེ་རིང་གི་ཆོས་བཤད་སྐབས་སུ་སྡོམ་པས་མི་གྲངས་བརྒྱད་བཅུ་འདུག་ཞེས་ངོས་ཀྱི་ཆོས་ཚོགས་འགན་འཛིན་ནས་དགའ་བཞིན་དུ་བཤད་བྱུང་། དེ་ནས་ཆོས་བཤད་གྲུབ་མཚམས་སུ་པར་བླངས་པ་དང་སོ་སོའི་ཟུར་འཕྲད་ངོ་སྤྲོད་སོགས་ཀྱིས་ཆོས་ཞུ་བ་རྣམས་ཀྱི་བློ་ཁ་ཡོངས་སུ་བཀང་ནས་ནང་དུ་འབྱོར་ཞིང་དགུང་ཟས་སུ་ཁ་སང་ཐུག་ལྷག་དེ་ཚ་བོ་བྱས་ནས་འཐུང་ཅིང་ཉལ་སར་སོང་ནས་གཉིད་དུ་ཡུར།