ཁ་འདོན་བྱས་ནས་ནང་དུ་བསྡད་པའི་ཉིན་མོ།

འབྲལ་མེད་འཆང་བའི་བེའུ་བུམ།

ཞོགས་པ་ལངས་ནས་གཟུགས་པོའི་འཕྲོད་བསྟེན་གྱི་ཆེད་དུ་རྐང་འགྲོས་ཀྱིས་སྐར་མ་སུམ་ཅུ་ཙམ་སོང་ནས་ཞོགས་ཟས་ལ་རོལ། དེ་རིང་གནམ་གཤིས་དེ་ཧ་ཅང་བཟང་བས་ཆུ་དྲོད་འཇམ་གྱི་འགྱིག་གཞོང་ནང་དུ་སྐར་མ་ཉི་ཤུ་ཙམ་གན་རྐྱལ་དུ་ཉལ་ནས་ནམ་མཁར་བལྟས་པས་བར་སྣང་དུ་སྤྲིན་པ་རྣམས་འགུལ་འཁྱུག་དང་། ཟུར་གྱི་ལྡུམ་རའི་ནང་ནས་བྱེའུ་སྐད་སྙན་སོགས་ཀྱིས་ཧ་ཅང་སྐྱིད་པོ་བྱུང་། དེ་རིང་ནི་དམིགས་བསལ་གྱི་ལས་ཀ་སོགས་གང་ཡང་མེད་སྟབས་ནང་དུ་ཡོང་ནས་མཆོད་པ་རྣམས་གཤམས་ནས་རྒྱུན་ཁྱེར་གྱི་ཁ་འདོན་རྣམས་དབུ་བཟུང་ནས་ཐུན་ཆུང་ཞིག་བཟུང་། ལོ་མང་རིང་བསྙེན་པའི་གསང་ཐིག་ཕུར་པའི་བསྙེན་མཚམས་སྐབས་སུ་ཟབ་བདུན་སྒྲུབ་ཁོག་གཞུང་ལས་ནང་དུ།
"རང་སེམས་སྤྲོས་པ་ཐམས་ཅད་དང་བྲལ་བ་རྡོ་རྗེ་གཞོན་ནུའི་ངང་དུ་རྫོགས་ཤིང་ངོ་བོ་སྟོང་ལ་རང་བཞིན་གསལ་བའི་སྣང་ཆ་རྣམས་དངོས་མེད་སྒྱུ་མ་ལྟ་བུ་རྟོགས་བྲལ་ཤར་གྲོལ་དུས་མཉམ་འོད་གསལ་གྱི་ངང་དུ་མཉམ་པར་བཞག"
ཅེས་པ་དང་། གསང་ཐིག་ནང་གི་ཟིན་བྲིས་སུ།
"རང་གི་སེམས་ཉིད་འདི་དག་ནི། རྡོ་རྗེ་གཞོན་ནུ་ཉིད་དུ་བལྟ།"
ཞེས་པའི་ཚིག་འདི་རྣམས་ཀྱི་དོན་ལ་ལེགས་པར་བསམ་བློ་གཏང་དུས་སྟོང་ཉིད་མངོན་སུམ་དུ་མ་རྟོགས་ཀྱང་ཡིད་དཔྱོད་བློས་བྱས་ཀྱི་སྦུབས་ལས་གྲོལ་བའི་ད་ལྟའི་གསལ་རིག་གི་ཤེས་པ་སོ་མ་འདི་ལ་སྦར་འཛིན་བྱས་དུས་སེམས་ལ་ངེས་ཤེས་ཐུན་མོང་མ་ཡིན་པ་ཞིག་འདུག་དྲན་ཤེས་དང་མ་བྲལ་བར་བླུན་སྒོམ་སྡུག་རྩིར་དུ་མ་སོང་བར་དཔྱད་འཇོག་སྤེལ་མས་གཞི་བཟུང་ཞིང་། མོས་གུས་ཀྱིས་གསོས་བཏབས་ནས་བསྡད་པས་སེམས་ལ་ཧ་ཅང་སྐྱིད་པོ་བྱུང་།
ཨ་རི་བའི་བཟའ་ཟླ་གཉིས་ཉིའུ་ཡོག་ནས་ངོས་ལ་ཐུག་འཕྲད་དུ་འབྱོར་བྱུང་བས་ཁོ་རང་གཉིས་ཀྱི་འདོད་པ་ལྟར་དུ་ཟ་ཁང་ཞིག་ནང་དུ་སོང་། བཙོ་བསྲེགས་སོགས་གང་ཡང་མ་བྱས་པའི་སྔོ་སྡེར་མ་གང་སྤྲད་བྱུང་བས་ནུབ་ཟས་སུ་སྔོ་ཚལ་རིགས་རྗེན་ཟས་རྣམས་འགྲང་ཚད་ཟོས། ཟུར་ནས་ངོས་ཀྱི་དགེ་ཕྲུག་ཞིག་ནས་སྔོ་ཚལ་གྱི་རིགས་རྣམས་འཕྲོད་བསྟེན་ལ་བཟང་རབ་དང་ཡག་རབ་ཀྱི་སྐད་ཆ་ལུང་པ་གང་བཤད་ཀྱི་འདུག་པས་ཡིན་མདོག་མདོག་གིས་ཉན་ནས་བསྡད་པ་ཡིན། ནང་དུ་འབྱོར་ནས་དེ་རིང་གི་ཉིན་ཐོ་མ་ཆད་ཙམ་ཞིག་གཏང་ཞིང་ཉལ་སར་སོང་ནས་གཉིད་དུ་ཡུར།