Saturday, September 14, 2013

པདྨ་འོད་གསལ་གླིང་ལ་སོང་བའི་ཉིན་མོ།

བླ་མ་མཐར་ཕྱིན་དགོངས་རྫོགས་མཆོད་འབུལ་བྱེད་བཞིན་པ།
ཉེ་བའི་ཆར་རྤིག་གསུར་ཞེས་སྐད་གྲགས་ཅན་གྱི་ས་ཆ་དེར་ཉིན་ཁ་ཤས་མཚམས་ལ་བསྡད་ལ་སོང་། དེ་རིང་ནི་ངོས་ཀྱི་ཆོས་གྲོགས་བླ་མ་མཐར་ཕྱིན་རིན་པོ་ཆེ་དགོངས་པ་རྫོགས་ནས་ཞགས་པོ་ཞེ་དགུའི་ཉིན་མོ་ཡིན་པས་པདྨ་འོད་གསལ་གླིང་འདུས་སྤྱི་ཐུན་མོང་གི་ངོ་ལྟར་ཞོགས་པ་ཆུ་ཚོད་བརྒྱད་ནས་མཚམས་ཧར་ལང་བྱས་ནས་པདྨ་འོད་གསལ་གླིང་ལ་མི་ཡོང་ཁག་མེད་ཆགས་སོང་། དེ་རིང་ནི་མི་མང་གིས་འཚང་ཁ་ཤིག་ཤིག་རེད་འདུག དེ་རིང་གི་རྡོ་རྗེ་སློབ་དཔོན་རུ་ཞིང་གཤེགས་བླ་མ་མཐར་ཕྱིན་རིན་པོ་ཆེའི་ཚ་བོ་སློབ་དཔོན་འཇིགས་མེད་དང་། གཞན་མཁན་སྤྲུལ་ངོ་ཤེས་པ་མདོར་ན་ཁྲི་འཐོབ་ཀྱི་བན་སྔགས་བདུན་བརྒྱད་ཙམ་ཞིག་དང་། ཕྱི་རྒྱལ་མགོ་སེར་བོད་རིགས་ཁ་ཤས་བཅས་བསྡོམས་པས་དེ་རིང་མི་གྲངས་ཉིས་བརྒྱ་མ་ཟིན་ཙམ་ཞིག་འདུག 
དེ་རིང་གི་ཆོ་ག་ནི་སྨིན་གླིང་རྡོར་སེམས་བླ་མ་མཆོད་པའི་ཚོགས་མཆོད་དང་དབང་ལེན་སོགས་རེད་འདུག ངོས་ནི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེའི་སྐུ་དྲིན་གྱིས་བཀའ་རྙིང་གི་ཆོ་ག་ཕྱག་ལེན་དང་བཅའ་འདོན་གར་སྟབས་སོགས་ལ་གང་དུ་སོང་ཀྱང་ངོ་གནོང་མི་དགོས་ཙམ་ཞིག་ཡོད་པས་དེ་རིང་གི་འདོན་པའི་རྟ་དབྱངས་དང་། ཕྱག་རྒྱ་གར་པད་སོགས་ཅུང་མི་འདྲ་ཡང་ཕལ་ཆེར་གཅིག་མཚུངས་རེད་འདུག ངས་ཀྱང་སྔ་ནས་གྲ་སྒྲིགས་བྱས་ཟིན་པའི་བླ་མ་མཐར་ཕྱིན་རིན་པོ་ཆེའི་སྐུ་པར་ཟླ་ཤས་གོང་ནས་ངོས་ཀྱི་དགེ་ཕྲུག་རྣམས་དང་ལྷན་ཁོང་མཇལ་ཁར་སོང་བའི་སྐབས་སུ་པར་པ་ངོས་ཀྱི་དགེ་ཕྲུག་ཨོ་ཤང་ནས་བླངས་པའི་པར་སྤུས་ལེགས་ཞིག་ཡོད་པ་པར་བརྒྱ་ཐམ་པ་བཟོས་ནས་དེ་རིང་མི་མང་ལ་སྤྲད་ཀྱང་མི་ཕྱེད་ཀ་ཙམ་ལ་ཐོབ་མ་སོང་ཀྱང་ཐབས་ཤེས་གང་ཡང་མི་འདུག
པདྨ་འོད་གསལ་གླིང་ལ་ཅུང་མི་འདྲ་བ་ཞིག་ཡོད་པ་དེ་ནི་ཚོགས་དྲངས་པའི་སྐབས་སུ་གཞོན་ནུ་མཛེས་མའི་མཆོད་གཡོགས་རེ་མཁན་སྤྲུལ་བན་སྔགས་རེའི་མདུན་དུ་ལངས་ནས་ལག་གཡོན་པའི་ནང་དུ་ཨ་རག་ཤེལ་བུམ་གང་རེ་དང་ལག་གཡས་པའི་ནང་དུ་ཚོགས་རྫས་ཀྱིས་བཀང་བའི་སྡེར་མ་རེ་ལག་སྣོལ་མའི་ཚུལ་དུ་འབུལ་སྲོལ་འདུག ཕར་ལྟ་དུས་ལེན་པ་པོས་ཀྱང་ལག་སྣོལ་མའི་ཚུལ་དུ་ལེན་དགོས་འདུག ངས་ནི་མི་ཚེ་དེར་ཨ་རག་ཧུབ་འཐུང་བྱེད་མྱོང་མེད་པས་དམ་ཚིག་གི་རྫས་ཀྱི་ཚུལ་དུ་ལྕེ་ཐོག་ཏུ་མྱང་ཙམ་བྱས་ནས་བཞག་ཀྱི་ཡོད། གཡས་གཡོན་གྱི་བན་སྔགས་རྣམ་པས་ཨ་རག་ལ་རྔུབ་འཐུང་དང་ཚོགས་ཤ་ལ་ཧབ་ཟོས་བྱེད་ཀྱི་འདུག་པས་ཕལ་ཆེར་ཉིན་གུང་ཟ་མའི་དོད་འདྲ་ཆགས་སོང་། 
དེ་ནས་ཆུ་ཚོད་གཉིས་པའི་སྐབས་སུ་འདོན་པ་ཚར་སོང་བས་བན་སྔགས་མཁན་སྤྲུལ་རྣམས་ལ་གྱེས་བྲལ་གྱི་ཐོད་གཏུག་དང་། ལག་འཆང་། འཐམ་འཁྱུད་སོགས་ཅི་རིགས་བྱས་ནས་ཨ་མ་སུས་སིན་ངེད་གཉིས་རླངས་འཁོར་སྐར་མདའ་ཆད་པ་ནང་བཞིན་མོན་ཊེའི་རུའི་ལ་དགོངས་མོ་ཆུ་ཚོད་ལྔ་པའི་སྐབས་སུ་འབྱོར། 
དེ་རིང་གི་ཉིན་ཐོ་མདོར་བསྡུས་ཞིག་གཏངས་ནས་ཉལ་སར་སོང་ནས་གཉིད་དུ་ཡུར། 

No comments:

Post a Comment