མེར་བསྲེགས་ཀྱི་གྲངས་ཀ་བརྒྱ་ལ་སླེབས་པའི་ཉིན་མོ།

བལ་ཡུལ་མཆོད་རྟེན་ཟུར་ནས།  

དེ་རིང་ཞོགས་པ་ལངས་ནས་ཁ་འདོན་རྣམས་ཚར་མ་ཐག་ཏུ་དྲྭ་ངོས་སུ་འཛུལ་བས་བལ་ཡུལ་མཆོད་རྟེན་བྱ་རུང་ཁ་ཤོར་གྱི་འགྲམ་ནས་བོད་རིགས་ཞིག་ལུས་ནས་མེ་དམར་ལྷབ་ལྷབ་ཏུ་འབར་བཞིན་མཆོད་རྟེན་ལ་ཁ་ཕྱོགས་ནས་ལང་བཞིན་པ་ཞིག་མཐོང་སོང་། དེ་མ་ཐག་ཏུ་མཆོད་རྟེན་འགྲམ་དུ་བཞུགས་མཁན་ངོས་ཀྱི་གྲོགས་པོ་ཞིག་ལ་ཁ་པར་གཏང་བས་ཁོང་ནས་གསུངས་ན་མེར་བསྲེགས་གཏོང་མཁན་དེ་གྲྭ་པ་ཞིག་རེད་འདུག་ཕ་ཡུལ་དང་མིང་སོགས་གང་ཡང་ཤེས་ཀྱི་མི་འདུག་ཟེར། དྲྭ་ཚིག་འགའ་ཞིག་གི་ནང་དུ་ཕ་ཡུལ་ཁམས་ནང་ཆེན་ནས་ཡིན་པ་དང་མིང་ལ་ལྷུན་འགྲུབ་རྡོ་རྗེ་ཞེས་འཁོད་འདུག ཁ་ཤས་ཀྱིས་ཕ་ཡུལ་སྟོད་དིང་རི་ནས་ཡིན་པ་དང་མིང་གཅིག་པ་རེད་འདུག གང་ལྟར་ཀྱང་སེམས་ཤུགས་དང་ལྷག་བསམ་དུང་བས་དཀར་ཞིང་བོད་རིགས་མི་རིགས་ཀྱི་དཔའ་བོ་ཞིག་དེ་རིང་སྐར་ཆ་ཁ་ཤས་ནང་དུ་རུས་ཐལ་སྦར་མོ་གང་ལ་རྗེས་པ་དེ་ལ་བསམ་ནས་འདས་པོའི་གླན་ཞེད་ཀྱི་ལྷག་བསམ་དང་སེམས་ཤུགས་ལ་ཡི་རངས་དང་རང་འདྲའི་ཤུལ་ལུས་བོད་རིགས་རྣམས་དཀའ་སྡུག་ལ་བསམ་ནས་སེམས་ལ་སྐྱོ་བ་ལ་ཚད་མེད་པ་འདྲ་བྱུང་། 
དེ་མ་ཐག་ཏུ་ཡང་སྐྱར་དྲ་ཚིག་ངོས་ནས་མཐོང་གསལ་ལྟར་དུ་བྱས་ན་བོད་རྔ་བ་རང་སྐྱོང་ཁུལ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་ནས་རྒྱ་ནག་གཞུང་གི་སྲིད་ཇུས་ལ་མི་འདོད་པའི་རྣམ་འགྱུར་ཆེད་རང་ལུས་མེར་བསྲེགས་གཏངས་འདུག སི་ཁེབ་ནང་དུ་ཉུལ་ནས་ཉིའུ་ཡོག་གཞོན་ནུའི་ཚོགས་གཞོན་ངོས་ཀྱི་གྲོགས་པོ་མགོན་པོ་མཉམ་དུ་སྐད་ཆ་བྱས་པས་ཁོང་ནས་གསུངས་ན་དེ་རིང་རྒྱལ་མཆོག་བཅུ་གསུམ་པ་ཆེན་པོའི་བོད་རང་བཙན་གསལ་བསྒྲགས་གནང་ནས་མི་ལོ་བརྒྱ་འཁོར་བའི་དུས་ཆེན་མཛད་སྒོའི་སྐོར་མང་པོ་ཞིག་གསུངས་སོང་། ང་ནི་ས་གནས་འདིར་འབྱོར་ནས་སོ་སོའི་བློ་མཐུན་སྐྱིད་གཏམ་སྡུག་གཏམ་གི་སྐད་ཆ་བཤད་ས་ཞིག་ཡོད་པ་དེ་ནི་ཉིའུ་ཡོག་ནས་མགོན་པོ་དང་། པོར་ལེན་ནས་པདྨ་ཆོས་འཕེལ་གཉིས་ཡིན། ད་ཡིན་ན་བོད་རིགས་ཉམ་ཐག་རྣམས་ཀྱི་མེར་བསྲེགས་ཀྱི་ལས་འགུལ་འདི་ལ་རྒྱལ་གཅེས་དང་འཛམ་གླིང་སྟོབས་ཆེན་རྒྱལ་ཁབ་སུ་གང་གིས་ཚད་བཀག་དང་ཚོད་འཛིན་སོགས་མི་བྱེད་པ་མ་ཟད་ད་དུང་བོད་རིགས་རྣམས་ཀྱིས་རྒྱལ་ཁབ་དང་གཞུང་ཚབས་སོགས་ཀྱི་སྒོ་བརྡུང་བའི་སྐབས་སུ་རི་བོང་རྡོ་རྫུས་བྱེད་ནས་བསྡད་པ་འདི་ལ་བསམ་ནས་སྙིང་རླུང་འདྲ་ལངས་བྱུང་། 
ཁ་སང་ཀ་རྩོམ་གྱི་འཕྲོ། 
 ཞྭ་མོའི་དབྱིབས་མདོག་ཙམ་ལ་བསྟན་རྩ་རང་འཛིན་ཅིང་།།
ཟ་ཉལ་སྤྱོད་སོགས་འཇིག་རྟེན་ཐ་མལ་ལས་སྡུག་པ།།
འ་ཅག་བོད་བསྟན་བདག་པོ་ང་འདྲ་ཡི་སེར་གཟུགས།།
ཡ་མ་རཱ་ཛའི་མདུན་ནས་བྲོས་ས་འདྲ་ཡོད་དམ།།
དེ་རིང་གི་སེམས་སྐྱོ་བའི་མིག་ཆུའི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར།