༄༅། སྙིང་གཏམ་ཆོས་ཀྱི་བདུད་རྩི་ཞེས་བྱ་བ་བཞུགས་སོ།
ཕན་བདེའི་ལེགས་ཚོགས་འབྱུང་བའི་སྒོ་གཅིག་པུ། །
མ་ནོར་ལམ་སྟོན་དགེ་བའི་བཤེས་གཉེན་ཆེ། །
བཀའ་དྲིན་འཁོར་མེད་རྩ་བའི་བླ་མ་ལ། །
གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །
༡ སྙིང༵་གི་བུ་སློབ་རྣམས་ལ་ཆོས་ཀྱི་གཏམ། །
སྙིང༵་ནས་གང་དྲན་ཡེ་གེར་བྲིས་པ་འདི། །
སྙིང༵་གི་དཀྱིལ་དུ་ཞོག་ལ་ཉམས་ལེན་བྱོས། །
ཆོས་གྲོགས་རྡོ་རྗེའི་སྤུན་ལ་སྙིང་གཏམ་ཡིན། །
༢ མི་ལུས་རིན་ཆེན་གྲུ་གཟིངས་ལྟ་བུ་འདི། །
ཡང་ནས་མི་རྙེད་ད་རེས་ཙམ་ཞིག་ཡིན། །
འཇིགས་རུང་འཁོར་བའི་རྒྱ་མཚོ་ཆེན་པོ་ལས། །
གྲུ་འདི་དལ་དུ་མ་འཇུག་སྙིང་གཏམ་ཡིན། །
༣ རྟེན་བཟང་རྙེད་པར་དཀའ་བ་ཐོབ་དུས་འདིར། །
དོན་མེད་སྡིག་པའི་ལས་ལ་བཀོལ་བ་ན། །
གསེར་དང་བོང་བ་བརྗེས་པའི་ཚུལ་ལགས་པས། །
རྟེན་འདི་ཆུད་ཟོས་མ་བྱེད་སྙིང་གཏམ་ཡིན། །
༤ མཉམ་མེད་ཟས་གཙང་སྲས་པོའི་ཞལ་ནས་ཀྱང་། །
བསམ་པ་བཟང་ན་ས་དང་ལམ་ཡང་བཟང་། །
བསམ་པ་ངན་ན་ས་དང་ལམ་ངན་གསུངས། །
བསམ་པ་བཟང་ལ་འབོད་ཅིག་སྙིང་གཏམ་ཡིན། །
༥ སེམས་ནི་ཀུན་བྱེད་དབང་གི་རྒྱལ་པོ་དང་། །
ལུས་ནི་དགེ་སྡིག་ཀུན་གྱི་གཡོག་པོ་ཡིན། །
ལུས་ངག་ལྟར་སྣང་དགེ་ལ་མི་གཙོ་བས། །
རྒྱུན་དུ་སེམས་འདི་སྲུངས་ཤིག་སྙིང་གཏམ་ཡིན། །
༦ འགྲོ་བ་འདི་ཀུན་བདེ་གཤེགས་སྙིང་པོ་ཅན། །
འོ་མར་མར་གྱིས་ཁྱབ་པ་ཇི་བཞིན་དུ། །
ཚོགས་གཉིས་ལམ་གྱིས་འབད་པས་བསྲུབས་པ་ན། །
ནམ་ཞིག་མངོན་དུ་འགྱུར་རོ་སྙིང་གཏམ་ཡིན། །
༧ སངས་རྒྱས་དང་ནི་སེམས་ཅན་ཞེས་པ་དེ། །
རིག་དང་མ་རིག་གཉིས་ཀྱི་ཁྱད་པར་ཡིན། །
རྟག་ཆད་ཐ་དད་གཉིས་སུ་མ་འཛིན་ན། །
སངས་རྒྱས་རང་ལས་རྙེད་དོ་སྙིང་གཏམ་ཡིན། །
༨ འཁོར་བ་དང་ནི་མྱང་འདས་ཟེར་བ་དེ། །
ལག་པའི་ལྟོ་རྒྱབ་ཙམ་གྱི་ཁྱད་པར་ལས། །
ཕྱོགས་རིས་གཉིས་འཛིན་བློ་དེ་ཡོངས་སྤོངས་དང་། །
ཞིང་ཁམས་གཞན་ན་མེད་དོ་སྙིང་གཏམ་ཡིན། །
༩ དུས་གསུམ་རྒྱལ་བ་ཀུན་གྱི་གཤེགས་པའི་ཤུལ། །
ཆོས་ཕུང་བརྒྱད་ཁྲི་བཞི་སྟོང་ཡང་སྙིང་གི །
གཞན་ཕན་བྱང་ཆུབ་སེམས་ཀྱི་མན་ངག་འདི། །
མ་བརྗེད་ཉམས་ལེན་བྱོས་ཤིག་སྙིང་གཏམ་ཡིན། །
༡༠ མང་པོའི་ནང་ནས་ངག་ལ་བརྟག་པ་དང་། །
གཅིག་པུར་འདུག་དུས་སེམས་ལ་བརྟག་ཅེས་གསུངས། །
སྤྱོད་ལམ་སྐབས་སུ་རང་གི་སྒོ་གསུམ་པོ། །
ཡང་ནས་བརྟག་དཔྱད་གྱིས་ཤིག་སྙིང་གཏམ་ཡིན། །
༡༡ སྦྱོར་བ་སེམས་བསྐྱེད་དངོས་གཞི་དམིགས་པ་མེད། །
རྗེས་ལ་བསྔོ་བས་ཡོངས་སུ་ཟིན་པ་ནི། །
ཐར་ལམ་བགྲོད་པའི་གཅེས་པ་རྣམ་གསུམ་གསུངས། །
མ་བརྗེད་སེམས་ལ་ཞོག་ཅིག་སྙིང་གཏམ་ཡིན།
༡༢ རང་ལ་དཔལ་དང་འབྱོར་པ་སྙན་གྲགས་དང་། །
ཡོན་ཏན་ལ་སོགས་ཇི་ལྟར་ཡོད་ཀྱང་རུང་། །
ང་རྒྱལ་མགོ་འཕང་དགུང་བས་མི་མཐོ་བ། །
རྟག་ཏུ་དམན་ས་ཟུངས་ཤིག་སྙིང་གཏམ་ཡིན། །
༡༣ སྐྱིད་པའི་སྐབས་སུ་མཆོང་ལྡིང་བྱེད་པ་དང་། །
སྡུག་པའི་སྐབས་སུ་ངུ་སྐད་འདོན་པ་སོགས། །
ལྟར་སྣང་མཐོ་དམན་སྐྱིད་སྡུག་ཅི་བྱུང་ཡང་། །
སྐྱིད་སྡུག་ཐེགས་པར་གྱིས་ཤིག་སྙིང་གཏམ་ཡིན། །
༡༤ གང་གི་མཚན་ཙམ་ཐོས་པས་ངན་སོང་ལས། །
མ་འཇིགས་ང་ཡིས་སྐྱབས་ཞེས་དམ་བཅས་པ། །
སངས་རྒྱས་འོད་དཔག་མེད་ཀྱི་ལྷ་འདི་ཉིད། །
གཏན་གྱི་སྐྱབས་སུ་བསྙེན་ཅིག་སྙིང་གཏམ་ཡིན།
༡༥ སྙིང་པོ་ཨ་མི་དྷེ་ཝའི་སྲོག་སྔགས་འདི། །
བུ་ཆུང་མ་ལ་འབོད་པའི་གདུངས་དབྱངས་ལྟར། །
ཉིན་མཚན་དུས་དྲུག་རྣམས་སུ་བསྙེན་པ་ན། །
ཐུགས་རྗེས་གཟིགས་པ་མྱུར་རོ་སྙིང་གཏམ་ཡིན། །
༡༦ བླ་སློབ་ཡུན་དུ་འདྲིས་པའི་དམ་ཚིག་དེ། །
གལ་གནད་སྐབས་སུ་ཆུ་ལ་མ་བསྐྱུར་བར། །
གཅེས་པའི་སྲོག་ལས་དམར་བའི་འདུ་ཤེས་ཀྱིས། །
མ་བརྗེད་སྙིང་ལ་ཞོག་ཤིག་སྙིང་གཏམ་ཡིན། །
༡༧ ངས་ཀྱང་ཁྱེད་རྣམས་ཆོས་ཀྱི་བཀའ་དྲིན་ཆེ། །
ཁྱེད་རྣམས་ངོས་ལ་ཟང་ཟིང་བཀའ་དྲིན་ཆེ། །
ཕན་ཚུན་གཅིག་ཕན་གཅིག་གྲོགས་བྱས་པ་དེ། །
ཆོས་མཐུན་དམ་པའི་ལས་ཡིན་སྙིང་གཏམ་ཡིན།
༡༨ མདོར་ན་གང་དུ་གནས་པའི་སློབ་བུ་རྣམས། །
རྣམ་ཀུན་ངོས་ནས་ཆོས་སྐད་གང་བགྱིས་པ། །
དུས་ཀུན་སེམས་ནས་མ་བརྗེད་དྲན་གྱིས་དང་། །
ཡང་བསྐྱར་སྐྱིད་འཛོམས་ཡོང་ངོ་སྙིང་གཏམ་ཡིན། །
༡༩ སློབ་དཔོན་དམ་ཆོས་སྤྲིན་གྱི་མེ་ཏོག་དེས། །
སློབ་མའི་སྐྱེད་ཚལ་ལྗོན་ཤིང་རབ་ཏུ་སྨིན། །
དམ་ཆོས་དབྱར་གྱི་དཔལ་མོ་མངོན་དུ་འགྱུར། །
མི་འབྲལ་ལྷན་ཅིག་འགྲོགས་པའི་སྙིང་གཏམ་ཡིན། །
༢༠ དཀོན་མཆོག་རིན་ཆེན་གསུམ་གྱི་བདེན་སྟོབས་དང། །
ཆོས་སྐུ་ཚེ་འོད་དཔག་མེད་བྱིན་རླབས་ཀྱིས། །
ཇི་སྲིད་བྱང་ཆུབ་སྙིང་པོ་མ་ཐོབ་བར། །
འབྲལ་མེད་ཁྱེད་རྣམས་སྲུངས་ཤིག་སྙིང་གཏམ་ཡིན། །
༢༡ དེ་སྐད་རང་ཉམས་མེད་པ་གང་དྲན་དུ། །
བོང་བ་གསེར་གཟིགས་ཅན་གྱི་སློབ་བུ་འགས། །
བསྐུལ་མ་ལྟར་དུ་ཕྱོགས་མེད་རྒྱལ་ཁམས་པ། །
ཆོས་སྨྲའི་མིང་འཛིན་དེ་ཡིས་སྙིང་གཏམ་ཡིན། །
ཅེས་ཆོས་གཏམ་དུ་བྱ་བའི་སྙིང་གཏམ་ཉེར་གཅིག་པ་འདི་ཉིད་ཀྱང་རང་ལ་བོང་བ་གསེར་རློམ་ཅན་གྱི་ནུབ་ཕྱོགས་པའི་སློབ་བུ་འགའ་ཡིས་རང་ཉིད་གནས་སྐབས་ཨེ་ཤ་ཡའི་ཕྱོགས་སུ་འགྲུལ་བཞུད་མ་བྱས་གོང་འདི་ལྟ་བུ་བསླབ་བྱ་དགོས་ཞེས་སྐུལ་མ་ལྟར་དུ། གང་དྲན་དུ་ཆོས་སྨྲ་བའི་མིང་འཛིན་ཀར་བསྟན་དེས། ཨ་རིའི་བྱང་ཕྱོགས་ཁ་ལི་ཧྥོ་ཉའི་གྲོང་ཁྱེར་ནས་ཁར་མེལ་ཞེས་ཀུན་གྱིས་ཡིད་སྨོན་བྱེད་ས་གནམ་སྔོན་པོ་ཐང་ལ་ལྷུང་འདྲ་ཡོམ་ཡོམ་དུ་འཁྱིལ་བའི་རྒྱ་མཚོ་ཆེན་པོའི་ཉེ་བའི་ཆར། རང་ཤག་བསམ་གཏན་ལྡིང་ཁང་ནས་གང་དྲན་དུ་ཕྱི་ལོ་༢༠༡༢ཟླ༤པའི་ཚེས་༦ལ་བྲིས་པས་ཐམས་ཅད་ཀུན་ཏུ་དགེ་ཞིང་ཤིས་པར་གྱུར་ཅིག།སརྦ་མངྒ་ལམ།། །།