Saturday, February 15, 2014

མཚམས་ཉིན་བཅུ་པའི་སྐབས་སུ་ཚོར་སྣང་།

ཚེ་འདི་བློས་གཏང་མི་ལ་རས་པའི་ཞབས།།
ད་ནང་ཞོགས་པ་ལངས་ནས་རྒྱུན་འདོན་རྣམས་ཚར་བར་བྱས། ཞོགས་ཟས་ཚར་བ་དང་མཉམ་དུ་སྔར་བཞིན་ཡི་དམ་རྡོ་རྗེ་གཞོན་ནུའི་བསྙེན་ཐུན་ལ་ཞུགས། བསྐྱེད་རིམ་སྐབས་སུ་ཏིང་འཛིན་རྣམ་གསུམ་གྱི་ཁོག་ཕུབས་ནས་མཆོག་གླིང་གཏེར་གསར་ལས་བྱང་ཕྲིན་ལས་སྙིང་པོ་ཉིད་དཔྱད་སྒོམ་གྱིས་ཚར་བར་བྱས་ཞིང་རྫོགས་རིམ་སྐབས་སུ།
 རང་སེམས་སྤྲོས་པ་ཐམས་ཅད་དང་བྲལ་བ་གུ་རུ་པདྨའི་ངང་དུ་རྫོགས་ཤིང་ངོ་བོ་སྟོང་ལ་རང་བཞིན་གསལ་བའི་སྣང་ཆ་རྣམས་དངོས་མེད་སྒྱུ་མ་ལྟ་བུ་རྟོག་བྲལ་ཤར་གྲོལ་དུས་མཉམ་འོད་གསལ་གྱི་ངང་དུ་མཉམ་པར་བཞག 
ཅེས་ཚིག་དོན་འདིའི་ཐོག་ནས་སེམས་ཀྱི་ངོ་བོ་སྐྱོང་ཁུལ་བྱས། ལར་ནི་འགྱོད་དགོས་པ་ཞིག་ལ་རང་གཙོར་བྱས་པའི་མིང་ཆེན་པོ་ཁུར་ནས་དེང་དུས་ཀྱི་ཆོས་པའི་གཟུགས་བརྙན་ཅན་རྣམས་ལ་ཟབ་ཟབ་མཐོ་མཐོའི་ཆོས་རྫོགས་ཆེན་དང་ཕྱག་ཆེན་སོགས་ལ་ཧབ་ཐོབ་བྱེད་པ་ལས་ཡང་དག་ཆོས་ཀྱི་སྙིང་པོ་ལས་འབྲས་དང་། ལྷག་པར་འཁོར་བ་ལ་ངེས་འབྱུང་རྣམ་དག་ཞིག་མེད་པ་རྒྱུ་མཚན་འདི་ལ་བསྟེན་ནས་དེང་སང་ལུང་ཆོས་སྡེ་སྣོད་གསུམ་གྱིས་ངག་རྒྱན་ཅིང་། རྟོགས་ཆོས་བསླབ་པ་གསུམ་གྱིས་ཐུགས་རྒྱུད་ཕྱུག་པའི་ཆོས་པ་རྣམ་དག་ཞིག་མཇལ་རྒྱུ་མེད་པ་འདི་ཡིན། 
དེའང་རྗེ་རིན་པོ་ཆེའི་ཞལ་ནས།
 གང་ཚེ་ཤིན་ཏུ་ཟབ་པའི་ཆོས་ཚུལ་ལ།། 
བསམ་བྱུང་བློ་ཡིས་ངེས་ཤེས་རྙེད་པའི་ཚེ།།  
ཚེ་འདིའི་འཁྲི་བ་ཆོད་པའི་བརྩོན་འགྲུས་ཀྱིས།། 
དབེན་པ་བསྟེན་ནས་ཚུལ་བཞིན་སྒྲུབས་པར་ཤོག།  
ཅེས་དང་། 
ཀརྨ་པ་མི་བསྐྱོད་རྡོ་རྗེའི་ཞལ་ནས་ཀྱང་། 
ལྟོ་གོས་ཀྱི་ངོ་སྲུང་དང་ཆོས་བརྒྱད་ཀྱི་འབྲེལ་ཐག་ཆོད་པར་བྱིན་གྱིས་རློབས་ཤིག 
ཅེས་ཐུགས་སྨོན་གནང་བ་དང་། མི་ལ་རས་པས་སྲིང་མོ་པེ་ཏ་ལ་གདམས་པ་ལས། 
"སྤྱིར་ང་རང་འཁོར་བ་དང་ངན་སོང་གི་སྡུག་བསྔལ་འདི་ལ་འཇིགས་དྲགས། གསོན་པོར་མེ་ནང་དུ་བཅུག་པ་ལྟ་བུའི་འཇིགས་སྐྲག་ཡོད་པས་འདུ་འཛི་དང་གཡེང་བ་ཆོས་བརྒྱད་ཀྱི་འདོར་ལེན་མཐོང་ཚེ་སྐྱུག་ནད་པ་ལ་ཟན་བྱིན་པ་ལྟར་ཞེ་ལོག ཕ་བསད་ཀྱི་ལག་དམར་པོ་མཐོང་བ་ལྟར་སེམས་མི་དགའ་བ་ཞིག་ཡོད་པས་ཚེ་འདི་བློས་གཏང་བ་ཡིན། ཁྱད་པར་ང་ལ་ལྷོ་བྲག་མར་པའི་བཀའ་ལུང་ལ། འཇིག་རྟེན་ཆོས་བརྒྱད་འདུ་འཛིའི་གཡེང་བ་སྤོངས། གྱོང་ལྟོ་གོས་གཏམ་གསུམ་ལ་ཐོངས། གནས་ངེས་མེད་ཀྱི་དབེན་ས་འགྲིམས་ལ། ཚེ་འདི་བློས་གཏང་གི་བསམ་སྦྱོར་དྲག་པོས་སྒྲུབས་པ་གཙོ་བོར་ཐོན་ཅིག་གསུངས་པས་བླ་མའི་བཀའ་བསྒྲུབས་པ་ཡིན།" 
ཅེས་གསུངས་ཤིང་ཁོང་གི་ཐུགས་སྨོན་གནང་བ་ནང་བཞིན་ཆོས་པ་ཚད་ལྡན་ཅིག་བྱུང་བ་དེ་ཡང་ལམ་ངེས་འབྱུང་དང་། ལས་རྒྱུ་འབྲས་ལ་ཡིད་ཆེས་རྨ་མེད་པའི་ཐོག་ནས་ཞེ་བཅད་ཀྱི་བརྩོན་པ་དྲག་པོས་ཆོས་ལ་བརྩོན་འགྲུས་བྱས་པའི་འབྲས་བུ་ཉག་གཅིག་རེད་བསམ། བཀའ་གདམས་པའི་དགེ་བཤེས་རྣམས་ཀྱིས་ཀྱང་། ཆོས་རྣམ་དག་བྱེད་དགོས་ན་ཚེ་འདི་བློས་ཐོངས་ཞེས་ལན་གཅིག་མ་ཡིན་པར་ཡང་ནས་གསུངས་མྱོང་ཡོད། བཀའ་བརྒྱུད་མར་མི་དྭགས་གསུམ་གྱི་གསུངས་བྱིན་རླབས་ཅན་རྣམས་ལས།  
བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་བྲག་ལ་གཏད། བྲག་ཕུགས་ཤི་ལ་གཏད་ཅེས་ཆེས་ཡ་མཚན་ཅན་གྱི་ཆོས་ཚིག་འགའ་ད་དུང་ཡང་མིག་ལམ་དུ་མཇལ་རྒྱུ་ཡོད། ལུང་པ་འདིའི་ནང་ནས་ཆོས་བཤད་འདི་འདྲ་ཞིག་བཤད་ན་ཆོས་ཉན་རྒྱུ་ཕར་ཞོག་བཤད་མཁན་བླ་མ་ཉིད་ཕལ་ཆེར་རིག་འཚོའི་མ་ཟིན་པའི་གྲལ་ལ་འཇོག་ཉེན་ཡོད། དེང་སང་ང་གཙོས་ཆོས་ཁ་ནས་གྱེར་མཁན་རྣམས་ནི་གོང་གི་བཀའ་གདམས་པའི་གཏད་ས་བཞི་ལས་གོ་ལྡོག་འདི་འདྲ་ཞིག་རེད་འདུག། 
བློ་ཕུགས་འཁོར་བ་ལ་གཏད། འཁོར་ཕུགས་འཇིག་རྟེན་ཆོས་བརྒྱད་ལ་གཏད། ཆོས་བརྒྱད་སྡུག་བསྔལ་ལ་གཏད། སྡུག་བསྔལ་ཐ་མ་ཤི་བ་ལ་གཏད་ནས་ཞེ་འདོད་དང་ལག་ལེན་ལག་པ་ལྟོ་རྒྱབ་ལྟར་རྒྱབ་འགལ་དུ་སོང་ནས་ད་དུང་མིང་རྫིག་པོའི་ཆོས་ལ་མཐོ་སྙབ་བྱེད་མཁན་རྣམས་ལ་བསམ་ནས་སྙིང་ནས་སྐྱོ་བ་ཞིག་སྐྱེས་སོང་། ཆོས་གྲོགས་སམ་མཚམས་གཡོག་ཚེ་རིང་ཆོས་འཕེལ་དང་མཉམ་དུ་ཁ་བརྡ་བྱེད་ཞོར་དགོང་མོའི་ཐུན་མཚམས་སྐབས་སུ་དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར། 

3 comments:

  1. ༄། མཕན་པོ་ལགས་ནས་ཉིན་ཐོ་ཤིན་དུ་ལེགས་པོ་བྲིས་གནང་འདུག་ན་ཐུགས་ཆེ་ཞུས་ཀྱི་ཡིན་ནོ།།

    ReplyDelete
  2. ཆོས་གྲོགས་ཚེ་རིང་ཆོས་འཕེལ་ལགས་ནས་བསྔགས་བརྗོད་གནང་བ་ཐུགས་རྗེ་ཆེ། ཡིན་ནའང་མཁན་པོ་དང་འཕན་པོ་སོགས་ཡིག་ནོར་ལ་གཟབ་གནང་རོགས

    ReplyDelete