མཚམས་ལ་བསྡད་པ་ཉིན་གསུམ་པའི་སྐབས་སུ་ཚོར་སྣང་།

འབྲལ་མེད་དུ་འཆང་བའི་ཁ་འདོན་བེའུ་བུམ།

དེ་རིང་གི་ཉིན་མོ་འདི་ནི་མཚམས་ལ་བསྡད་པའི་ཉིན་གསུམ་པ་དེ་ཡིན། ད་ནངས་ཞོགས་པ་ལངས་ནས་བླ་མའི་རྣལ་འབྱོར་དང་རིམ་བཞིན་རྒྱུན་ཁྱེར་གྱི་ཁ་འདོན་རྣམས་ཚར་བར་བྱས། ཞོགས་ཟས་ཚར་བ་དང་ལྷན་ངོས་ཀྱི་ཡི་དམ་ཕུར་པ་རྡོ་རྗེ་གཞོན་ནུའི་བསྙེན་སྒྲུབ་ལ་འཇུག རང་ལོ་ཉི་ཤུའི་སྐབས་སུ་བཀའ་དྲིན་འཁོར་མེད་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་དང་། ངོས་ཀྱི་ཕ་འདས་པོ་གཉིས་ཀྱི་སྐུ་དྲིན་གྱིས་རང་དགོན་དུ་མཆོག་གླིང་གཏེར་གསར་སྒྲུབ་ཁང་ནང་དུ་སྒྲུབ་ཐེངས་ཐོག་མའི་སྐབས་སུ་ལོ་གསུམ་ཕྱོགས་གསུམ་སྒྲུབ་ཁང་ནང་དུ་འདུག་རྒྱུའི་བསྐལ་པ་བཟང་པོ་བྱུང་། དུས་དེ་ནས་བཟུང་བློ་ཆོས་སུ་འགྲོ་བའི་རྟེན་འབྲེལ་གྱི་སྒོ་འཕར་ཡངས་པོར་ཕྱེས་ནས་ཕྱིས་ཐོས་བསམ་སོགས་བཤད་སྒྲུབ་གང་བྱས་ཀྱང་གེགས་དང་བར་ཆད་མེད་པར་ཧ་ཅང་ཡག་པོ་བྱུང་། རྗེས་སོར་ལོ་གསུམ་ཕྱོགས་གསུམ་སྒྲུབ་ཁང་ཚར་བ་དང་མཉམ་དུ་ཁམས་སྡེ་དགེའི་ཕྱོགས་སུ་སློབ་གཉེར་ལ་སོང་བས་ཐོས་བསམ་གང་བྱས་པ་རྣམས་རྒྱུད་ཐོག་ཏུ་ཁེལ་བ་དང་། དེང་སང་ཐོས་པ་ཡན་གར་ཁ་ཕྱི་ལྟས་སུ་སོང་བའི་གྲྭ་རྒོད་ཞིག་དང་གཏན་ནས་མི་འདྲ་བ་འདིའང་དང་པོ་ནས་སྒྲུབ་ཁང་ནང་དུ་ཉིན་མཚན་ལྟོས་མེད་དུ་དཀའ་ལས་རྒྱབ་པའི་འབྲས་རྟགས་ཡང་དག་པ་ཞིག་ཏུ་མཐོང་། ལར་ནི་ཐོས་བསམ་སྤྱི་ཡི་འགྲོ་སྟངས་ལ་དང་པོ་ཐོས་པ་དེ་ནས་རིམ་བཞིན་བསམ་སྒོམ་སོགས་ཀྱིས་རྒྱུད་སྦྱང་དགོས་ཚུལ་རྒྱ་བོད་ཀྱི་མཁས་གྲུབ་རྣམས་ཀྱིས་མགྲིན་གཅིག་ཏུ་སྨྲ། 
སློབ་དཔོན་དབྱིག་གཉེན་གྱིས།
ཚུལ་གནས་ཐོས་དང་བསམ་གཏན་དང་།
སྒོམས་པ་ལ་ནི་རབ་ཏུ་སྦྱོར།
ཞེས་དང་།
ཆོས་རྗེ་ས་པཎ་གྱིས།
ཐོས་པ་མེད་པའི་སྒོམ་པ་ནི།
ལག་ལྡུམ་བྲག་ལ་འཛེག་པ་འདྲ།
ཞེས་ཟེར་ནས་གྲྭ་སའི་རྟོག་གེའི་རིག་པ་བ་རྣམས་ཀྱིས་གོང་གི་རྒྱ་བོད་མཁས་པའི་ལུང་དུམ་དེ་རྣམས་ཟློས་སྐྱོར་བྱེད་ནས་ལུང་རིགས་ཀྱི་མདའ་རུབ་བྱེད་ཀྱིས་གསོད་གྲབ་བྱེད་སྲིད་ཀྱང་། དོན་དུ་ལོ་གསུམ་ཕྱོགས་གསུམ་གྱི་མཐར་སོན་པར་བྱས་ནས་ད་གཟོད་གཞི་ནས་ཐོས་པའི་གཞུང་ལུགས་ཀྱི་གྲུ་གཟིངས་ལ་ཞུགས་ན་གང་ཐོས་རྒྱུའི་དཔེ་ཆ་དེ་ཉིད་ཀྱང་རྒྱུད་ཐོག་ཏུ་ཁེལ་བའི་དགོས་པ་དང་། ཐ་ནའང་གྲྭ་སར་བཞུགས་པའི་རིང་གྲྭ་རྒོད་གླང་ཆེན་སྨྱོན་པ་ལྟ་བུ་མི་ཆགས་པའི་དགོས་པའང་་ཡོད་དོ།
གང་ལྟར་ཀྱང་ང་ནི་དུས་ཚོད་གང་ཁོམ་ལ་ཐུན་མཚམས་རེར་འདུག་རྒྱུ་འདི་ནི་ངོས་ལ་མཚོན་ན་ཆེས་གལ་ཆེན་ཞིག་ཏུ་ངོས་འཛིན་བྱེད་ཀྱི་ཡོད། ཡིན་ནའང་ཁ་སང་མཚམས་ལ་མ་བསྡད་པའི་ཉིན་ཤས་གོང་མིང་འགོད་འདོད་མེད་པའི་ངོས་ཀྱི་ཆོས་གྲོགས་བླ་མ་ཞིག་ནས་ཁ་པར་སླེབས་བྱུང་། ངས་ཁོང་ལ་གནས་སྐབས་ང་ཟླ་བ་གཅིག་རིང་མཚམས་འདུག་རྒྱུའི་གྲ་སྒྲིག་བྱེད་ཀྱི་ཡོད་ཞུས་པས་ཁོང་ནས་འདི་ལྟར་གསུངས་སོང་།

"ཝེ་མཁན་པོ་ལགས་མཚམས་ལ་འདུག་བསམ་ན་རྒྱ་གར་བལ་ཡུལ་སོགས་ལ་སོང་། ཨ་རི་ནས་མཚམས་ལ་འདུག་ནས་ཅི་བྱེད། དེ་ལས་ཁྱོད་རང་ཟླ་བ་གཅིག་ལ་དབྱིན་ཇིའི་སློབ་གྲྭ་ལ་སོང་ན་ཡག་པོ་ཡོད་རེད་ཟེར།"

དེ་ནི་གཅིག་བྱས་ན་ཁོ་རང་གིས་ངོས་ཀྱི་དབྱིན་ཇིའི་གོག་ཏོ་དེ་དང་། ང་ཡི་ཁ་ཐབས་འཇོན་གསུམ་ལ་སྙིང་ནས་མ་བཟོད་ནས་བརྩེ་བའི་བསླབ་བྱ་ཞིག་ཡིན་སྲིད་ཀྱང་། ངས་བསམ་ན་གྲྭ་ཆས་འདི་གྱོན་ཚར་ནས་བཟུང་སྟེ་མཐར་ཐུག་གི་དམིགས་ཡུལ་གཅིག་ལས་མ་གཏོགས་མི་འདུག་བསམ། དེ་ནི་གྲྭ་པ་ལ་དགོས་རྒྱུ་ཉག་གཅིག་པོ་དེ་ནི་ཐོས་བསམ་སྒོམ་གསུམ་དང་། དེ་ལས་གལ་ཆེ་ཤོས་ཤིག་ནི་ཉམས་ལེན་བྱེད་རྒྱུ་དེ་རེད་སྙམ། དུས་རབས་འདིར་བོད་པའི་སྤྱི་ཚོགས་ཁྲོད་དུ་གསང་སྔགས་ཀྱི་ཆོས་གྲོང་པའི་རྒན་མོ་ཚུན་ཆད་ཀྱིས་ཉམས་ལེན་བྱེད་ཀྱི་ཡོད་ཀྱང་རྒྱུད་ནས་གསུངས་པ་ནང་བཞིན་ལམ་རྟགས་ཀྱི་ཡོན་ཏན་སྣ་གཅིག་ཀྱང་སྟོན་རྒྱུ་མེད་པ་འདི་ནི་ལམ་འདིར་རིག་གཅིག་རྐང་འཛིན་བྱེད་མཁན་མེད་པའི་སྐྱོན་ཆ་ཞིག་ཏུ་མཐོང་།
དགོང་མོའི་ཐུན་མཚམས་སུ་སྡོད་ཁང་དང་འཚོ་བའི་སྦྱིན་བདག་བཀའ་དྲིན་ཅན་ཚེ་རིང་ཆོས་འཕེལ་ལགས་དང་ཁ་བརྡ་བྱེད་ཞོར་སེམས་ལ་གང་དྲན་དེ་རིང་གི་ཉིན་ཐོ་མདོར་བསྡུས་དེ་བཏང་ནས་ཉལ་སར་སོང་ནས་གཉིད་ཡུར།