 |
| འཛིན་གྲོགས་རྣམས་དང་ལྷན་དུ་བླངས་པའི་ཟུར་པར་ཞིག |
སྙིགས་མའི་མུན་པ་འཐིབ་པའི་དུས༔
གསང་སྔགས་བྱིན་རླབས་མེ་ལྟར་འབར༔
ཅེས་བསླུ་མེད་རྡོ་རྗེའི་ཐ་ཚིག་འདི་ལ་ཡིད་ཆེས་ཡང་ནས་རྙེད་པ་མ་ཟད་དུས་ངན་འདི་འདྲའི་ཁུག་སོར་རྟོག་གེ་མགོ་འཁྲེག་རང་གི་མཐོང་ཡུལ་གཅིག་པུ་ལས་གཞན་ཚད་མར་མི་འཛིན་མཁན་ཆོས་མེད་ལོག་ལྟ་ཅན་རྣམས་ལ་དཔངས་རྟགས་ཀྱི་ཆེད་དུ་དེང་སང་འདི་འདྲ་རེ་ཡོད་ན་སྔ་ནས་བསམ་བཞིན་ཡོད་པས་དེ་རིང་ནི་སེམས་ལ་དགའ་སྐྱོ་འདྲེས་མ་ཞིག་བྱུང་། སྐྱོ་དགོས་པ་ཞིག་ལ་རང་ཡང་ཁོང་དང་འདྲ་བ་མཁན་པོའི་མིང་ཁུར་ནས་འཛམ་གླིང་གང་སར་གཞན་དོན་ཁ་ལ་སྙད་དེ་ལོག་འཚོ་ལྔ་ཡི་ཁུར་པོ་ཕྲག་ཏུ་ཁུར་ནས་ཁྱི་སྡོམ་བཞིན་དུ་འཁྱམས་ཉུལ་བྱས་བྱས་ནས་ཤི་ཚར་དུས་ཐུགས་དམ་ལ་འདུག་རྒྱུ་ཕར་ཞོག་ནམ་ཞིག་མགོ་སེར་བསོད་ཟད་མི་ཚང་ཞིག་གི་ནང་དུ་སྡུག་རོ་དེ་བསྐྱལ་ས་རེད་བསམ་ནས་སེམས་ནང་སྐྱོ་བ་འདྲ་ཞིག་སླེབས་བྱུང་།
དེ་རིང་ནི་ངོས་ཀྱི་དབྱིན་ཇི་འཛིན་གྲྭའི་ནང་དུ་ཐུགས་སྤྲོ་ཞིག་ཡོད་པས་དེ་ལ་དགོངས་ཟས་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་གྱི་ཟས་མཆོག ལྷག་པར་དུ་རྗེ་བཙུན་མི་ལའི་ཁ་ཟས་བརྒྱ་གོ་གཅིག་ཆོད་ཟྭ་ཐུག་ཞིམ་པོ་ཞིག་དང་ལོ་གསར་སྐབས་སུ་ཁམ་ཟས་ལྷག་འཕྲོ་དེ་རྣམས་ཁུར་ནས་ཆུ་ཚོད་དྲུག་པའི་སྐབས་སུ་འཛིན་ཁང་ནང་དུ་སོང་། མི་རིགས་དཀར་སེར་དམར་ལྗང་ངོས་ཀྱི་སློབ་གྲོགས་རྣམས་ནི་ཟིང་ཟིང་ལོང་ལོང་འཛིན་ཁང་འུར་སྒྲས་ཁེངས་བསྡད་འདུག ང་ནང་དུ་འབྱོར་བ་དང་མཉམ་དུ་ཚང་མས་སྐད་ཤུགས་ཆེན་པོའི་ཧ་ལོ་ཀརྨ་ཞེས་ངས་ནི་དང་པོ་སུ་ལ་ཡ་ལན་བྱེད་དགོས་མིན་མ་ཤེས་པར་གཡས་གཡོན་རྣམས་ནས་འབོད་རྐྱང་བྱེད་ཀྱི་འདུག འཛིན་གྲོགས་མང་ཆེ་བ་མེའ་སི་ཁོའི་མི་རིགས་དང་གཞན་ཀོ་རི་ཡ་སོགས་མཐོར་བསྡུས་ཁ་ཤས་ཡོད། འཛིན་གྲར་བོད་པ་ང་གཅིག་པུ་མ་ཟད་གྲྭ་པ་ཡང་ང་གཅིག་པུ་ཡིན་པས་ཁོང་ཚོའི་ང་ལ་ཀརྨ་ཞེས་འབོད་ནས་ཚང་མས་ང་ལ་དགའ་བོ་བྱེད་ཀྱི་ཡོད། དགེ་རྒན་དེས་ང་ལ་ཧ་ཅང་དམིགས་བསལ་བྱེད་ཀྱི་ཡོད། ཉེ་བའི་ཆར་ཡིག་ཚད་གཏངས་བའི་སྐབས་སུ་ང་ཚོའི་འཛིན་གྲྭ་ནང་དུ་མི་གྲངས་སུམ་བཅུ་སོ་གཉིས་ཡོད་པའི་ནང་ནས་ང་ཨང་དང་པོ་རེད་འདུག་ཟེར། བདུན་ཕྲག་རྗེས་མར་ང་འཛིན་གྲྭ་b4 ལ་སྤར་བའི་འཆར་གཞི་རེད། ང་ནི་ཡིད་མ་ཆེས་པ་འདྲ་བོ་བྱུང་གང་ཡིན་ཞེ་ན་དེ་སྔ་ཕན་ཆོད་རྒྱ་བོད་གང་ནས་ཡིན་ཀྱང་སྐད་རིགས་ཀྱི་འཛིན་གྲྭ་ལ་ཉིན་གཅིག་ལའང་འགྲོ་མྱོང་མེད་ཀྱང་ནང་ཆོས་ཀྱི་བཤད་གྲྭའི་སློབ་སྦྱོང་དེས་ཏན་ཏན་རིག་པ་འགྲོ་སྟངས་སོགས་ལ་ཕན་ཐོག་ཆེན་པོ་འདུག་བསམ་པའི་ངེས་ཤེས་རྙེད་བྱུང་། འཛིན་གྲོགས་རྣམས་ནས་ཁ་ལག་བཟའ་བཞིན་སྐད་ཆ་བཤད་པ་དང་། ཁ་ཤས་ཀྱིས་དེང་དུས་རྐུབ་གཡུགས་ཀྱི་ཞབས་བྲོ་རྒྱབས་པ་སོགས་འཛིན་ཁང་འུར་སྒྲས་ཁེངས་སོང་། དེ་ནས་ཆུ་ཚོད་དགུ་པའི་སྐབས་སུ་འཛིན་གྲོགས་ཕོ་མོ་རྣམས་ལ་གྱེས་བྲལ་གྱི་ལག་གཡུགས་དང་འཐམ་འཁྱུད་སོགས་ཀྱང་བྱས། ངོས་ཀྱི་རླངས་འཁོར་ཁ་ལོ་བ་དད་ལྡན་མ་ཨ་མ་སུ་སིན་སླེབས་བྱུང་བས་རླངས་འཁོར་ནང་དུ་ཞུགས་ནས་ནང་དུ་འབྱོར།
བདག་ཀྱང་ནམ་ཞིག་འཆི་བའི་དུས་བྱུང་ཚེ།།
ཐུགས་དམ་བཞུགས་ཤིང་རིང་བསྲེལ་མ་བྱུང་ཡང་།།
འཆི་ཁར་སྡུག་གིས་བྲང་ལག་མི་འཐབ་ཅིང་།།
གནད་གཅོད་དྲག་པོའི་སྡུག་བསྔལ་མི་མྱོང་ཤོག།
ཐིམ་རིམ་བརྒྱད་ཀྱི་སྣང་བ་འཆར་བའི་དུས།།
གཞི་གནས་འོད་གསལ་མ་བུ་ངོ་འཕྲོད་ནས།།
འཆི་ཁ་བར་དོའི་འཕྲང་ཆེན་ལས་གྲོལ་ཞིང་།།
སྐད་ཅིག་ཡར་གྱི་ཟང་ཐལ་བགྲོད་པར་ཤོག
སྨོན་ཚིག་གིས་བརྒྱན་པའི་ཤོ་ལོ་ཀ་གཉིས་ཅན་གྱི་རྩོམ་ཐུང་དང་སྦྲགས་དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར།།
No comments:
Post a Comment