འདོན་པ་སྒྲ་འཇུག་བྱེད་ལ་སོང་བའི་ཉིན་མོ།

མཛེས་པའི་ཀི་ལི་ཧྥོ་ཉའི་མེ་ཏོག

ཞོགས་པ་ཆུ་ཚོད་བདུན་པའི་སྐབས་སུ་ལངས་ནས་འཆར་ཅན་གྱི་སོ་གདོང་སོགས་གཙང་མ་བྱས་ནས་ཞོགས་འདོན་རྣམས་ཚར་བར་བྱས་ཤིང་། ཐབ་ཚང་ནང་དུ་སོང་ནས་ཞོགས་ཟས་མདོར་བསྡུས་ཞིག་ལ་རོལ། ཁ་སང་གི་དུས་ཆད་བྱས་པ་ལྟར་དེ་རིང་གི་ལས་ཀ་གཙོ་བོ་ནི་ཨེ་ཊ་ལི་ནས་ཡིན་པའི་ངོས་ཀྱི་གྲོགས་པོ་མེའི་གོའི་དང་ལྷན་དུ་ཆུ་ཚོད་བཅུ་པའི་སྐབས་སུ་ཐུག་རྒྱུ་བྱས་པ་དེ་ཡིན་པས་ངོས་ཀྱི་རླངས་འཁོར་ཁ་ལོ་བ་ཨ་མ་སུ་སིན་ཆུ་ཚོད་དགུ་དང་ཕྱེད་ཀར་སླེབས་བྱུང་བས་ངེད་གཉིས་རླངས་འཁོར་ཁ་མོན་ཊེའི་རེའི་སོགས་ལ་བསྐོར་ནས་སོང་བས་སྐར་མ་སུམ་བཅུ་ཙམ་གྱིས་དེར་འབྱོར་སོང་། མེའི་གོའི་ནི་ཕོ་གསར་ལོ་ཆུང་ཞིང་གདོང་གི་དབྱིབས་ཅུང་ནུར་ལ་རིང་ཞིང་། སྣ་ཡི་གཟེངས་མཐོ་ལ་མིག་གི་རྫི་མ་རིང་བ། ཁམས་གཙང་ལ་བག་དྲོ་བོ་ལྟས་ཚོད་ལ་རྒྱ་གར་གྱི་མི་རིགས་དང་འདྲ་བོ་ཞིག་འདུག དེ་ནས་ཁོ་རང་གི་ལས་ཁུངས་སུ་ཁྲིད་སོང་བས་ནང་དུ་piano སྐད་འབྱིན་མཛུབ་གནོན་འཕྲུལ་སྒམ་འདྲ་མིན་དང་། རིན་གོང་ཆེན་པོའི་སྒྲ་བསྡུད་འཕྲུལ་ཆས་སོགས་མང་པོ་ཞིག་མཐོང་རྒྱུ་འདུག ཁོ་རང་གི་ཆེད་ལས་པ་ནི་མི་ཚོགས་བརྒྱ་སྟོང་མང་པོའི་དཀྱིལ་ནས་མཛུབ་གནོན་འཕྲུལ་ཆས་ཀྱི་སྒྲ་གདངས་གིས་མི་རྣམས་ལ་སྤྲོ་སེམས་ཀྱི་ཚོར་སྣང་སྟེར་བ་དེ་ཡིན་པ་མ་ཟད་གླུ་གཞས་སོགས་སྒྲ་འཇུག་བྱེད་ཀྱི་ཡོད། དེ་ནས་ངོས་ཀྱི་དབྱིན་སྐད་ཆག་རོ་དེ་སྐྱོན་ནས་དེ་རིང་ངོས་ཀྱི་ལས་ཀའི་སྐོར་ལ་སྐད་ཆ་མགོ་འཛུགས་བྱས་པ་ཡིན། ངོས་ཀྱི་ལས་ཀ་ནི་དེ་སྔོན་བླ་མ་རྒྱངས་འབོད་དང་། ཚོགས་གླུ་སོགས་སྡེ་ཚན་བདུན་བྱས་པའི་འོད་སྡེར་འཁོར་ཐག་ཞིག་བཟོས་པ་དེ་རིན་གོང་ཨ་སྒོར་ཉི་ཤུ་བྱས་པས་ངོས་ཀྱི་སློབ་མ་རྣམས་ཀྱིས་བོང་བུའི་རང་རྟུག་གསེར་རློན་གྱི་དཔེ་ལྟར་ཧ་ཅང་དགའ་མོས་བྱེད་ནས་འོད་སྡེར་འཁོར་ཐག་བརྒྱ་ཐམ་པ་དེ་རྫོགས་ལ་ཉེ་བས་ཡང་སྐྱར་འོད་སྡེར་འཁོར་ལོ་གཉིས་པ་ཞིག་སྒྲ་འཇུག་བྱེད་རྒྱུ་དེ་ཡིན། ངོས་ལ་མི་སེམས་རབ་ཏུ་འགུགས་པའི་སྐད་སྙན་མོ་ཞིག་ཡོད་བསམ་པའི་གདེངས་ཚོད་ཞིག་གཏན་ནས་མེད་ཀྱང་། བཀའ་དྲིན་འཁོར་མཐའ་བྲལ་བའི་ཕ་གཅིག་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་ཁོང་ཞིང་དུ་ཕེབས་ནས་བགྲང་བྱ་ཧྲིལ་པོ་བཅུ་འཁོར་བས་དེ་ཉིད་ཀྱི་རྗེས་དྲན་གྱི་ཆེད་དུ་བླ་མ་རྒྱངས་འབོད་སོགས་ཡོད་པའི་སྣ་ཚོགས་ཀྱི་འོད་སྡེར་འཁོར་ལོ་ཞིག་བཟོ་བསྐྲུན་བགྱིས་པས། མི་མང་པོ་ཞིག་ནས། ༼ཁྱེད་རང་ལ་སྐད་སྙན་མོ་འདུག་༽ ཅེས་པའི་ཚིགས་དེ་ཉིད་ཀྱིས་ངོས་ལའང་མ་འོངས་པར་འོད་སྡེར་བཟོ་རྒྱུར་སེམས་ཤུགས་འཕར་མ་ཞིག་སྤྲད་བྱུང་། དེ་ནས་ཕན་ཚུན་མ་འོངས་པའི་འོད་སྡེར་སྐོར་དང་ཁོ་རང་གི་དུས་ཚོད་སོགས་གཏན་འབེབས་བྱས་ནས་ཉིན་གུང་ཟ་མའི་ཆེད་དུ་ཉི་ཧོང་གི་ཟ་ཁང་ཞིག་ནང་ངོས་ཀྱི་དགེ་ཕྲུག་ཇེམ་དང་། སུ་སིན། ཨོ་ཤང་སོགས་ཕན་ཚུན་མི་ལྔ་ནས་ཟ་མ་མཉམ་དུ་ཟོས་པས་ཉིན་གུང་ཟས་རིན་ཚང་མ་ཇེམ་ནས་སྤྲད་སོང་། དེ་ནི་ལུང་པ་འདི་ཡི་མི་ལ་ལྟོས་ན་ཧ་ཅང་མ་སྲིད་པ་འདྲ་ཞིག་རེད། ཕན་ཚུན་བརྩེ་བའི་སྙིང་གྲོགས། ཕ་མ་ནང་མི་སོགས་ཟ་མ་མཉམ་དུ་ཟ་བའི་སྐབས་སུ་ཟས་རིན་རྣམས་ཚང་མ་ཕན་ཚུན་བགོ་གཤའ་རྒྱབ་ནས་སྒོར་མོ་གཅིག་གི་ཁེ་ཕམ་མེད་པར་བྱེད་ནས་གཙང་མ་བྱེད་པའི་ལུགས་སྲོལ་འདུག དེ་ནས་སུ་སིན་དང་། ཨོ་ཤང་ངེད་གསུམ་ངོས་ཀྱི་ཉེར་སྤྱད་ཕྲན་ཚེགས་ཞིག་གི་ཆེད་དུ་ཚོང་ཁང་ནང་དུ་སོང་ཞིང་དེ་མ་ཐག་ངོས་ཀྱི་ནང་དུ་སོང་། དགོང་ཟས་སུ་ཐུག་པ་ཞིག་འཐུང་ནས་དེ་རིང་གི་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།