ཨོ་གཤང་མཉམ་དུ་ཉིན་གུང་ཟ་མ་ཟོས་པའི་ཉིན་མོ།

ཨོ་གཤང་དང་ལྷན་རྒྱ་ནག་ཟ་ཁང་ཞིག་ནང་། 

ཁ་སང་ཆམས་ངན་དེས་རྐྱེན་ནས་ད་དགོང་ལུས་ལ་ཚ་བ་འབར་ཞིང་ཁ་སྐོམ་པ་སོགས་བྱུང་ནས་གཉིད་ཡག་པོ་ཁུག་མ་སོང་། དེས་རྐྱེན་ད་ནང་ཞོགས་པ་ཆུ་ཚོད་བརྒྱད་པ་ཙམ་ནས་གཞི་ནས་མལ་ལས་ལངས་ཡང་ལུས་ལྕི་ལ་ཉོབ་པ་ཁ་ཆུ་སྣ་ཆུ་འཛད་མེད་ནར་ནར་དུ་འཛག་པ་སོགས་རེད་འདུག་ཀྱང་ཁྲུས་ཁང་ནང་དུ་སོང་ནས་སོ་བཀྲུ་གདོང་བཤལ་སོགས་བྱས་ནས་འཆར་ཅན་གྱི་ཁ་འདོན་ཐུན་བཞི་བླ་མའི་རྣལ་འབྱོར་ནས་བཟུང་ཏེ་སྤྱན་རས་གཟིགས་འཁོར་བ་དོང་སྤྲུགས། གཏེར་གསར་སྔོན་འགྲོ། ཐུགས་སྒྲུབས་ཕྲིན་ལས་སྙིང་པོ་སོགས་རིམ་བཞིན་འདོན་སྒོམ་དང་སྦྲག་ནས་ཆུ་ཚོད་གཅིག་ནང་ཚར་བར་བྱས་ཤིང་། འོག་ཤོད་ཐབ་ཚང་ནང་ནས་ཞོགས་ཟས་མདོར་བསྡུས་ཞིག་བཟའ་བཞིན་པའི་སྐབས་སུ་གློ་ཁུག་ནང་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཨ་ཧྥི་རི་ཁ་ནས་ཡིན་པའི་ངོས་ཀྱི་དགེ་ཕྲུག་ཆོས་མིང་དུ་ཀརྨ་རྒྱ་མཚོ། ཡུལ་མིང་དུ་ཨོ་ཤང་རེད་འདུག ཁོང་གི་སྐད་གདངས་དམའ་ལ་སྐྱོ་བའི་ཉམས་ཀྱིས་ངང་ནས་འདི་ལྟར་ཟེར། ༼ང་ཉལ་སར་ལུས་ནས་ཉིན་གཉིས་ཡིན། ང་ཡི་ཆོས་གྲོགས་དང་ང་ཡི་བླ་མ་རྣམས་ཀྱིས་ང་ལ་ཁ་པར་ཙམ་ཡང་གཏོང་གི་མི་འདུག་༽ཞེས་ངུ་ངག་དང་བཅས་བཤད་ཀྱི་འདུག ངས་ཁྱོད་རང་སེམས་ཁྲལ་མ་གནང་དང་ཉིན་གུང་རྒྱབ་ལོགས་སུ་ང་ཁྱེད་རང་ས་ལ་ཡོང་གི་ཡིན་ཟ་མ་ག་རེ་ཁུར་ཡོང་དགོས་ཟེར་བས་ཁོང་ནས་ཟ་མ་གང་ཡང་མི་དགོས་ཁྱོད་རང་ཡོང་ན་དེ་བས་འགྲིག་གི་འདུག་ཟེར། ངོས་ཀྱང་ཉིན་གཉིས་སྔོན་ནས་ཚ་འཆམས་ཞིག་གི་རྐྱེན་གཟུགས་པོ་བདེ་བོ་དེ་ཙམ་མེད་ན་ཡང་ཁོ་རང་སར་འགྲོ་རྒྱུར་ཐག་བཅད། ཉིན་གུང་རྒྱབ་ཆུ་ཚོད་དང་པོའི་སྐབས་ཕ་ཡུལ་ཉི་ཧོང་ནས་ཡིན་པའི་ངོས་ཀྱི་རླངས་འཁོར་ཁ་ལོ་བ་ཆོས་མིང་དུ་ཀུན་བཟང་དབང་མོ། ཡུལ་མིང་དུ་ཨ་མ་སུ་སིན་ནས་མོག་མོག་ཞིག་དང་། ཐུག་པ། ཤིང་ཐོག་སོགས་ཟས་རིགས་འདྲ་མིན་བཟོས་ནས་ཁུར་འདུག་སྟབས། འདི་ནས་སྐར་མ་ལྔ་ལས་མེད་པའི་མོའུ་རི་ཎའི་རྒྱ་མཚོའི་འགྲམ་ལ་སོང་བས་དེ་རིང་གི་གནམ་གཤིས་དེ་ནམ་མཁའ་གཡའ་དག་ཅིང་ཉི་འོད་རྒྱ་མཚོར་ཁྱབ་ནས་རྒྱ་མཚོའི་རྦ་རླབས་རྣམས་མཁའ་རུ་རྩེན་ཅིང་བྱེ་མའི་དཀྱིལ་ནས་མི་རྣམས་ཁྱུ་ཁྱུ་བྱས་ནས་རྩེད་མོ་ལ་རོལ་ཅིང་འདུག ངེད་གཉིས་ཀྱང་ཕྱོགས་གཅིག་ཏུ་བསྡད་ནས་དེ་རིང་གི་གནམ་གཤིས་དེ་ལ་ཡིད་སྨོན་བྱེད་བཞིན་མིག་གིས་མི་ཚོགས་ཀྱི་ལྟད་མོ་ལ་བལྟ་བཞིན་མོག་མོག་དེ་ཟོས། དེ་ནས་ཅུང་མ་འགོར་བར་རླངས་འཁོར་ཁ་ལོ་ཨོ་ཤང་ཕྱོགས་སུ་བསྒྱུར་ནས་སོང་བས་ལམ་ཕྱེད་ནས་ཁ་པར་ཞིག་སླེབས་སོང་བས་ཁོང་རྒྱ་མིའི་ཟ་ཁང་ཞིག་ནང་ཡོད་པས་དེར་ཤོག་ཟེར་བས་དེར་ཤར་རྒྱགས་སོང་།  ཁོང་གི་གདོང་པར་སྐྱོ་ཉམས་དང་བཅས་ཟ་ཁང་དེའི་ནང་ནས་སྒུག་འདུག་ཁོ་རང་གི་འདོད་པ་ནི་ང་ཚོ་མཉམ་དུ་དགོང་ཟས་ཟ་རྒྱུ་དེ་ཡིན་ཀྱང་། ངོས་ནས་མོག་མོག་སྡེར་མ་གཉིས་བྲོད་གོག་ནང་དུ་བླུགས་ཚར་མ་ཐག་ཡིན་སྟབས་ཁོང་ནས་ཐུག་པ་ཕོར་པ་གང་མངགས་སོང་། ཁོང་ནི་ལུང་པ་ཨ་ཧྥི་རི་ཀ་ནས་ཡིན་ཅིང་ཨ་རིར་སླེབས་ནས་ལོ་ཉི་ཤུ་ལྷག་ཙམ་འགྲོ་གི་ཡོད། ཁོང་ནི་མི་ཡ་རབ་ཞིག་དང་མ་ཟད་ཁོ་རང་གི་འཚོ་ཐབས་ནི་གློག་བརྙན་པར་རྒྱག་པ་དང་གཞས་དང་འདོན་པ་སོགས་སྒྲ་འཇུག་བྱེད་མཁན་ལ་ཧ་ཅང་བྱང་ཆུབ་པ་ཞིག་ཡིན་པས་འདས་པའི་ལོ་གཅིག་ནང་ཚུད་ནས་ངས་ཆོས་བཤད་ཚད་ཚང་མ་སྒྲ་འཇུག་བྱེད་པ་མ་ཟད་བརྙན་པར་སོགས་ལེན་ནས་འོད་སྡེར་འཁོར་ལོ་བཟོ་བ་སོགས་ཚང་མ་ཁོ་རང་ནས་བྱེད་ཀྱི་ཡོད། ངས་ཁོ་རང་ལ་བལ་ཡུལ་ནས་རང་གིས་ཆེད་དུ་བཟོས་པའི་གདུགས་དཀར་རལ་གྲི་མའི་འཁོར་ལོ་བྱིན་ལྡན་ཞིག་ཡོད་པ་དེ་སྤྲད་པས་ཁོང་ཧ་ཅང་དགའ་བོ་བྱུང་སོང་། དེ་ནས་སུ་སིན་ངེད་གཉིས་མོ་རི་ཎའི་ཕྱོགས་སུ་སྐར་མདའ་ཆད་པ་ནང་བཞིན་སོང་། གང་ཡིན་ཟེར་ན་ཆུ་ཚོད་ལྔ་པའི་སྐབས་སུ་སིན་ནས་ཨ་རིའི་དམག་མི་གཞོན་སྐྱེས་ཁ་ཤས་ཞིག་ལ་ཅིས་ཀོང་གི་ལུས་རྩལ་བསླབ་དགོས་པའི་དུས་ཆད་དེ་རེད། ངོས་ཀྱང་ནང་དུ་འབྱོར་བ་དང་ལྷན་དེ་རིང་ཉིན་ཐོའི་ཟིན་བྲིས་མ་ཆད་ཙམ་ཞིག་བྲིས་ནས་ཉལ་སར་སོང་ནས་གཉིད་དུ་ཡུར།