ཚ་བས་ཞུ་གྲབ་བྱས་པའི་ཉིན་མོ།

དེ་རིང་གི་ཚ་བའི་ཨང་རྟགས། 

ཁ་སང་ནས་བཟུང་སྟེ་རྒྱ་གར་ལ་ཚ་བའི་མཐོ་ཚད་ཨང་གྲངས་བཞི་བཅུ་ཞེ་དྲུག་ལ་ཁེལ་ནས་སྲང་ལམ་ཐོག་ཏུ་བདག་མེད་དུ་ཉལ་བའི་སྤྲང་པོ་རྣམས་ཚ་བས་སྡེབས་ཤི་བྱས་ཡོད་པའི་སྐད་ཆ་འདུག ང་ནི་ཁ་སང་རྒྱུད་སྟོད་མགྲོན་ཁང་གྲང་གློག་ཅན་ཞིག་ནང་དུ་སྤོས་ནས་བསྡད་ཡོད་ཀྱང་ཕྱི་ལོགས་སུ་འགྲོ་བའི་སྐབས་སུ་ནམ་རྒྱུན་བསིལ་བའི་མཁའ་རླུང་ཉིད་ཀྱང་དེ་རིང་ནི་ཚ་བར་གྱུར་ནས་རླུང་གཡོ་བའི་སྐབས་སུ་ཚ་བའི་ངད་ཀྱིས་གདོང་པ་ལ་ཚ་ཆིལ་ཆིལ་བྱེད་ཀྱི་འདུག 
དེ་རིང་ནི་ནམ་རྒྱུན་བོད་སྒར་བསམ་ཡས་གླིང་ལ་ཡོད་པའི་ཟ་ཁང་རྣམས་སྒོ་རྒྱབས་པ་དང་གཞུང་ལམ་དུ་ཁྲོམ་སོགས་མཐོང་སར་མི་འདུག མགྲོན་ཁང་བདག་པོར་སྐད་ཆ་དྲིས་དུས། 

དེ་རིང་རྒྱ་ནག་གི་འགོ་ཁྲིད་ཞིག་རྒྱ་གར་ལ་ལྟ་སྐོར་ལ་ཡོང་གི་ཡོད་སྟབས་བོད་རིགས་རྣམས་ནས་ཟ་ཁང་དང་ཁྲོམས་སོགས་སྒོ་བརྒྱབས་ནས་ངོ་རྒོལ་ཆེད་དུ་སྐད་འབོད་ལ་སོང་རེད་ཟེར།
 ངས་ཚ་བ་འདི་འདྲའི་ནང་ནས་སྐད་འབོད་བྱེད་ལ་འགྲོ་རྒྱུ་ཧ་ཅང་སེམས་ཤུགས་རེད་ཟེར་དུས། ཟུར་ནས་གྲྭ་པ་ཁ་བདེ་ཅན་ཞིག་ནས་འདི་ལྟར་ཟེར། 
བོད་ནས་དཔའ་རྒོད་རྣམས་ཀྱིས་གཟུགས་པོར་ས་སྣུམ་བླུགས་ནས་མེ་ལ་དངོས་སུ་གསོན་བསྲེགས་བྱེད་ཐུབ་དུས་ང་ཚོའི་ཆུ་ཚོད་འགའ་ཤས་རིང་གཟུགས་པོར་ཉི་མའི་ཚ་བ་ཙམ་བཟོད་མི་ཐུབ་རྒྱུ་ཅི་ཡོད་ཟེར། ངས་ཀྱང་གྲྭ་པ་དེའི་སྐད་ཆ་ལ་མོས་མཐུན་བྱས་ཀྱང་སེམས་གཏིང་ནས་རང་བཞིན་གྱིས་དྲི་བ་ཞིག་སླེབས་བྱུང་། དེ་ནི་དོན་ངོ་མའི་ཐོག་ནས་གྲྭ་པ་ཁྱེད་ཀྱི་གསུངས་པ་ལྟར་རེད། ཡིན་ནའང་ད་ལྟ་ཁྱེད་ཀྱི་ཞལ་ནས་དོན་པའི་ཚིག་དེ་དོན་ཏུ་གནས་ན་ཁྱེད་དེ་རིང་སྐད་འབོད་ལ་མ་སོང་བ་ཅི་རེད།? ཡིན་ཡང་དྲི་བ་དེ་དངོས་སུ་ཁ་ནས་དོན་ཐུབ་མ་སོང་།