གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ།

ཀི་ལི་ཧྥོ་ཉའི་དབྱར་ཀའི་མཛེས་་ལྗོངས།

ཉིན་མོ་འདི་ནི་གཟའ་ཟླ་བའི་འཆར་ཅན་བདེ་ཆེན་ཞིང་སྒྲུབ་ཀྱི་ཉིན་མོ་དེ་ཡིན། ཞོགས་པ་ལངས་ནས་ཁ་འདོན་རྣམས་འགོ་འཛུགས་བྱས་དུས་དེ་རིང་ངོས་ཀྱི་རྙིང་མ་དང་བཀའ་བརྒྱུད་ཁ་འདོན་བེའུ་བུམ་གྱི་ཁྲོད་དུ་དགེ་ལུགས་པའི་རྡོ་རྗེ་འཇིགས་བྱེད་ཀྱང་འཚང་ཁ་རྒྱབ་ནས་སླེབས་འདུག དེ་ནི་སྔ་ལོར་༧གོང་ས་སྐྱབས་མགོན་ཡིད་བཞིན་ནོར་བུའི་མདུན་ནས་འཇིགས་བྱེད་དཔའ་གཅིག་གི་དབང་ཞུས་པའི་སྟབས་ཀྱིས་རེད། དགེ་ལུགས་པའི་གསར་ཆོག་རྒྱས་པ་དེ་འདྲ་མ་ལྕོག་ཀྱང་མཆོག་གླིང་གཏེར་གསར་འཇམ་དཔལ་ཕ་རོལ་རྒོལ་འཇོམས་རྡོ་རྗེའི་གསུང་བྱིན་རླབས་ཅན་དེ་ཉིད་ཀྱིས་འཐུས་པར་བྱས་ནས། ལར་ནི་དབང་ཞུ་བ་ལ་དགའ་ན་ཡང་ལེ་ལོ་ཅན་ང་ལ་ཁ་འདོན་རྒྱུ་ཇེ་མང་དུ་འགྲོ་བ་ལ་ཧ་ཅང་མཚེར་བས་ད་ནས་བཟུང་སྟེ་སྔར་ཐོབ་ཀྱི་དབང་དེས་ཆོག་ཤེས་པར་བྱ་དགོས་སྙམ། ཁ་འདོན་རྣམས་གྲུབ་པ་དང་ལྷན་འོག་ཤོད་ནང་དུ་བབས་ནས་ཞོགས་ཟས་སུ་བག་ལེབ་དང་སྒོ་ང་བཅས་ཟོས་ནས་ཕྱི་རོལ་དུ་རྐང་འགྲོས་སུ་ཆུ་ཚོད་གཅིག་ཙམ་སོང་ནས་ནང་དུ་འབྱོར། དེ་ནས་ཉིན་གུང་རྒྱབ་ནས་འཆར་ཅན་ལྟར་གཟའ་ཟླ་བའི་བདེ་ཆེན་ཞིང་སྒྲུབ་འཚོགས་ལ་སོང་བས་མི་གྲངས་ཉེར་ལྔ་ཙམ་གྱིས་ཚོགས་ཁང་ཕྱེད་ཀ་ཙམ་ཁེངས་སོང་། དེ་རིང་སྐད་བསྒྱུར་མེད་སྟབས་ངོས་ཀྱི་དབྱིན་ཇི་གོབ་ཏོ་དེ་སྐྱོན་ནས་ཁ་སང་ཉིན་གསུམ་གྱི་རིང་བྱེས་སོང་གི་ལོ་རྒྱུས་མདོར་བསྡུས་དང་སྦྲག་ནས་ཆོ་ག་བོད་ཀྱི་སྒྲ་གདངས་ཐོག་ནས་བཏོན་ཅིང་མདུན་བསྐྱེད་བསྡུ་ལྡངས་སྐབས་སུ་མཉམ་བཞག་སྐར་མ་ལྔ་ཙམ་བྱས་ནས་ཆོ་ག་མཐར་དབྱུངས། དེ་རིང་འདིར་ཞུགས་ཀྱི་འཚོགས་མི་རྣམས་ལ་ཁ་སང་གསུང་ཆོས་སྐབས་སུ་ཁུར་ཡོང་བའི་༧གོང་ས་མཆོག་གི་སྐུ་པར་རེ་ཕུལ་བས་ཧ་ཅང་དགའ་བོ་བྱས་སོང་། དེ་ནས་ཕན་ཚུན་གྱེས་བྲལ་གྱི་ཕྱག་རྒྱ་དང་། འཐམ་འཁྱུད། ལག་གཡུགས་སོགས་ཅི་རིགས་ཀྱིས་ཕེབས་རྫོང་བྱས་ནས་ནང་དུ་འབྱོར་ནས་དེ་རིང་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།