འཇམ་དབྱངས་ཆོས་འཁོར་གླིང་སློབ་མ་རྣམས་དང་ལྷན་ལོ་སྟར་ཆགས་སུ་དབྱིན་ཇི་ལོ་གསར་དང་བོད་ཀྱི་ལོ་གསར་གཉིས་ཀྱི་བར་ནས་མཚམས་ལ་འདུག་གི་ཡོད། དེ་ནི་ཧ་ཅང་གལ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། གང་ཡིན་ཞེ་ན། མི་མང་པོ་ཞིག་ནས་ལོ་གསར་གྱི་སྐབས་སུ་དགུང་མོའི་མཚན་འཚོགས་སྐབས་སུ་རང་གི་གྲོགས་པོ་དང་གྲོགས་མོ་སོགས་མཉམ་དུ་ཆང་འཐུང་ཞིང་ཞབས་བྲོ་གླུ་བཞས་སོགས་ལ་རོལ་ནས་ལོ་མཇུག་ནི་སྤྲོ་སྐྱིད་གཏོང་ནས་རྫོགས་ཀྱི་ཡོད། ལར་ནི་ཞི་བ་ལྷས། རྩོམ་པ་ཐམས་ཅད་དགའ་ཕྱིར་ཏེ།། དེ་ནི་རིན་གྱིས་ཉོས་ནའང་དཀོན།། ཞེས་གསུངས་པ་ལྟར་བྱ་དངོས་འཚོ་ཐབས་སོགས་གང་ཞིག་ཡིན་ཀྱང་བདེ་སྐྱིད་ཁོ་ནའི་ཆེད་དུ་ཡིན་སྟབས་སོ་སོའི་དགའ་རོགས་དང་མཉམ་དུ་ཉིན་གཅིག་ལའང་སྤྲོ་སྐྱིད་བྱེད་པ་དངོས་གནས་དགའ་འོས་པ་ཞིག་རེད། དེ་ག་དུས་ཡིན་ཀྱང་ཕན་ཚུན་བརྩེ་བ་དང་བདེ་སྐྱིད་ངང་གནས་དགོས་པ་ནི་མི་ཚེ་དོན་ལྡན་དང་ལུགས་མཐུན་གྱི་མི་ཚེ་བསྐྱེལ་སྟངས་ཤིག་རེད། འོན་ཀྱང་འགྲོ་བ་མི་རྣམས་ཀྱི་བདེ་སྐྱིད་འདོད་སྟངས་ལ་དམིགས་ཡུལ་དང་ཕུག་བསམ་མ་འདྲ་བ་རེ་ཡོད། འགའ་ཤས་ཤིག་ནས་གནས་སྐབས་དབང་པོ་སྒོ་ལྔའི་ཡུལ་ལ་ལོངས་སྤྱོད་ནས་དེ་ཉིད་མཐར་ཐུག་གི་བདེ་བར་ངོས་འཛིན་བྱེད་ཀྱི་ཡོད། ནང་པའི་ངོས་ནས་སྐད་ཆ་བཤད་ན་དབང་ཤེས་ཀྱི་རྗེས་སུ་འབྲང་བའི་བདེ་བ་ནི་བདེ་བ་ཡང་དག་པར་མ་ཡིན་པར་དེ་འགྱུར་བའི་སྡུག་བསྔལ་ཡིན་ཅེས་གསུངས་ཡོད། དེ་ལ་ཞིབ་ཏུ་བསམ་བློ་བཏང་ན་དངོས་གནས་བདེན་པ་རེད། གང་ཡིན་ཞེ་ན། དེ་རིང་གནས་སྐབས་བདེ་ཐང་དུ་གནས་ཀྱང་སང་ཉིན་ནད་ངན་པས་ཟིན་པ་དང་ཡང་ན་འཆི་བ་སོགས་མི་རྟག་པ་རང་བཞིན་ཚང་མས་མཐོང་ཆོས་སུ་ཡོང་གི་ཡོད། རྒྱུ་མཚན་དེ་ཉིད་ཀྱི་དབང་གིས་ངས་ཀྱང་སྐྱིད་པའི་ལོ་གསར་སྐབས་སུ་གོ་སྐབས་དེ་བཟུང་ནས་ངོས་ཀྱི་སློབ་མ་རྣམས་དང་མཉམ་དུ་ལོ་སྟར་ཆགས་སུ་མཚམས་འདུག་ནས་སྒོམ་སྒྲུབ་ཉམས་ལེན་གང་ཐུབ་བྱེད་བཅུག་གི་ཡོད།
ད་ལོའི་ལོ་སར་གྱི་མཚམས་ཆོས་སུ་ཤེས་རབ་སྙིང་པོའི་ཆོས་བཤད་དང་། སྤྱན་རས་གཟིགས་ཀྱི་རྗེས་གནང་། བྱང་ཆུབ་སེམས་སྡོམ་མཉམ་ལེན་སོགས་ཉིན་གསུམ་རིང་བྱས་པ་ཡིན། ད་ལོར་ཤེས་རབ་སྙིང་པོའི་གསུང་ཆོས་བྱེད་དགོས་དོན་ནི། ང་ལ་རེ་ལྟོས་བྱེད་མཁན་སློབ་མ་འདི་རྣམས་ཅི་ཡང་ཡིད་ལ་མི་བྱེད་པའི་འཇོག་སྒོམ་ཐན་ཐུན་ཙམ་དང་། བསྙེན་བཟླས་འདྲ་ཆགས་པོ་རེ་དབྱངས་སུ་གྱེར་ཤེས་མཁན་ཙམ་མ་ཡིན་པར་སྤྱིར་ནང་ཆོས་དང་ལྷག་པར་དུ་ཐེག་པ་ཆེན་པོའི་ཆོས་ལ་གོ་བ་གཏིང་ཟབ་རེའི་ངེས་པ་རྙེད་ཐུབ་ན་བསམ་ནས་ཡིན། ཤེས་རབ་སྙིང་པོའི་འགྲེལ་བཤད་སྐབས་སུ་སྟོང་ཉིད་ལ་སྤམ་བཤད་ཙམ་མ་ཡིན་པར་འགྲེལ་བཤད་གང་དྲག་བྱས་པ་ཡིན།
རྗེ་བདག་ཉིད་ཆེན་པོའི་ཞལ་ནས།
གནས་ལུགས་རྟོགས་པའི་ཤེས་རབ་མི་ལྡན་ན།། ངེས་འབྱུང་བྱང་ཆུབ་སེམས་ལ་གོམས་བྱས་ཀྱང་།།
སྲིད་པའི་རྩ་བ་གཅོད་པར་མི་ནུས་པས།། དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད།།
ཅེས་བདག་ཉིད་ཆེན་པོའི་ཚིག་རྐང་ཐ་མར། དེ་ཕྱིར་སྟོང་ཉིད་རྟོགས་པའི་ཐབས་ལ་འབད།། ཅེས་མ་གསུངས་ནས། དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད།། ཅེས་གསུངས་པ་འདི་ལ་ཧ་ཅང་དགོས་པ་ཆེན་པོ་ཞིག་ཡོད་ངེས་སོ། ལར་ནི་དེང་སང་སྒོམ་བྱེད་མཁན་རྣམས་དང་ལྷག་པར་དུ་ནུབ་ཕྱོགས་པའི་སྤྱི་ཚོགས་ཁྲོད་དུ་དེང་སང་དར་བཞིན་པའི་སྒོམ་འདི་ནི་ཚོགས་དྲུག་གི་ཡུལ་ཤེས་གནས་སྐབས་འགག་ཙམ་ཞིག་ལ་ཅི་ཡང་མི་དྲན་པར་ཐོམ་མེར་འདུག་ནས་འཇོག་སྒོམ་ཙམ་ཞིག་ལ་ངས་སྒོམ་རྒྱབ་ཡིན་ཁོས་རྒྱབ་རེད་ཅེས་ཁ་ཕོ་ཆེན་པོའི་འུར་སྒྲོག་བྱེད་མཁན་མང་ཡང་དེ་ནི་འབེན་མ་མཐོང་བར་མདའ་འཕངས་པ་དང་འདྲ་བས་དང་པོ་རྟོགས་རྒྱུའི་སྟོང་པ་ཉིད་ལ་གང་སྟོང་རྒྱུའི་དགག་བྱ་ངེས་པ། ཐབས་གང་གིས་སྟོང་པ། ཚུལ་ཇི་ལྟར་སྟོང་པ། སྟོང་ནས་ཇི་ལྟར་འགྱུར་བ་སོགས་མ་ཤེས་ན་སྟོང་ཉིད་གོལ་ས་དང་ཤོར་ས་སོགས་ལམ་ནོར་དོགས་ཡོད་པས་དེ་ཉིད་ཇི་ལྟ་བ་བཞིན་ཤེས་དགོས་ན་དང་པོ་ངེས་པར་རྟེན་འབྲེལ་གྱི་གནད་རྣམས་ལེགས་པར་ཤེས་དགོས་པས་ངས་ཀྱང་རྟེན་འབྲེལ་སྐོར་དང་པོ་རྒྱུ་འབྲས་རྟེན་འབྱུང་གི་རྟེན་འབྲེལ། གཉིས་པ་ཕན་ཚུན་ལྟོས་ནས་བཏགས་པའི་རྟེན་འབྲེལ། གསུམ་པ་མིང་རྐྱང་བཏགས་ཡོད་ཙམ་གྱི་རྟེན་འབྲེལ་སོགས་ཕྲ་རག་གི་དབྱེ་བ་རྣམས་ལེགས་པར་ཕྱེས་ནས་རྒྱས་བཤད་བྱས་པ་ཡིན་པས་མི་མང་དགའ་བོ་བྱས་སོང་། ནམ་རྒྱུན་ངས་དབང་འདོན་རྒྱུ་ཧ་ཅང་ཉུང་ཉུང་ཡིན་ཀྱང་ད་ལོར་སྤྱན་རས་གཟིགས་ཀྱི་རྗེས་གནང་ཞིག་བཏོན་པ་ཡིན། རྗེས་གནང་བྱེད་དགོས་དོན་ནི། ཤེས་རབ་སྙིང་པོའི་གསུང་ཆོས་འདི་སངས་རྒྱས་བྱིན་གྱིས་བརླབས་ནས་སྤྱན་རས་གཟིགས་ལ་ཤཱ་རིའི་བུས་དྲི་བ་ལ་སྤྱན་རས་གཟིགས་ཀྱི་ལན་གནང་ནས་གང་ལྟར་ཤེས་རབ་སྙིང་པོ་ནི་སྤྱན་རས་གཟིགས་ཀྱི་གསུང་ཆོས་ཡིན་ཟེར་ཀྱང་མི་ཆོག་རྒྱུ་མེད་པས་རྒྱུ་མཚན་དེ་ཉིད་ཀྱི་ཕྱིར་ན་ད་ལོར་སྤྱན་རས་གཟིགས་ཀྱི་རྗེས་གནང་བཏོན་པ་ཡིན། སྤྱིར་བཏང་འདི་ལོའི་ཤེས་རབ་སྙིང་པོའི་ཆོས་ཁྲིད་ཚུད་པས་ས་གནས་འདིར་ཤེས་རབ་སྙིང་པོའི་ཆོས་ཁྲིད་སྡོམ་པས་ཐེངས་མ་གསུམ་ཙམ་རེད་འདུག
ཉིན་རྗེས་མར་སྐྱབས་རྗེ་ཞི་བར་གཤེགས་པ་བྱ་བྲལ་སངས་རྒྱས་རྡོ་རྗེས་མཛད་པའི། རྡུལ་ཕྲན་མཚོན་ཆ་ཞི་བར་བྱེད་པའི་སྨོན་ལམ།“བསྐལ་ངན་དུས་ཀྱི་གཡོ་འཁྲུག་བཟློག་པའི་ཐུགས་དམ་རྒྱུད་བསྐུལ་གསོལ་འདེབས་སྨོན་ལམ་དུ་བྱ་བ་དྲང་སྲོང་དམོད་སྔགས་ཞེས་བྱ་བ།”འཛམ་གླིང་ཞི་བདེའི་སྨོན་ལམ་དང་། བསྟན་རྒྱས་སྨོན་ལམ། མར་མེ་སྨོན་ལམ་སོགས་སྨོན་ལམ་གསུམ་གྱིས་མཐའ་རྒྱན་ནས་ད་རེས་ཉིས་སྟོང་ཉེར་ལྔ་ལོའི་ལོ་མཇུག་གི་མཚམས་ཆོས་དེ་གེགས་མེད་ལེགས་གྲུབ་བྱུང་།