གཟའ་ཟླ་བའི་བདེ་ཆེན་ཞིང་སྒྲུབ་ཀྱི་ཉིན་མོ།

སྔ་ལོར་པོར་ལེན་ནས་བོད་རིགས་རྣམས་དང་མཉམ་དུ།

དེ་རིང་གི་ཉིན་མོ་འདིར་ནམ་རྒྱུན་བདེ་ཆེན་ཞིང་སྒྲུབ་དེ་ཉིད་ཡིན་པས་དགོང་མོ་ཆུ་ཚོད་དྲུག་པའི་སྐབས་སུ་ཉེ་ཆར་གསར་དུ་སྒོ་ཕྱེས་པའི་ཆོས་ཚོགས་སུ་མི་རྣམས་གཅིག་རྗེས་གཉིས་མཐུད་རིམ་བཞིན་འབྱོར་ནས་ཆོས་ཚོགས་ཀྱི་འཚོགས་ཁང་ཆུང་ཆུང་དེ་མི་ཡིས་ཡོངས་སུ་ཁེངས་ནས་ཁ་ཤས་ཞིག་ཐབ་ཚང་ནང་དུ་བསྡད་སོང་། དེ་རིང་ནི་ངོས་ཀྱི་གྲོགས་པོ་མེའུ་ཀོའུ་ནས་མཛུབ་གནོན་སྒྲ་བརྙན་ཐོག་མི་མང་དང་མཉམ་དུ་འོད་དཔག་མེད་ཀྱི་བསྙེན་དབྱངས་གཏངས་བྱུང་བས་མི་མང་ཧ་ཅང་དགའ་བོ་བྱས་སོང་། དེ་རིང་གི་ཆོས་ཐུན་ལ་སྔ་ལོར་ངོས་ནས་བྲིས་པའི། ཉིན་རེའི་དགེ་སྦྱོར་གྱི་ཉམས་ལེན། 

ཆོག་ཤེས་ནི་ནོར་གྱི་མཆོག་ཡིན་པས་ཀུན་ལ་འདོད་རྔམ་མ་ཆེ།། 

ཕྲག་དོག་ནི་བསོད་ནམས་ཟད་པའི་རྒྱུ་ཡིན་པས་ཀུན་ལ་ཡི་རངས་བསྐྱེད།། 

བསམ་པ་བཟང་པོ་ནི་ནང་ཆོས་ཀྱི་སྙིང་པོ་ཡིན་པས་མ་བརྗེད་པར་རྒྱུན་དུ་ཉམས་ལེན་བྱོས།། 

ང་རྒྱལ་ནི་བཟང་སྤྱོད་ཀྱི་བཀག་རྡོ་ཡིན་པས་རྟག་ཏུ་དམན་ས་ཟུངས།། 

ཞེ་སྡང་ནི་དགེ་སེམས་འཚིག་པའི་མེ་ཡིན་པས་ཀུན་ལ་སྙིང་རྗེ་སྒོམས།། 

སེར་སྣ་ནི་ཡི་དྭགས་སུ་སྐྱེ་བའི་རྒྱུ་ཡིན་པས་ཀུན་ལ་སྦྱིན་གཏོངས་བྱོས།།

ཞེས་པ་འདི་ཉིད་ཀྱི་ཐོག་ནས་འགྲེལ་བཤད་བྱས་ནས་ཞིང་སྒྲུབ་མདོར་བསྡུས་ཞིག་གཏང་། མདུན་སྐྱེད་འོད་ཞུའི་རྫོགས་རིམ་སྐབས་སུ་སྒོམ་སྐར་མ་བཅུ་ཙམ་མཉམ་དུ་བྱས་ནས་མཐར་བསྔོ་བ་སྨོན་ལམ་སོགས་ཀྱིས་གྲོལ།