ངོས་ཀྱི་ཉི་རའི་ནང་གི་ཤིང་སྡོང་རྩེ་རུ་འཇའ་ཤར་བ།

ངོས་ཀྱི་ཉི་རའི་ནང་གི་བར་སྣང་དུ་འཇའ་ཤར་བ།

ཉིན་མོ་འདི་ནི་ཉེ་བའི་ཆར་ཨ་རི་ཉིའུ་རྗེར་སི་ནས་ངོས་ཀྱི་སློབ་མ་ཞིག་འདས་གྲོངས་སུ་སོང་ནས་དེ་རིང་ཞེ་དགུ་ལ་ཁེལ་ཡོད་སྟབས་ཁོ་རང་གི་སྲིང་མོའི་འདོད་པ་ལྟར་དུ་དེ་རིང་ནང་དུ་བསྡད་ནས་ཞོགས་ཐུན་སྐབས་སུ་ནམ་རྒྱུན་གྱི་ཁ་འདོན་རྣམས་ཚར་བར་བྱས། གཤིན་པོ་ཀརྨ་མགོན་པོའི་ཆེད་དུ་གཏེར་གསར་འཁོར་བ་དོང་སྤྲུགས་ཀྱི་ཆོ་ག་ཚར་གྲངས་བསགས། ཉིན་གུང་རྒྱབ་ཏུ་ཆོ་ག་དེ་ཉིད་ཀྱི་སྒོ་ནས་བྱང་བསྲེགས་བྱས། འདིར་ཡོད་ངོས་ཀྱི་སློབ་མ་འགའ་སླེབས་བྱུང་བས་མཉམ་དུ་འོད་ཆོག་ཞིག་ཀྱང་བཏོན། ཆོ་ག་གྲུབ་མ་ཐག་ངོས་ཀྱི་དགེ་ཕྲུག་འགའ་དང་མཉམ་དུ་ཉི་ར་ནང་དུ་སྒོམ་མཉམ་དུ་རྒྱབས། མི་འགའ་ཡིས་སྒོམ་རྒྱབ་སའི་མདུན་གྱི་ནམ་མཁར་ཤིང་སྡོང་གི་རྩེ་ནས་པར་བླངས་པའི་ནང་དུ་འཇའ་འོད་ཀྱི་གུར་ཕུབས་པ་མཐོང་རྒྱུ་འདུག ཨ་རིའི་མི་འདི་རྣམས་རྒྱ་བོད་སོགས་ཀྱི་མི་རིགས་དང་མི་འདྲ་བས་བླུན་དད་བྱེད་མཁན་ཕལ་ཆེར་ཉུང་། དེ་རིང་ནི་ཁོང་ཚོའི་པར་ཆས་ནང་གི་འཇའ་དེ་ལ་ཡ་མཚན་ཆེན་པོ་བྱེད་ཀྱི་འདུག ངས་ནི་ཕལ་ཆེར་པར་ཆས་ཀྱི་སྐྱོན་ཆ་མིན་ནམ་བསམ་པ་ལས་གཞན་དམིགས་བསལ་གྱི་ཡོན་ཏན་གང་ཡང་མ་མཐོང་། ལར་ནི་པར་ཆས་ནང་གི་འཇའ་ལ་དཔྱད་ན་ནམ་རྒྱུན་གནམ་གཤིས་ཀྱི་རྐྱེན་པའི་ཆུ་འཇའ་དང་གཏན་ནས་མི་འདྲ། རྗེས་ནས་ང་ཚོའི་ས་ཆ་དེ་ག་རང་དུ་པར་ཆས་གཅིག་པས་པར་མང་པོ་བླངས་ཀྱང་འཇའ་དེ་མཐོང་རྒྱུ་མི་འདུག མི་མང་པོ་ཞིག་ཡ་མཚན་དགོས་པ་རུ་འཇའ་དེ་ཤིང་སྡོང་གི་ནང་དུ་ཡོད་པ་ལས་ཕྱི་ལོགས་སུ་མེད་པ་དེར་ཡ་མཚན་བྱེད་ཀྱི་འདུག 
དེ་ནས་ང་ཚོ་ཉི་ར་ནང་དུ་སྒོམ་ཚར་མ་ཐག་ནང་དུ་སོང་ནས་མཉམ་དུ་ཇ་འཐུང་བཞིན་ཁ་བརྡ་དང་མ་ཟད་པར་ཆས་ནང་གི་འཇའ་ལ་ཚང་མས་འཚང་ཁས་བལྟ་ཞིང་ཧ་ལས་མདོག་བྱེད་བཞིན་འདུག 
དགོང་མོར་དྲ་ནང་དུ་འཛུལ་བས་༧གོང་ས་སྐྱབས་མགོན་ཆེན་པོ་མཆོག་སྦས་ཡུལ་འབྲས་མོ་ལྗོངས་སུ་ཕེབས་ནས་ཀ་རྡོར་སྒང་གསུམ་གཙོར་བྱས་པའི་མི་མང་ཁྲི་གཉིས་ལྷག་ཙམ་ལ་ཟབ་རྒྱས་ཀྱི་གསུངས་ཆོས་ཟབ་མོའི་བཀའ་དྲིན་བསྩལ་གནང་མཛད་པ་དེ་མཇལ་རྒྱུ་བྱུང་། གནས་ཚུལ་ཐབས་སྡུག་ཞིག་ལ་བོད་ལྷ་ས་མལ་གྲོ་གུང་དཀར་སོགས་སུ་ཡོད་པའི་རྒྱ་མིའི་གཏེར་ཁ་རྔོགས་འདོན་བྱེད་སའི་ས་གནས་ཞིག་ནས་རི་ཉིལ་ནས་མི་གྲངས་བརྒྱ་སྐོར་ཞིག་ས་ཞབས་སུ་མནན་པ་དང་མི་མང་པོ་ཞིག་ལ་རྨས་སྐྱོན་ཚབས་ཆེན་ཕོགས་ཡོད་པའི་གནས་ཚུལ་འདུག