 |
| ངོས་ཀྱི་ལྡུམ་རའི་ནང་གི་མེ་ཏོག |
གློ་ཁུག་ནང་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་པོར་ལེན་ལ་ཡོད་པའི་ངོས་ཀྱི་དགེ་ཕྲུག་ཤེས་རབ་སྐལ་ལྡན་ལགས་རེད། ཁོང་ནས་གསུངས་ན་སང་ཉིན་རྒྱ་གར་ལ་དུས་འཁོར་དབང་ཆེན་ཞུ་རུ་འགྲོ་དགོས་ཡོད་པས་མ་སོང་བའི་སྔོན་ནས་སྙིང་ཐིག་སྔོན་འགྲོའི་ནང་གི་ཆོས་ཚིག་ཁ་ཤས་ཀྱི་དྲི་བ་ཡོད་པ་དེ་རེད། དེ་ནས་ངེད་གཉིས་གནམ་སྐར་རམ་སི་ཀེབ་ནང་ནས་སྐར་མ་ཉི་ཤུ་ཙམ་ལ་དྲི་བ་དང་དྲི་ལན་སོགས་ཀྱིས་ཁོ་རང་བློ་ཁ་ཚིམ་པར་བྱས། ཡང་སྐྱར་གློ་ཁུག་ནང་ནས་ཁ་པར་གྱི་སྒྲ་ཞིག་ཡོད་པ་དེ་ནི། མོན་ཏྲུ་རེ་ནས་དགེ་ཕྲུག་ཆོས་མིང་དུ་ཀརྨ་བློ་བཟང་ཡུལ་མིང་དུ་ཌོག་གེའི་རེད་འདུག ཁོང་ནས་གསུངས་ན་སང་ཉིན་དགོང་མོ་ཆུ་ཚོད་དྲུག་ནས་དགུ་ཡི་བར་དུས་ཚོད་ཨི་ཡོད། ཁོ་རང་གི་ནང་ལ་མི་བཅུ་གསུམ་ཙམ་མཉམ་དུ་དགོང་ཟས་གྲ་རྒྱས་པོ་ཞིག་གྲ་སྒྲིག་བྱས་ཡོད་གསུངས་སོང་། ངོས་ནི་སྤྱིར་གཏང་དབྱིན་ཇི་འདི་རྣམས་ཀྱི་ལུགས་སྲོལ་ལྟར་དོན་མེད་འཁྱམས་ཉུལ་དང་། ཁ་ལག་ཟ་བ་སོགས་ལ་དུས་ཚོད་གཏང་ཞིང་མི་ཚེ་རྣམ་གཡེངས་ཟང་ཟིང་ལ་ངང་ལ་བསྲེ་བ་འདིར་དེ་ཙམ་དགའ་བོ་མེད་ཀྱང་། ལུང་པར་བསྡད་ན་ཡུལ་ཁྲིམས་སྲུང་ཟེར་བ་ནང་བཞིན་མཚམས་རེར་ཁོང་ཚོ་ལ་མ་ལྟོས་རང་ལྟོས་འདྲ་ཞིག་རེད་འདུག གང་ལྟར་ངས་ཁོ་རང་ལ་སང་ཉིན་ངོས་ནས་གནམ་སྐར་ནང་ནས་དགོང་མོ་ཆུ་བདུན་པའི་སྐབས་སུ་མ་ཐུག་ནས་མི་ལོ་ཧྲིལ་པོ་བཅུ་བཞི་ཏག་ཏག་སོང་བའི་ངོས་ཀྱི་སྲིང་མོར་སྐད་ཆ་བཤད་རྒྱུ་བྱས་ཚར་བས་ཁྱེད་སར་ཡོང་ཐུབ་ས་མ་རེད། དགོངས་འགལ་མེད་པར་ཞུ་ཟེར་བས་ཁོ་རང་ནས་ཀྱང་མོས་མཐུན་བྱས་སོང་། ཆུ་ཚོད་གསུམ་པའི་སྐབས་སུ་དགེ་ཕྲུག་ཆོས་མིང་དུ་བདེ་ཆེན་དཔལ་མོ་དང་ཡུལ་མིང་དུ་ལིའུ་རྫ་འབྱོར་སོང་། དེ་ནི་མོ་རང་མི་སི་ཀོ་ལ་གུང་སང་ལ་སོང་ནས་ཚུར་སླེབས་པ་དེ་ཡིན་སྟབས་ངོས་ལ་མི་སི་ཀོའི་ཅ་ལག་འདྲ་མིན་ཁ་ཤས་རྔན་པ་ཉོས་ནས་ཁུར་འདུག ཆུ་ཚོད་བདུན་པའི་སྐབས་སུ་དགེ་ཕྲུག་ཆོས་མིང་དུ་ཀུན་བཟང་དབང་མོ་ཡུལ་མིང་དུ་སུ་སིན་ནས་མོག་མོག་བཟོས་ནས་ཁུར་སོང་བས་དགོང་ཟས་སུ་ཟོས་ནས་ཐོག་ཁར་སོང་ཞིང་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་པས། དྲ་རྒྱའི་རྒྱུད་ལམ་ཁག་གི་གནས་ཚུལ་གསར་པ་ཞིག་ལ། དེ་ནི་དེང་སང་དྲག་ཏུ་འཕྱུར་བཞིན་པའི་རྒྱ་ནག་ནང་དམངས་ཀྱི་ཐོབ་ཐང་རྩོད་ལེན་གྱི་ལས་འགུལ་གྱི་རྦ་རླབས་དེ་རེད། འདས་པའི་བདུན་ཕྲག་གཉིས་རིང་རྒྱ་ནག་གི་གྲོང་ཆེར་ཆེ་ཤོས་ཀང་ཀྲུའི་ནང་གི་ཝུའི་ཀང་གྲོང་བསེབ་ནང་ནས་མི་མང་སྟོང་ཚོ་མང་པོའི་རྒྱ་ནག་གཞུང་ནས་ས་ཞིང་བཙན་འཕྲོག་བྱས་པའི་འཁོན་འགྲས་དང་། རྒྱ་ནག་དཔོན་རིགས་རྣམས་ཀྱི་ལྐོག་ཟ་རུལ་སུང་གི་དྲི་ངན་འཛམ་བུ་གླིང་གང་སར་ཁྱབ་པའི་གནས་ཚུལ་སོགས་ཤེས་ནས་མི་མང་རྣམས་ཡར་ལངས་བྱས་པའི་འུར་སྒྲ་དེ་རེད། འདས་པའི་ལོ་གཅིག་ནང་ཚུད་ནས་ལིའི་བྷི་ཡ་དང་ཨ་རབ་སོགས་ཁ་ཆེའི་རྒྱལ་ཁབ་མང་པོ་ཞིག་ནང་མི་མང་ཡར་ལངས་བྱས་པའི་རྐྱེན་གྱིས་རྒྱལ་ཁབ་དང་སྲིད་འཛིན་རྒྱལ་པོ་སོགས་མང་པོ་ཞིག་བྱེ་མའི་ཆངས་བུ་བཞིན་དུ་ནུས་མེད་དུ་གྱུར་པ་འདིས་རྒྱ་ནག་གཞུང་ལའང་བརྡ་ལན་སྤྲད་ཡོད་པ་ནི། ཁ་སང་འཚོགས་མ་ཐག་པའི་རྒྱ་ནག་གི་དམར་ཤོག་ཚོགས་པའི་དཔོན་རིགས་ཤིག་ནས་ཁ་ཤ་དར་ཐག་འཐེན་འཐེན་ངང་ནས་སྡར་སྐད་འདི་འདྲ་ཤོར་དགོས་བྱུང་ཡོད། ཁོང་ནས་གསུང་ན། ༼ད་ལྟའི་རྒྱ་ནག་གི་ཞིང་ཆེན་མང་པོའི་ནང་མི་མང་གྱེན་ལངས་བྱས་པ་འདི་ལས་སླ་བོ་བྱས་ནས་རྩ་མེད་གཏང་ཐུབ་ཀྱི་མ་རེད། ང་ཚོའི་སྲིད་གཞུང་འདི་དཔེར་ན་ཀུ་ཤུ་ཤིང་ཐོག་རུལ་བ་དང་གཅིག་པ་ཡིན། ཕྱི་ལོགས་སུ་པགས་པ་ལ་དམར་པོ་ཡོད་ཀྱང་ནང་རུལ་ཚར་ནས་ཟ་ཉན་གྱི་མ་རེད།༽
ཅེས་སྡུག་སྐད་ཤོར་འདུག་པར་བལྟས་ན་རྒྱ་ནག་དམར་ཤོག་ཚོགས་པའི་རྒྱ་རྒན་ཁ་ཤས་ཀྱིས། གྲངས་ཉུང་མི་རིགས་ཀྱི་ཚེ་དང་ཚོད་མ་སོགས་མཉམ་བསྲེ་བྱས་ནས་ཟོས་པའི་བྲོད་གོག་ཆེན་པོ་དེ། རིང་མིན་ཉི་མ་གཅིག་ལ་འགས་འཐོར་དུ་འགྲོ་རྒྱུ་ཉག་གཅིག་ཡིན་ངེས། དེ་ནས་ཟིན་བྲིས་མདོར་བསྡུས་ཞིག་གཏང་ནས་ཉལ་སར་སོང་ཞིང་གཉིད་དུ་ཡུར།
No comments:
Post a Comment