Saturday, January 14, 2023

ཚེ་ཐར་གྱི་ཕན་ཡོན་མདོར་བསྡུས་བྱམས་བརྩེའི་ཆར་རྒྱུན་ཞེས་བྱ་བ་བཞུགས་སོ།


༅༅། ཚེ་ཐར་གྱི་ཕན་ཡོན་མདོར་བསྡུས་བྱམས་བརྩེའི་ཆར་རྒྱུན་

ཞེས་བྱ་བ་བཞུགས་སོ།

།ཚེ་ཡི་རིག་འཛིན་ལྷ་ཚོགས་ལ། །ཚེ་གང་སྐྱབས་སུ་ལ་བསྙེན་ནས།
།ཚེ་ལྡན་རྐང་གཉིས་འགྲོ་བ་ལ། །ཚེ་ཐར་ཕན་ཡོན་མདོར་བསྡུས་སྦྱིན།

།ཐར་མེད་ཉམ་ཐག་དུད་འགྲོ་རྣམས། །ཐར་པའི་ས་ལ་འགོད་འདོད་ན།
།ཐར་ལམ་སྲོག་བླུའི་དགེ་བ་ལ། །ཐར་འདོད་རྣམས་ཀྱིས་འཇུག་འཚལ་ལོ།

ཞེས་མཆོད་པར་བརྗོད་པས་མདུན་བསུས་ཏེ་འདིར་སྐབས་སུ་བབས་པ་སྲོག་བླུ་ཚེ་ཐར་གྱི་ཕན་ཡོན་མདོར་བསྡུས་སུ་བསྙད་པ་ལའང་རྩ་བའི་ས་བཅད་རྣམ་པ་བཞིའི་སྒོ་ནས་བཤད་པར་བྱའོ།
དང་པོ་གླེང་གཞིའི་སྒོ་ནས་མདོར་བསྟན་དུ་བཀོད་པ། གཉིས་པ་ཚེ་ཐར་ཇི་ལྟར་བྱ་ཚུལ། གསུམ་པ་ཚེ་ཐར་གྱི་ཕན་ཡོན། བཞི་པ་ཚེ་ཐར་གཏོང་མཁན་ཡོངས་ལ་རྗེས་སུ་ཡི་རངས་བཅས་ཀྱིས་མཇུག་བསྡུ་བའོ།

དང་པོ་ནི།
༼སྔོན་རྒྱ་གར་ཡུལ་དུ་མུ་སྟེགས་རྒྱལ་པོ་འཕྲི་ཅན་ཞེས་བྱ་བ་དེས། ཟས་སུ་ཤ་ཁྲག་དྲོན་མོ་ལ་དགའ་ཞིང་། སེམས་ཅན་ཁྲི་ཕྲག་མང་པོ་སྲོག་བཅད་པའི་རྣམ་སྨིན་གྱིས་དམྱལ་ཁམས་བཅོ་བརྒྱད་ཀྱི་ནང་ནས་རྡོ་རྗེའི་དམྱལ་བར་སྐྱེས་ནས་སྡུག་བསྔལ་གྱི་ཚད་ནི་ཉིན་གཅིག་རིང་ལན་བརྒྱ་རེ་ལ་འཆི། བརྒྱ་རེ་ལ་སོས་པའི་གནས་སུ་ལྷུང་ནས་ཡོད་པ་ལས། ཚེ་དང་ལྡན་པ་ཀུན་དགའ་བོས་མ་དག་པའི་དམྱལ་བའི་སེམས་ཅན་དེ་ཉིད་ཀྱི་སྡུག་བསྔལ་མཐོང་ནས་བཅོམ་ལྡན་འདས་ལ་ཞུས་པས། བཅོམ་ལྡན་འདས་ཀྱི་ཞལ་ནས། མི་དེ་ནི་ཟས་སུ་ཤ་ཁྲག་ལ་དགའ་ཞིང་སེམས་ཅན་གྱི་སྲོག་བཅད་པའི་རྣམ་སྨིན་ཡིན་ཅེས་གསུངས་སོ། ། དེ་ནས་ཀུན་དགའ་བོས་ཆོས་ཀྱི་རྒྱལ་པོ་ལ། འདི་ཐར་བའི་ཐབས་ཡོད་དམ་ཞེས་ཞུས་པས། གཤིན་རྗེ་ཆོས་ཀྱི་རྒྱལ་པོའི་ཞལ་ནས། མི་དེ་ངན་སོང་ནས་ཐར་བར་བྱེད་ན། འཇིག་རྟེན་གྱི་ཁམས་སུ་ཚེ་ཐར་བཏང་ན་ཐར་རོ། ། ཞེས་གསུངས་པ་ལས། དེ་ནས་ཀུན་དགའ་བོས་དམྱལ་བའི་སེམས་ཅན་དེ་ཉིད་ཀྱི་དོན་དུ་ཚེ་ཐར་བཏང་བས། རྡོ་རྗེ་དམྱལ་བ་ལས་ཐར་རོ། ། ཞེས་སངས་རྒྱས་ཀྱིས་མདོ་ལས་གསུངས་སོ།༽
དགེ་ལུགས་ཆོས་སྤྱོད་ལས་དྲངས། མཆན།
ཡང་སྟོན་པ་ཐུགས་རྗེ་ཅན་སྔོན་སློབ་པ་ལམ་གྱི་གནས་སྐབས་སུ་རྒྱལ་བུ་སྙིང་སྟོབས་ཆེན་པོར་སྐྱེ་བ་གཞེས་པའི་ཚེ་སྟག་མོ་མ་བུ་དྲུག་པོ་བཀྲེས་སྐོམ་གྱིས་མནར་བ་གཟིགས་ནས་རྒྱལ་བུ་སྙིང་སྟོབས་ཆེན་པོའི་རང་གི་སྐུ་ལུས་སྟག་མོར་སྦྱིན་པ་གཏང་ནས་སྟག་མོ་མ་བུ་དྲུག་པོའི་སྲོག་སྐྱབས་པའི་ལོ་རྒྱུས་དང་། ཡང་སྟོན་པ་ཐུགས་རྗེ་ཅན་ཉིད་ཚོང་དཔོན་གྱི་བུ་ཆུ་འབེབས་ཀྱི་སྐྱེ་བ་གཞེས་པའི་ཚེ་རྫིང་བུ་ཉི་མས་སྐམ་ནས་ཉ་ཁྲི་ཐམས་པ་ཤི་ལ་ཁད་དུ་གྱུར་པའི་སྐབས་སུ་རྫིང་བུར་ཆུ་དྲངས་ནས་ཉ་རྣམས་ཀྱི་སྲོག་སྐྱབས་པའི་ལོ་རྒྱུས་དང་གཏམ་རྒྱུད་སོགས་ཧ་ཅང་མང་ཡང་འདིར་ཡེ་གེ་མང་དུ་དོགས་ནས་མ་སྤྲོས་སོ། བདག་ཅག་རྣམས་ཀྱང་སྟོན་པ་ཐུགས་རྗེ་ཅན་གྱི་རྗེས་འཇུག་ཡིན་ནས་བཟུང་སྟེ་ངེས་པར་དུ་ཉམ་ཐག་སེམས་ཅན་རྣམས་ཀྱི་སྲོག་སྐྱབས་ཀྱི་ལས་ལ་འཇུག་དགོས་སོ།

གཉིས་པ་ཚེ་ཐར་ཇི་ལྟར་བྱ་ཚུལ་ནི།
འགྲོ་བ་སེམས་ཅན་ཡོད་དོ་ཅོག་སྲོག་ཆགས་གྲོག་སྦུར་ཚུན་ཆད་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་ཅིང་། ལྷག་པར་དུ་ཉམ་ཐག་དུད་འགྲོ་རྣམས་ནི་ཁ་གྲག་ཐུབ་མིན་ལས་མ་གཏོགས་ཚོར་བ་བདེ་སྡུག་འདོད་མི་འདོད་ནི་གཅིག་པ་ཡིན་ཅིང་དུད་འགྲོ་ཕལ་ཆེར་ནི་རྣམ་དཔྱོད་མི་ལས་གྲུང་ཞིང་ཕན་ཚུན་བརྩེ་བ་དང་། རོགས་རམ་བྱེད་པ་སོགས་མང་པོ་མཐོང་ཆོས་སུ་ཡོད་པ་ལྟར་རོ། བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་སུ་གནས་པའི་སྲོག་ལྡན་གཞན་ཞིག་གིས་དབང་ཤེད་བེད་སྤྱོད་གཏང་ནས་ཉམ་ཆུང་གཞན་གྱི་སྲོག་ལ་རྒོལ་ནས་ཇི་མི་སྙམ་པར་རང་གི་ཁ་ཟས་སུ་བེད་སྤྱོད་བྱེད་པ་འདི་ནི་ཞིབ་ཏུ་བསམ་བློ་གཏང་ན་ཆེས་ཡ་ང་བའི་གནས་སྟངས་ཞིག་ཡིན་ནོ།
དངོས་གཞི་ཚེ་ཐར་ལ་འཇུག་པའི་སྐབས་སུ་ཀུན་སློང་མ་དག་པ་རང་ཉིད་ཆེ་འདོད་དང་གྲགས་འདོད། ང་རྒྱལ་དང་ངོམ་ཆོས། ཉམ་ཐག་དུད་འགྲོ་རྣམས་ཀྱང་འཇིག་རྟེན་ཆོས་བརྒྱད་ཀྱི་རྩེད་ཆས་དང་ཐ་ན་ཚོང་རྫས་སུ་མ་སོང་བར་མདོར་ན་བརྩེ་བའི་སྙིང་རྗེས་ཀུན་ནས་བསླང་སྟེ་དུས་རྟག་ཏུ་ཚེ་ཐར་བྱེད་མ་ཐུབ་ཀྱང་སྐབས་རེར་དུས་ཆེན་ཁྱད་པར་ཅན་སངས་རྒྱས་ཀྱི་འཁྲུངས་སྐར་དང་། ཚེས་པ་བཅོ་ལྔ་། སོ་སོའི་རྩ་བའི་བླ་མའི་འཁྲུངས་སྐར་དང་ཡང་ན་འདས་མཆོད་སོགས་དུས་ཚེས་དགེ་བའི་ཉིན་མོ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་ཚེ་སྒྲུབ་ཡང་གསང་བླ་མེད་ལས་ཁོལ་དུ་ཕྱུངས་བའི། ཚེ་ཐར་གཏང་ཐབས་ཕན་བདེའི་སྙིང་པོ་དང་། གལ་སྲིད་རྒྱས་པ་མ་བྱུང་ན་ཡང་། འཇམ་མགོན་མི་ཕམ་རིན་པོ་ཆེའི་མཛད་པའི། ཚེ་ཐར་གཏོང་བའི་ཆོ་ག་འདོད་དགུའི་དཔལ་སྟེར། སོགས་གང་རུང་ཞིག་གིས་གཞུང་བསྲངས་ནས་ར་ལུག་སོགས་སེམས་ཅན་རྣམས་ཀྱི་སྤྱི་གཙུག་ཏུ་མགོན་པོ་ཚེ་དཔག་མེད་བསྒོམས་ནས་ཚེ་སྙིང་དང་། འོད་མཚན། ཡིག་བརྒྱ། མི་འཁྲུགས་པའི་གཟུངས་སྔགས། གཞན་སངས་རྒྱས་དང་བྱང་སེམས་རྣམས་ཀྱི་མཚན་སྔགས་དང་། གསོལ་འདེབས་སྨོན་ལམ་སོགས་གང་ཤེས་བྱ་ཞིང་ཁྱད་པར་དུ་གྲོལ་བ་དྲུག་གི་སྒོ་ནས་མཐོང་གྲོལ་ཙཀ་ལི་དང་སྐུ་ཐང་སོགས་བསྟེན། ཚོར་གྲོལ་བདུག་སྤོས་སྣར་བདུག། རེག་གྲོལ་བྱེ་མ་ལུས་ཐོག་ཏུ་འཐོར། བཏགས་གྲོལ་མགོ་ཐོག་ཏུ་འཇོག། མྱོང་གྲོལ་དམ་རྫས་དང་མ་ཎི་རིལ་བུ་སོགས་ཁར་ལྡུག། ཐོས་གྲོལ་རྒྱུད་པདྨའི་སྙིང་པོ་དང་སངས་རྒྱས་ཀྱི་མཚན་སྔགས་སོགས་རྣ་ཁུང་དུ་གོ་ངེས་སུ་བཟླ་ཞིང་མཐར་དུད་འགྲོར་མིང་གསར་པ་འདོགས་ཤིང་རྣ་ཚར་དང་། དཔུང་སྐུད་སོགས་འདོགས་པའི་ལུགས་སྲོལ་ལྟར་བྱ་ཞིང་ཇི་སྲིད་འཚོ་ཡི་བར་དུ་སེམས་ཅན་ཉིད་གཞན་གྱིས་མི་འཚེ་བའི་ས་གནས་དང་། ཉ་སོགས་ཆུ་གནས་ཀྱི་རིགས་རྣམས་ལ་སོ་སོའི་གཟུགས་པོ་དང་འཕྲོད་པའི་རྒྱ་མཚོ་དང་རྒྱུག་ཆུ་སོགས་ཀྱི་ནང་དུ་བསྐྱལ་ཞིང་ར་ལུག་སོགས་ཡིན་ན་དམིགས་བསལ་ཚེ་ཐར་སྲུང་སྐྱོབས་ཀྱི་ཁོར་ཡུག་སོགས་ཆེད་དུ་ཡོད་ན་དེར་བསྐྱལ་ལོ།
ཚེ་ཐར་དང་། སྲོག་བླུ་གཉིས་ནི་ཐ་དད་ཡིན་ཅིང་སྲོག་བླུ་ནི་དཔེར་ན་ཉ་ལྟ་བུ་གནས་སྐབས་གཤེད་མའི་ལག་ནས་ཉོ་ཞིང་ཆུ་ནང་དུ་བསྐྱལ་བ་ལྟར་ཡིན་ལ། ཚེ་ཐར་ནི་སེམས་ཅན་དེ་ཉིད་ཀྱི་སྲོག་བླུས་པའི་ཉིན་མོ་ནས་བཟུང་སྟེ་ཇི་སྲིད་འཚོ་ཡི་བར་དུ་བྱམས་བརྩེས་དམིགས་བསལ་ལྟ་སྐྱོང་བྱེད་ནས་བསད་ནས་ཤ་མི་བཟའ། གཙོང་ནས་རིན་མི་ལེན། བཀོལ་ནས་ཁལ་མི་འགེལ། རྒྱབ་ལ་རྐང་པ་མི་འཇོག ལུས་ནས་བལ་རྩིད་མི་ལེན་པ་སོགས་བྱས་ན་དེ་ནི་ཚེ་ཐར་དོན་དང་ལྡན་པ་ཡིན་ནོ།

སྲོག་བླུ་ཡིན་ན་ཚེ་ཐར་ཡིན་པའི་མ་ཁྱབ་ཅིང་། ཚེ་ཐར་ཡིན་ན་སྲོག་བླུ་ཡིན་པའི་ཁྱབ་པ་ལྟར་སྲོག་བླུ་དང་ཚེ་ཐར་གཉིས་ལ་ཁྱབ་ཆེ་ཆུང་གི་ཁྱད་པར་ཡོད་པ་ཤེས་དགོས་སོ།

གསུམ་པ་ཚེ་ཐར་གྱི་ཕན་ཡོན་ནི།
སྤྱིར་ཐེག་ཆེན་ལམ་གྱི་སྙིང་པོ་ཕར་ཕྱིན་དྲུག་ལས་དང་པོ་སྦྱིན་པ་ལའང་རྣམ་པ་གསུམ་ཡོད་ཅིང་། ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་གསུམ་ལས་ཐ་མ་ནི་སྲོག་བླུ་དང་ཚེ་ཐར་ཡིན་ཅིང་སེམས་ཅན་གཞན་ཚེ་ཐར་བྱེད་པ་འདི་ནི་མི་འཇིགས་པའི་སྦྱིན་པའང་ཡིན་ལ་ཚེ་ཐར་ཡང་ཡིན་ནོ།
༼ཕན་ཡོན་ནི་སེམས་ཅན་ཚེ་ཐར་བཏང་ན་དགེ་སློང་སྡོམ་ལྡན་དང་འདྲའོ། ། ལུག་ཚེ་ཐར་གཅིག་གིས་ངན་སོང་ལན་གཅིག་དག་གོ ། ར་ཚེ་ཐར་གཅིག་གིས་ངན་སོང་ལན་བདུན་དག་གོ ། འཇིག་རྟེན་གྱི་ཁམས་ན་མི་བརྒྱ་རྟ་བརྒྱ་བསད་པའི་སྡིག་པ་ཡོད་ཀྱང་། ཚེ་ཐར་གཅིག་བཏང་བས་སྡིག་སྒྲིབ་དག་གོ ། ཚེ་ཐར་བཅུ་གསུམ་བཏང་ན་བསྐལ་པ་ཁྲི་ཕྲག་གཅིག་གི་སྡིག་སྒྲིབ་དག་གོ ། ཚེ་ཟད་པའི་དོན་དུ་ཚེ་ཐར་བཏང་ན་ཚེ་བསྲིང་བར་འགྱུར་རོ། ། ཡང་ཚེ་ཟད་པའི་མི་ཞིག་ཞག་གསུམ་འཆི་ངེས་པ་ལ་ཚེ་ཐར་བཅུ་གསུམ་བཏང་ན་མི་དེ་ལོ་གསུམ་ཚེ་བསྲིང་ངེས་པར་འགྱུར་རོ། ། ཚེ་ཐར་རེ་བསད་ན་མི་བརྒྱ་སྲོག་གཅོད་པ་དང་འདྲའོ། ། དེ་ལ་སོགས་པའི་ཉེས་དམིགས་དཔག་ཏུ་མེད་པ་བཅོམ་ལྡན་འདས་ཀྱིས་མདོ་ལས་གསུངས་སོ། །༽
གཞན་ལས་བཏུས། མཆན།
དེ་བས་ཚེ་ཐར་དང་སྲོག་བླུ་བྱེད་པ་ནི་ཚེ་ཐུང་བ་དང་ནད་མང་བ། ལོངས་སྤྱོད་ཀྱིས་དབུལ་བ་སོགས་ལས་ལྡོག་པའི་ཐབས་ཉག་གཅིག་ཡིན་པ་སོགས་ཕན་ཡོན་མང་བོ་མདོ་རྒྱུད་ཀྱི་བསྟན་བཅོས་དུ་མ་ནས་གསུངས་ཏེ།
མདོ་དྲན་པ་ཉེར་བཞག་ལས།
ཚུལ་ཁྲིམས་ཀྱི་ནང་ནས་མཐོ་རིས་སུ་སྐྱེ་བ་མཆོག་ནི་འདི་ཡིན་ཏེ། སྲོག་སྦྱིན་པའི་ཚུལ་ཁྲིམས་སོ། །
ཞེས་ཚེ་བླུ་བྱས་པས་མཐོ་རིས་སུ་སྐྱེ་བར་གསུངས་པ་དང༌།
སློབ་དཔོན་དབྱིག་གཉེན་གྱིས།
གསོད་སར་ཁྲིད་པ་ཡོངས་བཏང་ནས། །དེ་བཞིན་སྲོག་གི་ཕན་བཏགས་ཤིང༌།
།སྲོག་ཆགས་འཚེ་བ་ཡོངས་སྤངས་པས། །ཚེ་རིང་བ་ནི་འཐོབ་པར་འགྱུར།
།ནད་གཡོག་བྱེད་ཅིང་སྨན་པ་དང༌། །སྨན་རྣམས་སྦྱིན་པར་བྱ་བ་དང༌།
།སྲོག་ཆགས་རྣམས་ལ་རྡོ་དབྱུག་དང༌། །འཚེ་བ་སྤངས་པས་ནད་མེད་གྱུར།
ཞེས་དང༌།
གཞན་ལ་འཚེ་བ་སྤངས་ན་རང་ཉིད་ནད་མེད་ཚེ་རིང་ཡོང་བར་གསུངས་པ་དང་།

སློབ་དཔོན་ངག་གི་དབང་ཕྱུག་གྲགས་པས།
བྱ་ཉ་རི་དྭགས་རྐུན་མ་དང༌། །སྦྲུལ་སོགས་གསད་བྱའི་ཕྱོགས་གྱུར་རྣམས།
།སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར།
ཞེས་ཚེ་ཐར་བཏང་བས་ཚེ་འཕེལ་བར་གསུངས་ཤིང༌།

སའི་སྙིང་བོ་འཁོར་ལོ་བཅུ་བའི་མདོ་ལས།
གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ་མར་བྱེད།
།རྟག་ཏུ་ནད་མེད་ཚེ་ཡང་རིང༌། །བདེ་ཞིང་སྐྱིད་ལ་གནོད་པ་མེད།
།སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ལམ་ལམ་ལ་མོས།
།སངས་རྒྱས་ཆོས་དང་དགེ་འདུན་མཐོང༌། །མྱུར་དུ་བླ་མེད་བྱང་ཆུབ་འཐོབ།
ཞེས་གསུངས་སོ།

སྲོག་བཅོད་སྤངས་པས་ཀུན་གྱིས་བཀུར་ཞིང་། མཐར་ཐུག་སངས་རྒྱས་ཀྱི་གོ་འཕང་འཐོབ་པར་གསུངས་པ་དང་།

།སྐྱབས་རྗེ་བྱལ་བྲལ་སངས་རྒྱས་རྡོ་རྗེའི་ཞལ་ནས། །
བྱ་ཉ་རི་དྭགས་གཡུང་དྭགས་དང་།།
འབུ་སྦྲང་ཡན་གྱི་སྲོག་ཆགས་རྣམས།།
སྲོག་མི་གཅོད་ཅིང་ཚེ་ཐར་བཏང་།།
མི་འཇིགས་སྐྱབས་སྦྱིན་ལ་བརྩོན་བྱ།།

འདི་ཡི་ཕན་ཡོན་བསམ་མི་ཁྱབ།།
ཚེ་སྒྲུབ་མཆོག་ཏུ་འདི་འགྱུར་ཞིང་།།
གསོན་རིམ་གཤིན་དགེར་འདི་ལྷག་མེད།།
ང་ཡི་འགྲོ་དོན་རྩ་བ་ཡིན།།

འགལ་རྐྱེན་ཕྱི་ནང་བར་ཆད་སེལ།།
མཐུན་རྐྱེན་འབད་མེད་ལྷུན་གྱིས་གྲུབ།།
སེམས་བསྐྱེད་བཟང་པོས་ཟིན་པ་དང་།།
བསྔོ་སྨོན་དག་པས་མཚམས་སྦྱར་ན།།

རྫོགས་སངས་རྒྱས་ལ་རེག་འགྱུར་ཞིང་།།
རང་གཞན་དོན་གཉིས་འགྲུབ་པ་ཡིན།།
འདི་ལ་ཐེ་ཚོམ་བྱ་མི་དགོས།།
ཞེས་གསུངས།
ལར་ནི་ཉམ་ཐག་གི་སེམས་ཅན་རྣམས་ལ་སྙིང་རྗེས་སྐྱོང་བ་ནི་སངས་རྒྱས་མཉེས་པའི་ཐབས་བླ་ན་མེད་པའང་ཡིན་ཏེ།
སྤྱོད་འཇུག་ལས།
གཞན་ཡང་གཡོ་མེད་གཉེན་གྱུར་ཅིང་། །ཕན་པ་དཔག་མེད་མཛད་རྣམས་ལ།
།སེམས་ཅན་འགུ་བྱ་མ་གཏོགས་པ། །གཞན་གང་ཞིག་གིས་ལན་ལོན་འགྱུར།
ཞེས་གསུངས་སོ།
ཞེས་སོགས་མདོ་རྒྱུད་ཀྱི་བསྟན་བཅོས་རྣམས་ལས་ཀྱང་གཞན་ལ་བརྩེ་བས་རྗེས་སུ་སྐྱོང་བའི་བློ་འདི་དགེ་བ་གཞན་ལས་ཀྱང་ཕན་ཡོན་རྒྱ་ཆེར་གསུངས་སོ། ། དེ་ལྟར་ཚེ་ཐར་བྱས་པ་ལ་ཕན་ཡོན་མཐའ་མེད་ཀྱང་མདོར་བསྡུས་ན་རྣམ་པ་བཅུ་རུ་འདུས་ཏེ། ༡ སྐྱེ་བ་ཕྱི་མར་ངན་འགྲོའི་སྐྱེ་བ་ཁེགས་ནས་བདེ་འགྲོར་སྐྱེས་པ། ༢ དུས་མིན་གྱི་འཆི་བ་བཟློགས་ནས་ཚེ་རིང་བོར་འགྱུར་བ། ༣ ནད་རིགས་བཞི་བརྒྱ་རྩ་བཞི་དང་བྲལ་ཏེ་བདེ་སྐྱིད་ཀྱི་དཔལ་ལ་རོལ་བ། ༤ སྨན་རྣམས་མཐུ་དང་ལྡན་པར་འགྱུར་བ། ༥ ནོར་དང་ལོངས་སྤྱོད་རྒྱས་པ། ༦ གཟའ་གདོན་མི་མ་ཡིན་གྱི་གནོད་པ་མེད་པ། ༧ དཀར་ཕྱོགས་སྐྱོང་བའི་སྲུང་མས་སྐྱོང་ཞིང་གཞན་གྱིས་བཀུར་བ། ༨ སྐྱེ་བ་གཞན་དུ་རང་གིས་ཆོས་གསུངས་པའི་འཁོར་དུ་འགྱུར་བ། ༩ རང་གི་འདོད་པའི་དོན་ཐམས་ཅད་བདེ་བླག་ཏུ་འགྲུབ་པ། ༡༠ དཀོན་མཆོག་གསུམ་མངོན་སུམ་དུ་མཐོང་ནས་ཆོས་ཀྱི་དཔལ་ལ་སྤྱོད་ཅིང་བླ་མེད་བྱང་ཆུབ་འཐོབ་པ་བཅས་སོ།

བཞི་པ་ཚེ་ཐར་གཏོང་མཁན་ཡོངས་ལ་རྗེས་སུ་ཡི་རངས་དང་བཅས་པས་མཇུག་བསྡུ་བའོ།

དེང་སང་རྒྱ་ནག་དང་བོད་གཙོས་ཨེ་ཤ་ཡའི་ནང་པའི་རྒྱལ་ཁབ་རྣམས་སུ་ལོ་རབས་བརྒྱད་བཅུ་ནས་བཟུང་སྤྱི་ཚོགས་ཁྲོད་དུ་སྔར་མེད་གསར་དར་ཚེ་ཐར་དང་སྲོག་བླུའི་དགེ་བ་རླབས་པོ་ཆེའི་རྦ་རླབས་ཤིག་གྱེན་དུ་འཕྱུར་བཞིན་པ་འདིར་ཞིབ་ཏུ་བསམ་ན་ཆེས་ཡི་རངས་བྱེད་འོས་པ་ཞིག་རེད་བསམ། སྤྱིར་གཏང་ནས་བཤད་ན་དགེ་སྒྲུབ་སྡིག་སྤོངས་བྱེད་ཐབས་ཧ་ཅང་རྣམ་པ་མང་ཡང་དོན་ཧྲིལ་གྱིས་དྲིལ་ན་རང་གི་སྒོ་གསུམ་ལས་བྱུང་བའི་མི་དགེ་བ་རྣམས་སྤངས་ཞིང་དགེ་བ་བཅུར་བསྒྱུར་རྒྱུ་དེ་ཡིན།
མགོན་པོ་ཀླུ་སྒྲུབ་ཀྱི་ཞལ་ནས།
།དགེ་བའི་ལས་ལམ་བཅུ་པོ་ལུས་དང་ནི། །ངག་དང་ཡིད་ཀྱིས་རྟག་ཏུ་བརྟེན་བགྱི་ཞིང་།
།ཆང་རྣམས་ལས་ལྡོག་དེ་བཞིན་དགེ་བ་ཡི། །འཚོ་བ་ལ་ཡང་མངོན་པར་དགྱེས་པར་མཛོད།

ཞེས་གསུངས་པ་ལྟར་རོ།
དེ་བས་ཀྱང་སྲོག་གཅོད་སྤངས་རྒྱུ་འདི་ཤིན་ཏུ་ནས་ཀྱང་གལ་ཆེ་སྟེ།
སྲོག་གཅོད་གོང་ལས་སྡིག་གཞན་མེད།
ཅེས་གསུངས་པ་ལྟར་དེང་སང་བསྟན་འཛིན་གྱི་སྐྱེས་བུ་འགའ་ཡིས་རང་ཉིད་མི་ཚེ་ཧྲིལ་པོར་དམར་ཟས་སྤངས་ཤིང་ད་དུང་མཐའ་གཅིག་ཏུ་ཉམ་ཐག་སྐྱབས་མེད་དུད་འགྲོ་རྣམས་ཀྱི་རྒྱབ་ཏུ་ལངས་ནས་བསད་ལ་ཁད་པའི་སེམས་ཅན་རྣམས་ལ་འགྲོ་སོང་རང་གི་སྒོར་ཁུག་ནང་ནས་གཏོང་ཞིང་སྲོག་བླུ་དང་ཚེ་ཐར་བྱེད་པ་འདི་ནི་ཧ་ཅང་རླབས་ཆེན་གྱི་དགེ་བ་ཞིག་ཡིན་སྟབས་ཀུན་གྱིས་དེ་ལ་མཐུན་འགྱུར་དང་། ཞལ་འདེབས། རྒྱབ་སྐྱོར་བྱེད་དགོས་ངེས་སོ། བོད་ནས་བླ་རུང་ཆོས་སྒར་མཁན་སྤྲུལ་རྣམས་ཀྱིས་ལོ་ལྟར་ཉ་སོགས་ཆུ་གནས་ཀྱི་རིགས་གྲངས་མེད་པ་ཚེ་ཐར་དང་སྲོག་བླུ་གནང་བ་དང་། བལ་ཡུལ་གནས་བཞུགས་སྐྱབས་རྗེ་གྲུབ་དབང་ཞིང་གཤེགས་དམ་པ་བྱ་བྲལ་སངས་རྒྱས་རྡོ་རྗེ་རིན་པོ་ཆེ་ནས་སྐུ་ཚེ་གང་པོར་ཉམ་ཐག་སེམས་ཅན་གྲངས་མེད་པ་རྣམས་སྲོག་གི་འཇིགས་པ་ལས་བསྐྱབས་པ་དང་། ཐེའུ་ཝན་ལ་བཞུགས་པའི་ང་ཡི་ཆོས་གྲོགས་འཇའ་ཚོན་སྤྲུལ་སྐུ་ནས་ཀྱང་ཐེའུ་ཝན་ས་གནས་རང་ནས་ཉ་སོགས་ཆུ་གནས་ཀྱི་རིགས་ཐེངས་མ་༢༣༡ གནང་ཞིང་ཐེངས་རེར་སྲོག་ཆགས་གྲངས་མེད་པ་གནང་ཞིང་མདོར་ན་ཚེ་ཐར་གྱི་འགྲོ་སོང་ཁོ་ནའི་ཆེད་དུ་ཐེའུ་ཝན་སྒོར་མོ་འབུམ་བརྒྱ་ལྷག་གཏང་ཞིང་། བོད་ནས་འབྲི་གཡག་གཙོས་སྒོ་ཟོག་སེམས་ཅན་ཉིས་སྟོང་བཞི་བརྒྱ་ལྔ་བཅུ་དང་། འགྲོ་སོང་རྒྱ་སྒོར་ཁྲི་སུམ་བརྒྱ་ཁ་ལྷག་གཏང་གནང་བའོ། ཨ་རིའི་ཁ་ལི་ཧྥོར་ཉི་ཡར་བཞུགས་པའི་གུས་པའི་ཆོས་གྲོགས་གླིང་སྤྲུལ་རིན་པོ་ཆེ་ནས་ཀྱང་ལོ་ལྟར་ར་མ་མང་པོ་ཚེ་ཐར་གནང་ཞིང་འདས་པའི་ལོ་འགའ་ཡི་རིང་ར་མ་སྟོང་ཕྲག་གསུམ་ལྷག་སྲོག་བླུ་གནང་བ་དང་། ཁོང་གི་ཆོས་གྲོགས་འཇམ་དབྱངས་རིན་པོ་ཆེ་ནས་ཀྱང་སེམས་སྲོག་ཆགས་དུང་ཕྱུར་གསུམ་ལྷག་ཚེ་ཐར་གནང་སྐད་འདུག། གང་ལྟར་འགྲན་ཟླ་དང་བྲལ་བའི་བསྟན་འཛིན་གྱི་སྐྱེས་ཆེན་ཁོང་རྣམ་པའི་ཚེ་ཐར་གྱི་ཕྱག་ལས་རླབས་ཆེན་གྱི་མཛད་པ་རྣམས་ལ་ཁ་མིག་གྱེན་ལྟ་བྱེད་ནས་རང་རེ་རྣམས་ཀྱང་རྗེས་སུ་ངེས་པར་འཇུག་དགོས་པར་སེམས་སོ།
གལ་སྲིད་རང་ཉིད་ཀྱིས་དེ་ལྟ་བུའི་སྒྲུབ་མ་ནུས་ཀྱང་གཞན་གྱིས་བསགས་པའི་རླབས་ཆེན་གྱི་དགེ་བ་འདི་རྣམས་ལ་ཕྲག་དོག་མེད་པར་སེམས་ཁོངས་ནས་ཡི་རངས་བྱས་ན་དགེ་རྩ་མཉམ་དུ་འབྱུང་ཞེས་གསུངས་སོ།
མཁས་གྲུབ་ཀརྨ་ཆགས་མེད་ཀྱིས།
གཞན་གྱི་དགེ་བ་བྱས་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས།
།སྙིང་ནས་དགའ་བས་རྗེས་སུ་ཡི་རངས་ན། །དེ་ཡི་བསོད་ནམས་མཉམ་དུ་འཐོབ་པར་གསུངས།
ཞེས་གསུངས་པ་ལྟར་གང་ཞིག་གིས་ཉམ་ཐག་མགོན་མེད་སྐྱབས་བྲལ་གྱི་སེམས་ཅན་འདི་རྣམས་ལ་སྙིང་ནས་བརྩེ་བ་ཡོད་ན་བྱུང་ན་མི་ཚེ་ཡོངས་ལ་དམར་ཟས་སྤངས་ཞིང་དཀར་ཟས་ལ་རོལ་བ་དང་། དེ་ལྟར་མ་བྱུང་ནའང་ཉ་སྟོང་དུས་བཟང་སོགས་ལ་དམར་ཟས་སྤངས་ཅི་ཐུབ་བྱེད་ཅིང་བསམ་པ་བྱང་ཆུབ་སེམས་ཀྱིས་རྒྱན་ཅིང་སྦྱོར་བ་དངོས་སུ་སེམས་ཅན་རྣམས་སྲོག་བླུ་དང་། ཚེ་ཐར་གྱི་དགེ་ལས་རླབས་པོ་ཆེ་འདིར་སྣང་ཆུང་དུ་མ་འཇོག་པར་ཅི་ནུས་སུ་བརྩོན་པར་ཅི་ནས་ཀྱང་འབད་འཚལ་ལོ།
སླར་སྨོན་པ།
རབ་དཀར་ཀུན་སློང་དྲི་མེད་ཀྱི། །ལེགས་བྱས་དགེ་འདིས་འགྲོ་བ་ཀུན།
།འཆི་བདག་བདུད་ལས་ཐར་གྱུར་ནས། །རིང་འཚོའི་བདེ་སྐྱིད་དཔལ་འབར་ཤོག

ལྷག་པར་ཉམ་ཐག་དུད་འགྲོ་རྣམས། །མི་ཡིས་བསད་དང་བཀོལ་བ་སོགས།
།ཡ་ངའི་འཇིགས་པ་ལས་གྲོལ་ཞིང་། །རང་དབང་སྐྱིད་ཀྱིས་འཚོ་བར་ཤོག

ཞེས་ཚེ་ཐར་གྱི་ཕན་ཡོན་མདོར་བསྡུས་བྱམས་བརྩེའི་ཆར་རྒྱུན་ཅེས་པ་འདིའང་གུས་པའི་ཆོས་གྲོགས་གླིང་སྤྲུལ་རིན་པོ་ཆེ་ནས་འདི་ལྟར་བྱོས་ཤེས་བཀའ་ཡི་བསྐུལ་མ་ལྟར་དུ་ཆོས་སྨྲ་བའི་མིང་ཙམ་འཛིན་པ། དོན་དུ་ཆོས་དོན་ནོར་གྱིས་དབུལ་བའི་འཁྱར་བོ་ཀརྨ་བསྟན་སྲུང་དེས་ཚེ་ཐར་གྱི་ཕན་ཡོན་སོགས་དཔྱད་འོས་ཅན་གྱི་ཡིག་ཆ་འགའ་དང་མཐུན་པར་བྱས་ནས་ཨ་རིའི་ཁ་ལི་ཧྤོར་ཉ་ཡའི་ཞི་བདེ་རྒྱ་མཚོའི་ཉེ་འགྲམ། རང་གནས་འཇམ་དབྱངས་ཆོས་འཁོར་གླིང་ནས་རབ་གནས་ཆུ་སྟག་ལོའི་བོད་ཟླ་༡༡ པའི་ཚེས་པ་༡༢ དང་། ཕྱི་ལོ་2023 ཟླ་བ་1 པོའི་སྤྱི་ཚེས་11 ༧སྐྱབས་མགོན་རྒྱལ་བ་ཡིད་བཞིན་ནོར་བུའི་སྐུའི་བླ་གཟའ་རེས་གཟའ་ལྷག་པའི་ཉིན་མོ་སྦྱར་བས་དཔལ་ལྡན་བླ་མའི་སྐུ་ཚེ་ཡུན་དུ་བརྟན་ཅིང་མཛད་འཕྲིན་ཕྱོགས་ཀུན་ཁྱབ་པའི་སྨོན་འདུན་གྲངས་མེད་བཅས་གུས་པས་སྦྱར་ཏེ་ཕུལ་བའོ།
སརྦ་མངྒ་ལཾ།









Friday, January 6, 2023

ཡེ་ཤུའི་ལྷ་ཁང་ནང་དུ་ཆོས་བཤད་བྱས་པའི་ཉིན་མོ།

སྤྱིར་འཛམ་བུའི་གླིང་མི་རིགས་མི་འདྲ་བའི་དབང་གིས་ཆོས་ལུགས་ཀྱང་ཧ་ཅང་མང་པོ་ཞིག་དར་ཡོད། ཆོས་ལུགས་འགའ་ཤས་ནི་ལོ་སུམ་སྟོང་ཡར་ལྷག་ནས་དར་བའི་ཆོས་ལུགས་ཡོད་ཅིང་འགའ་ཤས་ནི་ལོ་བརྒྱ་ཕྲག་ལས་མ་ཕྱིན་པའང་ཡོད། ནང་པའི་ཆོས་ནི་འཇིག་རྟེན་འདིའི་དབང་དུ་བྱས་ན་ལོ་ཉིས་སྟོང་ལྔ་བརྒྱ་ཡར་ལྷག་ཕྱིན་ཡོད།
ཆོས་ལུགས་དེ་རྣམས་ཀྱི་རྒྱུད་རིམ་གྱི་ཁྲོད་ནས་འགྲོ་བ་སེམས་ཅན་མང་པོ་ལ་སོ་སོའི་ཡིད་ཆེས་དང་བློ་གཏད་འགེལ་སའི་སྐྱབས་གནས་ཞིག་རྙེད་ནས་མི་མང་ས་ཡ་མང་པོར་གནས་སྐབས་དང་མཐར་ཐུག་ལ་ཕན་ཐོག་ཆེན་པོ་ཞིག་བྱུང་ཡོད། ཡང་ཆོས་ལུགས་འགའ་ཤས་ཀྱིས་ཆོས་ལུགས་ཕན་ཚུན་བར་ལ་རྙོག་དྲ་དང་། འཐེན་ཁྱེར། འཁྲུགས་རྩོད་སོགས་ཀྱི་དབང་གིས་མི་མང་པོར་བརྡབ་གསིག་བྱུང་བ་དང་། ད་ལྟ་ཡང་འབྱུང་བཞིན་པ་རེད། ནང་པ་སངས་རྒྱས་པའི་ཆོས་ལུགས་འདི་ནི་ཆོས་ལུགས་གཞན་དང་བསྡུར་ན་ལོ་རྒྱུས་ཀྱི་བྱུང་རིམ་ཐོག་ནས་ཆེས་སྔ་ཤོས་དེ་མིན་ཀྱང་། ལྟ་གྲུབ་ཀྱི་ཐོག་ནས་གླེང་ན་འཛམ་བུ་གླིང་གི་ཆོས་ལུགས་ནང་ནས་ཆེས་གཏིང་ཟབ་ཤོས་ཡིན་ཅེས་བཤད་ཀྱང་མི་ཆོག་པ་མེད་སྙམ། དེང་སང་ནུབ་ཕྱོགས་ལ་བོད་ཆོས་གསང་སྔགས་ཀྱི་བསྟན་པ་འདི་ལ་ཉིན་རེ་བཞིན་དགའ་མོས་བྱེད་མཁན་ཇེ་མང་ལ་འགྲོ་བཞིན་པ་འདི་ལ་རྒྱུ་མཚན་འགའ་ཤས་ཞིག་ཡོད་སྙམ།
རྒྱུ་མཚན་དང་པོ་ནི།
ནང་པའི་ཆོས་འདི་འཕགས་ཡུལ་ན་ལེནྜ་ནས་བསྲེག་བཅད་བརྡར་བའི་གསེར་བཞིན་དུ་དཔྱད་གསུམ་གྱིས་ལུང་རིག་དྲི་མ་མེད་པས་གཏན་ལ་ཕབས་པའི་ཆོས་ཚུལ་ཞིག་ཡིན་སྟབས་དེང་སང་ནུབ་ཕྱོགས་པའི་ཆོས་ལུགས་མང་པོ་ཞིག་ཤིན་ཏུ་སྐྲག་དགོས་ས་ཚན་རིག་པ་རྣམས་དང་མཉམ་དུ་༧གོང་ས་སྐྱབས་མགོན་ཡིད་བཞིན་ནོར་བུའི་གཙོས་བོད་ཀྱི་མཁས་དབང་བླ་སྤྲུལ་མང་པོའི་བགྲོ་གླེང་དང་མཚུངས་བསྡུར་བྱས་ནས་དེང་སང་ནུབ་ཕྱོགས་པའི་ཀླད་རྩའི་ཚན་རིག་པའི་མཁས་དབང་མང་པོ་ཞིག་ལ་ནང་ཆོས་ཀྱི་སེམས་ཁམས་རིག་པའི་ཐོག་ནས་བསམ་བློ་གཉིས་པ་ཞིག་མི་གཏོང་ཀ་མེད་དུ་གྱུར་ནས་ནུབ་ཕྱོགས་པའི་མི་མང་པོ་ཞིག་དེའི་སྟབས་ཀྱིས་ཡིད་དབང་འཕྲོག་པ་རེད་སྙམ།

རྒྱུ་མཚན་གཉིས་པ་ནི།
ལོ་རབས་དྲུག་བཅུ་པའི་ནང་སྐོར་བོད་ཀྱི་བླ་ཆེན་ཁག་ཕྱི་རྒྱལ་དུ་ཕེབས་ནས་ཆོས་ཚོགས་གསར་འཛུགས་དང་། ལྷག་པར་དུ་དུས་རབས་ཀྱི་སྟོན་པ་གཉིས་པ་ལྟ་བུ་འཛམ་གླིང་ཞི་བདེའི་དེད་དཔོན་༧སྐྱབས་མགོན་ཡིད་བཞིན་ནོར་བུའི་མཛད་པ་དང་ཕྲིན་ལས་ཀྱི་འོག་ནས་འཛམ་གླིང་དུ་ཆེས་སྐད་གྲགས་ཅན་གྱི་མཁས་དབང་དང་། ལྷག་པར་དུ་ཚན་རིག་པ་རྣམས་དང་མཉམ་དུ་འདས་པའི་ལོ་མང་རིང་ཆེད་དུ་༼སེམས་དང་སྲོག་གི་བགྲོ་གླེང་།༽ཞེས་པ་གསར་འཛུག་གནང་ནས་ལོ་ལྟར་བཞིན་བགྲོ་གླེང་གནང་ནས་རྒྱལ་ཁའི་འབྲས་རྟགས་ཤིག་རེད་སྙམ།
རྒྱུ་མཚན་གསུམ་པ་ནི།
ནང་པའི་ཆོས་གཞུང་ནང་དུ་ལྟ་བ་རྟེན་འབྱུང་དང་། སྤྱོད་པ་གཞན་ལ་འཚེ་བ་མེད་པ། ཞེས་པའི་ཚིག་དུམ་འདི་རྣམས་ས་ཁྱབ་རྡོ་ཁྱབ་ཏུ་སོང་ནས་ནང་པའི་སྤྱི་ཚོགས་དང་ནང་པའི་རྒྱལ་ཁབ་རྣམས་སུ་ཆོས་ལུགས་གཞན་དང་བསྡུར་ན་འཚེ་བ་མེད་པ་ཉུང་ཤོས་ཡིན་པ་དང་། ནང་པ་བ་རང་ཉིད་ཀྱང་ཆོས་ལུགས་གཞན་ལ་བསྡུར་ན་གཉོམ་ཆུང་ཤོས་ཡིན་ཞེས་ཟེར་ཀྱང་མི་འགྲིག་པ་མེད་སྙམ། དེང་སང་ཆོས་ལུགས་གཞན་གྱི་འཁྲུགས་རྩོད་ཀྱི་ཉེར་ལེན་ལ་བརྟེན་ནས་མི་མང་པོ་ཞིག་ནས་ཆོས་ལུགས་ལ་གཞན་རྣམས་ལ་སྐྱུག་མེར་ལང་བཞིན་པའི་སྐབས་སུ་ཟུར་ནས་མི་མང་པོ་ཞིག་ནས་ནང་པ་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་རེད་བསམ།
རྒྱུ་མཚན་བཞི་པ།
བོད་ཀྱི་ནང་ཆོས་འདི་གསང་སྔགས་ཀྱི་ཆོས་ལུགས་ཞིག་ཡིན་སྟབས་བཀའ་གཏེར་དག་གསུམ་གྱི་ཟབ་ཆོས་འདི་རྣམས་དེང་སང་ནུབ་ཕྱོགས་པའི་སེམས་ཁམས་དང་ཧ་ཅང་མཐུན་པ་མ་ཟད་བོད་ཆོས་འདི་ལ་གང་ལ་དགོས་སར་འབྱར་རྒྱུ་དང་། གང་ནས་ཆད་སར་བླན་རྒྱུ་ཡོད་པ་འགྱིག་བྱེ་རེ་ལྟ་བུ་ནར་ནར་ཇི་ཙམ་འཐེན་ཀྱང་ནར་རྒྱུ་ཡོད་པ་ཞིག་ཡིན། དཔེར་ན་ཁོར་ཡུག་སྲུང་སྐྱོབ་འབྲེལ་བ་ཡོད་པའི་རི་ཁྲུས་དང་གཏེར་བུམ་སྦས་པ། ཀླུ་གཏོར་དང་བསང་མཆོད་འབུལ་བ། ནད་གདོན་དང་བར་ཆད་སོགས་ཀྱི་གཉེན་པོ་གཅོད་དང་ཕྲིན་བཅོལ་ཞབས་བརྟན་སོགས་ཀྱི་རིགས་དང་། དཔལ་འབྱོར་དང་ལོངས་སྤྱོད་འཕེལ་ཕྱིར་གཡང་སྒྲུབ་དང་། གཡང་གཏེར་སོགས་མདོར་ན་ལས་བཞིའི་ཕྲིན་ལས་རྣམས་གང་འདོད་འདོད་དུ་བཀོལ་ཆོག་ཆོག་ཡོད་ཅིང་ལྷག་པར་དུ་ནང་སེམས་འདུལ་བྱེད་ཀྱི་གཉེན་པོ་རུ་བློ་སྦྱོང་དང་གཏོང་ལེན་སོགས་དང་། ལྟ་བའི་སྐོར་ནས་དེང་སང་ཀུན་གྱིས་ཆེས་དགའ་མོས་བྱེད་ས་རྫོགས་ཆེན་དང་། ཕྱག་ཆེན་སོགས་ཉམས་བྱེད་ཐུབ་མིན་ལ་མ་ལྟོས་པར་མིང་སུས་སུ་རྫིགས་རེ་ཡོད་པས་ཡིན་ནམ་སྙམ་དེ་རྣམས་ཉིན་ཐོ་འདིའི་བརྗོད་བྱ་དང་འབྲེལ་བའི་རྒྱབ་ལྗོངས་ཀྱི་གནས་ཚུལ་གསལ་བཤད་མདོར་བསྡུས་ཙམ་ཡིན།



ཉིན་ཐོའི་བརྗོད་བྱ་དངོས་ནི། ཁ་སང་གུས་པས་ཡེ་ཤུའི་ལྷ་ཁང་ནང་དུ་ཆོས་བཤད་བྱས་པའི་སྐོར་ཡིན། ང་ས་གནས་འདིར་ཉིས་སྟོང་བརྒྱད་ལོར་ཕྱིན་ཅིང་སྐབས་དེ་དུས་ས་གནས་འདིར་གནས་བསྡོད་བྱེད་མཁན་ཨ་མ་ཞིག་ནས་གོ་སྒྲིག་འོག་ཁ་སང་གི་ཡེ་ཤུའི་ལྷ་ཁང་འདིའི་ནང་དུ་ཆོས་བཤད་བྱས། དེ་ནས་བཟུང་སྟེ་ཡེ་ཤུའི་ལྷ་ཁང་འདི་ང་གཉིས་བར་གྱི་འབྲེལ་བ་བྱུང་། སྤྱི་ཟླ་༡༡་པའི་སྤྱི་ཚེས་༢༨ ཉིན་ཞོགས་པ་ཆུ་ཚོད་༡༠པའི་སྐབས་སུ་བརྗོད་བྱ། ༼ནོར་གྱི་མཆོག་ནི་ཆོག་ཤེས་ཡིན།༽ཅེས་པའི་བརྗོད་བྱ་འདི་ཉིད་ཀྱི་ཐོག་ནས་ཆོས་བཤད་སྐར་མ་བཞི་བཅུའི་རིང་བྱས། ཆོས་བཤད་གྲུབ་མཚམས་གུས་པའི་ཡུན་འདྲིས་ཀྱི་གྲོགས་པོ་མཛུབ་མནོན་སྒྲ་སྙན་པ་Michael Martinez དང། ་སྐད་བསྒྱུར་བྱམས་པ་མཐར་ཕྱིན་ནས་གླིང་བུ་གཏང་ཞིང་ངེད་གསུམ་ནས་རྒྱལ་དབང་ཀརྨ་པ་བཅུ་བདུན་པས་མཛད་པའི་༼མཆོག་གསུམ་བདེན་བསྐུལ་སྨོན་ཚིག།༽ཉིད་གདངས་དབྱངས་སུ་གྱེར་ནས་དེ་རིང་གི་ཆོས་བཤད་དེ་མཇུག་ཡོངས་སུ་གྲུབ་པར་བྱས། དེ་རིང་ཆོས་ཉན་མཁན་མི་གྲངས་དགུ་བཅུ་གོ་གཉིས་ཡོད་སྐད་འདུག ཆོས་བཤད་གྲུབ་མཚམས་ཟུར་བཅར་བ་རྣམས་ལ་འཚམས་འདྲི་དང་ཁ་བརྡ་བྱས་ནས་སྤྱི་སྒེར་སོ་སོའི་འདོད་བློ་ཡོངས་སུ་བཀང་། ཟུར་ནས་ལྷ་ཁང་འདིའི་གཙོ་འཛིན་བུད་མེད་ཞིག་འདུག་པ་དེ་ལ་ངས་བཀའ་དྲིན་ཆེ་ཞེས་ཟེར་དུས་མོ་རང་ནས་ང་ཡི་ལག་པར་དམ་དུ་བཟུང་ནས་གདོང་པར་བལྟ་བཞིན་འདི་ལྟར་ཟེར།

༼རིན་པོ་ཆེ། ང་ཚོ་ཚང་མས་ཁྱོད་རང་ལ་སྙིང་དབུས་ནས་བཀའ་དྲིན་ཆེ་ཞུ་འདོད་བྱུང་། དེ་རིང་གི་ཆོས་བཤད་དེའི་མི་མང་པོའི་སེམས་ལ་ཕན་ཐོག་ཆེན་པོ་བྱུང་ཡོད་རེད། ངས་ཐག་བཅད་ནས་བཤད་ཐུབ། གང་ལྟར་ཁྱོད་རང་ས་གནས་འདིའི་མི་མང་ལ་ཧ་ཅང་བཀའ་དྲིན་ཆེན་པོ་རེད། ཁྱོད་རང་གིས་ས་གནས་འདིར་ཆོས་དང་མ་ཟད་ཁོར་ཡུག་སྲུང་སྐྱོབས། ནད་པར་ཐུག་ཕྲད། རྒན་གསོ་ཁང་གི་རྒན་གོག་རྣམས་ལ་བསླབ་བྱ་སོགས་ཧ་ཅང་ཡག་པོ་གནང་ཡོད་རེད། སྤྱིར་གཏང་ས་གནས་འདིར་ཡེ་ཤུའི་ཆོས་ཁང་དང་བརྒྱ་ལྷག་དང་། ཆོས་ལུགས་གཞན་པའི་ཆོས་ཚོགས་སོགས་ཡོད་རེད་དེ་ཁྱོད་རང་ནང་བཞིན་ས་གནས་འདིར་ཕན་ཐོག་ཅན་ཞིག་བྱུང་ཡོད་མ་རེད། ཁྱོད་རང་ས་གནས་འདིར་ཕེབས་ནས་ཡུན་རིང་པོ་མ་རེད་དེ་ལས་ཀ་ཧ་ཅང་ཡག་པོ་གནང་གི་ཡོད་རེད། ང་ཚོའི་ལུང་པ་འདི་ལ་མི་ཁྱོད་རང་འདྲ་བོ་ཧ་ཅང་མང་པོ་དགོས་ཀྱི་འདུག། སྲིད་གཞུང་གི་གཙོ་འཛིན་འགའ་ཤས་ཀྱིས་སྤོབས་པ་མཐོན་པོའི་སྒོ་ནས་༼ངས་ཨ་མི་རི་ཁའི་མི་མང་རྣམས་ཡང་དག་པའི་ལམ་དུ་འཁྲིད་ཀྱི་ཡིན།༽ཟེར་ནས་བཤད་ཀྱི་ཡོད་རེད་དེ་ཁོང་ཚོའི་ཁ་ཙམ་རེད། དོན་ངོ་མ་ཁྱོད་རང་འདྲ་བོ་མི་མང་པོ་ཞིག་བྱུང་ན་ཨ་མི་རི་ཁའི་མི་མང་རྣམས་ཡང་དག་པའི་ལམ་དུ་འཁྲིད་ཐུབ་ཀྱི་རེད། ངས་ཧ་གོ་གི་ཡོད། གང་ལྟར་ཡང་སྐྱར་ཁྱེད་རང་ལ་ཐུགས་རྗེ་ཆེ་ཞེས་ཞུ་འདོད་བྱུང་། མ་འོངས་པར་སྐུ་མཁྱེན་ཡང་སྐྱར་ང་ཚོའི་ཚོགས་ཁང་ནང་ལ་ཕེབས་གནང་རོགས།༽

ཞེས་བུད་མེད་དེའི་སེམས་ཚོར་ཆེན་པོ་ཐོག་ནས་དེ་ལྟར་ཟེར།

ཁོང་ཚོའི་ང་ལ་ལྟ་ཚུལ་དེ་ལྟ་བུ་ཞིག་ཡིན་ཀྱང་ངས་ཁོང་ཚོའི་ལྟ་ཚུལ་དེ་དང་མཐུན་པའི་བསམ་ཚུལ་འགའ་ཤས་བཤད་འདོད་བྱུང་། སྤྱིར་ཆོས་ལུགས་ཀྱིས་ཤན་ཞུགས་པའི་མི་སྣ་རྣམས་ནི་སོ་སོའི་ཆོས་ལུགས་དང་ལྟ་སྒོམ་སོགས་ཡང་དག་ཡིན་མིན་ལ་མ་ལྟོས་པར་རང་གི་ཆོས་ལུགས་དང་། གྲུབ་མཐའ་ལྟ་སྒོམ་སོགས་ཀྱིས་བསླད་ནས་ཕལ་མོ་ཆེ་ནི་རང་ལྟ་མཆོག་འཛིན་གྱིས་བློ་ཡི་རྗེས་སུ་འབྲངས་ཀྱི་ཡོད། དཔེར་ན། དཀྱིལ་ཤར་ཁ་ཆེའི་རྒྱལ་ཁབ་མང་པོའི་ནང་དུ་ལོ་མང་རིང་ཆོས་ཀྱི་རྙོག་འཛིང་གིས་རྒྱལ་ཁབ་དེ་ཉིད་ཀྱི་ཉམ་ཆུང་མི་མང་རྣམས་ཅི་བྱེད་འདི་བྱེད་མེད་པར་སྡུག་བསྔལ་གྱི་གནས་སུ་ལྷུང་ཡོད། ལྷག་པར་དུ་ཡེ་ཤུའི་ཆོས་ལུགས་འདི་རྣམས་ནི་སྤྱི་ལོའམ་ཡེ་ལོ་ཞེས་ད་ལྟ་འཛམ་གླིང་རྒྱལ་གཅེས་ཡོངས་རྫོགས་ལོ་ཚིག་འདིར་རྗེས་འདེད་བྱེད་ནས་འགྲོ་བཞིན་པ་འདི་ཙམ་སོང་ཡོད། གང་ལྟར་མི་ལོ་༢༠༢༢་ཙམ་ཕྱིན་ཡོད། ང་སྔོན་ཆད་རྒྱ་གར་བལ་ཡུལ་ཕྱོགས་སུ་ཡོད་པའི་སྐབས་སུ་དགེ་འདུན་ཆོས་འཕེལ་གྱིས་ནུབ་ཕྱོགས་པའི་མི་ལ་ཕྱོགས་བསྡོམ་ཞིག་རྒྱབ་ཡོད་པའི་ཚིགས་བཅད།
གཞན་ཕན་སྙིང་རྗེ་སྣུམ་དང་བྲལ་ན་ཡང་།། རིག་རྩལ་ཐབས་མཁས་གློག་གི་ཆོ་འཕྲུལ་གྱིས།།
དྲང་པོའི་མི་ལ་འཁྱོག་པོའི་ལམ་སྟོན་པ།། སྐྲ་སེར་སྤྲེའུ་རིགས་ལ་དོགས་ཟོན་མཛོད།།
འདི་མཐོང་བ་དང་མཉམ་དུ་སྐབས་དེ་དུས་ནུབ་ཕྱོགས་པའི་མི་ལ་རང་བཞིན་གྱིས་དོགས་པ་ཇེ་ཆེར་གྱུར་སོང་། ཡིན་ནའང་༢༠༠༨ ལོར་ཨ་རིར་འབྱོར་ནས་བཟུང་སྟེ་ས་གནས་འདིའི་མི་རིགས་རྣམས་དང་འབྲེལ་འདྲིས་ཆེན་པོ་བྱུང་བ་མ་ཟད། མི་རིགས་འདི་རྣམས་སློབ་མར་གྱུར། སྤྱིར་གཏང་བོད་རིགས་ཀྱི་བླ་མ་རྣམས་ཀྱི་ཆོས་ཚོགས་ཀྱི་སློབ་མ་ཕལ་མོ་ཆེ་རྒྱ་རིགས་གཙོས་ཤར་ཕྱོགས་པ་ཡིན་ཀྱང་ང་ཡི་ཆོས་ཚོགས་ནང་དུ་བརྒྱ་ཆ་དགུ་བཅུ་གོ་ལྔ་ཨ་རིའི་མི་རིགས་དཀར་པོ་ཤ་སྟགས་ཡིན། ཁོང་ཚོའི་མཉམ་དུ་ས་གནས་འདིར་ཆོས་ཚོགས་ཞིག་ཀྱང་གསར་འཛུགས་བྱས་ཤིང་ལས་ཀ་མཉམ་ལས་བྱས་པའི་རྒྱུད་རིམ་ནས་གོང་གི་དགེ་ཆོས་ཀྱིས་གསུངས་པའི་དོགས་པ་རྣམས་དངོས་སུ་བསལ་སོང་། མི་རིགས་འདི་རྣམས་ཀྱི་ཁྱད་ཆོས་ནི་དྲང་བདེན་དང་། ཁྲིམས་ལ་དགའ་ཞིང་། ཁ་གསལ་ལ་གཞུང་དྲང་ཞིང་མང་པོ་ཞིག་ནས་ཕུག་རྒྱངས་རིང་ཙམ་ལྟ་ཐུབ་པའི་མི་རིགས་ཞིག་ཡིན། དེང་སང་ཨ་རི་དང་ནུབ་ཕྱོགས་ལུང་པའི་རྒྱལ་ཁབ་མང་པོར་ཀུན་གྱིས་ཡིད་སྨོན་བྱེད་དགོས་པ་འདི་ནི་མི་རིགས་འདི་རྣམས་ཀྱིས་ཡར་རྒྱས་གཏང་བའི་གྲུབ་འབྲས་ཞིག་ཡིན།
གནའ་སྔ་མོ་ཡེ་ཤུའི་ལྷ་ཁང་རྣམས་སུ་མིང་གཅིག་གྱུར་ཞིག་ཡོད་པ་དེ་ནི་church ཞེས་པ་འདི་རེད། དཔེར་ན་ནང་པའི་ལྷ་ཁང་རྣམས་སུ་དགོན་པ་ཞེས་པ་དང་གཅིག་པ་རེད། དེང་སང་ཡེ་ཤུའི་ལྷ་ཁང་གི་མིང་མང་པོ་འགྱུར་བ་གཏང་འདུག་པས་ངས་ཆོས་བཤད་བྱེད་ཡུལ་གྱི་ལྷ་ཁང་འདིའི་མིང་ལ་Center for Spiritual Awakening ངས་མི་འགའ་ཤས་ཞིག་ལ་ཡེ་ཤུའི་ལྷ་ཁང་མང་པོའི་མིང་འགྱུར་བ་ག་རེ་བྱས་ནས་གཏང་བ་རེད་ཅེས་དྲིས་དུས། ཁོང་ཚོའི་ཟེར་ན་སྔོན་མ་church ནང་གི་སློབ་དཔོན་ནམ་ཆོས་དགེ་བ་མང་པོའི་བྱ་སྤྱོད་ངན་པའི་དབང་གིས་བྱུང་བའི་རྒྱུ་མཚན་གཅིག་དང་། རྒྱུ་མཚན་གཉིས་པ་ནི། སྔོན་གྱི་ཡེ་ཤུ་བའི་ཆོས་པ་རྣམས་མང་པོ་ཞིག་རྨོངས་དད་ཁོ་ནས་འགྲོ་ཞིང་དཀོན་མཆོག་གི་བཀའ་ལས་འགལ་ན་དམྱལ་བར་འཕེན་པ་དང་། དཀོན་མཆོག་གི་བཀའ་དང་མཐུན་ན་དག་ཞིང་དུ་ཁྲིད་འགྲོ་བ་སོགས་དེང་དུས་གཞོན་སྐྱེས་མང་པོའི་ཡིད་ཆེས་མེད་པ་བཅས་ཀྱིས་དེང་སང་ཉིན་རེ་བཞིན་དུ་ཡེ་ཤུའི་ལྷ་ཁང་རྣམས་སུ་གཞོན་སྐྱེས་འགྲོ་མི་མེད་པར་གྱུར་ནས་མིང་བརྗེས་པ་རེད་ཟེར།
གང་ལྟར་ཀྱང་ཆོས་ལུགས་ནི་འདི་བཟང་དང་འདི་ངན་ཞེས་བཤད་ཚོད་གཏན་ནས་མི་ཐེག་པས་དེའི་སྐོར་བཤད་འདོད་ཀྱང་གཏན་ནས་མེད། བཤད་འདོད་ཅིག་ཡོད་པ་དེ་ནི་ནུབ་ཕྱོགས་པའི་མི་ཡི་བཟང་སྤྱོད་དང་། བསམ་ཤེས། གུ་ཡངས་སོགས་ཀྱི་སྐོར་ཡིན། གང་ལྟར་ཀྱང་ང་ཚོའི་བྱ་ལས་གང་ཡིན་ཀྱང་ཁ་བདེ་བོ་ཙམ་མ་ཡིན་པར་དོན་དངོས་པོའི་ཐོག་ཀྱི་ལག་ལེན་ལ་ཁེལ་དགོས་པ་མ་ཟད། རང་ས་ལ་མི་བཞག་མི་སར་རང་བསྡད་ནས་བསམ་བློ་གཏོང་དགོས། ཁ་སང་ངས་ཆོས་བཤད་བྱེད་ཡུལ་དེ་ནི་ནང་པ་མིན་ལ་དེ་བས་ཀྱང་ནང་ཚན་དུ་གྱུར་པའི་བཀའ་བརྒྱུད་པ་ཞིག་ཀྱང་གཏན་ནས་མིན། ཁོང་ཚོའི་ལྷ་ཁང་ནང་དུ་ངས་ཆོས་བཤད་བྱས་པ་ཐེངས་མ་དང་པོ་གཏན་ནས་མིན་ཕལ་ཆེར་ཐེངས་མ་བཅུ་གྲངས་ཙམ་བཤད་ཚར་བ་རེད། བཤད་པའི་སྐབས་སུ་ཡེ་ཤུའི་ལྷ་ཁང་གི་དབུས་སུ་ནང་པའི་སྐུ་ཐང་དང་མཆོད་གཤམས་སོགས་བྱེད་ནས་དབང་སྐུར་བ་དང་སྐྱབས་སྡོམ་གནང་བ་སོགས་བྱས་པ་རེད། སྐབས་དེ་དུས་ཁོ་རང་ཚོའི་དགེ་སློབ་ཡོངས་རྫོགས་ཁ་གྱེན་དུ་ཕྱོགས་ནས་ཆོས་ཞུ་བ་དང་། འདོན་པ་མཉམ་འདོན་བྱེད་པ་སོགས་གནང་གི་ཡོད། ངས་དཔེར་མཚོན་ཅིག་ཞུས་ན།
བོད་ནང་ནས་དགོན་པ་ཞིག་གི་ནང་དུ་ནུབ་ཕྱོགས་ཡེ་ཤུའི་གྲྭ་པ་ན་བཟའ་དཀར་པོ་ཅན་ཞིག་ནས་ཁོ་རང་ཚོའི་ལུགས་སྲོལ་ལྟར་ཆོས་བཤད་དང་། བྱིན་རླབས་སོགས་བྱེད་ས་ཨི་རྙེད། གལ་སྲིད་རྙེད་པའི་དབང་དུ་གཏང་ན་དགོན་བདག་བླ་གྲྭ་རྣམས་ཀྱིས་ཡེ་ཤུའི་བླ་མའི་མདུན་ནས་ཁ་གྱེན་དུ་ཕྱོགས་ནས་ཆོས་དང་བྱིན་རླབས་ཞུ་བ་སོགས་ཨི་བྱེད། དེ་རྣམས་ནི་གཏན་ནས་བྱེད་མི་སྲིད་པ་ཞིག་རེད། ཡེ་ཤུའི་ཆོས་དཔོན་དང་མ་ཟད་ནང་བསྟན་གཅིག་པ་དེ་བས་གལ་ཆེ་བ་སོ་སོའི་ཆོས་རྒྱུད་དང་གྲུབ་མཐའ་གཅིག་པ་དེ་བས་ཀྱང་དགོན་པ་གཅིག་པའི་བླ་མ་རྣམས་ཕྱི་རྒྱལ་ལ་འབྱོར་དུས་སོ་སོའི་ཆོས་ཚོགས་སུ་ཡུན་འདྲིས་ཀྱི་དམ་ཚིག་གཅིག་པའི་ཆོས་གྲོགས་དང་བླ་མ་གཅིག་པའི་རྡོ་རྗེའི་སྤུན་གྲོགས་གཞན་ལ་མཛད་རིམ་དང་གོ་སྒྲིག་བྱེད་ཐུབ་ཀྱི་མེད། ངས་གོ་ཚུལ་ཞིག་ལ་ཐེའུ་ཝན་གནས་བཞུགས་དགོན་པ་གཅིག་དང་བླ་མ་གཅིག་པའི་ཆོས་དགེ་རྣམས་ཕན་ཚུན་ཐུག་འཕྲད་བྱེད་སྐབས་ཚིག་ཇ་འཐུང་ས་དང་། ཟ་ཁང་སོགས་ལ་དུས་ཆད་བྱེད་པ་ལས་སོ་སོའི་ཆོས་ཚོགས་ནང་དུ་མགྲོན་འབོད་བྱེད་ཕོད་ཀྱི་མེད་སྐད་འདུག གང་ཡིན་ཞེ་ན་སོ་སོའི་ཡོན་བདག་སློབ་མ་རྣམས་ཤོར་འགྲོ་བའི་དོགས་པ་རེད་ཟེར། ད་དུང་ང་ཚོ་བླ་མ་རྣམས་ཀྱི་ཞལ་ནས་མིག་གྱེན་ལ་རྫོགས་ནས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཅིག་ཅིག་མུག་མུག་ཟེར་ནས་འདྲ་ཆགས་པོ་བཤད་ཤེས་ཀྱི་ཡོད། དོན་ངོ་མའི་ཉམས་ལེན་གྱི་ཐོག་ནས་རང་གི་ཉེ་འཁོར་དུ་ཡོད་པའི་ཕ་ས་དང་ཕ་ཡུལ་གཅིག་པའི་བོད་རིགས་སྤུན་ཟླ། དགོན་པ་གཅིག་པའི་ཆོས་གྲོགས། སྐྱིད་སྡུག་གཅིག་པའི་གྲོགས་མཆེད་སོགས་ལ་ཐུག་དུས་རང་ངོས་ནས་ངོ་ཚ་དང་། གཞན་ངོས་ནས་ཁྲེལ་ཡོད་སོགས་བླ་མ་དང་ཆོས་པ་ཕར་ཞོག་མི་གཞི་བཟང་པོའི་དྲི་མ་ཙམ་ཡང་ལྡན་མེད། ད་དུང་དེང་སང་ཁ་སྙན་པོའི་ཆོས་ལུགས་རིས་མེད་ཀྱི་འཚོགས་འདུ་དང་། བགྲོ་གླེང་སོགས་ཟེར་ནས་ས་སྟེང་འུར་སྒྲོག་གིས་བཀང་གི་ཡོད། དཔེར་ན། ཨ་རིའི་མངའ་སྡེ་གཅིག་གི་སྟོད་སྨད་བྱས་ནས་ཡོད་པའི་ཆོས་རྒྱུད་གཅིག་དང་ཆོས་ཚོགས་དང་དགོན་པ་ཧ་ཅང་མང་ཡང་འགག་ལ་ཐུག་དུས་སོ་སོའི་ཆོས་ཚོགས་ནང་ལ་བླ་མ་གཞན་དག་གདན་འདྲེན་ཞུ་ནས་སོ་སོའི་ཁྲིའི་ཐོག་ཏུ་བླ་མ་གཞན་དེ་བཞུགས་བཅུག་ནས་རང་གི་སློབ་མས་མཐའ་སྐོར་ནས་གསུང་ཆོས་ཞུ་མཁན་ཨི་ཡོད། དེ་འདྲ་བྱེད་ནུས་མཁན་ཞིག་ཡོད་ན་གང་ཟག་དེ་ཉིད་ཀྱིས་སེམས་གཏིང་ནས་ཆོས་ལུགས་རིས་མེད་ཀྱི་མགོ་བཙུགས་པ་རེད། ངས་བོད་མི་རིགས་ལ་སྨད་བཤད་དང་། ཕྱི་རྒྱལ་དུ་བཞུགས་པའི་ཆོས་ཚོགས་ཀྱི་བླ་མ་རྣམས་ལ་མ་དགའ་བའི་ཕྲག་དོགས་ཀྱིས་སྐུར་འདེབས་དང་ངན་སྨྲས་སོགས་གཏན་ནས་མིན། ང་རང་ཚོའི་མི་རིགས་ཀྱི་རྟ་ཕོ་ལ་གུ་དོགས་ཀྱི་བསམ་བློའི་ལྕགས་སྒྲོག་ལས་ཐར་ནས་གུ་ཡངས་བློ་བདེའི་ཐང་ཆེན་ལ་ཁ་ཡན་དུ་གློད་ནས་མི་རིགས་འདི་ཉིད་མ་འོངས་པར་བསམ་བློའི་ཡར་རྒྱས་དང་བཟང་བསྐྱེད་ཀྱི་ལམ་དུ་སོང་ན་སྙམ་པའི་བསམ་པ་བཟང་པོའི་རྟོག་འཆར་ཙམ་ཡིན།
མདོར་ན་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་ཞལ་ནས།
རང་སྐྱོན་རི་བོ་ཙམ་ཡང་ཁོང་དུ་སྦས། །གཞན་སྐྱོན་ཏིལ་འབྲུ་ཙམ་ཡང་སྒྲོག་ཅིང་སྨོད། །
ཡོན་ཏན་ཅུང་ཟད་མེད་ཀྱང་བཟང་པོར་རློམ། །ཆོས་པའི་མིང་བཏགས་ཆོས་མིན་ཁོ་ནར་སྤྱོད། །
བླ་མ་མཁྱེན་ནོ་ཐུགས་རྗེས་མྱུར་དུ་གཟིགས། །རང་འདོད་ང་རྒྱལ་ཞི་བར་བྱིན་གྱིས་རློབས། །
ཞེས་གསུངས་པའི་གདམས་ངག་འདི་རང་རེ་ཚང་མས་སེམས་ལ་བཅངས་ནས་རང་ཕན་ཆད་ཚང་མ་ལ་མཐོང་ཆུང་དང་ཁྱད་གསོད་བྱེད་ཅིང་ལྷག་པར་དུ་ནུབ་ཕྱོགས་པའི་མི་རིགས་འདི་རྣམས་ལ་རང་མདོག་དང་མི་མཚུངས་པའི་རྒྱུ་མཚན་ཁོ་ནས་མགོ་སེར་དང་སྣ་རིང་སོགས་མིང་འདོགས་བཏགས་ནས་མ་བསྐྱུར་བར་ཉམས་ཞིབ་རེ་བྱོས་དང་ད་གཟོད་མི་གཞི་གསེར་ནག་འདྲ་བ་རེ་སྣ་བོ་ཆེ་དང་། སྐྲ་སེར་ཅན་གྱི་མི་རིགས་འདིའི་ཁྲོད་ནས་མི་རྙེད་པའི་ངེས་པ་མི་འདུག་གོ།