ས་ག་ཟླ་བའི་ཚེས་པ་བཅོ་ལྔ་ཉིན་མོ།

ཉིན་མོ་འདི་ནི་ནང་པ་ཡོངས་རྫོགས་ཀྱི་ཆེས་དུས་ཆེན་ཞིག་ཡིན། དེ་ནི་སངས་རྒྱས་བཅོམ་ལྡན་འདས་སངས་རྒྱས་པ་དང་། མྱ་ངན་ལས་འདས་པ། སྐུ་འཁྲུངས་པ་སོགས་དུས་ཆེས་གསུམ་འཛོམས་ལ་ངོས་འཛིན་བྱེད་ཀྱི་ཡོད། འཇམ་དབྱངས་ཆོས་འཁོར་གླིང་ཆོས་ཚོགས་ནས་ཀྱང་ཁ་སང་ནས་གྲ་སྒྲིག་བྱས་པ་ལྟར་ཚུལ་ཁྲིམས་ཀྱི་དྲི་བསུང་འཐུལ་བའི་བདུག་སྤོས་དང་། ཉོན་མོངས་ཀྱི་ཚ་གདུང་འཇོམས་པའི་བདུད་རྩི་སོགས་ཀྱི་ཕྱི་ནང་གི་མཆོད་གཤམས་རང་འཁོས་འབྱོར་ཚོད་དང་ལྷག་པར་དུ་ཚོགས་རྫས་རྣམས་མ་ཚང་བར་མེད་པར་བཤམས་བཀོད་བྱས། དེ་རིང་ནི་རེས་གཟའ་སྤེན་པའི་ཞོགས་པ་ཆུ་ཚོད་བཅུ་ནས་བཅུ་གཅིག་བར་མི་མང་ལྷན་སྒོམ་རྒྱག་རྒྱུ་དེ་ཡིན་སྟབས་སྒོམ་ཚར་བ་དང་མཉམ་དུ་མི་གྲངས་ལྔ་བཅུ་མ་ཟིན་ཙམ་དང་ལྷན་གནམ་ཆོས་འོད་དཔག་མེད་ཀྱི་ཚོགས་བསྡུས་ཀརྨ་པ་བཅུ་བཞི་པ་ཐེག་མཆོག་རྡོ་རྗེས་མཛད་པ་དེ་ཉིད་དབྱིན་སྐད་ཐོག་ཏུ་འདོན་བཅུགས། ཚོགས་ལྷག་གོང་དུ་བཟང་སྤྱོད་སྨོན་ལམ་མགོ་ནས་མཇུག་བར་དབྱིན་སྐད་དུ་མཉམ་འདོན་བྱས། ཚོགས་རྣམས་ཕམ་རྒྱལ་མེད་པར་མི་མང་ལ་བཀྱེས་ནས་ཚོགས་ལྷག་དང་ཆད་བརྟན་བསྔོ་སྨོན་བཀྲ་ཤིས་སོགས་ཀྱིས་མཐར་དབྱུངས། མི་མང་རྣམས་ཚོགས་ལ་རོལ་བཞིན་ཕན་ཚུན་ཁ་བརྡས་ལྷིང་འཇག་ཏུ་ཡོད་པའི་ཆོས་ཚོགས་དེ་ནི་ཅོང་ཀའི་ཁྱུ་ཚོགས་འུར་རྡོས་སྐྲོག་པ་ནང་བཞིན་ཀུ་ཅོས་ཡོངས་སུ་ཁེངས་པར་གྱུར། ཉིན་རྒྱབ་མི་རྣམས་ཀྱིས་ཕན་ཚུན་གྱེས་བྲལ་གྱི་ལག་འཇུ་དང་། འཐམ་འཁྱུད། ཕྱག་རྒྱ་སོགས་ཅི་རིགས་ཀྱིས་དེ་རིང་གི་མཛད་སྒོ་དེ་ཡག་རབ་དང་བཟང་རབ་སོགས་ཀྱིས་ངོ་བསྟོད་ས་སྟེང་དུ་མི་ཤོང་བ་ཙམ་རེ་བཤད་རེས་བྱས་ནས་རང་གནས་སུ་དེངས། ང་ནི་སང་ཉིན་ནས་བཟུང་བདུན་གསུམ་རིང་སེན་ཊེའི་ཁུའུ་རོོའུསུ་ལ་མཚམས་འདུག་རྒྱུ་དེ་ཡིན།

བལ་ཡུལ་ནས་ཟླ་གམ་འབྱོར་བའི་ཉིན་མོ།

བལ་ཡུལ་ནས་ཆོས་གྲོགས་ནུབ་རི་བ་མཁན་པོ་ཨོ་རྒྱན་འོད་ཟེར་ལགས་ནས་དགེ་འདུན་པའི་དགུན་ཁའི་ན་བཟའ་ངོས་ཀྱི་གྲོང་སྐད་དུ་ཟླ་གམ་ཞེས་འབོད་སྲོལ་ཡོད་པའི་གྲྭ་ཆས་དེ་ད་ལྟ་རང་འབྱོར་སོང་། ང་ནི་བོད་ཀྱི་སྲོལ་རྒྱུན་གྱི་རིགས་ལ་ཧ་ཅང་དགའ་བོ་ཡོད། ལྷག་པར་དུ་དགེ་འདུན་པའི་ན་བཟའི་རིགས་དཔེར་ན་འདུལ་བ་ནས་གསུངས་པའི་མཁོ་བའི་ཡོ་བྱད་བཅུ་གསུམ་སོགས་ཉར་ཚགས་བྱེད་རྒྱུ་ལ་ཧ་ཅང་ནས་དགའ་བོ་ཡོད། མ་ཟད་ངོས་ཀྱི་སྐྱེ་ཡུལ་བོད་ཁམས་ནང་ཆེན་པའི་གྲྭ་ཆས་ཡ་མ་ཟུང་ཐེབ་ཆག་དཔེར་ན་པགས་པའི་སྨད་གཡོགས་དང་། ཡུ་ནུའི་འགག་རིང་། ཆོོས་ཆེན་རྒྱ་གསེར་སྟོད་འགག ཐུར་ཞྭའམ་རྫོགས་ཆེན་ཉི་ཞྭ་རྩེ་རིང་མ། ཤིང་གི་ཕོར་པ། ཤིང་གི་གཟར་བུ་དང་གཞོང་པ། རྫ་ཡི་ཁོག་མ་སོགས་སྐབས་སྐབས་སུ་ཡིད་ལ་འཁོར་གིན། ནམ་ཞིག་ངེས་པར་ཅན་གྱིས་ནང་ཆེན་པའི་གྲྭ་ཆས་ནང་གསེས་བོད་ལྷམ་ཡུ་བ་ཕྲུག་དང་ཐག་གང་རུང་གིས་ཤན་བཏབས་ཅིང་ལྷམ་མགོ་དང་ལྷམ་མཐིལ་སོགས་ཀོ་བས་རྒྱན་ཅིང་ལྷམ་སྣ་ནས་ངར་གདོང་གི་ཐད་སོའི་བར་སྟོང་སྐུད་དཀར་དམར་གྱིས་འཇའ་བཏབས་ནས་མཛེས་ཆོས་སུ་བཟོས་པའི་ལྷམ་སྒྲོག་དང་བཅས་པ་ཞིག་འདིར་ལེན་ཐུབ་པའི་འབད་རྩོན་བྱེད་མུས་ཡིན། ང་སྐྱེ་སའི་གྲོང་བསེབ་དེས་ནང་གོང་གི་ལྷམ་དེ་འདྲ་བ་བཟོ་ཤེས་མཁན་གཅིག་ཀྱང་མེད། ཕ་ཞིང་གཤེགས་གཙོར་བྱས་པའི་མི་འགའ་ཡིས་རོང་པའི་བོད་ལྷམ་ཐེབ་ཆག་ཐག་གི་ཡུ་བ་བྱས་པ་བཟོ་མཁན་མི་ཉུང་བ་ཞིག་ཡོད་ཀྱང་ང་གཙོས་གཞོན་སྐྱེས་རྣམས་ནས་ལྷམ་དེ་ལ་སྤྲང་ལྷམ་སྐྱ་ཐོ་མ་ཞེས་འབོད་ནས་ཧུས་ཐུག་ན་མ་གཏོགས་མི་གྱོན། ད་དུང་དྲན་ཡུལ་ལ་ལྷང་ངེར་ཡོད་པ་ཞིག་ལ་ཕལ་ཆེར་སྤྱི་ལོ་1977 ནང་སྐོར་ཞིག་ལ་ང་ཡི་ཨ་ཞང་བླ་མ་དགེ་འཕེལ་སྡེ་དགེ་ནས་ནང་ཆེན་ལ་ནང་མི་གཞིས་སྐོར་ལ་ཕེབས་པའི་སྐབས་སུ་ང་ལ་ཕྲུག་ལིང་ཚེ་ཆ་གཅིག་ཆེ་ཆུང་ལ་ཁམས་པའི་བླ་རྒན་ཞིག་གི་སྣབས་འབྱིད་ས་ཙམ་ཞིག་གནང་བྱུང་། ང་དགའ་ཐག་ཆོད་ནས་ཕ་འདས་པོའི་སར་སོང་ནས་ད་རེས་ང་ལ་ཕྲུག་ལྷམ་ཡག་པོ་ཞིག་ཚེམ་དགོས་པས་ཐབས་ཤེས་གནང་རོགས་ཞུས་པས་ཕ་ནས་ཀྱང་དགའ་སྤྲོའི་ངང་ནས་ཁས་ལེན་བྱས་ནས་ཨ་ཞང་ནས་གནང་བའི་ཕྲུག་སྣབ་ཕྱེས་ཙམ་གཉིས་དེ་གསེར་ལས་ལྷག་པར་བྱས་ནས་དུད་ཚང་དེ་ལ་གལ་ཆེན་གྱི་ཅ་དངོས་ཉར་སྣོད་ཤིང་སྒམ་ཀོ་ཤན་མ་ཞིག་ཡོད་པ་དེས་ནང་དུ་བཅུག་སོང་། ངས་ག་དུས་ཡིན་ཀྱང་ཕ་རྒན་ལ་ང་ཡི་ལྷམ་དེ་བཟོ་དགོས་ཞེས་དྲན་གསོས་བྱས་པ་ནི་ཐེངས་མ་གཅིག་ག་ལ་ཚད། ཉིན་གཅིག་ཕ་རྒན་ནས་གྲོང་པ་འདིས་ནང་དུ་ལྷམ་ཡག་པོ་བཟོ་ཤེས་མཁན་མེད། དེ་རིང་ང་འགྲིག་ལ་རུ་ཁག་ལ་འགྲོ་ནས་ལྷམ་བཟོ་མཁས་པ་མི་རྒན་ལུག་ཡག་ངེད་གཉིས་ཤག་པོ་ཡིན་པ་མ་ཟད་བདེ་སྐྱིད་ལྷ་མོའི་གཟའ་ཟླ་ཆུང་བ་དེ་ཡིན་པས་ང་ཚོའི་སྤུན་མཆེད་ཀྱང་རེད། ངས་ཁོང་ལ་ལྷམ་འདི་ཡག་པོ་ཞིག་བཟོ་མཇུག་དགོས་ཁྱེད་རང་ནས་རང་ཉིད་བོད་ཡིག་ཀློག་བྱང་བའི་ཆེད་དང། ང་ཚོའི་མི་ཚང་གི་རྐྱེན་སེལ་རིམ་འགྲོ་གཉིས་ཀའི་ཆེད་དུ་པདྨ་བཀའ་ཐང་ཚར་བཅུ་ཐོན་ཤོག་ཟེར་ངས་ཀྱང་དང་ལེན་བྱས། དེ་ནས་ཕ་རྒན་ནས་འབྲལ་མེད་དུ་གལ་ཆེའི་མཚོན་སྲུང་ནང་བཞིན་སྐེ་ལ་བཏགས་པའི་བོད་བཟོའི་ལྡེའུ་མིག་དེས་ཤིང་སྒམ་ཀོ་ཤན་མ་ཆག་རོ་དེ་སྒོ་ཕྱེ་དུས་ཨ་ཞང་ནས་གནང་བའི་ཕྲུག་མི་རྒན་གྱི་སྣབས་ཕྱིས་ཙམ་གཉིས་དེ་ཀོ་སྒམ་ཆག་རོའི་ཟུར་ནས་བྱི་བ་འཛུལ་ནས་ཕྲུག་རྩབ་ཧྲལ་གཏང་ཟོས་ཚར་ནས་མི་འདུག ཕ་རྒན་འདས་པོ་ངེད་གཉིས་ནི་སེམས་སྡུག་གིས་ངུ་ལ་ཁད་དུ་གྱུར། ཕ་རྒན་ནས་ཆིག་ལབ་ཀྱིས་འདི་ལྟར་ཟེར། ལི་ལི་རོག་པོའི་ཁ་ལ་རྒྱག་རྒྱུའི་སྡུག་བྱི་དེ་ཚོས་ཨ་ཉོག་གི་ལྷམ་བཟོ་བྱས་དེའང་ཟོས་བཞག་གདའ་ཨོ་ཧོ། ཟེར་ཞོར་ཁ་ཚུར་སྐོར་ནས་ང་ཡི་མགོ་ལ་བྱིལ་བྱིལ་བྱེད་བཞིན་སེམས་སྡུག་མ་བྱེད་དང་ཨ་ཕས་གང་མགྱོགས་ཕྲུག་ལྷམ་ཞིག་ཐབས་ཤེས་བྱེད་ཡོང་ཟེར།

ལོ་གཅིག་འཁོར་བའི་ཆོས་ཚོགས་ཀྱི་མཛད་སྒོའི་ཉིན་མོ།

ཁ་སང་གི་ཉིན་མོ་དེ་ནི་ཆོས་ཚོགས་འདི་གསར་དུ་ཉོས་ནས་ལོ་གཅིག་འཁོར་བའི་དུས་དྲན་མཛད་སྒོ་དེ་ཡིན། ཞོགས་པ་རེས་གཟའ་སྤེན་པར་རྟག་པར་ཆུ་ཚོད་བཅུ་ནས་བཅུ་གཅིག་བར་མི་མང་དང་ལྷན་དུ་སྒོམ་རྒྱག་གི་ཡོད་པས་དེ་རིང་གི་ཉིན་མོ་འདིར་ཁེལ་འདུག

མི་གྲངས་ཉི་ཤུ་ལྷག་ཙམ་ཞིག་ལ་སྒོམ་ཇི་ལྟར་བྱེད་དགོས་མིན་རང་ལུགས་བཀའ་བརྒྱུད་པའི་འཇོག་སྒོམ་ཐོག་ནས་ངོ་སྤྲོད་སྐར་མ་བཅོ་ལྔ་ཙམ་བྱས་ནས་སྒོམ་མཉམ་དུ་བྱས། ཆུ་ཚོད་བཅུ་གཅིག་ཐོག་ཆོས་ཚོགས་ཀྱི་ལས་བྱེད་རྣམས་ནས་སྔ་ནས་གྲ་སྒྲིག་བྱས་ཟིན་པ་ལྟར་མི་མང་དང་ལྷན་དུ་ཐུགས་སྤྲོའི་བྱེད་སྒོའི་ལས་རིམ་ལ་འཇུག འཇམ་དབྱངས་ཆོས་འཁོར་གླིང་གི་ཚོགས་མི་དང་སློབ་མ་གྲོགས་ཕོ་མོ་གཉུག་མར་གནས་པ་དང་གློ་བུར་དུ་ལྷགས་པ་སོགས་མི་མང་ཕལ་ཆེར་བཞི་བཅུ་ལྷག་ཙམ་ཞིག་འཛོམས་འདུག དེ་རིང་གི་མཛད་སྒོ་འདིར་ཚེ་འདིར་བཀའ་དྲིན་ཆེས་གཞལ་དཀའ་བའི་ཆོས་ཚོགས་འདི་ཉོ་མཁན་གཏོང་ཕོད་ཅན་གྱི་སྦྱིན་བདག་ཆེན་མོ་རྡེའུ་ར་ལགས་ལ་བླ་སློབ་ཡོངས་ནས་བཀའ་དྲིན་རྗེས་དྲན་གྱི་དྲན་གསོ་ཞུས། ལྷག་པར་དུ་ཆོས་ཚོགས་ཀྱི་སློབ་སྟོན་པ་སྨན་པ་ཁ་སེན་རྡེའི་ར་ལགས་ནས་ཆོས་ཚོགས་འདིའི་ཐོག་མཐའ་བར་གསུམ་དུ་ཕྱག་ལས་རྒྱུན་སྐྱོང་གནང་བ་ལ་མེ་ཏོག་དང་ཤོག་ལིང་ཁ་གཏགས་སོགས་ཕུལ་ཞིང་མི་མང་ནས་དགའ་བསུའི་ལེགས་གསོལ་ཞུས། ཆོས་ཚོགས་ཀྱི་སྐད་བསྒྱུར་བྱམས་པ་དང་གཞན་གཞས་དང་སྒྲ་སྙན་ལ་མཁས་པ་འགའ་ནས་དེང་དུས་ཀྱི་རོལ་ཆ་དང་གླིང་བུ་སོགས་ཀྱིས་མི་མང་གི་ཐུགས་སྤྲོ་གཉིད་ལས་སད་པར་བྱས། སོ་སོའི་ཁུར་བའི་ཤ་མེད་ཀྱི་ཟས་རིགས་གང་འདོད་ལོངས་སུ་སྤྱད་ནས་སྔ་དྲོ་ཆོས་ཀྱི་སྒོམ་དང་ཕྱི་དྲོ་མི་མང་རྣམས་ཁ་ལ་ཟས་ཞིམ་དང་། རྣ་བ་རུ་སྒྲ་སྙན་སོགས་དབང་པོ་སྒོ་ལྔའི་བདེ་བ་ལ་ལོངས་སུ་མཉམ་སྤྱད་བྱས། བོད་ཀྱི་ཁ་རྒྱུན་དུ། ཟ་སྐྱིད་ཆོས་གསུམ་ཞེས་པའི་ཚིག་འདི་ཉིན་མ་གཅིག་ལ་མཉམ་དུ་ལོངས་སྤྱོད་རྒྱུ་བྱུང་བས་ངོས་ཀྱང་དགའ་བོ་བྱུང་། ལུང་པ་འདིའི་མི་རྣམས་ལས་ཀའི་བྲེལ་ཟིང་གི་རྐྱེན་པས་མི་ཐུག་འཕྲད་ཀྱི་དུས་ཚོད་ཆེས་དཀོན་པའི་རིགས་རྣམས་ལ་མི་མང་མཉམ་འཛོམས་ཀྱི་ཐུགས་སྤྲོའི་སྐབས་སུ་བཟང་པོའི་ཞོར་དུ་ཇ་ཆང་གི་དཔེ་ལྟར་རིང་ནས་སྙིང་དུ་གནག་པའི་འདོད་དོན་གྲོགས་པོ་དང་གྲོགས་མོའི་འབྲེལ་བའི་གོ་སྐབས་ཀྱང་ཡག་ཤོས་ཞིག་ཡིན་ཚོད་སྣང་། ཉིན་རྒྱབ་ཆུ་ཚོད་གསུམ་མ་ཟིན་ཙམ་ནས་མཛད་སྒོ་གེགས་མེད་མཐར་ཕྱིན་གྱིས་ལེགས་གྲུབ་བྱུང་། ངས་ཀྱང་གློ་བུར་དུ་ལྷགས་པའི་གསར་པ་ཟུར་བཅར་བ་རྣམས་ལ་སོ་སོའི་འདོད་བློ་དང་མཐུན་པར་གང་དགོས་ལེགས་གྲུབ་ཞུས། ལུང་པ་འདིའི་གོམས་སྲོལ་ལྟར་འཐམ་འཁྱུད་དང་། ལག་འཇུ། ཕྱག་རྒྱ་སོགས་ཅི་རིགས་ཀྱིས་གྱེས་བྲལ་བྱས་ནས་དེ་རིང་གི་མཛད་སྒོ་དེ་རེ་ཞིག་མཇུག་སྒྲིལ་བྱས། 

ས་མཐར་ཁྱི་སྡོམ་བཞིན་འཁྱམས་ནས།། 

བགྲང་བྱ་བཅུ་ཕྲག་གཉིས་རིང་ལ།། 

མངར་སྐྱུར་བྱེ་ཐང་གི་ཁྲོད་ན།། 

ཡར་མེད་རྐང་རྗེས་ཞིག་བཞག་ཡོད།། 

སྔུན་བསུ་རྒྱབ་སྐྱོར་དང་བྲལ་བའི།། 

ནར་བུ་འཁོས་མེད་ཀྱི་བུ་ལ།། 

མཆོག་གསུམ་ཐུགས་རྗེ་ཡི་ཉི་མ།། 

མ་བོས་མགོ་ཐོག་ཏུ་ཤར་བྱུང་། 

བགྲང་བྱ་ཧྲིལ་པོ་ཡི་དུས་ཆེན།། 

སྐྱིད་པའི་དགའ་སྟོན་གྱི་དར་དཀར།། 

མི་ནུབ་མཁའ་དབྱིངས་སུ་སྤུར་ནས།། 

བཀྲ་ཤིས་མཛད་སྒོ་དེ་གྲུབ་སོང་།

ཨ་མའི་དུས་ཆེན་ཉིན་མོ།

དེ་རིང་ནི་འཛམ་གླིང་རྒྱལ་སྤྱིའི་ཨ་མའི་དུས་ཆེན་གྱི་ཉིན་མོ་དེ་རེད། ངོས་ཀྱི་དྲིན་ལྡན་མ་ལོ་དེ་གུང་ཕྲན་དམར་པོའི་རླུང་འཚུབ་ཀྱི་ཁྲོད་ནས་ང་བྱིས་པ་སྙོམ་ལག་མ་རྒྱས་བའི་ཟླ་བ་གསུམ་ཙམ་གོང་རྐྱེན་འདས་སུ་སོང་། དེ་ནི་ང་ཡི་མི་ཚེར་སོས་མེད་ཀྱི་སྙིང་ལ་རྨ་ཁ་ཆེན་པོ་ཞིག་རེད་འདུག ཡིན་ནའང་རི་གཟར་གྱི་གྱེན་ནས་ཤོར་བའི་རྦབ་རྡོ་ནི་སུས་ཀྱང་མི་ཁེག་པ་ལྟར་ལུས་རྟེན་འདིར་ལས་དབང་གིས་མ་མེད་དྭ་ཕྲུག་ཁེར་རྐྱང་དུ་ལུས་དགོས་པ་ཉམ་ཆུང་ཁོ་བོས་མགོ་ཐོག་ཏུ་ཁེལ་བ་འདིའང་བཅོས་མེད་ཀྱི་སྔོན་ལས་ངན་པ་ཞིག་ཡིན་པར་བསམ། གང་ལྟར་དེ་རིང་ནི་འཛམ་གླིང་ཨ་མའི་དུས་ཆེན་གྱི་ཉིན་མོ་འདིར་ངོས་ཀྱི་ལུས་ཀྱི་སྐྱེས་མ་དྲིན་ལྡན་མ་དངོས་སུ་མེད་ཀྱང་ལས་ཀྱིས་བསྐོས་པའི་ཨ་མ་ཀུན་བཟང་དབང་མོ་ལ་ཤོག་ལིང་ཀར་ཊི་དང་མཉམ་དུ་ཤེལ་དཀར་ཕྲེང་བ་ཞིག་བཅས་ལག་བཏགས་སུ་སྤྲད་ནས་ངེད་གཉིས་རྒྱ་མཚོའི་འགྲམ་དུ་སྤྲོ་སེང་ལ་ཁྱུག་ཙམ་སོང་། དགུང་མོ་ངོས་ཀྱི་ཁྱིམ་འཚེས་རྒན་པོ་སིའི་ཊེན་ཧྥེང་ནང་མི་མཉམ་དུ་དགུང་ཟས་མཉམ་བཟའ་བྱས་པས་ཧ་ཅང་སྐྱིད་པོ་བྱུང་། 

ལུས་ཀྱི་སྐྱེད་མ་དམར་པོའི་རླུང་འཚུབས་ཀྱིས་ཁྱེར་ཡང་།། 

ལས་ཀྱི་བསྐོས་པའི་དྲིན་ཅན་ཨ་མ་ཞིག་རྙེད་སོང་། 

ཤི་གསོན་གཉིས་ཀྱིས་བསྐྱངས་བའི་ས་མཐའ་ཡི་བུ་ཆུང་།།

དེ་རིང་ཨ་མའི་དུས་ཆེན་བསུ་བ་རུ་སླེབས་ཡོད།། 

དམར་པོའི་འཐབ་རྩོད་ཁྲོད་ཀྱི་ཨ་མ་ཡི་འོ་རྒྱལ།།

ཟླ་གསུམ་ཙམ་ལས་མ་ལོན་བུ་ཆུང་ང་བསྐྱུར་ནས།། 

སྡུག་གི་མུན་པའི་ཀློང་ནས་གསོན་བྲལ་དེ་བྱས་དུས།། 

ངུས་པའི་་གདོང་གི་མིག་ཆུ་ད་དུང་ཡང་སྐམ་མེད།། 

མ་མེད་ས་མཐའི་བུ་ཆུང་ཁེར་རྐྱང་དུ་གྱུར་དུས།། 

ངོ་གདོང་གཉེར་མས་ཁེངས་བའི་བོད་མོ་འགའ་མཐོང་སྐབས།། 

དྲིན་ཅན་ཨ་མའི་ཞལ་རས་ལྷང་ལྷང་དུ་དྲན་ནས།། 

སྐྱོ་བའི་མིག་ཆུ་ཤོར་བ་ཉུང་ཉུང་ཞིག་མིན་ནོ།། 

ས་སྟེང་ཨ་མའི་དུས་ཆེན་རེ་རེ་ཡི་སྐབས་སུ།། 

ས་མཐའི་བུ་ཆུང་སེམས་ལ་རྨ་ཁ་རེ་བཟོས་སོང་།

བརྩེ་བའི་སྙིང་གི་ནོར་བུ་དྲིན་ཅན་གྱི་ཨ་མ།། 

ད་ལྟ་འཛམ་གླིང་ས་ཆ་གང་འདྲ་རུ་བཞུགས་ཡོད།། 

སྔ་ལོ་ཨ་མའི་དུས་ཆེན་སྐབས་ལ་བྲིས་པའི་གོང་གི་རྩོམ་ཐུང་དེ་སྐད་བསྒྱུར་བྱམས་པ་ནས་དབྱིན་ཡིག་བསྒྱུར་ནས་བོད་དབྱིན་གཉིས་ངོ་དེབ་ཐོག་ཏུ་བཞག་པས་མི་མང་པོ་ནས་དགའ་རྟགས་དང་མཆན་འདེབས་སོགས་བྱས་འདུག།

སྤྲུལ་སྐུ་དོན་འགྲུབ་མཇལ་བའི་ཉིན་མོ།

སྔ་ནས་དུས་ཆད་བྱས་པ་ལྟར་དེ་རིང་ཉིན་གུང་རྒྱབ་ཏུ་ཨ་མ་ཡེ་ཤེས་མ་བུ་གཉིས་དང་ལྷན་ས་གནས་འདིར་གཉུག་མར་བཞུགས་མཁན་སྤྲུལ་སྐུ་དོན་འགྲུབ་མཇལ་བཅར་ལ་སོང་། སྤྲུལ་སྐུ་དོན་འགྲུབ་ནི་ཕ་ཡུལ་མགོ་ལོག་རྡོ་དགོན་ནས་ཡིན་ཅིང་ཨ་རིར་ཕེབས་ནས་ལོ་གྲངས་ཕལ་ཆེར་ལྔ་བཅུ་མ་ཟིན་ཙམ་ཡིན་སྐད་འདུག ཁོང་གི་རྩ་བའི་བླ་མ་སྐྱབས་རྗེ་རྡོ་གྲུབ་ཆེན་ཡིན་པ་མ་ཟད་དགོན་པའང་གཅིག་པ་རེད་འདུག ཨ་མ་ཡེ་ཤེས་ངེད་གཉིས་ཨ་རིའི་ཁང་པ་དཀྱུས་མ་ཐོག་རྩེགས་མང་པོ་ཅན་ཞིག་ཏུ་ཁ་གཏད་ནས་སོང་། རིན་པོ་ཆེ་ཐོག་རྩེགས་མཐོན་པོ་ཞིག་གི་སྒང་དུ་བཞུགས་འདུག བགྲེས་ཉམས་ཤ་སྐམ་ལ་འཛུམས་མདངས་ཅན་གྱི་བླ་རྒན་དེའི་དལ་བུས་སྒོ་འགྲམ་ནས་སྒུག་འདུག ནང་དུ་འཛུལ་ནས་ཁ་བཏགས་ཕུལ་ཅིང་རང་ཉིད་ངོ་སྤྲོད་སོགས་བྱས། མི་འདུག་ས་དང་མཆོད་ཁང་གཅིག་ཅོག་ཅན་གྱི་ཁང་པ་གཙང་ཟོ་དོད་པོ་ཞིག་དང་ཟུར་ནས་ཐང་སྐུ་མང་ཞིག་ཀྱང་མཇལ་རྒྱུ་འདུག མགོ་སེར་བུད་མེད་ལྟས་ཚོད་ལ་ལོ་གྲངས་ལྔ་བཅུའི་ཡས་མས་ཅན་ཞིག་ནས་ཨ་མ་ཡེ་ཤེས་ངེད་གཉིས་ལ་བོད་ཀྱི་ལུགས་སྲོལ་ལྟར་གུས་ཞབས་དང་ལྷན་ཇ་ཁུར་སོང་བས་དེ་ནི་སྤྲུལ་སྐུ་རིན་པོ་ཆེ་ཁོང་གི་གསང་ཡུམ་དེ་ཡིན་སྐད་འདུག དེ་ནས་ཕན་ཚུན་བཀའ་མོལ་བྱས་པས་རིན་པོ་ཆེ་ནས་མགོ་ལོག་གི་སྐད་གདངས་དམའ་ལ་དབུས་སྐད་འདྲེས་མ་དེང་དུས་སྐྱབས་བཅོལ་བ་བཙན་བྱོལ་བོད་པའི་འདྲེས་སྐད་དཀྱུས་མ་དེ་རེད་འདུག ངེད་གཉིས་ཕན་བཀའ་མོལ་མང་པོའི་རྒྱུད་རིམ་ཁྲོད་ནས་ངས་བདེ་ཆེན་ཞིང་སྒྲུབ་འཚོགས་ཀྱི་ཡོད་ཞུས་དུས་ང་ལ་ནན་ཏན་གྱིས་གཟིགས་ནས་ཐུགས་དགྱེས་དགྱེས་གནང་ནས་འདི་ལྟར་གསུངས་སོང་། 

"དེང་སང་ཕྱི་རྒྱལ་གྱི་ནང་པ་འདི་རྣམས་ལ་སྐྱོན་ཆེ་ཤོས་དེ་ནང་ཆོས་ལ་ཡིད་རྟིང་ནས་དད་པ་མེད་པ་དེ་རེད་འདུག གལ་སྲིད་དད་པ་ཡོད་ན་སྤྱན་རས་གཟིགས་དང་འོད་དཔག་མེད་སོགས་རྒྱུད་སྡེ་འོག་མའི་ལྷ་འདི་རྣམས་གང་ཉམས་སུ་བླངས་ཀྱང་ངེས་པར་འབྲས་བུ་འབྱུང་གི་རེད།"

ཅེས་དོན་སྙིང་བཀའ་མོལ་མང་དག་ཞིག་གསུངས་སོང་། བཀའ་མོལ་གསུངས་པའི་སྐབས་སུ་སྐད་གདངས་དམའ་བོས་སྤྱན་བར་སྣང་དུ་གཟིགས་ནས་གསུངས་པ་ལས་བཀའ་མོལ་གནང་སའི་གདོང་ལ་དེ་ཙམ་གཟིགས་སྲོལ་མི་འདུག བཀའ་མོལ་གསུང་སྟངས་དང་བཞུགས་སྟངས་སོགས་གང་ལ་དཔྱད་ནའང་ཉམས་ལེན་པ་ཞིག་ཡིན་གཏན་ཁེལ་རེད་འདུག ཁོང་ནས་དབྱིན་ཇིའི་ཐོག་ཏུ་བྲིས་པའི་ནང་ཆོས་ཀྱི་དེབ་ཧ་ཅང་མང་ཞིང་མང་པོ་ཞིག་ནས་ཧ་ཅང་དགའ་བོ་བྱེད་ཀྱི་ཡོད། ད་ལོར་དགུང་གྲངས་བདུན་བཅུ་དོན་དགུ་ཡིན་ཅེས་གསུངས་སོང་། གལ་སྲིད་ཀི་ལི་ཧྥོ་ཉའི་སོགས་སུ་ཕེབས་དགོས་ཡོད་ཚེ་ང་ཡི་ཆོས་ཚོགས་སུ་ཕེབས་རོགས་ཞེས་གདན་ཞུས་ཀྱང་བྱས། ངས་གོ་ཚུལ་ལྟར་དུ་བྱས་ན་ཁོང་ནི་མཁས་དབང་ཞིག་ཡིན་པ་མ་ཟད་ཉམས་ལེན་ཀྱང་ཧ་ཅང་ཡག་པོ་ཡོད་པའི་སྐད་ཆ་འདུག 

རིག་ལམ་ངག་ལ་གྱེར་བའི་རྟོག་གེ་བ།། 

མཐོང་ཚད་ཚུལ་མིན་སྒྲུབ་པའི་ལོག་ལྟ་ཅན།། 

མིང་སྙན་ཟོལ་རྫུ་ཆོས་དྲེད་བདག་འདྲ་རྣམས།། 

བློ་འདི་ཁྱེད་ལྟར་འགྱུར་ན་ཅི་མ་རུང་། 

བཤད་བཤད་ཚིག་སྐམ་བདག་པོའི་མཁན་པོ་དང་། 

རྩད་རྩད་གདན་སའི་གྲྭ་རྒོད་དགེ་བཤེས་སོགས། 

ཁྱི་ལུད་དར་བཏུམ་ང་འདྲའི་ཆོས་གཟུགས་རྣམས།། 

གང་ཁྱེད་ཐེངས་གཅིག་མཇལ་བས་གློ་བ་དགའ།། 

ཐོས་རྟགས་ཞི་ཞིང་དུལ་ལ་མི་མཛའ་མེད།།

སྒོམ་རྟགས་ཉོན་མོངས་མེད་ཅིང་ཆོག་ཤེས་མཁན།།

སེམས་སྲུང་དགེ་ལ་གཅིག་ཏུ་འདུན་པ་ཅན།། 

སྐྱེས་བུ་གཏན་གྱི་དོ༵ན་ཆེན་འགྲུ༵བ་པ་རྒྱལ།། 

བྷོ་སི་ཊོན་བཙོན་ཁང་ནང་ལ་ཆོས་བཤད་བྱས་པའི་ཉིན་མོ།

ཉིན་མོ་འདི་ནི་ངོས་ཀྱི་ལོ་གཅིག་གི་ཆོས་ཕྱོགས་ཀྱི་ལས་འཆར་ནང་ནས་མི་གྲངས་མང་ཉུང་ལ་མ་ལྟོས་པར་གལ་ཆེ་ཤོས་ཞིག་ཡིན། ལོ་ལྔ་ཡི་ཡར་སྔོན་དགེ་ཕྲུག་ཨ་རི་བ་ཀརྨ་ཤེས་རབ་བརྒྱུད་ནས་བྷོ་སི་ཊོན་ས་གནས་འདིའི་བཙོན་ཁང་ནང་དུ་ཆོས་བཤད་བྱེད་རྒྱུའི་གོ་སྐབས་བྱུང་། དེ་རིང་ལོ་བཞི་པ་དེ་ཡིན་དེ་ནི་ངོས་ལ་ལྟོས་ན་ཕན་ཐོག་ཆེ་ཤོས་ཀྱི་ཆོས་བཤད་ས་དེ་ཡིན། ཐེངས་མ་དང་པོར་ཉིས་སྟོང་དགུ་ལོར་བཙོན་ཁང་ནང་གི་སྡེ་ཚན་མི་འདྲ་བའི་ནང་ནས་ནང་པའི་སྡེ་ཚན་ཞིག་ཏུ་ཆོས་བཤད་བྱས་སྐབས་མི་གྲངས་བཅུ་གཉིས་ཡོད་པས་ཚང་མས་སྐྱབས་སྡོམ་ཞུས་ཤིང་ནང་ཆོས་ཉམས་ལེན་བྱེད་རྒྱུའི་འགོ་འཛུག་བྱས། དེ་ནས་ད་བར་བཙོན་པ་མང་པོ་ཞིག་གི་བརྒྱུད་ལ་ནང་ཆོས་ཀྱི་དགེ་བའི་བག་ཆག་འཇོག་ཐུབ་པ་མ་ཟད་ཁ་ཤས་ཆོས་པ་ཡང་དག་པ་བྱུང་འདུག ཁ་ཤས་བཅོན་བཀག་དུས་ཚོད་ཚང་ནས་བཙོན་གྲོལ་ཐོབ་པ་ཡང་མི་ཉུང་བ་བྱུང་འདུག ཉིན་རྒྱབ་ངོས་ཀྱི་གྲོགས་པོ་མི་རིགས་ནག་པོའི་ཡེ་ཤུའི་ཆོས་པ་ཞིག་ཡོད་པས་ཁོང་གི་ཆོས་ཁང་ནང་དུ་ཆོས་བཤད་བྱེད་ལ་སོང་། མི་རིགས་ནག་པོ་ཤ་སྟག་མི་གྲངས་ལྔ་བཅུ་ཙམ་ཞིག་སླེབས་འདུག ངོས་ཀྱི་དགེ་ཕྲུག་ཀརྨ་ཤེས་རབ་ནས་དེར་ཡོད་ཀྱི་མི་རྣམས་ལ་ང་ཡི་སྐོར་ངོ་སྤྲོད་མདོར་བསྡུས་གྲུབ་ནས་ངས་དབྱིན་ཇི་ཆག་རོ་དེ་རྒྱབ་ནས་བྱམས་སྙིང་རྗེའི་ཆོས་བཤད་མདོར་བསྡུས་བྱས། ཁོ་རང་ཚོའི་འདོད་པ་ལྟར་འོད་དཔག་ཀྱི་བསྙེན་དབྱངས་ཞིག་ཀྱང་བྱས་པས་མི་མང་ཧ་ཅང་དགའ་བོ་བྱས་སོང་། དགོང་མོ་ཨ་མ་ཡེ་ཤེས་དང་དཀོན་མཆོག་གཉིས་ནང་དུ་འབྱོར། ངོས་ཀྱི་ཟ་མ་དགའ་ཤོས་ཟྭ་ཐུག་དང་རྩམ་པ་སོགས་བོད་ཟས་བྲོ་བ་ཅན་རེ་བཟའ་རྒྱུ་རྙེད་དུས་བན་རྒན་ང་ནི་ངོ་ཚ་མེད་པར་གླང་རྒན་ཚ་ཆུ་དང་འཕྲད་པ་ལྟར་ནུབ་ཟས་འགྲངས་ཚད་ཟོས། གང་ལྟར་ད་རེས་ཡང་སྐྱར་བློ་དཀར་གཞུང་དྲང་བ་དད་ལྡན་ཕ་དཀོན་མཆོག་དང་དད་ཅན་ཨ་མ་ཡེ་ཤེས་གཉིས་ཀྱི་ནང་མི་ལོ་རེར་ཐེངས་མ་རེར་ཐུག་འཕྲད་ལ་ཡོང་ནས་ཞག་ཤས་རིང་མཉམ་དུ་འཛོམས་རྒྱུ་འདི་ཡང་ཧ་ཅང་ནས་དགའ་བོ་བྱུང་། ང་ནི་ག་དུས་ཡིན་ཀྱང་མི་ཚང་འདི་ངོས་ཀྱི་ལས་ཀྱིས་བསྡུས་པའི་ནང་མི་ཞིག་ཡིན་པའི་ཚོར་བ་རྒྱུན་ཆགས་སུ་ཡོང་གི་ཡོད། ཕ་མ་འདི་གཉིས་ནི་ས་གནས་བྷོ་སི་ཊོན་བོད་རིགས་ཆེས་སྔ་ཤོས་དང་མ་ཟད་སྐྱབས་བཅོལ་བོད་རིགས་རྗེས་མ་རྣམས་ལ་རོགས་རམ་དང་སློབ་སྟོན་སོགས་ཧ་ཅང་དཀའ་དྲིན་ཆེན་པོ་ཡིན་སྐད་འདུག ཆེས་ཡ་མཚན་པ་ཞིག་ལ་དཀོན་མཆོག་དང་ཡེ་ཤེས་གཉིས་ཀྱི་བུ་མོ་ཆུང་བ་བསྟན་ལྷ་ལ་ཉེ་ཆར་ཟླ་ཤས་གོང་ནས་བུ་ཞིག་སྐྱེས་ཡོད་པའི་མིང་ལ་ངོས་ཀྱི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེའི་མཚན་དང་གཅིག་པ་རེད་འདུག དེ་ནི་ངོས་ལ་ལྟོས་ན་ཆེས་ཡ་མཚན་ཅན་ཞིག་ཏུ་མཐོང་། གང་ཡིན་ཞེ་ན་སངས་རྒྱས་ཟེར་བའི་མིང་ཡོད་ཀྱང་སངས་རྒྱས་བསྟན་འཛིན་ཟེར་བའི་མིང་འདི་བོད་རིགས་བྱིང་གི་ཁྲོད་དུ་དར་ཁྱབ་ཆེར་མེད་པས་ཡིན། 

རྒོ་གུལ་ནང་དུ་ཆོས་བཤད་བྱས་པའི་ཉིན་མོ།

ཟླ་བ་འགའ་ཡི་གོང་ནས་ངོས་ཀྱི་དགེ་ཕྲུག་གསར་པ་dayena བརྒྱུད་ནས་ཆུ་ཚོད་གཅིག་ཙམ་གྱི་སར་ཡོད་པའི་རྒོ་གུལ་དྲྭ་རྒྱའི་ལས་ཁུངས་སུ་ཆོས་བཤད་བྱེད་རྒྱུ་དེ་ཡིན། ཁ་སང་ཞོགས་པ་ཆུ་ཚོད་བདུན་པའི་སྐབས་སུ་འཇམ་དབྱངས་ཆོས་འཁོར་གླིང་གི་ཚོགས་གཙོ་གཙོས་སྐད་བསྒྱུར་བྱམས་པ་མཐར་ཕྱིན་བཅས་སྡོམས་ངོས་ཀྱི་སློབ་མ་བཅུ་ལྷན་དུ་རླངས་འཁོར་བཞིའི་དང་བཅས་གཅིག་རྗེས་གཉིས་མཐུད་ཀྱིས་ཆུ་ཚོད་གཅིག་ཙམ་གྱི་སར་ཡོད་པའི་རྒུ་གོལ་དྲྭ་རྒྱའི་ཚོགས་པའི་ཕྱོགས་སུ་ཁ་གཏད་ནས་ཕྱིན། ཆུ་ཚོད་བཅུ་པའི་སྐབས་སུ་ངས་སྐད་ཆ་དངོས་གཞི་དེ་འགོ་འཛུག་དགོས་འདུག དེ་རིང་བཤད་བྱའི་སྐད་ཆ་ནི། བྱམས་སྙིང་རྗེའི་ངང་སྤྱི་ཚོགས་སུ་ལས་ཀའི་ནུས་པ། ཞེས་པའི་བརྗོད་བྱ་རེད་འདུག 

དེར་འདུས་དངོས་ཡོད་མི་མང་བདུན་བཅུ་མ་ཟིན་ཙམ་ཞིག་འདུག་ཀྱང་དྲྭ་ཐོག་ནས་ཐད་གཏོང་སྐབས་སུ་མི་ཁྲི་གསུམ་ནས་བཞིའི་བར་བལྟ་མཁན་ཡོད་སྐད་འདུག གང་ལྟར་དང་པོ་ངས་དབྱིན་ཇིའི་ཆག་རོ་དེ་བེད་སྤྱོད་བྱས་ནས་ཚང་མར་ཁམས་འདྲི་དང་མ་ཟད་ང་རང་གྲྭ་རྐྱང་དཀྱུས་མ་ཞིག་ཡིན་ཀྱང་རྒུ་གོལ་འདི་ཉིད་ཀྱང་ཁ་བྲལ་ཐབས་མེད་མཁན་ཞིག་ཡིན་པའི་ཆ་ནས་དེ་རིང་འདིར་སྐད་ཆ་བཤད་མཁན་མགྲོན་འབོད་གནང་བར་ཐུགས་རྗེ་ཆེ་ཞུས་བ་དང་སྦྲགས་ནས་བརྗོད་བྱ་དངོས་གཞི་སྐད་བསྒྱུར་དང་བརྒྱུད། ས་བཅད་རྣམ་པ་གསུམ་གྱི་སྒོ་ནས་དེ་རིང་གི་སྐད་ཆ་དེ་གླེང་སློང་བྱས། བྱམས་སྙིང་རྗེ་མེད་པའི་སྐྱོན་ཆ། ཡོད་པའི་དགེ་མཚན། དེ་ཇི་རང་རྒྱུད་ལ་བསྐྱེད་ཐབས་ཞེས་བརྗོད་བྱ་འདི་གསུམ་ཐོག་ནས་དེང་དུས་དངོས་ཡོད་གནས་ཚུལ་གཞིར་བཞག་ལ། ནང་ཆོས་ཀྱི་སླན་པ་རྒྱབ་ཀྱིན་འགྲེལ་བཤད་བྱས་དུས་དེར་ཡོད་ཀྱི་མི་མང་པོ་ཧ་ཅང་ནས་དགའ་བོ་བྱེད་ཀྱི་འདུག 

དུས་ཡུན་ནི་ཆུ་ཚོད་གཅིག་རེད་དྲི་བ་དྲིས་ལན་སོགས་ནི་གང་ཡང་མི་འདུག སྐད་ཆ་མཇུག་གྲུབ་པ་དང་ལྷན་གྲ་སྒྲིག་བྱེད་མཁན་ཕོ་གསར་གཟུགས་རིང་ལྟས་བཟོ་དོད་པོ་དེས་ཐུགས་རྗེ་ཆེ་ཞེས་གསུངས་བཤད་ཀྱི་མཇུག་གྲུབ། ཚོགས་པ་འདི་ཡི་ལས་བྱེད་གསུམ་གྱིས་ངེད་སླ་སློབ་རྣམས་ཟུར་དུ་ཡོད་པའི་རྒྱ་གར་ཟ་ཁང་ཞིག་ནང་དུ་ཁྲིད་ནས་གང་བཟའ་ཆོག་པའི་ཟས་རིགས་རྣམས་སོ་སོའི་གང་འདོད་ལ་ལོངས་སྤྱད། དོ་ནུབ་ཆུ་ཚོད་དགུ་པའི་སྐབས་སུ་སན་ཧོ་སེའི་San jose airport གནམ་ཐང་བརྒྱུད་ནས་boton བྷོ་སི་ཊོན་ལ་འགྲོ་དགོས་ཡོད། ང་མ་སོང་བའི་གོང་ནས་སྤྲོ་སེང་ལ་ཁྲིད་ཀྱི་ཡིན་ཟེར། ཉིན་རྒྱབ་རྒུ་གོལ་ཚོགས་པའི་ལས་བྱེད་མི་གསུམ་དང་འཇམ་དབྱངས་ཆོས་འཁོར་གླིང་ཚོགས་མི་བཅུ་དང་བཅས་ང་ཚོ་ཐག་ཉེར་ཡོད་པའི་ཧ་ཅང་མཛེས་སྡུག་ལྡན་པའི་ས་ཆ་ཞིག་ཏུ་འཁྱམས་ཉུལ་ལ་སོང་། ཀི་ལི་ཧྥོ་ཉའི་ས་ཆ་གང་དུ་སོང་ཡང་དག་པའི་ཞིང་ཁམས་འདྲ་ཤ་སྟག་རེད་འདུག ས་ཆ་འདིའི་དབྱིབས་ནི་སྤྱིར་གཏང་རི་མགོ་དབེན་ཁྲོད་འདྲ་ཞིག་ཡིན་པ་ལ། སྤངས་ལྗོངས་དང་ལྗོན་ཤིང་སྐབས་སྐབས་སུ་མཚོ་དང་མཚེའུ་ཆུ་ནང་དུ་བྱ་རིགས་དཀར་སེར་དམར་ལྗངས་ཁྱུ་ཁྱུ་བྱས་ནས་བསྡད་པ། གང་ལྟར་ས་ཆ་ཧ་ཅང་སྐྱིད་པོ་ཞིག་ཏུ་སླེབས་པས་མི་མང་ཧ་ཅང་དགའ་བོ་བྱས་སོང་། ཁོ་རང་ཚོའི་འདོད་པ་ལྟར་རྟེན་འབྲེལ་གྱི་ཆེད་དུ་རི་མགོ་དེར་ཕྱག་ཆེན་རྣལ་འབྱོར་བཞི་རིམ་འགྲེལ་བཤད་མདོར་བསྡུས་ཞིག་ཀྱང་བྱས། དེ་ནས་དགོང་མོར་གནམ་ཐང་བརྒྱུད་བྷོ་སི་ཊོན་ལ་སོང་། གནམ་གྲུ་ཆུ་ཚོད་ལྔ་ཡི་རིང་འཕུར་དགོས་འདུག ཕྱི་ཉིན་ཞོགས་པ་ཆུ་ཚོད་དྲུག་པའི་སྐབས་སུ་བྷོ་སི་ཊོན་གནམ་ཐང་ལ་བདེ་འབྱོར་བྱུང་། གནམ་ཐང་དུ་དཀོན་མཆོག་དང་བུ་མོ་བསྟན་ལྷ་གཉིས་ནས་སྒུག་འདུག་པས་དཀོན་མཆོག་ལགས་ཀྱི་ནང་ཤར་སྐྱོད་བྱས་ནས་ཡོང་། སང་ཉིན་ནས་བཟུང་ཉིན་གཉིས་རིང་བྷོ་སི་ཊོན་བཙོན་ཁང་ནང་དུ་ཆོས་བཤད་བྱེད་དགོས་ཡོད།