ལར་ནི་དེང་སང་བོད་ནང་གི་གནས་སྟངས་དེ་ས་ཁུལ་མ་འདྲ་བ་ལ་སྲིད་ཇུས་མི་འདྲ་བའི་དབང་གིས་བོད་སྤྱི་ཡི་གནས་སྟངས་ཡོངས་རྫོགས་ས་ཁུལ་བྱེ་བྲག་པའི་ནང་དུ་སྡོམ་རྒྱག་རྒྱུ་ཧ་ཅང་དཀའ། ནང་ཆེན་ཕྱོགས་ལའང་སྲིད་ཇུས་འཇམ་རྩུབ་མི་འདྲ་བ་མང་པོ་ཞིག་ཡོད། རྒྱ་ནག་གཞུང་རང་གིས་བཤད་ཚུལ་ལ་རྒྱལ་ཁབ་ཉིན་རེའི་གསར་འགྱུར་ཞེས་བཤད་སྲོལ་ཡོད་པ་ལྟར་རེད། བོད་ལ་གནས་སྐབས་དཀའ་ངལ་ཆུང་ཚེག་རེ་འཕྲད་པའི་སྐབས་སུ་གློ་བུར་དུ་འདིར་ཕྱོགས་ནས་དེ་ཉིད་ཀྱི་རྒྱབ་ཕྱོགས་སུ་བསམ་བློ་གང་ཡང་མ་གཏང་བར། དེང་སང་གསར་འགོད་པའི་ངོ་བོ་ཞིག་གིས་ས་གནས་དེའི་མི་ཡི་མིང་ཐ་ན་སྡོད་གནས་སོགས་བཤད་གང་ཐུབ་བྱས་ན་དོན་ངོ་མར་དོ་བདག་དེ་ཉིད་ལ་ཕན་ལས་གནོད་ཆེ་བ་རེད་འདུག་བསམ། རྒྱུ་མཚན་དེར་བརྟེན་ཁ་སང་ངས་ཀྱང་གསར་འགོད་པ་སོགས་ལ་གནས་སྐབས་བདུན་ཕྲག་གཅིག་ཙམ་རིང་མཁན་པོའི་སྐོར་དེ་ཁྱབ་སྒྲག་མ་བྱས་ན་ཡག་ཚུལ་བཤད་ཀྱང་སྤྱི་ཚོགས་དྲྭ་རྒྱའི་ལས་མེད་གསར་འགོད་པ་རྣམས་ཀྱི་ཁུངས་མེད་ཀྱི་གནས་ཚུལ་དེ་རྣམས་དཔང་པོ་བྱས་ནས་ཁྱབ་སྒྲག་བྱས་ཚར་འདུག ང་རང་ཉིད་ལའང་ནོར་འཁྲུལ་མེད་པ་གཏན་ནས་མིན་ཏེ། སྔ་ལོར་མཁན་པོ་འཇུ་བཟུང་བྱས་པའི་སྐབས་སུ་བསམ་པ་བཟང་པོའི་འཕེན་བྱེད་དགེ་བས་འཕངས་ཀྱང་རྫོགས་བྱེད་སྡིག་པས་རྫོགས་ཟེར་བའི་ལུང་ལྟར་གོང་དུ་བཤད་པ་བཞིན་རླུང་འཕྲིན་དང་གསར་ཤོག་སོགས་སུ་ཁྱབ་སྒྲག་གང་ཐུབ་བྱས་པས་བོད་ལ་ཡོད་པའི་ང་ཡི་སྤུན་མཆེད་དང་། ཆོས་གྲོགས་འགའ་ལ་རྒྱ་ནག་སྤྱི་བདེ་མི་སྣས་དོ་དམ་དང་འདྲི་རྩད་འགའ་ཤས་བྱུང་འདུག་པས་ད་ལྟའི་ཉིན་ཐོ་འདིའི་བརྒྱུད་ངས་ཁྱེད་རྣམ་པ་ཚང་མ་ལ་སྙིང་གི་དཀྱིལ་ནས་བཟོད་གསོལ་ཞུ་རྒྱུ་ཡིན། ད་རེས་ངས་མཁན་པོ་ཀར་ཚེའི་སྐོར་གནས་ཚུལ་གང་ཡང་གནས་སྐབས་ངོས་ཀྱི་མིང་ཐོག་ནས་ཁྱབ་སྒྲག་མི་བྱེད་རྒྱུ་བྱས་ཡོད།
མ་བསྐོས་ལས་ཀྱི་ཡ་ཐོད་རི་མོ་ལ།།
མ་བསྐོས་ལས་ཀྱི་ཡ་ཐོད་རི་མོ་ལ།།
བདེ་སྡུག་མ་འདྲེས་དབྱར་ཀའི་སྤངས་ལྗོངས་འདྲ།།
ལས་དབང་ལྕི་མོས་ནོན་པའི་གངས་ཅན་པ།།
བསམ་བཞིན་དཔྱད་ན་སྙིང་ནས་མཆི་མ་དཀུ།།
ལྷག་པར་བསྟན་སྲིད་དམར་པོའི་འཐོར་རླུང་ཁྲོད།།
མི་འཇིགས་ཕྱག་གིས་སྐྱབས་པའི་སྐྱེས་བུ་རྣམས།།
དོན་མེད་སྙད་སྡང་སྲོག་ལ་རྒོལ་བའི་ཚེ།།
དབུགས་བྲལ་བེམ་པོ་ཡིན་ཡང་མི་འགུལ་ཅི།།
འདས་པའི་བགྲང་བྱ་ཁྱུད་འཁོར་ཟུང་ཡར་སྔོན།།
ལུགས་ཟུང་ཕྲག་ཏུ་འདེགས་མཁན་གངས་སེང་ཞིག།
རིགས་ངན་རྔོན་པའི་རྙི་རུ་ཚུད་པ་དེ།།
ཁ་སང་གློད་གྲོལ་ཐོབ་པས་གློ་བ་དགའ།།
སྤྱི་སེམས་ལ་རྒྱར་བཅངས་བའི་ཆག་སྒོ་དང་།།
འབངས་ཀྱི་བདེ་སྡུག་སྒྲོག་པའི་ནག་ཉེས་ཀྱིས།།
གང་ཁྱེད་ཁྲི་མུན་དམ་པོས་བཅིངས་བའི་སྐབས།།
སེམས་ཤུགས་འགྱུར་བ་མེད་དམ་ཆོས་ཀྱི་གྲོགས།
དྲང་པོའི་སྐུ་ལ་གཡོ་སྒྱུས་ཞྭ་མོ་བཀོན།།
ལྷག་བསམ་ཐུགས་ལ་མ་ཉེས་ཁ་ཡོག་བྱས།
ཁྱེད་ཀྱི་གཟེད་པའི་མི་བཟོད་དུཿཁ་དེ།།
ཁོ་བོའི་དོན་སྤྱིའི་ངོགས་སུ་ལྷང་ངེར་གསལ།།
རིགས་བདག་སྐྱབས་མགོན་བུདྡྷའི་མཚན་ཅན་དང་།
མཁན་ཆེན་ཨ་བྷྱ་ཀ་ར་རྣམ་གཉིས་ཀྱི།།
ཕ་རྗེས་བུ་འཇུག་ལུགས་གཉིས་མཛད་བཟང་ཅན།།
ཁྱེད་ནི་དཀྲོང་ངེར་འགྱིངས་པའི་རྡོ་རིང་ཞིག།
མཐོན་པོའི་མིང་གི་གོ་སར་ཁྱེད་མི་དགྱེས།།
བླ་གཟུགས་དཔོན་མ་བླ་ཡི་ཆེ་ཚུགས་མེད།།
བསྟན་སྲིད་དམར་པོའི་རླུང་གིས་ཁྱེར་བའི་དུས།།
ཁྱེད་ནི་དྲང་བདེན་སྒྲོག་པའི་དཔའ་བོ་ཞིག།
ན་གཞོན་ཐལ་རྡུལ་ཁྲོད་ནས་སློབ་གསོ་བ།།
གསེར་འཕྲུའི་རྒྱ་ཕིག་འོག་ནས་ཆོས་དཔོན་དང་།
མགོན་མེད་ཉམ་ཐག་པ་ལ་སྐྱབས་མགོན་ཞིག།
ཁྱེད་ནི་དུས་རབས་གསར་པའི་ཕོ་ཉ་ཡིན།།
ཡུལ་གྱིས་བསྐལ་བའི་ཆོས་ཀྱི་མཆེད་པོ་དེས།།
ནུབ་གླིང་ས་མཐའི་ཡུལ་ནས་སེམས་འཕྲིན་གྱི།།
ལེགས་སྐྱེས་རྒྱ་སེ་དམར་པོའི་དོ་ཤལ་འདི།།
གྲོགས་ཁྱེད་དྲན་པའི་རྟེན་གྱི་ཚུལ་དུ་ཕུལ།།
