དཔེ་བལྟས་བྱས་ནས་ནང་དུ་བསྡད་པའི་ཉིན་མོ།

ཞོགས་པ་ལང་ནས་གཟུགས་པོའི་འཕྲོད་བསྟེན་གྱི་ཆེད་དུ་རྐང་འགྲོས་ཐུང་ཙམ་བྱས་ནང་དུ་འབྱོར་ཞིང་ཞོགས་ཟས་ཚར་མ་ཐག་ཁ་འདོན་རྣམས་ཚར་བར་བྱས། ལོ་གཉིས་ཡར་སྔོན་ནས་ངོ་ཤེས་སུ་གྱུར་པའི་འགུ་ལོག་སྔགས་པ་མཐར་ཕྱིན་རིན་པོ་ཆེ་ནས་གདུང་སྲས་ཕྲིན་ལས་ནོར་བུ་རིན་པོ་ཆེའི་གསུང་འབུམ་པོད་གསུམ་རིན་མེད་གནང་བྱུང་བས་དེ་རིང་ངོས་ཀྱི་ཉི་ར་ནང་དུ་འཕྲེད་འཕྱངས་དྲྭ་ཐག་ཐོག་ཏུ་འཕྲེད་ཉལ་ཉི་ལྡེའི་ཞོར་དུ་པོད་གཉིས་པ་དེར་དཔེ་མཇལ་ཞུས་པ་ཡིན། དེའི་ནང་དུ། 
ཚོགས་ཁང་པདྨའི་རྒྱུད་མང་། དེའི་དོན་འགྲེལ་ཉི་མ་གཞོན་ནུའི་འོད་ཟེར།
ཞེས་པ་དེར་ཞིབ་མཇལ་ཞུས་པས་མཛད་པ་པོ་ཁོང་ལ་མི་ཕྱེད་པའི་དད་པ་ཞིག་སྐྱེ་བྱུང་། གང་ཡིན་ཟེར་ན་དོན་འགྲེལ་འདི་ཡི་སྐབས་སུ། ཚིག་གིས་དོན་སྟོན་ཅིང་། དོན་ཉམས་ལེན་དང་སྦྱར་བ། དཔྱད་འོས་ཀྱི་རྒྱབ་རྟེན་གྱི་ལུང་ཁུང་བཙན་ཅིང་། ལུང་དོན་གནད་ཐོག་ཏུ་ཁེལ་བ་སོགས་གང་ནས་བལྟས་ཀྱང་ཁོང་ནི་མཁས་གྲུབ་གཉིས་ལྡན་གྱི་དམ་པའི་སྐྱེ་བུ་ཁྱད་པར་བ་ཞིག་ཡིན་པ་སུས་ཀྱང་འགྲེལ་བཤད་མ་དགོས་པར་བསྟན་བཅོས་འདིས་རྟོགས་ཐུབ་བྱུང་། 
སེམས་སྐྱོ་དགོས་པ་ཞིག་ལ་ཉིས་སྟོང་གསུམ་ལོར་ང་བལ་ཡུལ་ནས་དགོན་པ་ཞིག་ནང་དཔེ་ཁྲིད་བྱེད་བཞིན་པའི་སྐབས་སུ་མཆོད་རྟེན་བྱ་རུང་ཁ་ཤོར་གྱི་ཉེ་འཁྲིས་སུ་ཡོད་པའི་བདུད་འཇོམས་དགོན་པ་ཞིག་ནང་ཆོས་མཇལ་ལ་སོང་བའི་སྐབས་སུ་བགྲེས་ཉམས་ཅན་གྱི་སྔགས་པ་ཞིག་ཨ་ནེ་གྲྭ་པ་འགའ་ནས་གཡས་སྐྱོར་གཡོན་སྐྱོར་བྱེད་བཞིན་པ་མཐོང་བ་དེ་དེ་རིང་བཀླག་མ་ཐག་པའི་བསྟན་བཅོས་མཇད་པ་པོ་དེ་ཡིན་པ་ཤེས་སོང་། སྐབས་དེ་དུས་རྒྱ་གར་བལ་ཡུལ་བླ་མ་འགའ་ཡིས་ངོས་ཀྱི་དག་སྣང་སྣ་བོ་ཆེའི་ཐོག་ཏུ་ཚུལ་མིན་རྩིང་སྤྱོད་ཁུ་ཚུར་ཞིག་བཞུས་མ་ཐག་པ་ཡིན་སྟབས་ཁོང་ཡང་དམ་པ་དམན་པའི་གྲངས་སུ་འཕངས་ནས་དད་པ་འཇོག་མ་ཤེས། 
སྤྱིར་གཏངས་བདུད་འཇོམས་གཏེར་གསར་འདི་ནི་ངས་གོ་ཚུལ་ཞིག་ལ་མཆོག་གླིང་གཏེར་གསར་གྱི་འཕྲོ་ཅན་རེད་ཅེས་པ་ཞིག་རྣ་ལམ་དུ་འཇག་འདུག་སྟབས་ད་ལྟ་ཞིབ་མཇལ་བྱེད་དུས་ཕལ་ཆེར་མཆོག་གླིང་གཏེར་གསར་གྱི་གསུང་སྒྲོས་ཀྱི་ཚིག་རྣམས་གཅིག་པ་གཅིག་རྐྱང་རེད་འདུག 
དེ་རིང་གི་ཉིན་ཐོ་མདོར་བསྡུས་དེ་གཏངས་ནས་ཉལ་སར་སོང་ནས་གཉིད་དུ་ཡུར། 

སུམ་བཅུའི་དུས་དྲན་ཐེངས་མ་ང་བཅུ་ང་དྲུག་པ།

ཉིན་མོ་འདི་ནི་བོད་དགྲ་ལག་ཏུ་ཤོར་ནས་མི་ལོ་ལྔ་བཅུ་ང་ལྔ་པ་དེ་ཡིན། བོད་པ་རྣམས་ཀྱིས་སུམ་བཅུ་དུས་དྲན་ཞེས་འབོད་སྲོལ་ཡོད། དེ་ནི་༡༩༥༩ ལོའི་སྤྱི་ཟླ་གསུམ་པའི་ཚེས་བཅུ་ཉིན་མོ་ལྷ་ས་ནས་བོད་རིགས་རྣམས་ཀྱིས་རྒྱ་ནག་གཞུང་གི་བོད་ཟ་སེམས་ཀྱི་གཡོ་སྒྱུས་སྲིད་ཇུས་ངན་པ་དེར་ངོ་རྒོལ་བྱས་པའི་ཉིན་མོ་དེ་རེད། ༧གོང་ས་སྐྱབས་མགོན་ཆེན་པོ་མཆོག་གཙོས་བོད་རིགས་འབུམ་གཅིག་ལྷག་སྔ་ཕྱིར་རྒྱ་གར་ལ་སྐྱབས་བཅོལ་དུ་སླེབས་ནས་ད་བར་ཕྱི་སྡོད་སྐྱབས་བཅོལ་བོད་པ་རྣམས་ཀྱིས་དུས་དྲན་འདི་སྲུང་གཙི་བྱས་ནས་ད་ལོར་མི་ལོ་ལྔ་བཅུ་ང་དྲུག་ཏག་ཏག་སོང་ཡོད། 

གང་ལྟར་ཀྱང་དེ་རིང་གི་ཉིན་མོ་འདི་ནི། 

གཅེས་པའི་ཕ་ས་དགྲ་བོས་འཕྲོག་ནས་མི་འདོད་ཡུལ་གྱར་དུ་བུད་པའི་ཉིན་མོ། 

ཉེས་མེད་སྤུན་ཟླ་དམར་བསད་གཏང་ནས་ཁེར་རྐྱང་དྭ་ཕྲུག་ཏུ་ལུས་པའི་ཉིན་མོ། 

རིན་བྲལ་དགོན་སྡེ་གཏོར་བཤིགས་གཏང་ནས་བླ་སྤྲུལ་འཛིན་བཟུང་བྱས་པའི་ཉིན་མོ། 

སོགས་གང་ལྟར་བོད་མི་རྣམས་ལ་ལོ་རྒྱུས་ཀྱི་ཐོག་ནས་བྱུང་མ་མྱོང་བའི་གོད་ཆག་བཀྲ་མ་ཤིས་པ་དང་དོན་མ་འགྲུབ་པ་བོད་མདོ་དབུས་ཁམས་གསུམ་ལ་མི་འདོད་པའི་ལྟས་ངན་བཅོ་བརྒྱད་བྱུང་ནས་སྐྱིད་མིན་སྡུག་གི་ཉི་མ་ནག་པོ་ཤར་བའི་ཉིན་མོ་ཞིག་ཀྱང་ཡིན། 

འོན་ཀྱང་བོད་པའི་ཁ་རྒྱུན་དུ་ལྟས་ངན་གཡང་དུ་ལེན། རྐྱེན་ངན་གྲོགས་སུ་ཤར་ཞེས་པའི་སེམས་གསོའི་ཤ་ཚ་མོའི་ཚིག་དུམ་དེ་སྙིང་ལ་བཅངས་ནས་རེ་བ་བཟང་ས་དང་། གྲ་སྒྲིག་སྡུག་སའི་དཔེ་ལྟར་ཕྱི་སྡོད་སྐྱབས་བཅོལ་བོད་རིགས་རྣམས་ཀྱིས་༧གོང་ས་སྐྱབས་མགོན་ཆེན་པོའི་ཐུགས་རྗེའི་བཀའ་དྲིན་ཉག་གཅིག་ལ་བསྟེན་ནས་མཆོད་རྟེན་མགོ་འཇུག་ལྡོག་ཀྱང་བང་རིམ་རྩིས་བགྲང་གི་དཔེ་ལྟར་བོད་གཞི་བྱེས་མཉམ་འཛོམས་མ་བྱུང་ཡང་ད་ཆ་བོད་འདི་ཛམྦུའི་གླིང་གི་སྐྱབས་བཅོལ་བའི་ནང་ནས་ཆ་རྐྱེན་དང་གནས་ཚད་མཐོ་ཤོས་ཞིག་ཏུ་སླེབས་ཡོད་པ་མ་ཟད་བོད་བརྒྱུད་ནང་བསྟན་འདི་གོ་ལའི་གཅེས་ནོར་ཞིག་ཏུ་ནང་པ་མ་ཡིན་པའི་ཚན་རིག་པའི་མཁས་དབང་རྣམས་ཀྱིས་ངོས་འཛིན་བྱེད་ཀྱི་ཡོད། དེ་རིང་གི་ཉིན་མོ་འདིར་ཕྱི་ལོགས་གཡར་པོའི་རྒྱལ་ཁབ་ནང་འཐོར་བསྡད་པའི་བོད་རིགས་རྣམས་ཀྱིས་རྒྱ་ནག་གཞུང་ཚབ་ཁང་དང་ཁྲོམ་ལམ་སོགས་སུ་ཁ་ངུ་སྐད་དང་སྦྲག། མིག་མཆི་མས་གང་། ལག་ཏུ་གངས་སེང་གི་དར་ཆ་ཅན་ལོ་རེ་བཞིན་ཇེ་མང་དུ་མཐོང་རྒྱུ་ཡོད། 

དེ་སྔོན་ས་གནས་འདིར་གཏན་བསྡོད་བྱེད་མཁན་བོད་པ་ང་ལས་མེད་ཀྱང་སྟབས་ལེགས་པ་ཞིག་ལ་ད་ལོར་བལ་ཡུལ་ནས་ཕེབས་པའི་བོད་པ་མི་ཚང་ཡ་རབ་ཞིག་ཉེ་ཆར་ངོ་ཤེས་བྱུང་། དེ་རིང་སྐད་འབོད་སྐབས་སུ་ཁོང་ཚོའི་ནང་མི་ལྔ་པོ་ཆ་ཚང་དང་མ་ཟད་ང་ཡི་ཆོས་ཚོགས་ཀྱི་དབྱིན་ཇི་སློབ་མ་རྣམས་གཙོས་མི་གྲངས་སུམ་བཅུ་མ་ཟིན་ཙམ་ཞིག་སྐད་འབོད་ལ་འབྱོར་འདུག ད་ལོ་དམིགས་བསལ་སེན་ཧྥེ་རན་སེའུ་སེ་ཀོའུ་ནས་ཆེད་དུ་ཕེབས་པའི་གློག་བརྙན་ལེན་མཁན་དང་ཨ་རིའི་གཞུང་གི་རླུང་འཕྲིན་ཁང་སོགས་གཅིག་ལྕོག་བུ་མོ་མར་ལོའུ་སླེབས་འདུག་སྟབས་ཆོས་ཚོགས་ཀྱི་དགེ་སློབ་ཡོངས་ནས་དགའ་བསུ་ཆེན་པོ་བྱས་སོང་། ང་འདིར་འབྱོར་ནས་མི་ལོ་ལྔ་ཡི་རིང་སུམ་བཅུ་དུས་དྲན་དང་རྒྱལ་བའི་འཁྲུངས་སྐར་སོགས་བོད་པའི་རྩ་ཆེའི་དུས་ཆེན་རྣམས་ཆད་མྱོང་མེད། དེ་ནི་ང་རང་ཉིད་བོད་མི་ཞིག་ཡིན་པའི་རྒྱུ་མཚན་གྱིས་གཡོལ་དུ་མེད་པ་ཕྲག་པའི་ཐོག་ཏུ་ཡོད་པའི་ལས་འགན་ཞིག་ཡིན་བསམ་གྱི་ཡོད། 
མི་མང་ནས་ལག་ཏུ་བོད་ཀྱི་རྒྱལ་དར་དང་། བོད་ལ་རང་དབང་དགོས་སོགས་ཞེས་པའི་འཕྲེད་དར་དང་སྦྱར་བྱང་འདྲ་མིན་ཁུར་ནས་ཆུ་ཚོད་གཉིས་ཙམ་གྱི་རིང་ཁྲོམ་སྐོར་བྱས། གཞུང་ལམ་ནང་ནས་བོད་པར་རྒྱབ་སྐྱོར་ཡོད་པའི་རྟགས་སུ་མགྲོན་པོ་རྣམས་ཀྱིས་རླངས་འཁོར་གྱི་ཉེན་བརྡ་ཙིར་ཙིར་གཏོང་མཁན་ནི་ཆད་མེད་རེད། 

ཁྱད་མཚར་བོ་ཞིག་ལ་ཨ་རིའི་སྐྱབས་བཅོལ་ཡིག་ཆ་ཞུས་སྐབས་སྟེས་དབང་གིས་བྱུང་བའི་ངོས་ཀྱི་སྐྱེ་སྐར་རྫུན་མ་དེ་ཡང་དེ་རིང་གི་ཉིན་མོ་འདིར་མཉམ་དུ་ཁེལ་ཡོད། སྐད་འབོད་གྲུབ་མ་ཐག་ཆུ་ཚོད་དྲུག་པའི་སྐབས་སུ་ཆོས་ཚོགས་སུ་སོང་བས་ཆོས་ཚོགས་ཀྱི་ལས་བྱེད་རྣམས་ནས་ངོས་ཀྱི་སྐྱེ་སྐར་གྱི་འོ་སྤྲིས་མཆོད་མེ་ཡང་ལས་རྒྱན་པ་གཤམས་ནས་དེང་དུས་ཀྱི་ལུགས་སྲོལ་ལྟར་ཡང་ལའི་མཆོད་མེ་དབུགས་ཐེངས་གཅིག་གིས་ཕུ་ཡིས་བདས་ཅིང་སྐྱེས་སྐར་ཤིས་ཚིག་མཉམ་གྱེར་བྱས་ནས་འཚོགས་ཁང་འུར་སྒྲ་དང་ཐལ་སྒྲས་ཁེང་སོང་། 

ངོས་ལ་ལྟོས་ན་སྐྱེས་སྐར་སྲུང་བརྩི་བྱེད་རྒྱུ་གལ་ཆེན་པོ་མིན་པ་མ་ཟད་བོད་ཀྱི་སྲོལ་རྒྱུན་ལུགས་སྲོལ་ལའང་ཆེར་མི་མཐུན་ཀྱང་དགེ་ཕྲུག་ཆོས་གྲོགས་ཕོ་མོ་རྣམས་ཀྱི་འདོད་པ་ལྟར་ཚོགས་ཁང་ཀུ་ཅོ་འུར་སྒྲས་བཀང་ནས་དགོང་མོ་ཆུ་ཚོད་བཅུ་གཅིག་མ་ཟིན་བར་དུ་བསྡད་པས་ཧ་ཅང་སྐྱིད་པོ་བྱུང་། 

མགོན་སྐྱབས་དཔུང་གཉེན་མེད་པ་གཞིས་ལུས་ཀྱི་སྤུན་ཟླ།། 

ལོ་ཟླའི་ཉིན་མཚན་སྦྲེལ་ཞིང་རེ་ཆེན་གྱི་འཕྲང་ནས།། 

སྡུག་གི་མུན་པའི་ཁྲོད་དུ་ངུ་སྒུག་རང་བྱས་དུས།། 

སེམས་ལ་སོས་མེད་རྨ་ཁ་གསར་པ་ཞིག་བཟོས་སོང་།། 

འགྱུར་མེད་སེམས་ཤུགས་ཡ་ཀིའི་རི་རྒྱལ་ལས་བརྟན་ཅིང་།། 

ལ་རྒྱའི་ཕུག་བསམ་མ་ཀིའི་རྒྱ་མཚོ་ལས་ཟབ་པ།། 

ཤ་རུས་གདུང་བརྒྱུད་གཅིག་པའི་གདོང་དམར་གྱི་བོད་པ།། 

ཆོལ་གསུམ་ཆིག་སྒྲིལ་གྱིས་དང་ཕ་ས་དེ་ཟིན་ཡོང་།། 

དགོས་པའི་ཕ་བསད་དགྲ་ལ་ཡ་ལན་ཞིག་མེད་པར།། 

མི་དགོས་ཕུ་ནུའི་ནང་ལ་མདུང་རྩེ་དེ་མ་བསྟེན།། 

རྒྱལ་བ་དོན་གྱི་བདག་པོའི་བཀའ་དགོངས་དེ་སྒྲུབས་དང་།། 

ཅི་བསམ་འགྲུབ་པ་རང་གི་ལག་མཐིལ་དུ་ཡོད་དོ།། 

དེ་རིང་ཉིན་ཐོ་དེ་གཏངས་ཞིང་ཉལ་སར་སོང་ནས་གན་སྐྱལ་དུ་བྲང་ཐོག་ཏུ་ལག་པ་བཞག་ནས་རང་གིས་རང་ལ་བསྟོད་ར་དང་ཡིད་སྨོན་བྱེད་བཞིན་དེ་རིང་ས་གནས་འདིར་བོད་མི་ཞིག་ཡོད་གོ་ཆོད་པ་ཞིག་བྱས་ཡོད་བསམ་དགའ་བཞིན་དུ་ཉལ་སར་སོང་སྐྱིད་ཉལ་བྱས་ནས་གཉིད་དུ་ཡུར།། 

ཁ་འདོན་བྱས་པའི་ཉིན་མོ།།

ཞོགས་ཟས་ཚར་མ་ཐག་ཁ་འདོན་རྣམས་གྲུབ་པར་བྱས། ནམ་རྒྱུན་འཆར་ཅན་ལྟར་རྒྱ་མཚོའི་འགྲམ་དུ་ལུས་བདེའི་གཟུགས་པོའི་འཕྲོད་བསྟེན་ཆེད་དུ་ཆུ་ཚོད་གཅིག་ལྷག་འགྲོ་གི་ཡོད། དེ་རིང་ནི་གནམ་གཤིས་དེ་ཙམ་མི་ལེགས་པས་ནང་དུ་བསྡད་ནས་སྔ་ལོར་རྒྱ་གར་ལ་སོང་བའི་སྐབས་སུ་བོད་སྒར་བསམ་ཡས་གླིང་ནས་ཉོས་པའི་དཔེ་ཆའི་ཁྲོད། གླིང་སྤྲུལ་པདྨ་ལུང་རྟོགས་རྒྱ་མཚོའི་བསྒྲིགས་པའི་ཉེ་བརྒྱུད་གཅོད་ཀྱི་ཁྲི་ཡིག་གསལ་བར་བཀོད་པ་ལེགས་བཤད་བདུད་རྩིའི་རོལ་མཚོ་ཞེས་པའི་པོད་གཉིས་ཅན་དེ་ཁ་ཕྱེས་ནས་ཞིབ་མཇལ་བྱས་པས་སེམས་ལ་ཕན་པོ་བྱུང་། དེབ་འདིའི་ནང་དུ་གཅོད་ཁྲིད་གཅིག་པུ་མ་ཡིན་པར་ཐུན་མོང་ལམ་སྦྱང་སྐྱེས་བུ་གསུམ་གྱི་ལམ་རིམ་རྣམས་ཕལ་སྐད་གོ་སླའི་ཚུལ་དུ་གསལ་བོར་བཀོད་འདུག ནམ་རྒྱུན་ནང་ཆོས་དང་ལྷག་པར་བློ་སྦྱོང་སྐོར་དཔེ་ཀློག་བགྱིས་པའི་སྐབས་སུ་སྟུན་པ་བཞིའི་ནང་གསེས་ཚིག་ལ་མི་སྟུན་དོན་ལ་སྟུན་གསུངས་པ་ལྟར་ཚིག་དག་མིན་དང་སྡེབ་སྦྱོར་ཡག་མིན་ལ་བསམ་བློ་མི་གཏོངས་ནས་བརྗོད་བྱའི་དོན་ཉིད་རང་གི་ཉམས་སུ་ལེན་བྱའི་གདམས་ངག་ཏུ་གོ་ནས་བཀླག་པ་ཡིན་ན་ནང་ཆོས་ཀྱི་དེབ་བཀླག་པའི་དོན་གོ་ཆོད་པ་རེད། 

དེ་མ་ཡིན་པར་དང་པོ་ཉིད་ནས་དེབ་ཉིད་ཞིབ་འཇུག་བྱེད་མཁན་འདྲ་བོར་བྱས། བརྗོད་བྱ་དང་རྗོད་བྱེད་གང་གི་ཆ་ནས་ཀྱང་ལེགས་པའི་ཆ་རྣམས་གང་ཡང་མ་མཐོང་ནས་སྐྱོན་གྱི་ཆ་གང་ཡོད་པ་དེ་ལ་མིག་ཅེར་ཅེར། རིག་པ་གྲུང་གྲུང་བྱེད་ནས་སྐྱོན་འདོགས་རྒྱུ་ཅི་  
རྙེད་བྱས་བསྡད་ན་ཁྱེད་རང་གི་བཀླག་རྒྱུའི་ནང་ཆོས་དེབ་གང་འདྲའི་རྩ་ཆེན་པོ་ཡིན་ཀྱང་སེམས་ལ་ཕན་རྒྱུ་ཕར་ཞོགས་རང་རྒྱུད་ལ་ང་རྒྱལ་དང་འགྲན་སེམས་སོགས་བསྐྱེད་བྱས་སུ་སོང་ན་ལྷ་བདུད་དུ་བབས་པ་དང་སྨན་དུག་ཏུ་སོང་བ་ཡིན་པས་དེ་འདྲར་མ་སོང་བར་རབ་ཏུ་བྱུང་ན་དེབ་བཀླག་ཚར་དུས་སེམས་ལ་སྔར་མེད་ཀྱི་ཐོས་བྱུང་གི་ཤེས་རབ་ན་འཕར་ནས་དེབ་ནས་གསུངས་པའི་དོན་ཚང་མར་རང་རྒྱུད་ཉོན་མོངས་འདུལ་བྱེད་ཐབ་ལམ་ཏུ་གོ་ནས་དེབ་ཉིད་སློབ་དཔོན་ཁྲོ་མེད་དམ་པའི་འདུ་ཤེས་ཀྱིས་འཇོག་ཐུབ་པ་ཞིག་དགོས། ཐ་ནའང་དེབ་ནས་གསུངས་པའི་སྐབས་སུ་བྱང་ཆུབ་ཀྱི་སེམས་དང་། འཆི་བ་མི་རྟག་ལས་འབྲས་སོགས་ལ་རང་བློའི་ངེས་པ་ཇེ་ཆེར་འདྲོངས་ནས་མེ་འབར་བ་ལ་མར་ཁུས་གསོས་བཏབས་པ་ནང་བཞིན་རང་རྒྱུད་ཀྱི་དཀར་ཆོས་ཡོན་ཏན་རྣམས་འཕེལ་དུ་འཕེལ་ཞིང་། མ་མཐའ་ཡང་དེབ་བཀླག་ཚར་བའི་སྐབས་སུ་ངེས་འབྱུང་དང་བྱམས་སེམས་སོགས་ཀྱི་རྐྱེན་སེམས་ལ་ཚ་ཟིང་ངེ་བ་ཞིག་བྱུང་ན་ནང་ཆོས་ཀྱི་དེབ་བཀླག་པའི་དོན་གོ་ཆོད་པ་ཡིན། 

ང་ནི་དེ་རིང་ཧ་ཅང་སྐྱིད་པོ་བྱུང་ཉིན་མ་རེ་རེ་ལ་སྡིག་ལས་ལ་འཛེམས་ཅི་ཐུབ་ཀྱིས་དམ་པའི་ཆོས་དང་མ་འགལ་བར་བེམ་གོག་འདི་དུར་སར་བསྐྱལ་ཐུབ་ན་བན་རྒན་ང་ཡི་བསམ་པ་ཡོངས་སུ་ཁེངས་པ་ཡིན།། 

ཡུན་ཐུང་མི་ཚེ་ནམ་མཁའི་འཇའ་ཚོན་འདྲ།། 

འཁོར་བའི་རང་བཞིན་སྨྱོན་པའི་ཟློས་གར་འདྲ།། 

བདེ་སྡུག་སྣ་ཚོགས་མདང་སུམ་རྨི་ལམ་འདྲ།། 

གང་ལ་དཔྱད་ཀྱང་སྙིང་པོ་མེད་པ་འདྲ།། 

དལ་འབྱོར་དོན་ཆེན་རྙེད་པའི་ལག་རྗེས་སུ།། 

ཚེ་འདིར་སངས་རྒྱས་འཐོབ་པར་མ་བྱུང་ཡང་། 

དོན་མེད་སྡིག་པའི་གཡོག་ཏུ་མ་སོང་བར།། 

སྐྱིད་པའི་མི་ཚེ་ཆོས་ཀྱིས་འདའ་བར་ཤོག།

ཨེ་ཤ་ཡའི་རླུང་འཕྲིན་ཁང་དུ་སྐད་ཆ་བྱས་པའི་ཉིན་མོ།།

ཉིན་ཤས་གོང་ནས་ལོ་གསར་མཛད་སྒོ་དང་འཆར་ཅན་ལྟར་དུ་ཡོད་པའི་ཆོས་ཀྱི་བྱེད་སྒོ་ཁག་གཅིག་མཇུག་གཉིས་མཐུད་ཀྱིས་ཧ་ཅང་བྲེལ་ཟིང་དབང་གིས་ཉིན་ཐོ་བཏབས་ཐུབ་མ་སོང་། དེ་རིང་ནས་བཟུང་སྟེ་ལས་བྲེལ་གྱིས་ཕལ་ཆེར་ངོས་ཀྱི་ཉིན་ཐོ་དེ་ཡང་བདུན་ཐོར་མི་འགྱུར་བའི་ངེས་པ་གཏན་ནས་མི་འདུག 

ཞོགས་འདོན་རྣམས་ཚར་བར་བྱས་ཤིང་ཐབ་ཚང་ནང་དུ་ཞོགས་ཟས་ལ་རོལ་བཞིན་པའི་སྐབས་སུ་ཟུར་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་རྒྱལ་ས་ཝ་ཤིང་ཊོན་ནས་ཨེ་ཤ་ཡའི་རང་དབང་རླུང་འཕྲིན་ཁང་གི་ཁམས་སྐད་མདོ་འཛིན་པ་རྒན་ཚེ་དབང་ནོར་བུ་རེད། 

ཁོང་ནས་གསུངས་ན་ད་ལྟ་རང་སྐར་མ་བརྒྱད་དུས་བཀག་ཅན་གྱི་སྐད་ཆ་ཞིག་བཤད་རོགས་ཟེར། བཤད་བྱ་ནི། ཁམས་སོགས་ནས་ལོ་གསར་སྲུང་བརྩི་བྱེད་སྟངས་དང་ད་ལོར་༧་གོང་ས་སྐྱབས་མགོན་ཆེན་པོ་མཆོག་དགུང་གྲངས་བརྒྱད་བཅུའི་གྱ་སྟོན་སྐབས་སུ་བོད་རིགས་ཡོངས་ནས་གང་འདྲ་བྱེད་དགོས་མིན། གྱ་སྟོན་ངོ་མ་དེ་ག་རེ་ཡིན་མིན་སོགས་འདྲི་བ་ཁ་ཤས་ཞིག་རེད་འདུག 
ངས་ཀྱང་དངས་ལེན་བྱས་ནས་རང་གི་བསམ་ཚུལ་དང་མཐུན་པར་གང་ཤེས་བཤད་ཁུལ་བྱས་པས་ཁོ་རང་ནི་འདོད་བློ་ཡོངས་སུ་ཁེངས་སོང་།
གསན་འདོད་ཡོད་ན་དྲྭ་ཚིག་འདིར་བཀོད་ཡོད། 

བཙན་བྱོལ་བོད་གཞུང་གི་ལས་བྱེད་རྣམ་པ་དང་མ་ཟད་ཨ་རིར་ཡོད་པའི་བོད་སྐད་རླུང་འཕྲིན་ཁང་འདི་རྣམས་ལ་གང་ལས་རྒྱུའི་ལས་ཀ་དེ་ཉིད་ལ་ཟབ་སྦྱོང་གཏན་ནས་མེད་པའི་སྐྱོན་ཆ་ཆེན་པོ་ཞིག་མཐོང་གི་འདུག ལྷག་པར་དུ་རླུང་འཕྲིན་བཤད་མཁན་ཞིག་ལ་ཚང་དགོས་པ་ནི་མེད་དུ་མི་རུང་བ་སྐད་སྒྲ་དག་ལ་སྒྲོས་གཙང་བ་ཞིག་ཐ་ནའང་དགོས་པས་དེའང་ཧ་ཅང་དཀོན་པོ་རེད་འདུག 

རླུང་འཕྲིན་ཁང་གི་ལས་བྱེད་རྣམས་ལ་ཞུ་བ་འདི་འདྲ་འཐེན་ན་བསམ།། 

ཁྱོད་ལ་བོད་ཆས་གྱོན་པའི་ཐོབ་ཐང་ཨ་རིའི་གཞུང་ནས་འཕྲོག་སོང་ངམ།། 

དགོས་པའི་ཚིག་ལ་སྐྱར་ཟློས་མེད་ཅིང་མི་དགོས་ཚིག་ལྷག་ཟློས་སྐྱོན་མང་།། 

ཡུལ་སྐད་ཡིག་སྐད་ར་མ་ལུག་གིས་རྣ་བའི་དབང་པོར་སུན་པོ་བཟོས།། 

ཨ་ས་ཀུ་རེ་ཡིན་ནོ་མཚུངས་མེད་ལྷག་བསམ་དུང་ཟླ་དཀར་པོའི་མཆེད་།། 

ཁྱེད་ཀྱི་ངལ་བའི་བསིལ་ཟེར་སྟོང་གིས་ན་གཞོན་འབུམ་གྱི་འདབ་གྲོལ་བཞད།། 

ཤེས་ཡོན་དམན་ཀྱང་ལྷག་བསམ་དཀར་བའི་མེས་པོའི་རྒན་རབ་དམ་པ་རྣམས།། 

གངས་ལྗོངས་ལུགས་གཉིས་དགེ་བཅུའི་སྲོག་གི་ཕ་མཁར་དུང་གི་ཀ་བ་ཡིན།། 

ཨ་ཕྱི་རྒན་མོ་ནད་ཀྱིས་མནར་བའི་ཉིན་མོ།

དེང་སང་འཆར་ཅན་ལྟར་དུ་ཡོད་པའི་བདུན་ཕྲག་རེའི་ནང་གཟའ་ཟླ་བའི་བདེ་ཆེན་ཞིང་སྒྲུབ་དང་གཟའ་སྤེན་པ་དང་གཟའ་ལྷག་པར་སྒོམ་བྱེད་པ་སོགས་ཉིན་གསུམ་རེའི་དགེ་སྦྱོར་ཆོས་ཚོགས་ཀྱི་མཛད་རིམ་དང་། བར་གསེང་སྐབས་སུ་མི་ལ་ཐུག་འཕྲད། སྒེར་གྱི་ཁ་འདོན་སོགས་ཀྱིས་བྲེལ་ཟིང་ཧ་ཅང་ཆེ་བ་མ་ཟད་ཆོས་ཚོགས་གསར་པ་ཞིག་སྒོ་འབྱེད་བྱེད་རྒྱུའི་གྲ་སྒྲིག་སོགས་ལས་ཀ་རྣམས་དུས་ཐོག་གཅིག་ཏུ་ཁེལ་ནས་བྲེལ་ཟིང་ཧ་ཅང་ཆེ་བའི་སྐབས་ཡིན་པས་སྐབས་རེར་ཉིན་རེར་ཟ་མ་དུས་གཉིས་རེ་ལས་རག་གི་མི་འདུག
ང་ཡི་སྐྱེས་མའི་དྲིན་ཆེན་ཨ་མ་ནི་ང་བཙས་ནས་ཟླ་གསུམ་ཙམ་གོང་རིག་གནས་གསར་རྗེའི་ལས་འགུལ་ཆེན་མོའི་སྐབས་སུ་ཁ་ཟས་མེད། རྒྱབ་ཆོས་མེད་ཀྱིས་བུ་ཆུང་ང་དང་མི་འདོད་བཞིན་དུ་གསོན་བྲལ་བྱེད་དགོས་བྱུང་བ་རེད། གཏམ་དཔེར། ཕ་མེད་ན་ཨ་ཁུས་ཕ་ཚབ། མ་མེད་ན་ཨ་ཕྱིས་མ་ཚབ་ཞེས་པའི་གནའ་གཏམ་ལྟར་ཨ་ཕྱི་མ་རྒན་མོ་བཞི་ཐམས་པ་བོད་ལ་ཡོད། ཁར་ནུབ་ཨ་ཕྱི་འབྲིང་བའི་བུ་མོ་ང་ཡི་སྲིང་མོར་ཁ་པར་ཞིག་གཏང་བས་ངུ་སྐད་དམའ་བོས་འདི་ལྟར་ཟེར།

ཨ་སྦོ་ (ཨ་སྦོ་ཞེས་པ་ནི་ནང་ཆེན་པའི་ཡུལ་སྐད་ལ་གཅེན་པོའམ་ཇོ་ཇོ་ལ་གོ་དགོས། མཆན།) ནས་ཁ་པར་གཞི་ནས་གཏང་བྱུང་ང་ཚོའི་ཁྱེད་རང་ཁ་པར་ག་དུས་གཏང་ཡོང་ན་བསམ་ནས་སྒུག་བསྡད་ཡོད། ད་ལྟ་ང་ནང་ཆེན་རྫོང་མི་དམངས་སྨན་ཁང་ནང་དུ་ཨ་མ་དང་མཉམ་དུ་ཡོད། ཨ་མ་ནད་ཚབ་ལྗི་མོ་རེད་འདུག ངས་ཁ་པར་ཨ་མ་ལ་སྤྲད་ཀྱི་ཡིན་ཨ་མ་དང་མཉམ་དུ་སྐད་ཆ་ཤོད་ཟེར།
ངས་ཨ་ཕྱི་ཨ་ཕྱི་ཞེས་ཐེངས་འགའ་བོས་ཀྱང་གྲེ་སྐད་སོབ་སོབ་ཞིག་ལས་གོ་གི་མི་འདུག སྲིང་མོ་ནས་ངེད་གཉིས་བར་དུ་སྐད་བསྒྱུར་བྱས་སོང་བས་ཨ་ཕྱི་རྒན་མོ་ནས་ང་ཡིན་པ་ཧ་གོ་བའི་བརྡ་བསྟེན་གྱི་འདུག་ཟེར།
སྲིང་མོ་ནས་བཤད་ན་ཨ་མ་ཁྲག་ཤེད་ཧ་ཅང་མཐོ་དྲག་ནས་རྐང་པ་གཡས་པའི་ངར་གདོང་གི་རྩ་རྣམས་ཁྲག་གིས་འགགས་ནས་རྐང་པའི་ཤ་རྣམས་དམར་ནག་ཏུ་གྱུར་ཅིང་ཧ་ཅང་ཟུག་གཟེར་ཆེན་པོ་འདུག སྨན་པས་ཟེར་ན་རྐང་པ་གཡས་པ་མ་བཅད་ན་གསོན་པོའི་རེ་བ་མི་འདུག་ཟེར། དོ་ནུབ་རྐང་པ་བཅད་རྒྱུ་ཐག་བཅད་ཚར་འདུག ང་ནི་ལོ་གྲངས་བརྒྱད་བཅུ་གྱ་བརྒྱད་ཅན་གྱི་མ་རྒན་ཞིག་གི་ཚེ་ལྷག་ལ་བསམ་ནས་རྐང་པ་བཅད་རྒྱུར་མོས་མཐུན་དེ་ཙམ་མ་བྱུང་ཡང་དོ་བདག་ནད་པ་རང་ཉིད་དང་། མོ་མ་སྨན་པ་སོགས་མང་དག་ཞིག་ནས་ཐག་བཅད་ཚར་འདུག
ངས་ནི་ཁ་བདེ་བོ་ཙམ་མ་ཡིན་པར་ཨ་ཕྱི་རྒན་མོ་རྐང་ཆད་མར་ནད་གཡོགས་དང་ལྟ་སྐྱོང་སོགས་ཡག་པོ་བྱེད་དགོས་རབས་ལུང་པ་གང་ཙམ་བཤད།
ལོ་བཞིའི་ཡར་སྔོན་ངོས་ཀྱི་ཨ་ཕྱི་འདས་མོ་མེ་ཏོག་ལ་འཕྲོད་བསྟེན་གྱི་ཆེད་དུ་ཕན་ཕྱིར་གྱིས་ཤ་ཟ་རྒྱུ་ཉུང་དུ་ཐོངས། ཇ་གར་པོ་མ་འཐུང་། མར་དང་ཚིལ་སོགས་འཛེམས་ཞེས་བཤད་དུས་ཚུར་འདི་འདྲ་ལབ་བྱུང་། དེང་སང་ཕྲུག་གུ་རྣམས་ཀྱི་སྐུ་དྲིན་གྱིས་ཚེ་སྨད་ལ་ཤ་དང་མར་སོགས་བཟའ་རྒྱུ་རྙེད་ཙམ་བྱུང་དུས་ཤི་ནའང་དེ་རྣམས་སྤངས་ཐུབ་ས་མ་རེད་ཟེར། བོད་ཀྱི་རྒན་གོག་རྣམས་ཤ་དང་མར་བཟའ་རྒྱུ་དགའ་བོ་ཡོད་པ་ཕར་ཞོག་ཆེས་སྡུག་ཤོས་ཞིག་ལ་རྒྱ་ནག་ནས་བཟོས་པའི་ཇ་སླད་ཅན་བག་ཆུང་ངམ་སྙུག་ཇ་དེ་ཉོ་ནས་ཇ་ཁུ་ནག་པོ་ཉིན་ལྟར་གླང་རྒན་གྱིས་ཚྭ་ཆུ་འཐུང་བ་ནང་བཞིན་ཧུབ་འཐུང་བྱེད་ཀྱི་ཡོད། དེར་བསྟེན་བོད་ཀྱི་རྒན་གོག་མང་པོ་ཞིག་ཁྲག་མགོ་མཐོ་དྲག་ནས་ཤི་རྐྱེན་དུ་འགྲོ་གི་ཡོད།

དམར་པོའི་འཐོར་རླུང་ནང་གི་རྣམ་ཤེས།།
མ་བུ་གསོན་བྲལ་བྱེའུ་ཆུང་དྭ་ཕྲུག།
ངེས་མེད་ཕྱོགས་སུ་འཕུར་ལྡིང་བྱེད་དུས།།
སྡུག་གི་མུན་པ་སང་དུས་མི་འདུག།

ཡ་ཀི་མཐོང་གི་བྱ་རྒྱལ་རྒོད་པོ།།
མགྱོགས་པོ་གཤོག་རྩལ་ང་ལ་གཡོར་དང་།།
ཐག་རིང་རྒྱང་ལ་མི་འགྲོ་ང་ཡི།།
དྲིན་ཅན་ཨ་མ་བཙལ་ནས་སླེབས་ཡོང་།

ཨ་རིའི་རླུང་འཕྲིན་ཁང་ལ་ཁ་བརྡ་བྱས་པའི་ཉིན་མོ།

རྒྱུན་འདོན་རྣམས་གྲུབ་མ་ཐག་ཞོགས་ཟས་མདོར་བསྡུས་ཞིག་ལ་རོལ་བཞིན་པའི་སྐབས་སུ་ཟུར་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཨ་རིའི་རླུང་འཕྲིན་ཁང་ནང་ཆོས་ཀྱི་སྡེ་ཚན་མདོ་འཛིན་པ་ཨ་མ་ཀུན་བཟང་སྒྲོལ་མ་རེད་འདུག དེ་ནི་ཉེ་སྔོན་དུས་ཆད་བྱས་པ་ནང་བཞིན་རླུང་འཕྲིན་ཁང་དུ་བར་དོ་དྲུག་གི་ངོ་སྤྲོད་བྱེད་རྒྱུའི་ལས་ཆར་ཡོད་པ་དེའི་སྐོར་རེད་འདུག་ཨ་རིའི་རླུང་འཕྲིན་ཁང་འདིའི་ནང་དུ་ནང་ཆོས་ངོ་སྤྲོད་དང་། བདེ་བ་ཅན་དུ་སྐྱེ་བའི་རྒྱུ་བཞིའི་འགྲེལ་བཤད་སོགས་བྱས་ནས་ད་རེས་འདི་ཐེངས་མ་བཞི་པ་དེ་ཡིན། ལར་ནི་བཙན་བྱོལ་བོད་པའི་སྤྱི་ཚོགས་མ་ཡན་ལག་དང་བཅས་ས་གནས་གང་དུ་ཡོད་ཀྱང་ལས་བྱེད་རྣམས་ལ་ཆེད་ལས་པའི་སློབ་སྦྱོང་མཐར་ཕྱིན་ནས་ལས་ཀ་བྱེད་མཁན་ནི་ཉིན་མོའི་སྐར་མ་ལྟར་དུ་རེད་འདུག དེ་ལ་རྒྱུ་མཚན་གཉིས་འདུག གཅིག་ནི་ཆེད་ལས་པའི་སློབ་སྦྱོང་བྱེད་མཁན་དཀོན་པ་དང་། གལ་སྲིད་ཆེད་ལས་པ་རེ་ཟུང་ཡོད་ཀྱང་གླ་ཕོག་གང་ཆེར་བལྟ་ནས་རྒྱལ་ཁབ་གཞན་ཞིག་ནང་དུ་ལས་ཀ་དོན་དུ་གཉེར་བ་ལས་རང་གཞུང་རྐུབ་སྟེག་གས་ཆགས་སུ་སོང་བ་འདིའི་སྟེང་འདུག་མི་ཐུབ་པ་དེ་རེད།

དེ་རིང་གི་ནང་ཆོས་མདོ་འཛིན་པ་ཨ་མ་ཀུན་བཟང་དབང་མོ་ལའང་སྤྱིར་བོད་པའི་བུད་མེད་དཀྱུས་མའི་ཤེས་ཡོན་ལས་ནང་ཆོས་ལ་ཟླ་གཅིག་རིང་སློབ་སྦྱོང་བྱེད་མྱོང་མེད་པ་ཞིག་ཡིན་པ་ནི་སྐད་ཆ་དང་པོའི་སྐབས་སུ་ནས་ཤེས་བྱུང་། དྲི་མཁན་མེད་ན་བཤད་མཁན་ཁྱི་དང་འདྲ་ཞེས་པའི་དཔེ་ལྟར་དུ་དང་པོ་འདྲི་བ་འདོན་མཁན་ནས་ཡག་པོ་མ་བྱུང་ན་ལན་སྟེར་མཁན་གྱི་གོ་རིམ་འཁྲུགས་པ་དང་། གྲ་སྒྲིག་ནོར་བ་སོགས་དྲིས་ལན་རྣག་ཐོག་རྩ་ཁེལ་མི་ཡོང་བ་ནི་ཆོས་ཉིད་ཡིན། འོན་ཀྱང་ལྷག་བསམ་ཅན་གྱི་ཨ་མ་ཀུན་བཟང་དབང་མོའི་འདོད་པ་ལྟར་ངེད་གཉིས་ནས་བར་དོ་དྲུག་སྐོར་འགྲེལ་བཤད་སྐར་མ་སུམ་བཅུ་ཙམ་གྱི་རིང་བྱས་ནས་མོ་རང་མངོན་འདོད་ཡོངས་སུ་བཀང་། 
གསན་འདོད་ཡོད་ན་དྲྭ་ཚིག་འདིར་བཀོད་ཡོད། 
ལེའུ་ཚན་དང་པོ། 
ལེའུ་ཚན་གཉིས་པ།

རླུང་རྟ་དར་བའི་ཉིན་མོ།

དེ་རིང་གི་ཉིན་མོ་འདི་ནི་བསམ་དོན་ལྷུན་འགྲུབ་ཀྱི་ཉིན་མོ་ཡིན་ཞེས་བཤད་ཀྱང་མི་ཆོག་རྒྱུ་གང་ཡང་མེད། 

༢༠༡༠་ནས་བཟུང་ད་བར་ཨ་རིའི་ལུང་པ་འདིའི་ནང་དུ་གང་སར་ཁྱི་སྡོམ་བཞིན་འཁྱམས་ཉུལ་བྱས་ནས་ཕལ་ཆེར་མི་ལོ་ལྔ་ཙམ་འགྲོ་སོང་། ད་ལྟ་ང་འདུག་སའི་ས་གནས་འདིར་གནམ་གཤིས་དང་ཁོར་ཡུག་སོགས་ལེགས་པའི་ཆ་མང་པོར་བསམ་ནས་ར་རྒན་གད་བཅར་གྱི་ཚུལ་དུ་ཨུ་ཚུག་རྒྱབ་ནས་བསྡད། ལར་ས་གནས་འདིར་འབྱོར་ལྡན་སྐད་གྲགས་ཅན་རྣམས་ལྷོད་དལ་བྱེད་ནས་འདུག་ས་ཞིག་ལས་ང་འདྲ་བ་སྔུན་ནས་བསུ་མ་དང་། རྒྱབ་ནས་སྐྱོར་མཁན་གང་ཡང་མེད་པའི་ལས་མེད་གྲྭ་རྐྱང་དཀྱུས་མ་ཞིག་འདུག་ས་གཏན་ནས་མ་རེད། ཡིན་ནའང་ཐུད་སྣུམ་པ་མར་གྱི་སྐུ་དྲིན་གྱི་དཔེ་ལྟར་ནང་ཆོས་རིག་གཞུང་ཟབ་མོ་འདིའི་ཐུགས་རྗེའི་སྐུ་དྲིན་གྱིས་གནས་གང་དུ་སོང་ཡང་ཕ་ཡུལ་དང་། གྲོགས་སུ་དང་འགྲོགས་ཀྱང་ཕུ་ནུ་ནང་བཞིན་ཀུན་གྱིས་དགའ་བོ་བྱེད་ཀྱི་འདུག། མ་ཟད་ངོས་ཀྱི་ཐོག་མཐའ་བར་གསུམ་དུ་འབྱོར་ལྡན་སྦྱིན་བདག་བཀའ་དྲིན་ཅན་རྡེའུ་ར་ནས་འདི་ལོར་ཁྱེད་རང་གི་དམིས་ཡུལ་གང་ཡིན་ཅེས་དྲིས་བྱུང་བས་ངས་ས་གནས་འདིར་ཆོས་ཚོགས་མ་ཆུང་བ་ཞིག་དགོས་ཞེས་བཤད། དེ་རིང་ངོས་ཀྱི་བཀྲ་ཤིས་པའི་བླ་གཟའི་ཉིན་མོ་དང་མ་ཟད་བོད་ཚེས་བཅོ་ལྔའི་ཉིན་མོ་འདིར་ཞོགས་པ་ཆུ་ཚོད་དགུ་པའི་སྐབས་སུ་རྗེའུ་མེར་ནས་སྒོ་རྡུང་སོང་། སྒོ་ཕྱེས་པའི་སྐབས་སུ་ལག་ཏུ་ཤོག་ཁུག་ཞིག་ཁྱེད་རང་གི་སྦྱིན་བདག་རྡེའུ་ར་ནས་གཏངས་བྱུང་ཟེར་ནས་སྤྲད་བྱུང་། ངས་བློ་བུར་དུ་ཤོག་ཁུག་ཁ་ཕྱེས་དུས་ནང་དུ་ཨ་སྒོར་་་་་་་་་་་་་་་་་་་་་་་་་་་་་་་་ཞིག་གི་དངུལ་འཛིན་འདུག། ང་རྩིས་རིགས་ལ་སློབ་སྦྱོང་གཏན་ནས་མེད་པས་བློ་བུར་དུ་ཀླད་ཀོར་གྲངས་ཀ་ག་ཚོད་ཡོད་མེད་ཡང་བལྟ་ཞིག་བྱས་དུས་ཧ་ལས་སོང་།  

བླ་མར་དགོས་པའི་ཐུགས་རྗེ་བྱིན་རླབས་མེད།། 

མཛེས་མར་དགོས་པའི་གཟུགས་དང་རྣམ་པ་མེད།། 

དྲང་བདེན་ཐོད་དུ་བཅིངས་པའི་སྐུ་དྲིན་གྱིས།། 

དེ་རིང་སྐྱིད་པའི་ཉི་མ་ཀླད་ནས་ཤར།།  

བླ་ཆེན་རྣམས་ཀྱིས་ང་ལ་རྒྱབ་སྐྱོར་མེད།།

མི་དཔོན་རྣམས་ལ་ལྟག་སྒོ་ངས་མི་ཤེས།། 

ལས་འབྲས་པང་དུ་བླངས་པའི་སྐུ་དྲིན་གྱིས།། 

དེ་རིང་སྐྱིད་པའི་ཉི་མ་ཀླད་ནས་ཤར།།

མཐོན་པོའི་ངོ་དགའ་སྤྲེལ་ལད་ངས་མི་ཤེས།། 

ཉམ་ཆུང་དམན་ལ་སྡང་མིག་མ་བགྲད་པ།། 

ཀུན་ལ་ཡ་རབས་བྱས་པའི་དན་རྟགས་ཀྱིས།། 

དེ་རིང་སྐྱིད་པའི་ཉི་མ་ཀླད་ནས་ཤར།། 

སུམ་རྩེགས་རྒྱ་ཕིག་ཅན་གྱི་དགོན་བདག་མིན།།

སློབ་ཚོགས་སྟོང་ཚོའི་བདག་པོ་དེ་བས་མིན།། 

ཉམ་ཆུང་ཞི་དུལ་སྤྱོད་པའི་ལག་རྗེས་ཀྱིས།། 

དེ་རིང་སྐྱིད་པའི་ཉི་མ་ཀླད་ནས་ཤར།།