གོང་ས་མཆོག་མེད་ན་སྲིད་སྐྱོང་རང་མགོ་མི་ཐོན་པ་ཡིན་ནམ།

ཕྱི་ལོ་ང་དགུ་ལོ་ནས་བཟུང་ཆོལ་གསུམ་བོད་རིགས་རྩམ་ཟན་ཡོངས་ལ་དོན་མེད་བསད་རྡུང་། མནར་གཅོད། མུག་ཤི་བཙོན་འཇུག་སོགས་གང་ལྟར་དམྱལ་བ་མི་ཡུལ་དུ་མངོན་སུམ་དུ་འཕོས་པ་ནང་བཞིན་སྡུག་བསྔལ་མྱོང་ཡོད། ཡིན་ནའང་བོད་གངས་ཅན་ལྗོངས་འདི་འཕགས་མཆོག་སྤྱན་རས་གཟིགས་ཀྱི་གདུལ་བྱ་ཡིན་ཅེས་བོད་ཀྱི་ལོ་རྒྱུས་དང་རྒན་གཞོན་མཐོ་དམན་མེད་པའི་ངག་སྒྲོས་ལས་གསལ་བ་ལྟར། ད་རེས་དུས་ངན་གྱི་ཁུག་སོ་འདིར་གདུལ་བྱ་དུས་བབས་ཀྱི་ཚུལ་དུ། སྤྱན་རས་གཟིགས་མི་ཡི་རྣམ་རོལ་དུ་དངོས་སུ་ཕེབས་ནས་དཔེར་ན་ལྷུང་ལ་ཉེ་བའི་གཡང་ཁའི་ལག་ལྡུམ་གྱི་མི་ལྟར་གྱུར་པའི་ཆེས་ཛ་དྲག་ཅན་གྱི་དུས་ངན་འདིར་དགུངས་གྲངས་བཅུ་གྲངས་ནས་ད་བར་བོད་མི་གཞི་བྱེས་གཉིས་ཀྱི་དོན་དུ་སྐུ་ལས་གང་འདྲ་སྐྱོན་ཡོད་པ་ནི་འདིར་ངོས་ནས་ཡང་སྐྱར་སྨོས་མ་དགོས་པ་བློ་གཟུ་བོར་གནས་མཁན་བོད་པ་ཞིག་ཡིན་ནས་བཟུང་སྟེ་ཚང་མས་མཁྱེན་གསལ་ལྟར་རེད། ཉེ་བའི་ལོ་ཤས་གོང་༧ གོང་ས་སྐྱབས་མགོན་ཡིད་བཞིན་ནོར་བུ་མཆོག་ནས་འཛམ་གླིང་སྤྱི་འགྲོས་དང་མཐུན་པར་བོད་རིགས་རྣམས་ལའང་དམངས་གཙོའི་གསོལ་རས་མ་ཞུས་རང་བཙལ་དུ་གནང་བ་ནི་བོད་ཀྱི་ལོ་རྒྱུས་ཐོག་བྱུང་མྱོང་མེད་པའི་ཆེས་རྨད་དུ་བྱུང་བའི་མཛད་བཟང་ཞིག་ཏུ་འཁུམས། ཉིན་མོ་དེ་ནས་བཟུང་སྟེ་ཁོང་ནས་འདི་ལྟར་གསུངས་མྱོང་ཡོད། 

"དེ་རིང་ནས་བཟུང་སྟེ་ང་ནི་རྒན་ཡོལ་ཆ་ཚང་བྱས་ཟིན་པའི་བོད་རིགས་དཀྱུས་མ་ཞིག་ཡིན།"

 ཅེས་རྟག་པར་གསུང་གི་ཡོད་པ་མ་ཟད་ད་ནས་བཟུང་སྟེ་དགོས་མཁོའི་སྐབས་སུ་ངོས་ཀྱི་མིང་གཡར་བ་ཙམ་ལས་ངས་བོད་ཀྱི་སྲིད་དོན་མཚམས་བཞག་པ་ཡིན་ཅེས་ཀྱང་ལན་གྲངས་གཅིག་ཙམ་མ་ཡིན་པར་ཡང་ནས་གསུངས་མྱོང་ཡོད། རྒྱ་ནག་གཞུང་ནས་དེ་ལས་ལྡོག་སྟེ་ཏཱ་ལའི་བླ་མས་བོད་ཀྱི་སྲིད་དོན་ནས་རྒན་ཡོལ་ཞུས་ཟེར་བ་འདི་སྲིད་དོན་ཆེ་ཤོས་ཞིག་རེད་ཅེས་ཡང་ནས་བཤད་ཀྱི་ཡོད། ངས་འདིར་བསམ་ཚུལ་བཤད་འདོད་པ་ནི་༸གོང་ས་སྐྱབས་མགོན་ཡིད་བཞིན་ནོར་བུ་ཁོ་རང་སྐུ་སྒེར་ཆོས་ཕྱོགས་ཀྱི་མཛད་འཕྲིན་གྱི་ཆེད་དུ་རྒྱལ་ཁབ་གང་དུ་ཕེབས་ཀྱང་རྡ་སའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་གཞན་སྤྱི་འཐུས་སོགས་ནས་རྗེས་འདེད་མ་བྱེད་ཅེས་འབོད་སྐུལ་ཞུ་རྒྱུ་དེ་ཡིན། གང་ཡིན་ཞེ་ན། རྒྱུ་མཚན་རྣམ་པ་གཉིས་ཡོད། 

རྒྱུ་མཚན་དང་པོ་ནི། 

༧གོང་ས་སྐྱབས་མགོན་ཡིད་བཞིན་ནོར་བུ་མཆོག་ནས་ལོ་གྲངས་མང་པོའི་གོང་ནས་འདི་ལྟར་གསུངས་མྱོང་ཡོད།

 "ང་ཚོའི་བོད་ཀྱི་འཐབ་རྩོད་འདི་ང་མི་གཅིག་ལ་མགོ་བསྔས་བསྡད་པ་ཙམ་མ་ཡིན་པར་ང་མེད་པ་ནང་བཞིན་ད་ལྟ་ནས་བསམ་བློའི་བང་བསྒྲིགས་ཞིང་ད་ལྟའི་མི་ཐོག་བོད་རིགས་གཞོན་སྐྱེས་རྣམས་ནས་འགན་ཁུར་ཐུབ་དགོས།"

 ཞེས་བཀའ་གནང་མྱོང་ཡོད་པས་ཆེས་རིན་བྲལ་གྱི་བཀའ་སློབ་ཟབ་མོ་འདི་ཉིད་ད་ལྟ་ནས་སེམས་ལ་བཞག་ཅིང་ཤར་བསྐྱོད་ལག་ལེན་བྱེད་མ་ཐུབ་ན་ནམ་ཞིག་དགུང་གྲངས་བརྒྱད་བཅུ་ལ་སླེབས་པའི་མི་ཞིག་ལ་ཚེ་ཡི་ལྷག་མ་ག་ཚད་ཡོད་མེད་ནི་མཐོང་ཆོས་མངོན་གསལ་རེད། 

རྒྱུ་མཚན་གཉིས་པ་ནི། 

ད་ལྟའི་ལས་ཐོག་སྲིད་སྐྱོང་མཆོག་ནས་སྲིད་སྐྱོང་ལ་གཞེངས་པའི་སྐབས་སུ་འགན་ཁུར་སྐབས་སུ་དམ་བཅའ་གསུམ་ཞེས་སྐད་གསང་མཐོན་པོའི་བསྒྲོགས་པའི་ནང་གསེས། "རང་མགོ་རང་ཐོན།" ཅེས་རང་ཉིད་ལ་གནས་སྐབས་རིང་སྲིད་སྐྱོང་གི་མིང་སྙན་པོ་ཞིག་འཐོབ་པའི་ཆེད་དུ་ཁ་ཙམ་མ་ཡིན་པར་དོན་ངོ་མར་བོད་མི་ས་ཡ་དྲུག་པོའི་ཕུག་གི་བདེ་སྡུག་གི་ཆེད་དུ་གསུངས་པ་ཞིག་ལོས་ཡིན་བསམ། རང་མགོ་རང་ཐོན་ཆེས་པའི་ཚིག་འདྲ་ཆགས་པོ་ཙམ་མ་ཡིན་པར་དང་པོ་རང་ཉིད་གང་དུ་སོང་ཡང་ད་དུང་༧གོང་ས་མཆོག་ལ་གཞན་བསྟེན་རིང་ལུགས་ཀྱི་རྗེས་འདེད་དེ་བཞག་ནས་སྲིད་སྐྱོང་རང་ཉིད་རང་མགོ་རང་ཐོན་ཞིག་བྱུང་ན་གཞི་ནས་བཙན་བྱོལ་བོད་མིའི་བསྒྲིགས་འཛུགས་སོགས་གཞི་བྱེས་བོད་མི་ས་ཡ་དྲུག་པོར་རང་མགོ་རང་ཐོན་གྱི་ལམ་ཞིག་སྟོན་ཐུབ་ན་སྙམ། ལར་ནི་ངོས་ལ་མཚོན་ན་སྲིད་སྐྱོང་ལ་སྒེར་གྱི་འཁོན་འགྲས་ཁོག་བཅངས་ཀྱིས་སྙིང་ནད་སོགས་གང་ཡང་མེད་པ་མ་ཟད་ཁོང་གི་ཕྱག་ལས་བྱེ་བྲག་པ་འགའ་ཤས་ལ་མཐའ་གཅིག་ཏུ་ཡི་རངས་ཡོད། འོས་ཆོས་ལ་རྒྱབ་སྐྱོར་བྱེད་མཁན་གྱི་གྲས་ཤིག་ཀྱང་ཡིན་སྟབས་ཤ་ཚའི་གཏམ་ལ་སྙན་པོ་མེད་ཅེས་པའི་དཔེ་ལྟར་ཡིན་ནོ། 

ཁ་སང་གཟའ་ཟླ་བའི་བདེ་ཆེན་ཞིང་སྒྲུབ།

ཁ་སང་ནི་འཆར་ཅན་ལྟར་ཡོད་པའི་གཟའ་ཟླ་བའི་བདེ་ཆེན་ཞིང་སྒྲུབ་དེ་ཡིན་པས་ཆུ་ཚོད་དྲུག་པའི་སྐབས་སུ་ཆོས་ཚོགས་སུ་མི་རྣམས་གཅིག་རྗེས་གཉིས་མཐུད་ཀྱིས་འཛོམས་ནས་ཆོས་ཚོགས་ཆུང་ཆུང་དེ་རྦད་དེ་ཁེངས་སོང་། དེ་རིང་སྐད་བསྒྱུར་བྱམས་པ་ལགས་ཀྱང་ཕེབས་འདུག དང་པོ་ཆོས་ཐུན་མཚམས་སྦྱོར་གྱི་ཚུལ་དུ་ངོས་ཀྱི་དབྱིན་ཇི་ཆགས་རོ་དེའི་ཐོག་ནས་གང་ཤེས་འགྲེལ་བཤད་བྱས་ནས་དངོས་གཞིའི་ཆོས་ཐུན་སྐབས་སུ་སྐད་བསྒྱུར་བརྒྱུད་ནས་ནང་ཆོས་གལ་ཆེན་ཡིན་ཚུལ་དང་། ཆོས་ཟེར་དུས་ཉོན་མོངས་ཀྱི་གཉེན་པོར་འགྲོ་དགོས་ཚུལ། སྒོམ་དངོས་གཞིའི་སྐབས་སུ་འཇོག་སྒོམ་ཉིད་གལ་ཆེན་ཡིན་ཚུལ་སོགས་བཤད་པས་མི་མང་ཧ་ཅང་དགའ་བོ་བྱས་སོང་། དེ་རིང་གི་བདེ་ཆེན་ཞིང་སྒྲུབ་ནི་དབྱིན་ཇིའི་སྐད་ཐོག་ཏུ་བོད་ཀྱི་གདངས་ནང་བཞིན་བཏོན། མདུན་བསྐྱེད་འོད་ཞུའི་སྐབས་སུ་རྫོགས་རིམ་ལ་མཉམ་བཞག་སྒོམ་ཆུ་ཚོད་ཕྱེད་ཀ་ཙམ་བྱེད་བཅུག་ནས་མཐར་བསྔོ་བ་སྨོན་ལམ་སོགས་ཀྱིས་གྲོལ། དེ་རིང་ཆོས་གྲལ་དུ་སྔར་ཡོང་མྱོང་མེད་པའི་གསར་བུ་འགའ་ཤས་འདུག་ཁོང་ཚོའི་རྣམ་འགྱུར་ལ་བལྟས་ན་ཧ་ཅང་དགའ་བོ་བྱུང་ཡོད་ཚོད་འདུག 

ཁ་པར་ཆུ་ནང་དུ་ཟགས་པའི་ཉིན་མོ།

དེ་རིང་ཞོགས་པ་ངོས་ཀྱི་ཆོས་ཚོགས་སུ་ནམ་རྒྱུན་ལྟར་སྒོམ་དང་ཁ་འདོན་སོགས་བྱས་ནས་ཉིན་གུང་ཆུ་ཚོད་གཅིག་བར་ང་རང་གཅིག་པུ་བསྡད་པས་ཧ་ཅང་སྐྱིད་པོ་བྱུང་། ཆུ་ཚོད་དང་པོའི་སྐབས་སུ་ཨ་མ་སུས་སིན་སླེབས་སོང་ཁ་སང་ནས་དུས་ཆད་བྱས་པ་ལྟར་གྲོགས་པོ་རྗེའུ་ཧྥུ་དང་མཉམ་དུ་ཆོས་ཚོགས་འགྲམ་དུ་ཡོད་པའི་ཐེའུ་ལན་ཌི་ཟ་ཁང་ཞིག་ནང་ཉིན་གུང་ཟ་མ་ལ་སོང་། ཟ་མ་ཚར་མ་ཐག་དེ་རིང་གནམ་གཤིས་ཧ་ཅང་ཡག་པས་གྲོགས་པོ་རྗེའུ་ཧྥུའི་འདོད་པ་ལྟར་མཚོ་འགྲམ་དུ་སྤྲོ་འཁྱམས་ལ་སོང་ནས་རྗེའུ་ཧྥུ་དང་མཉམ་དུ་མཚོ་འགྲམ་ནས་དབྱིན་ཇིའི་མིང་དུ་ fvisbee འགྱིག་སྐོར་འཕེན་རེས་བྱས་ནས་ཡར་མཆོང་མར་ལྡིང་བྱེད་རྒྱུ་མང་དྲགས་པའི་རྐྱེན་གྱིས་ངོས་ཀྱི་ལག་འཛིན་ཁ་པར་ཀུ་ཤུ་རྟགས་ཅན་དེ་གློ་ཁུག་ནས་ཆུ་ནང་དུ་ཟག་སོང་འདུག ཕལ་ཆེར་ཁ་པར་ཟག་ནས་སྐར་མ་བཅོ་ལྔ་ཙམ་ནས་ངོས་ཀྱི་ཁ་པར་གློ་ཁུག་ནང་དུ་མེད་པ་གཞི་ནས་ཤེས་སོང་། རྗེའུ་ཧྥུ་ངེད་གཉིས་མཚོ་འགྲམ་གྱི་རྐང་རྗེས་འདེད་བཞིན་ཁ་པར་བཙལ་བས་རྗེའུ་ཧྥུ་ནས་ངོས་ཀྱི་ཁ་པར་དེ་མཚོ་ནང་ནས་བླངས་སོང་། ངེད་གཉིས་མགྱོགས་པོ་སྔ་ལོར་ཁ་པར་ཉོ་སའི་ཚོང་ཁང་ནང་དུ་ཁ་ཧར་སྒྲ་ཙིག་གེ་ལུས་དངུལ་ནག་ཕལ་ལེ་འབྱོར་མ་ཐག་མགྲོན་པོར་སྣེ་ལེན་བུ་མོ་དེར་ཁ་པར་ཆུ་ནང་ཟག་སོང་བས་ད་ལྟ་རང་སྐྱོབས་རོགས་ཞུས་པས་ཁྱད་མཚར་ཞིག་ལ་ཁ་པར་ཁྱད་ལས་པ་རྣམས་ཀྱིས་ཐབས་ཤེས་གང་ཡང་ཡོད་མ་རེད་ཟེར་འབྲས་ནང་དུ་ཉིན་ཤས་བཞག་ན་གཅིག་བྱས་ན་སྒོ་ཕྱེ་ཐུབ་ཀྱི་རེད་ཟེར། ངེད་གཉིས་ལམ་སང་ཟུར་དུ་ཡོད་པའི་ཚོང་ཁང་ཞིག་ནང་དུ་སོང་ནས་འབྲས་ཉོས་ནས་དེའི་ནང་དུ་ཁ་པར་དེ་བཞག 
ང་ནི་སྔ་ལོར་མ་ལེ་ཞ་རུ་སོང་བའི་སྐབས་སུ་ཁ་པར་ཞིག་བོར་རླག་བྱུང་ད་རེས་ཡང་སྐྱར་ཁ་པར་དེ་བེད་མེད་དུ་ཆག་ཁ་པར་དེ་རྣམས་ཧ་ཅང་གོང་ཆེན་ཤ་སྟགས་རེད། དོན་མེད་དངུལ་ཕྲོག་རླག་བསམ་ནས་འཕངས་སེམས་འདྲ་ཞིག་སྐྱེས་པའི་རྣལ་འགྱུར་བསྟན་པས་རྗེའུ་ཧྥུ་ནས་འདི་ལྟར་ཟེར།
རིན་པོ་ཆེ་ཁྱེད་རང་རྟག་པར་མི་རྟག་པའི་སྐོར་གསུང་རྐྱང་རེད། ཁྱེད་རང་ཁ་པར་དེ་ཡང་དེ་དང་གཅིག་པ་རེད། ལར་ནས་སངས་རྒྱས་འོད་དཔག་མེད་ཀྱིས་ཁ་པར་གཏང་རྒྱུ་ཉུང་དུ་ཐོངས་ཞེས་པའི་བརྡ་རེད་ཟེར་བས་ངེད་གཉིས་ཀ་གད་མོ་ཤོར་སོང་། 

པདྨ་འོད་གསལ་གླིང་ལ་སོང་བའི་ཉིན་མོ།

དེ་རིང་ནས་བཟུང་སྟེ་ཉིན་གསུམ་རིང་པདྨ་འོད་གསལ་གླིང་ལ་འགྲོ་དགོས་ཡོད། འགྲོ་དོན་ནི། ངོས་ཀྱི་ཆེས་དགའ་ཤོས་ཆོས་གྲོགས་སྔགས་པ་བླ་མ་མཐར་ཕྱིན་རིན་པོ་ཆེ་སྔ་ལོར་དུས་ཚེས་འདིར་གློ་བུར་དུ་ཞིང་དུ་ཕེབས་སོང་བས་ད་རེས་པདྨ་འོད་གསལ་གླིང་འདུས་སྡེ་རྣམས་ཀྱི་རེ་བ་ལྟར་གལ་ཆེན་དུ་རྩིས་ཞིང་གཟའ་ཟླ་བའི་བདེ་ཆེན་ཞིང་སྒྲུབ་ཀྱང་མེད་པར་བྱས་ནས་ངོས་ཀྱི་དགེ་ཕྲུག་མི་གྲངས་བདུན་བརྒྱད་ཞིག་དང་མཉམ་དུ་སོང་། བླ་མ་མཐར་ཕྱིན་རིན་པོ་ཆེ་ནི་འཁྲུངས་ཡུལ་བོད་འགུ་ལོག་ནས་ཡིན་ཅིང་སྐུ་ན་ཕྲ་བའི་སྐབས་བོད་མི་སྤྱི་ལྟར་བཙན་བྱོལ་ལ་སྐྱབས་བཅོལ་དུ་ཕེབས་ནས་ཨོ་རིའི་སེའི་གཞིས་ཆགས་སུ་བཞུགས། བདུད་འཇོམས་ཡབ་སྲས་རྣམས་བླ་མ་རུ་བསྟེན་ནས་བདུད་འཇོམས་ཁྲག་འཐུང་གླིང་པའི་གཏེར་མར་ཉམས་གཞེས་གནང་ཞིང་གདུང་སྲས་ཕྲིན་ལས་ནོར་བུ་རིན་པོ་ཆེའི་ཐུགས་ཀྱི་སྲས་གཅིག་པུར་གྱུར། ཁོང་ནི་འཇིག་རྟེན་མི་ཆོས་ནས་མི་གཤིས་བཟང་ཞིང་གཉོམ་ཆུང་ལ་ཐུགས་རབ་སྒམ་པ། ལྷ་ཆོས་ནས་མདོ་སྔགས་སྤྱི་དང་ལྷག་པར་བདུད་འཇོམས་གླིང་པའི་གཏེར་ཆོས་རྣམས་ལ་གཞན་དྲིང་མི་འཇོག་པའི་རང་བྱན་ཚུད་ཅིང་ཐོས་པས་རང་རྒྱུད་གྲོལ་ཅིང་བསྒོམས་པས་གནས་ལུགས་ཀྱི་དོན་རྟོགས་པའི་དེང་དུས་ཀྱི་སྔགས་པ་ཞེས་མིང་ཁུར་ནས་མགོ་ལ་ཐོར་ཅོག་བཅིངས་ཞིང་རྒྱབ་རུ་གཟན་དཀར་གྱོན་མཁན་རྣམས་ཀྱི་ཁྲོད་ནས་རྒྱལ་མཚན་གྱི་ཏོག་ལྟ་བུ་ཞིག་ཏུ་མངོན། 
ཞོགས་པ་པདྨ་འོད་གསལ་གླིང་ལ་འབྱོར་བ་དང་མཉམ་དུ་སྔགས་བན་སྐྱ་སེར་མི་གྲངས་ཕལ་ཆེར་བདུན་བཅུའི་ཡས་མས་ཞིག་ནས་འཚོགས་ཁང་འགྲམ་ནས་ངོས་ལ་ཕེབས་སྒུག་བྱས་འདུག 
སྤྲུལ་འཇིགས་མེད་རིན་པོ་ཆེས་གཙོར་བྱས་ཁྲི་ཐོབ་ཀྱི་མཁན་སྤྲུལ་བདུན་ཙམ་ཞིག་འདུག 
སྨིན་གླིང་རྡོར་སེམས་བླ་མ་མཆོད་པའི་ཆོ་ག་ཉིད་རྟ་འདུར་གྱིས་མཉམ་འདོན་བྱས། མཆོད་ཕྲེང་སྐབས་སུ་གར་པད་རྣམས་དང་རྡོ་རྗེ་སློབ་དཔོན་གྱི་ཕྱག་ལེན་སོགས་ངོས་ཀྱི་ཕ་དགོན་དང་ཅུང་མི་འདྲ་ཡང་ཁྲི་ཟུར་ནས་བླ་མ་བསོད་ནམས་ལ་བཀའ་འདྲི་བྱེད་ཅིང་གཉོམ་ཆུང་དམན་ས་བཟུང་ནས་གང་ཡང་ཤེས་ཀྱི་མེད་མདོག་བྱས་ཁ་བཙུམས་ནས་བསྡད། འོན་ཀྱང་འདས་པོ་ཞིང་གཤེགས་བླ་མ་མཐར་ཕྱིན་པོ་ཆེ་ནས་ངོས་ལ་ར་གན་གསེར་རློན་གྱིས་ག་དུས་ཡིན་ཀྱང་ཁོང་གི་སློབ་མ་རྣམས་ཀྱི་མདུན་ངོས་ལ་བསྟོད་ར་བྱེད་རྒྱུ་མང་དྲགས་པའི་རྐྱེན་གྱིས་པདྨ་འོད་གསལ་གླིང་འདུས་སྡེ་རྣམས་ཀྱིས་གུས་པར་དགའ་མོས་བྱེད་མཁན་ཧ་ཅང་མང་། 
ཉིན་གསུམ་རིང་ཞོགས་པ་ཆུ་ཚོད་དགུ་ནས་དགོང་མོ་ཆུ་ཚོད་དྲུག་བར་རྡོར་སེམས་བླ་མ་མཆོད་པ་ཆ་ཚང་ཚོགས་དང་བཤགས་པ། བདག་འཇུག་སོགས་མཉམ་འདོན་བྱས་པས་གཞན་དོན་སྐབས་སུ་རང་དོན་ཞོར་དུ་འབྱུང་བའི་དཔེ་ལྟར་རང་ཉིད་ཀྱང་དགེ་བའི་ལམ་དུ་འཇུག་རྒྱུའི་ཆེས་གོ་སྐབས་བཟང་པོ་ཧ་ཅང་སྐྱིད་པོ་བྱུང་། 
ཉིན་ཐ་མའི་སྐབས་སུ་བཀྲ་ཤིས་སྨོན་ལམ་གྱིས་མཐའ་རྒྱན་པར་བྱས་ནས་འདུས་མང་ནས་ལག་ཏུ་ཁ་གཏགས་དང་ཕྱག་རྒྱས་གྱེས་བྲལ་བྱས་ཤིང་ངོས་ཀྱི་རླངས་འཁོར་ཁ་ལོ་བ་ཨ་མ་ཀུན་བཟང་དབང་མོ་ངེད་གཉིས་སྐར་མདའ་ཆད་པ་ནང་བཞིན་ལམ་བར་དུ་འཚོགས་པ་དེ་ཡག་རབས་དང་སློབ་མ་རྣམས་བཟང་རབས་ཁ་བརྡ་བྱེད་བཞིན་དགོང་མོ་ཆུ་ཚོད་དགུ་ཙམ་གྱི་ཐོག་རང་ཁྱིམ་དུ་བདེ་འབྱོར་བྱུང་།

ཨ་རིར་འབྱོར་བའི་ཉིན་མོ།

ཨ་རིའི་གནམ་ཐང་དུ་འབྱོར་མ་ཐག

ཟླ་བ་གསུམ་མ་ཟིན་ཙམ་གྱི་རིང་རྒྱ་གར་སོགས་ལ་སོང་ནས་ཁར་ནུབ་མགྲོན་པོ་རང་ཁྱིམ་དུ་འབྱོར་བའི་དཔེ་ལྟར་གེགས་མེད་བདེ་བླག་ངང་འབྱོར་སོང་། གནམ་ཐང་ལ་ངོས་ཀྱི་དགེ་ཕྲུག་འགའ་ནས་ལག་ཏུ་མེ་ཏོག་དང་ཁ་བཏགས་བཟུང་ནས་ཕེབས་སྒུག་བྱས་འདུག དེང་སང་ཉིན་མཚན་གོ་ལྡོག་པའི་དབང་གིས་མཚན་མོ་གཉིད་མི་ཁུག་པ་དང་ཉིན་མོར་གཉིད་དུ་ཤོར་བའི་ན་ཚ་འདིས་ཟིན་ནས་ཉིན་ཤི་མཚན་ལང་བྱེད་དགོས་འདུག ངོས་ལ་ར་གན་གསེར་རློམ་ཅན་དད་ལྡན་མ་ཨ་མ་སུས་སིན་སྟབས་མ་ལེགས་པ་ཞིག་ལ་བདུན་གཉིས་གོང་ཟས་དུག་འདྲས་རྐྱེན་བྱས་ནས་བཤའ་བཅོས་བྱེད་དགོས་འདུག་སྟབས་དེ་རིང་གནམ་ཐང་སླེབ་ཐུབ་མི་འདུག 

རྨི་ལམ་ཡ་མཚན་ཅན་ཞིག་རྨིས་པའི་ཞོགས་པ།

༧གོང་ས་མཆོག་གཞོན་ནུའི་སྐབས་སུ། 

ཉེ་སྔོན་འགྲུལ་བཞུད་མང་དྲགས་པའི་རྐྱེན་གྱིས་ཚ་འཆམས་ཞིག་ཕོགས་ནས་གཟུགས་པོ་ཧ་ཅང་ཐང་ཆད་འདུག་སྟབས་སྡོད་གནས་བོད་སྒར་བསམ་ཡས་གླིང་པོ་ཏཱ་ལའི་མགྲོན་ཁང་ནང་ངོས་ཀྱི་ཚ་མོ་གཉིས་དང་མཉམ་དུ་ཁ་སང་ལྷོད་ལྷོད་ངང་བསྡད་རྒྱུ་བྱུང་། 

ཡུན་རིང་མ་ཐོས་པའི་ཨ་རིའི་བོད་སྐད་རླུང་འཕྲིན་དང་ཀུན་གླེང་སོགས་ལ་བལྟ་ཉན་བྱེད་བཞིན་པའི་སྐབས་སུ་ཉེ་བའི་ཆར་༧གོང་ས་སྐྱབས་མགོན་ཆེན་པོའི་གསང་གསུམ་གྱི་མཛད་འཕྲིན་སྤྱི་དང་། མ་ཟད་གྲུབ་མ་ཐག་པའི་ལ་དྭགས་སུ་མི་འབུམ་གཅིག་དང་ཕྱེད་ལྷག་ལ་དཔལ་དུས་ཀྱི་འཁོར་ལོའི་དབང་ཆེན་སྐབས་མཛད་འཕྲིན་ཁག་ལེགས་གྲུབ་བྱུང་བ་རྣམས་རྒྱངས་བསྲིང་བྱེད་བཞིན་པ་གོ་ཐོས་བྱུང་བས་ངོས་ལ་དགའ་སྐྱོ་འདྲེས་མའི་ཚོར་སྣང་ཞིག་བྱུང་། སེམས་དགའ་འོས་པ་ནི། མི་ཐོག་འདི་ཡི་བསོད་ཟད་ལས་ངན་བོད་པ་རྣམས་ཀྱིས་བསམ་ཤེས་ཐུབ་ན་ས་སྟེང་འདིར་སུ་གང་ལ་ཡང་མེད་པའི་དབུ་ཁྲིད་ཡང་དག་པ་ཞིག་གི་གྲིབ་ནས་འཛམ་གླིང་འདིའི་སྒང་བོད་པ་ཟེར་དུས་ངོ་གནོང་མི་དགོས་པ་ཞིག་ཡོད་པ་མ་ཟད་ལུགས་གཉིས་གང་གི་ཐད་ནས་མ་གཅིག་པས་བུ་ལ་བརྩེ་བ་ལྟར་སྐྱོང་བཞིན་པའི་བཀའ་དྲིན་འདི་ལ་བསམ་ནས་ཡིན། 

སེམས་སྐྱོ་དགོས་པ་ནི། ད་རེས་གུས་རྒྱ་གར་ལ་སླེབས་ཐུབ་ཀྱང་གུས་པའི་ཆོས་ཕྱོགས་ཀྱི་བྱེད་སྒོ་འགའ་ཡི་རྐྱེན་དབང་གིས་དུས་འཁོར་དབང་ཆེན་ལ་ཆེད་བཅར་མ་ཐུབ་པ་ནི་གུས་ལ་མཚོན་ན་ཆོས་ཕྱོགས་ནས་གྱོང་གུད་དེ་ལས་ཆེ་བ་ཞིག་མེད། འདུས་པའི་ཐ་མ་བྲལ་ཞེས་པའི་དཔེ་ལྟར་སང་ཉིན་མི་འདོད་བཞིན་དུ་ཨ་རི་གཡར་པོའི་རྒྱལ་ཁབ་གཉིས་པར་འགྲོ་དགོས་སྟབས་ཆོས་བྱེད་ང་ལྟ་བུ་ལ་མཚོན་ན་རྩ་བའི་བླ་མ་ལ་བྲལ་བ་ནི་མི་དཀྱུས་མར་ཕ་མ་དང་དང་བྲལ་བ་ལས་ཀྱང་སྡུག་བསྔལ་ཆེ་བ་ཡོད་པས་མ་འོངས་པར་༧གོང་ས་སྐྱབས་མགོན་ཆེན་པོ་མཆོག་ལོ་ཟླ་ཚེས་གྲངས་སོགས་དུས་ཚོད་ངེས་ཅན་ཞིག་ནང་ལ་མཐོང་བ་དོན་ལྡན་གྱི་འཛུམ་པའི་གསེར་ཞལ་དེ་ཡང་སྐྱར་ལན་གཅིག་ག་དུས་མཇལ་ན་བསམ་བཞིན་གཉིད་ལ་ཡུར། 

ཞོགས་པ་ཆུ་ཚོད་ལྔ་ཙམ་ལ་རྨི་ལམ་ཁྱད་མཚར་འདི་འདྲ་ཞིག་རྨིས་བྱུང་། ཉེ་ཆར་འབྲུག་ལ་གནས་མཇལ་ལ་ཁྱུག་ཙམ་སོང་བའི་རིང་འབྲུག་པའི་ལྷ་ཁང་འགའ་མཇལ་རྒྱུ་བྱུང་བས་བག་ཆགས་དེའི་སྟོབས་ཀྱིས་ཡིན་ན་གང་ལྟར་ཀྱང་༧གོང་ས་སྐྱབས་མགོན་ཡིད་བཞིན་ནོར་བུ་མཆོག་སྐུ་འཁོར་ཉུང་ཤས་ཞིག་འབྲུག་པའི་ལྷ་ཁང་ལྟ་བུ་ཞིག་གི་ནང་ནས་མཇལ་བྱུང་། ངས་ནམ་རྒྱུན་ཡི་དམ་རྡོ་རྗེ་གཞོན་ནུ་རྒྱུན་བསྙེན་བྱེད་བཞིན་ཡོད་སྟབས་མི་མང་ཁྲོད་ནས་འཛེམས་ཟོམ་གང་ཡང་མེད་པར་མཆོག་གླིང་གཏེར་གསར་གསང་ཐིག་ཕུར་པའི་ལྷ་བསྐྱེད་སྐད་ཤུགས་ཆེན་པོའི་འདོན་གྱིན་འདུག ༧གོང་ས་སྐྱབས་མགོན་ཆེན་པོ་མཆོག་ནས་ཀྱང་ཐུགས་ཐོག་ནས་ཤ་ར་ར་མཉམ་འདོན་གནང་སོང་། བསྙེན་པའི་སྐབས་སུ། 

རང་གི་སེམས་ཉིད་འདི་དག་ནི།། 

རྡོ་རྗེ་གཞོན་ནུ་ཉིད་དུ་བལྟ།།

ཞེས་དང་རྫོགས་རིམ་སྐབས་སུ།

རང་སེམས་སྤྲོས་པ་ཐམས་ཅད་དང་བྲལ་བ་རྡོ་རྗེ་གཞོན་ནུའི་ངང་དུ་རྫོགས་ཤིང་། ངོ་བོ་སྟོང་ལ་རང་བཞིན་གསལ་བའི་སྣང་ཆ་རྣམས་དངོས་མེད་སྒྱུ་མ་ལྟ་བུ་རྟོག་བྲལ་ཤར་གྲོལ་དུས་མཉམ་འོད་གསལ་གྱི་ངང་དུ་མཉམ་པར་བཞག།

ཅེས་པའི་ཚིག་འདི་དལ་བུས་བཏོན་དུས་༧གོང་ས་སྐྱབས་མགོན་ཡིད་བཞིན་ནོར་བུ་ཁོང་གི་དམིགས་བསལ་གྱི་སྤྱན་གཉིས་པོ་ང་ལ་འབྲུ་ཚུགས་སུ་གཟིགས་ནས་སྤྱོད་འཇུག་ཤེས་རབ་ལེའུ་ནང་ནས་ཤོ་ལོ་ཀའི་ཚིག་གཅིག་གསུངས་ཞིང་ང་ལ་དབུ་ཐོད་ཅིག་གཏུགས་ནས་གསུངས་ཤུགས་ཆེན་པོའི་གད་མོ་ཆེན་པོ་ཞིག་དགོད་བཞིན་མི་སྣང་བར་གྱུར་སོང་། 

ང་ནི་ཞོགས་པ་བླ་མ་ལ་མོས་གུས་ཀྱིས་ངུས་པའི་མིག་ཆུས་མགོ་སྔས་ཡང་རློན་པ་ཆག་འདུག སྤྱོད་འཇུག་གི་ཚིག་དོན་རྣམས་ནི་དྲན་པའི་ཡུལ་ལ་མི་འདུག གང་ལྟར་ཀྱང་ད་ནངས་ཞོགས་པ་ལངས་བའི་སྐབས་སུ་སེམས་ལ་སྔ་ན་མེད་པའི་དགའ་སྤྲོས་ཁེངས་འདུག

ཐ་མལ་སྣང་བ་འགགས་ནས།། 

རང་རིག་བླ་མར་ཤེས་ན།། 

བླ་མ་མ་མཇལ་བསམ་པའི།། 

སྡུག་ཡུས་ངུ་སྐད་མི་དགོས།།

མཉམ་མེད་དྭགས་པོའི་རྗེས་འཇུག།། 

མོས་གུས་དཀར་པོ་ཆིག་ཐུབ།། 

སྟོང་ཉིད་རྟོགས་པའི་གཞུང་ཤིང་། 

གེགས་སེལ་བོགས་འདོན་མན་ངག།

གཟུགས་སྐུའི་འགྲོ་དོན་བླ་མ།། 

ལུས་དང་གྲིབ་མར་མེད་ཀྱང་།

རིག་སྟོང་དོན་གྱི་བླ་མ།། 

ཡེ་ནས་ཡོད་པས་འཚེང་ངོ་།

བོད་སྒར་བསམ་ཡས་གླིང་པོ་ཏཱ་ལའི་མགྲོན་ཁང་ནས་ལིམ་ཇ་སྐྱུར་མོ་ཞིག་འཐུང་ཞོར་ད་ནུབ་མཚན་མོའི་རྨི་ལམ་དེའི་སྐོར་དེ་རིང་གི་ཉིན་ཐོ་རུ་བསྐྱལ། 

རྒྱ་གར་ལྷོ་ཕྱོགས་ཞིང་སྒྲུབ་ཚར་ནས་འབྲུག་འབྲས་ལྗོངས་སོགས་ལ་སོང་བའི་སྐོར།

འཇིགས་རྔམ་ཆེ་བའི་འབྲས་ལྗོངས་ཀྱི་ཤུལ་ལམ།

ཉེ་བའི་ཆར་ཉིན་ལྔ་ཡི་རིང་རྒྱ་གར་ལྷོ་ཕྱོགས་བདེ་ཆེན་ཞིང་སྒྲུབ་ཆེན་མོ་ལེགས་གྲུབ་བྱུང་། ད་ལོའི་རྒྱ་གར་ལྷོ་ཕྱོགས་ཐེངས་དྲུག་པའི་བདེ་ཆེན་ཞིང་སྒྲུབ་ཆེན་མོ་ཧ་ཅང་གྲ་རྒྱས་པོ་དང་མི་མང་པོ་འཛོམས་བྱུང་། འདི་ལོའི་ཞིང་སྒྲུབ་ཆེན་མོའི་སྦྱིན་བདག་རྣམས་སིངྒ་པོར་གནས་བཞུགས་ངོས་ཀྱི་སློབ་མ་རྣམས་ཡིན། སང་ལོའི་སྦྱིན་བདག་མ་ལེ་ཞ་དང་། གནང་ལོའི་སྦྱིན་བདག་ཨ་རི་སོགས་རེས་མོས་བྱེད་རྒྱུ་བྱས་ཡོད། མི་ལོ་ཧྲིལ་པོ་ལྔ་ཡི་རིང་ངོས་ནས་ཁྲག་བསོགས་རྣག་གསོགས་བྱས་ནས་བསགས་ཞིང་གཏངས་བའི་སྒོར་མོ་རྣམས་གཞིས་ཆག་རྒན་གོག་རྣམས་ནས་རང་ཆོས་རང་བདག་གི་དཔེ་ལྟར་ས་རྡོ་རྒལ་པར་ཁུར་ཞིང་རྗེ་བཙུན་མི་ལ་རས་པས་ལྷོ་བྲག་མར་པའི་བསས་མཁར་དགུ་ཐོགས་བཞེངས་པ་ནང་བཞིན་ད་ལོར་འཚོགས་ཁང་གི་འོག་ཁང་དེ་ལེགས་གྲུབ་བྱུང་ནས་བླ་སློབ་རྣམས་འཚོགས་ཁང་གསར་པའི་ནང་ད་རེས་མཉམ་དུ་བདེ་ཆེན་ཞིང་སྒྲུབ་འཚོགས་རྒྱུ་བྱུང་བ་དངོས་གནས་ཧ་ཅང་དགའ་བོ་བྱུང་། ཉིན་ལྔ་ཧྲིལ་པོར་བདེ་ཆེན་ཞིང་སྒྲུབས་འཚོགས་ཞིང་ད་ལོར་དམིགས་བསལ་རྫོགས་ཆེན་དགོན་དང་། བག་ཡོད་དགོན། རྟ་རྣ་དགོན། སྟག་ཤམ་དགོན། དར་རྒྱས་དགོན་སོགས་ནས་གདན་འདྲེན་ཞུས་པའི་བླ་སྤྲུལ་མཁན་པོ་དགེ་བཤེས་གྲྭ་སྔགས་སོགས་སྡོམས་པས་ཉིན་ལྟར་དགེ་འདུན་པ་དྲུག་བཅུ་དང་བདུན་བཅུའི་ཡས་མས་ཕེབས་ཀྱི་འདུག མི་མང་ཡང་ཉིས་བརྒྱ་མ་ཟིན་ཙམ་ཞིག་སྡོམ་པས་སྐྱ་སེར་སུམ་བརྒྱ་མ་ཟིན་ཙམ་ཞིག་ཉིན་ལྟར་འཚོགས་ཞུགས་གནང་མཁན་འདུག ངས་ཀྱང་བདེ་ཆེན་ཞིང་སྒྲུབ་དང་འབྲེལ་བའི་ཆོས་བཤད་གང་དྲག་བྱས་པས་མི་མང་རྣམས་ཧ་ཅང་དགའ་བོ་བྱས་སོང་། ཉིན་ཐ་མའི་སྐབས་སུ་རྟེན་འབྲེལ་མ་འགྲིག་རང་འགྲིག་གི་དཔེ་ལྟར་དུ་༧གོང་ས་སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་ཁེལ་འདུག་སྟབས་མི་མང་རྣམས་དང་མཉམ་ཞུགས་བྱས་ནས་གཞིས་ཆགས་མི་མང་ནས་རྐང་བྲོ་གླུ་གཞས་སོགས་ལྟད་མོ་མིག་གི་བདུད་རྩིར་གྱུར། ཕྱི་ཉིན་ཞོགས་པ་སྔ་བོར་ལངས་ནས་བདེ་ཆེན་ཞིང་སྒྲུབས་ཚོགས་གཙོ་བསྟན་འཛིན་རིན་ཆེན་གཙོས་མི་གསུམ་གྱིས་བླ་མ་བསོད་ནམས་རྡོ་རྗེ་ངེད་གཉིས་བྷེང་ལོར་གནམ་ཐང་ལ་བསྐྱེལ་མ་བྱས་སོང་།

འབྲུག་དང་འབྲས་ལྗོངས་སོགས་གནས་སྐོར་ལ་ཁྱུག་ཙམ་སོང་བའི་ཉིན་ཐོ། 
 ལྷོ་ཕྱོགས་ཆོས་ཀྱི་བྱེད་སྒོ་ཁག་ལེགས་གྲུབ་བྱུང་ནས་རིང་ནས་སྙིང་དུ་གནག་པའི་རེ་བ་རྡོ་རྗེ་གླིང་ན་བཞུགས་པའི་ངོས་ཀྱི་ཆོས་གྲོགས་བླ་མ་མིག་དམར་རྡོ་རྗེ་དང་། འབྲུག་གྲྭ་དགེ་ལེགས་གཉིས་ཀྱི་རོགས་རམ་དང་མཐུན་འགྱུར་འོག་འབྲུག་དང་རྒྱ་གར་ས་མཚམས་ཕུན་ཚོགས་གླིང་བརྒྱུད་ནས་ཐེམ་བུ་དང་སྦ་གྲོ་སོགས་ལ་ཉིན་གཉིས་རིང་འགྲུལ་བཞུད་ཐུང་ཙམ་འགྲོ་རྒྱུ་བྱུང་། འབྲུག་པའི་ཡུལ་ལྗོངས་ནི་ཧ་ཅང་མཛེས་ཀྱང་ད་རེས་ཆར་བསྡུས་ཀྱི་དུས་ཚིག་ལ་ཁེལ་ནས་འགྲོ་ལམ་བདེ་བོ་མེད་པ་རེད་འདུག འབྲས་ལྗོངས་ལ་བཞུགས་པའི་སྐྱབས་རྗེ་རྡོ་གྲུབ་རིན་པོ་ཆེ་མཇལ་བསམ་ཀྱང་སྐུ་མཚམས་བཅད་རྒྱར་ཁེལ་ནས་མཇལ་ཁ་མ་བྱུང་། གང་སར་འཁྱམས་ཉུལ་མང་དྲག་པ་དང་རྒྱ་གར་ཆར་བསྡུས་ཀྱི་མགོ་ཟིན་ནས་གནམ་གཤིས་འཁྲུགས་པའི་རྐྱེན་གྱིས་ཉིན་གཉིས་གོང་ནས་ངོས་ལ་ཚ་བ་འབར་ཞིང་གློ་རྒྱབ་པ་སོགས་ཚ་འཆམས་ཞིག་ཕོག་ཀྱང་འདི་ཟླའི་ཚེས་པ་ཉི་ཤུ་ཉིན་ཨ་རིར་འབྱོར་དགོས་སྟབས་འབྲུག་དང་འབྲས་ལྗོངས་སོགས་ལ་དགུ་ལུང་དགུ་རྣམས་རྒྱབས་ནས་སི་རི་གུ་རིའི་གནམ་ཐང་བརྒྱུད་ད་ནུབ་བོད་སྒར་བསམ་ཡས་གླིང་ལ་ཤི་མ་གསོན་གྱིས་སླེབས་སོང་། ས་གནས་འདིར་ཡོད་པའི་ངོས་ཀྱི་ཚ་མོ་ཆོས་དབྱིངས་དབང་མོ་དང་དགའ་སྐྱིད་ནས་ངོས་ཀྱི་ཟ་མ་དགའ་ཤོས་སྐྱུར་ཐུག་ཧ་ཡང་གང་བསྐོལ་ནས་སྒུག་འདུག ད་རེས་བྱེས་ཡུན་འདི་ཡི་སྐབས་སུ་ངོས་ཀྱི་འདོད་པ་ལྟར་དུ་བོད་ཟས་ཞིམ་པོ་ཞིག་མ་རག་པས་གླང་རྒན་གྱིས་ཚ་ཆུ་འཐུང་པ་ནང་བཞིན་སྐྱུར་ཐུག་ཕོར་རྒན་གཉིས་བྲོད་ཁོག་ནང་དུ་བླུགས་ནས་ཉལ་སར་སོང་ནས་གཉིད་དུ་ཡུར།