ཡེ་ཤུའི་འཚོགས་ཁང་ཞིག་ནང་དུ་བདེན་བཞིའི་ཆོས་ཁྲིད་བྱས་པའི་ཉིན་མོ།

མགོན་པོ་ནས་བཟོས་པའི་ཆོས་བཤད་ཀྱི་སྦྱར་བྱང་།

ཉིན་མོ་འདི་ནི་ཟླ་ཤས་གོང་ནས་གཏན་འབེབས་བྱས་པའི་ཡེ་ཤུའི་འཚོགས་ཁང་ཞིག་ནང་དུ་ཆོས་བཤད་བྱེད་རྒྱུ་དེ་ཡིན། ཆུ་ཚོད་དྲུག་པའི་སྐབས་སུ་འཚོགས་ཁང་ནང་དུ་སོང་བས་ངོས་ཀྱི་ཆོས་ཚོགས་ཀྱི་རྒྱུན་ལས་འགའ་ནས་གཤམས་བཀོད་སོགས་གྲ་བསྒྲིགས་ཀྱི་བྱ་བ་ལ་བྲེལ་ཟིང་ལངས་འདུག དེ་རིང་ཆོས་ཞུ་བ་མི་གྲངས་ལྔ་བཅུ་ལྷག་ཙམ་ཞིག་འདུག་ཟེར། དེ་རིང་གི་བཤད་བྱའི་ཆོས་ནི་བདེན་བཞི་ལས་སྡུག་བསྔལ་བདེན་པ་ལ་གདོང་ལེན་བྱེད་ཕྱོགས་སྐོར་ཡིན། ལོ་ལྔ་ཡི་ཡར་སྔོན་ཞིག་མ་ལེ་ཤ་ནས་ངོས་ཀྱི་ཆོས་གྲོགས་མཁན་པོ་ཞིག་ནས་བསམ་པ་བཟང་པོའི་སྒོ་ནས་ང་ལ་བསླབ་བྱ་འདི་འདྲ་ཞིག་གནང་མྱོང་། 
 མཁན་པོ་ཁྱེད་རང་ཕྱི་རྒྱལ་བ་རྣམས་ལ་ཆོས་བཤད་བྱེད་སྐབས་ལས་འབྲས་དང་འཁོར་བའི་སྡུག་བསྔལ་སོགས་མང་པོ་བཤད་ན་ཆོས་ཞུ་མཁན་རག་གི་མ་རེད། དེ་ལས་ཁྱེད་རང་ནས་ཛམྦྷ་ལྷའི་འཚོགས་པ་དང་སྦྱིན་བསྲེགས་སོགས་བྱས་ན་དགའ་གི་རེད། 
ཅེས་གསུངས་མྱོང་། གཅིག་བྱས་ན་ཁོ་རང་ནས་ང་ལ་ཤ་ཚའི་སྙིང་གཏམ་ཞིག་ལུས་ཡིན་ཀྱང་གཅིག་བྱས་ན་རང་ཉིད་མཁན་པོ་ཞིག་གི་མིང་ཐོག་ནས་སློབ་མའི་ཆོས་ཕྱོགས་ཀྱི་འགན་ཚད་ལྡན་མ་ཁུར་བའི་སྐད་ཆ་ཞིག་ཀྱང་ཤུགས་ལ་གོ་བྱུང་། ངས་ནི་ནམ་རྒྱུན་མི་རིགས་སུ་འདྲ་ཞིག་ཡིན་རུང་བཤད་རྒྱུའི་ཆོས་ནི་ལས་འབྲས་དང་འཁོར་བའི་སྡུག་བསྔལ་སོགས་ཡང་ཡང་གླེང་གཏམ་བྱེད་ཀྱི་ཡོད་པས་མི་རྣམས་ཇེ་མང་ལས་ཉུང་དུ་འགྲོ་མ་སོང་། དེ་རིང་ཡང་བདེན་བཞིའི་ཆོས་བཤད་སྐབས་སུ་སྡུག་ཀུན་གཉིས་ཀྱི་ཉེས་དམིགས་ལ་དུས་ཚོད་མང་དུ་གཏངས་ནས་བཤད་པས་མི་མང་ནས་དགའ་བོ་བྱས་བྱུང་། 
དེ་རིང་གི་ཆོས་བཤད་གྲུབ་མཚམས་ཡེ་ཤུའི་འཚོགས་ཁང་བདག་པོ་མི་རྒན་དེར་ཁ་གཏགས་ཞིག་དང་༧གོང་ས་སྐྱབས་མགོན་ཆེན་པོའི་སྐུ་པར་ཞིག་བཅས་ཕུལ། ནང་དུ་འབྱོར་ནས་དགོང་ཟས་མདོར་བསྡུས་ཞིག་ཟོས་ནས་འཛམ་གླིང་གི་སྒེའུ་ཁུང་ནས་རྒྱངས་ལྟ་ཞིག་བྱས་པས་རྒྱལ་གཅེས་དཔའ་བོ་ཞི་བའི་གོམས་བགྲོད་པ་གླིང་ཚ་ཚེ་བརྟན་རྡོ་རྗེ་ནས་ཡང་སྐྱར་ཐེངས་གཉིས་པའི་ཞི་བའི་གོམས་བགྲོད་བྱེད་རྒྱུའི་གསར་འགོད་སྒྲག་གཏམ་བྱས་ནས་ང་འདྲ་བའི་ཇུས་གཏོགས་ཅན་རྣམས་ཀྱིས་སྐད་ཆ་འདྲ་མིན་གྱིས་འུར་ཟིང་ལངས་བཞིན་པའི་སྐབས་རེད་འདུག མི་མང་པོ་ཞིག་ནས་སྔ་ལོར་ཁོང་གིས་རྒྱ་ནག་གི་དར་ཆ་ཁྱེར་བ་དེར་ངོ་རྒོལ་བྱེད་མཁན་མི་ཉུང་བ་ཞིག་ཡོད་པ་མ་ཟད་གཞོན་ལྷན་གཙོས་ཆབ་སྲིད་སྒེར་གྱི་ཁེ་གྲགས་ལ་བེད་སྤྱོད་བྱེད་མཁན་བསམ་མེད་ཁ་ཤས་ནས་ཁོང་མི་བུ་གཉོམ་ཆུང་ཞིག་གིས་རང་སྲོག་དང་གཅེས་པའི་ཆུང་མ་ཡན་བོད་ཀྱི་རྩ་དོན་ལ་བློས་གཏངས་བྱས་ནས་རླབས་ཆེན་གྱི་ཕྱག་ལས་དེར་རྒྱབ་སྐྱོར་བྱེད་རྒྱུའི་ཚབ་ལ། ཤིག་ཐོག་ཏུ་སྟ་རེ་འཕྱར། ཞེས་པའི་དཔེ་ལྟར་དུ་རྐྱེན་ཆུང་ཆུང་ཆེན་པོར་གཏང་ནས་གསར་འགོད་གསལ་སྒྲག་སོགས་བྱས་ནས་ཁོང་གི་རླབས་ཆེན་གྱི་བྱས་རྗེས་དེ་ནག་བསུག་གཏང་ཡོད། ཡིན་ནའང་མི་ང་ཡི་བསམ་འཆར་ནི་ཁོ་རང་མི་སྒེར་པ་ཞིག་གིས་བོད་སྤྱི་བའི་རྩ་དོན་དུ་ཁྱིམ་གཞིས་གཉིས་བློས་གཏང་བ་མ་ཟད་གཅེས་པའི་རང་སྲོག་ཀྱང་བློས་གཏང་ནས་བོད་གཞུང་དང་ཚོགས་པ་སོགས་གང་གིས་ཀྱང་རྒྱུད་བསྐུལ་མེད་པར་རང་ཐག་རང་བཅད་ཀྱིས་རྡ་ས་ནས་བོད་བར་ཞི་བའི་གོམས་བགྲོད་ཆེན་མོའི་ལས་འགུལ་འདི་ལ་དགག་བྱ་མེད་ཅེས་པའི་རྩོམ་ཐུང་ཞིག་ཀྱང་ཁ་བརྡའི་དྲ་ཚིག་ཏུ་བསྐྱལ་ནས་ཉལ་སར་སོང་ནས་གཉིད་དུ་ཡུར།


དར་དམར་མགོ་བོར་ཁུར་ཀྱང་ཁྱད་པར་མེད།།
དར་ནག་རྐུབ་ལ་གླན་ཀྱང་དེ་བས་མེད།།
ཁྱེད་ཀྱི་ཡོད་ཚད་བློས་གཏང་སེམས་ཤུགས་དེར།།
མི་བུ་ང་ཡིས་མཐའ་གཅིག་རྒྱབ་རྩ་ཡོད།།
དབུ་མ་ཉལ་ནས་བརྩད་ཀྱང་ཁྱད་པར་མེད།
རང་བཙན་ལངས་ནས་བརྩད་ཀྱང་དེ་བས་མེད།།
ཁྱེད་ཀྱི་ལངས་ཕྱོགས་འཐབ་རྩོད་གསར་པ་འདིར།།
མི་བུ་ང་ཡིས་སྙིང་ནས་ཡི་རངས་ཡོད།།
གཞིས་ལུས་བོད་མི་ཡིན་ཀྱང་ཁྱད་པར་མེད།།
བཙན་འབྱོལ་སྐྱབས་བཅོལ་ཡིན་ཀྱང་དེ་བས་མེད།།
ཁྱེད་ཀྱི་ཁ་ཡོད་ལག་ཡོད་བློས་གཏངས་འདིར།།
མི་བུ་ང་ཡིས་མཐའ་གཅིག་རྒྱབ་རྩ་ཡོད།།