 |
དེ་རིང་ཞོགས་པ་ཆུ་ཚོད་བཅུ་པའི་སྐབས་སུ་མི་མང་ལྷན་ངོས་ཀྱི་ཆོས་ཚོགས་རྙིང་པའི་ནང་གི་ཅ་དངོས་ཡོངས་རྫོགས་ཆོས་ཚོགས་གསར་པར་གནས་སྤོ་བྱས། ང་ནི་ཆུང་ནས་ད་བར་བློ་ཕུག་ཆོས་ལ་གཏད་ནས་པདྨ་དབང་གི་ལྷ་སངས་རྒྱས་འོད་དཔག་མེད་ལ་འདི་ཕྱི་གཉིས་ཀྱི་སྐྱབས་གནས་སུ་བཅོལ་ནས་བརྒྱུད་འདེབས་ནས་གསུངས་པ་ལྟར།
གསོལ་བ་འདེབས་སོ་བྱིན་རླབས་དངོས་གྲུབ་སྩོལ།།
གདོད་མའི་སངས་རྒྱས་འགྲུབ་པར་བྱིན་གྱིས་རློབས།།
ཞེས་པའི་དོན་ལ་སྦར་འཇུ་བྱས་ནས་ངེས་ལེགས་གཏན་བདེའི་ཐར་པའི་གོ་འཕང་ལ་རེ་བ་ཆེན་པོ་བྱས་པ་ལས། ཚེ་འདིར་བཙན་ཕྱུག་དར་གསུམ་སོགས་ལ་རེ་བ་ཆེར་མ་བྱས་ཀྱང་། སྟོན་ཐོག་ལེགས་ན་འཇག་སྐྱ་ཞོར་དུ་འབྱུང་བའི་དཔེ་ལྟར། ད་རེས་སྦྱིན་བདག་སྐུ་དྲིན་ཅན་ནས་ཨ་སྒོར་འབུམ་དྲུག་ལྷག་གིས་ཁང་པ་ཞིག་ཉོས་ནས་སྤྲད་བྱུང་། དེ་ནི་མི་ཚེ་ས་མཐར་འཁྱར་བའི་སྤྲང་བན་ང་ལ་ལྟོས་ན། རྨི་ལམ་ནང་བཞིན་བསམ་ཡུལ་ལས་འདས་པའི་ལེགས་ཕྱོགས་ཀྱི་འགྱུར་བ་ཆེ་ཤོས་ཞིག་ཡིན། ཁ་སང་ཉེ་ཆར་ཨ་སྒོར་ཁྲི་གསུམ་མ་ཟིན་ཙམ་གྱིས་ཁང་པའི་ཕྱི་ནང་གི་བཟོ་བཅོས་དང་། རྙིང་རྗེ། གསར་བསྒྲིགས། ཚོན་རྩི་སོགས་ངོས་ཀྱི་དགེ་ཕྲུག་རྣམས་ཀྱིས་དགའ་བཞིན་དུ་དང་བླང་གིས་ཉིན་ལྟར་ལས་ཀ་ལ་ཧུར་བརྩོན་བྱས་པས་དུས་ཐུང་ངུའི་ནང་མི་ཚང་མ་ཡིད་སྨོན་རང་དབང་མེད་པར་ཤོར་བའི་འཇམ་དབྱངས་ཆོས་འཁོར་གླིང་གཏན་ཇག་གི་ཆོས་ཚོགས་སྤུས་ལེགས་ཤིག་ཏུ་གྱུར། ད་ནས་བཟུང་སྟེ་གཟའ་ཟླ་བའི་བདེ་ཆེན་ཞིང་སྒྲུབ་དང་ཆོས་ཕྱོགས་ཀྱི་བྱེད་སྒོ་ཁག་ཚང་མ་ཆོས་ཚོགས་གསར་པའི་ནང་དུ་བྱེད་རྒྱུའི་གཏན་ཁེལ་ཟིན། ས་གནས་འདིར་ནང་པའི་ཆོས་ཚོགས་ཉུང་བ་མ་ཟད་བོད་ཀྱི་ཆོས་ཚོགས་ནི་ང་གཅིག་པུ་ཡིན་པས་ངས་ཀྱང་ད་ནས་བཟུང་སྟེ་གཞན་ཕན་བྱང་ཆུབ་སེམས་ཀྱི་སྤྱོད་པས་རང་དོན་བློས་བཏང་ཞིང་གཞན་དོན་གཙོ་ཆེར་འཛིན་ནས་ས་གནས་འདིའི་མི་མང་དང་མ་ཟད་འགྲོ་བ་སེམས་ཅན་ཡོངས་ཀྱི་ལུས་ངག་ཡིད་གསུམ་ལ་དམ་ཆོས་ཀྱི་འོད་སྣང་འཕྲོ་ཞིང་བདེ་སྐྱིད་ཀྱི་དྲོད་ཁྱིམ་ལྡན་པའི་དམ་བཅའ་དང་སྨོན་ལམ་སོགས་ཀྱང་བྱས།
ཆོས་ཚོགས་འདི་ཡི་ནང་དུ། ། ཆོས་མིན་ལས་ལ་མི་སྤྱོད། །
ཆོས་གྲོགས་ཕོ་མོ་ཡོངས་ཀྱི། ། ཆོས་སྒྲུབ་ལྟེ་གནས་ཡིན་ནོ། །
ཆོས་ཚོགས་འདི་དང་འབྲེལ་བའི། ། ཆོས་ཀྱི་དམ་ཚིག་ལྡན་པའི། །
ཆོས་མཛད་སྐྱེ་བོ་ཕོ་མོ། ། ཆོས་ཀྱི་ལམ་སྟེགས་རྙེད་ཤོག། །
ཆོས་ཚོགས་ཀུན་གསལ་དབྱིངས་སུ། ། ཆོས་ཀྱི་ཉི་མ་ཤར་ནས། །
ཆོས་མིན་རྨོངས་མུན་བསལ་ནས། ། ཆོས་ཀྱི་གོ་འཕང་འཐོབ་ཤོག། །
No comments:
Post a Comment