 |
| གྲོགས་པོའི་ཁྱི་ལ་བསྔོ་སྨོན་བྱས་པའི་སྐབས་སུ། |
ཞོགས་པ་ལང་ནས་ཁ་འདོན་རྣམས་ཚར་བར་བྱས་ཤིང་ཞོགས་ཟས་མདོར་བསྡུས་ལ་རོལ། དེ་རིང་གི་ཉིན་མོ་འདིར་ཁ་སང་ནས་དུས་ཆད་བྱས་པ་ནང་བཞིན་དགེ་ཕྲུག་རྗེའུ་ཧྥུའི་ཁྱི་རྒན་ལོང་བ་དེ་ཤི་སོང་བས་ངོས་ལ་འཕོ་བ་དང་བསྔོ་སྨོན་སོགས་འདོན་དགོས་ཞེས་པའི་སྐུལ་མ་ལྟར་དུ་ཆུ་ཚོད་བཅུ་པའི་སྐབས་སུ་ངོས་ཀྱི་རླངས་འཁོར་ཁ་ལོ་བ་སུ་སིན་འབྱོར་སོང་བས་ངེད་གཉིས་རྗེའུ་ཧྥུའི་ནང་དུ་སོང་བས། རྗེའུ་དང་ཁོ་རང་གི་གྲོགས་མོ་མེའི་རེའུ་གཉིས་ནི་ཁྱི་རོའི་ཟུར་ནས་འོད་དཔག་མེད་ཀྱི་བསྙེན་པ་འདོན་བཞིན་བསྡད་འདུག ངོས་ནས་མི་ལ་བྱས་པ་ནང་བཞིན་འཕོ་ལུང་རྒྱས་པ་ཚར་གཅིག་དང་། ང་ཚོ་མཉམ་དུ་འོད་ཆོག་ཚར་གཅིག་བཏོན་ནས་དབྱིན་ཇིའི་ཆག་རོ་དེ་སྐྱོན་ནས་ཁོ་རང་ཚོ་ལ་སེམས་གསོ་འདྲ་བྱས། ཉིན་གུང་ཟ་མ་རུ་སུ་སིན་དང་རྗེའུ་ཧྥུ་ངེད་གསུམ་ཝེར་ནམ་ཤ་མེད་ཟ་ཁང་ཞིག་ནང་དུ་སོང་ནས་ཟ་མ་འགྲང་ཚད་ཟོས་ནས་སུ་སིན་ངེད་གཉིས་ནང་དུ་འབྱོར། ཉི་ཡོག་ལ་ཡོད་པའི་ངོས་ཀྱི་གྲོགས་པོ་གཞོན་ནུའི་ཚོགས་གཞོན་མགོན་པོ་ལ་ཁ་པར་ཞིག་བཏང་། ངས་ནི་ནམ་རྒྱུན་ཁོ་རང་ལ་མཚར་གཏམ་དང་སྦྲག་ནས་ག་སུ་ཡིན་ཀྱང་རང་བཙན་ཁ་སྤུ་ཅན་ཞེས་འབོད་ཀྱི་ཡོད། ངས་འདི་ལྟར་བཤད། "ཁྱེད་རང་ཚོ་གཞོན་ནུ་ཚོགས་པས་ལོ་མང་རིང་བོད་རང་བཙན་གྱི་དོན་དུ་དཀའ་ལས་རྒྱབ་པ་དེ་ཁ་སང་ཉེ་ཆར་བེད་མེད་དུ་གྱུར་སོང་། གང་ཡིན་ཟེར་ན་༧གོང་ས་སྐྱབས་མགོན་ཆེན་པོ་མཆོག་ནས་ཉེ་བའི་ཆར་ལ་དྭགས་དང་། ཨེ་ཊ་ལིའི་སོགས་ནས་བཀའ་སློབ་གནང་བ་དེར་ལྟོས་དང་།"
ཞེས་བཤད་པས་ཁོང་ནས་ད་དུང་གླེན་པས་ཕ་རོ་མཛུབ་ཚུགས་ཀྱི་དཔེ་ལྟར་རང་སྐྱོན་ངོས་ལེན་བྱེད་རྒྱུ་ཕར་ཞོག་ད་དུང་༧གོང་ས་མཆོག་ནས་ཁ་སང་གི་གསུངས་དེའི་མི་མང་ལ་བརྡབ་གསིག་གཏང་བ་རེད་ཞེས་བཤད་བྱུང་བས་ངེད་གཉིས་གནས་སྐབས་བཤད་ཆ་བཤད་མཚམས་འཇོག་དགོས་བྱུང་།
དགོང་ཟས་སུ་འབྲས་དང་རྡ་ལི་ཞིག་ཟོས་ནས་དེ་རིང་གི་ཉིན་ཐོ་མདོར་བསྡུས་ཞིག་བཏང་ནས་ཉལ་སར་སོང་ནས་གཉིད་དུ་ཡུར།
No comments:
Post a Comment